1 Iragi ly’omuntu erhasâgijira ecâha omu nderho, n’orhayumva omurhima gw’ebyâha byâge gwamulya. 2 Iragi lyâge omuntu orhacîtumuzizi cici, omuntu orharhiba murhima.

3 Obugale burhakwânana nshâhu, n’oku muntu w’amagene, ebirugu binji birigi bya cici? 4 Ohaka n’ishali lyamuyîrha, bandi ahakira, ebyâge byalîbwa n’abandi. 5 Owacîyîrha yêne, ndi akaciza? Owayôboha ciru okuhuma oku byâge. 6 Ntà mwîsi mubî kulusha ocîyîrha yêne, lwo luhembo lw’okumînya kwâge. 7 Okujira aminjà kwâge kunabè nka kuhugwa, buzinda anayêrekane obumînya bwâge. 8 Ali mumînya omuntu w’amasù g’oluhubo, kukengula akengula n’okugayaguza abandi. 9 Omuyâgalwa arhasîma ehi agwêrhe, amagene kuyumya gayumya omurhima. 10 Omujinisi arhalîka bulye, n’amêza gâge cizombo. 11 Mwâna wâni, nk’ogwêrhe onalye, orhûle na Nyamuzinda entûlo ahûnyire. 12 Orhayîbagiraga oku olufù omu njira luli, n’oku omulâli gw’ab’ekuzimu ntâye osâgikubwirago. 13 Ojirire abîra bâwe aminjà oku orhacifa, ohâne nk’oku onahashire. 14 Orhalahiraga iragi lya buno, orhanenaga ehinja omurhima gucifinjire. 15 Kàli obugale bwâwe bandi wâbusigire? N’ebirugu byâwe kàli iragi lyâbigaba? 16 Ohûne, onahâbwe. osîme, arhali ekuzimu yo balongeza obusîme. 17 Ngasi mubiri kwo gukoya nka bwikunjè, okufà liri irhegeko ly’ensiku n’amango. 18 Kul’obona orhwâsi rhw’omurhi gujagalîre, rhurhaliholoka rhurhalishoga, kwo n’amâburhwa g’omubiri n’omukò gali, oku baguma bafà abandi bâburhwa. 19 Ngasi bushanja bukoya kuhwa bunahwa, na nnabwo bombi bagendanwa.

20 Iragi lyâge omuntu okengêra oburhimanya, n’orhimanya n’obukengêre bwâge, 21 agerêreze emurhima enjira z’oburhimanya, anakulikire amahwe gâbwo. 22 Kw’abushimba nka muhivi, oku njira yabwo alingûkiza; 23 anajè ah’idirisha lyabwo, atamale aha lusò lwâbwo; 24 acumbike eburhambi bwâbwo, agwîke omulindizo omu côgo câbwo; 25 ayûbake eburhambi bwâbwo, abwârhale omu kahwenyenye k’omurhûla. 26 Abuyâbuze abâna bâge, naye yêne ayâkire omu mashami gâbwo. 27 Omu cihôho câbwo mwo akaziyâkira idûrhu, na ntyo ajè omu irenge lyâbwo.