1 Mwâna wâni, ka wajizire ecâha? Orhacishubiriraga, ohûne obwonjo oku byâha byâwe byoshi bya mîra. 2 Oyâke ecâha kula onayâka enjoka: okaciyegera, cakuluma, amîno gâco gali nka ga mpangaza, go gazigulula abalume. 3 Ngasi câha ebà ngôrho ya môji abiri, aha yatwâga hanajè akafinjo. 4 Obukali n’entambala, kwo n’enyumpa ya cibone eshâbûka ntyo. 5 Omusengero gw’omukenyi omu marhwiri ga Nyamuzinda guhika, n’okushuza kwâge kurhalegama. 6 Orhasîma bamukalihire, kajira ka banya-byâha akulikira, orhînya Nyamuzinda yêhe murhima agalula. 7 Kishiderha anajè irenge hoshi-hoshi, ci omuntu w’obukengêre arhahabiri obuzamba bw’okwo. 8 Okuyûbaka aha mwâwe n’ebirugu bya bene, kuli kucîhumbira enshinda wanabona nko’olunda amabuye omu mpondo. 9 Endêko y’ababî, nsinga ya muliro, obuzinda bwâyo kukwêbwa ecîko. 10 Enjira y’ababî erhahimwa kukoma, ci ekuzimu*21, 10 Ekuzimu: lolà Mat 7, 13. ehêka.

11 Omuntu oshîbirira irhegeko kushuba ashuba oku magene gâge, obwimâna bw’okurhînya Nyamuzinda bubà burhimanya. 12 Hali oyâbirwa n’okucîyigîriza, kubula irhwe kurhuma, ci haligi n’ôbà agwêrhe eyo nshôkano y’irhwe emurhindibuze. 13 Omurhimanya ebà nyenga ya bumanye, n’obulonza bwâge, iriba lya nshongôle. 14 Omurhima gw’omusirhe, ndaha mbêre, yo erhabîka bici. 15 Omuntu mwenge akayumva akanwa kinjà, anakabîke emurhima, ayûshûlekwo n’akâge; leka omusirhe akayumve, asheke, kwo na kuyîbagira. 16 Ebinwa by’omusirhe bibà nka muzigo guyâbire omubalama, ci ekanwa k’omurhimanya binjà biyirhenga. 17 Akanwa k’omuntu nkana basîma okukâyumva omu ndêko, oku adesire, ngasi muguma anakuhire emurhima. 18 Nyumpa ya mushaka bwo burhimanya bw’ecihwinja, n’obumanye bw’omusirhe, binwa birhagwêrhi nda na mugongo. 19 Emw’omusirhe, enjira ly’akalamo gubà mugozi emagulu, kabangiro emaboko. 20 Omusirhe nk’asheka, analinzi basha, ocîkenzire yêhe kugera agera amasheka gâge. 21 Emw’omuntu nkana, irhegeko gali masholo ga bulimbi, ngolo ekuboko kulyo. 22 Ecinganyi cinacîshokoze okudâha, omuntu mwenge arhangibà nk’alinda; 23 ecinganyi cinakâhengûliza oku lumvi, omuntu ocîkenzire anabè nk’acîyêgûla. 24 Okuyumvîrhiza aha lumvi kubà kwa muntu orhaleragwa, nshonyi kubonêsa omuntu. 25 Akanwa ka bakadegende karhahwa kujumbulusa ebinwa bya bene, enderho z’abarhimanya zôhe zijira olugero. 26 Omurhima gw’ebinganyi ekanwa gubà, ci akanwa k’abarhimanya, murhima gwâbo. 27 Omubî anahehêrere omushombanyi wâge, n’obwo yêne ocîhehêrire. 28 Omuntu ohambâra abâbo, yêne ocîkolera amabî, kushombwa ashombwa n’abalungu bâge.