1 Ci kwône, orhabâga nshonyi z’ebîra bikulikîre*42, 1 Enshonyi zirhakwânîni: hali enshonyi z’obukenge, zo nyinjà; hali n’enshonyi z’obuhwinja n’obwôba, zo mbî, zinayise nnazo., orhajiraga ecâha erhi bwôba bwa bantu burhuma. 2 Orhabêraga irhegeko lya Nyamuzinda n’endagâno yâge nshonyi, orhabâga nshonyi z’okutwîra enkola-maligo olubanja lwâbo, 3 ez’okushambâla n’abinyu muli mweshi, ez’okuhà abîra bâwe oku byâwe sho àkusigiraga. 4 okulola bwinjà omunzâni n’olugero lwâgwo, okubà n’obunguke busungunu erhi bunene bw’olugero, 5 okuyunguka omu burhunzi bwâwe, okukalihira abâna bâwe, okuhanûla n’akarhi omujà mubî. 6 Embere z’omukazi wakulonzako emyanzi, okuhulika kwo kukulu, n’aha abantu bahumahuma, orhayîbagiraga okufûnikira bwinjà. 7 Okuganja n’okugera bwinjà kwo kumanyibîka, ebyâwe n’ebya bene byoshi biyandikwe. 8 Orhabâga nshonyi z’okuhabûla omuhwinja n’omusirhe, n’omushosi w’emvi wajà kadali n’emisole. Kwo wayêrekana ntyo oku walezirwe bwinjà, n’abandi boshi bakusîma.

9 Buzira kumanya, omunyere ntanya nyinji alêrhera îshe, enkengêro amulêrhera zinamuhanze kujà îrò: nka aciri murhò, bwôba mpu nkaba ârhayishiheruke duba; erhi aheruka, bwôba mpu k’abona obunyumpa bwinjà! 10 Oku aciri munyere, bwôba mpu erhi bakamurhebaga, abêre ifunze aha mwâbo! Amango akol’agwêrhe îba, bwôba mpu erhi akagumbaga 11 Mwâli wâwe arhayumva? Omulange bwinjà, omanye akubonêsa nshonyi emw’abashombanyi bâwe, olek’ibà lwimbo oku lugo, muderhwa w’esêzi n’ow’ebijingo, abantu boshi bakakushunga omunwe!

12 Oleke okulolêreza iranga lya ngasi muntu, oleke n’okukâbwârhala haguma n’abakazi. 13 Bulya omwambalo gujira obugukuzimu bwâgwo, n’omukazi naye a­gwêrhe obubî bw’omukazi. 14 Obubî bw’omulume bwo bukulu aha bwinjà bw’omukazi: omukazi analêrhe ihanja†42, 14 Ihanja: Lolà Muh 7, 26-28. n’ecitumulè.

15 Buno, nkolaga naganira ogw’emikolo ya Nyamuzinda, nkola naganira ebi nabwîne. Luderho lwâge‡42, 15 Luderho lwâge: lolà Murh 1, 3; Ywn 1, 1. Nyamuzinda àjiragamwo emikolo yâge, n’ebiremwa byâge oku alonzize kwo bijira. 16 Izûba kumoleka limoleka, libone ngasi kantu, n’omukolo gwa Nyamuzinda guyunjwîre irenge lyâge. 17 Nyamuzinda àrhahâga abatagatîfu obuhashe bw’okuganîra ebinja byâge byoshi, ebi Nyamuzinda, nnawâbo-byoshi, asimbanyize mpu ly’igulu libêra omu irenge lyâge. 18 Alikîre isù omu cirumbi c’enyanga n’omu murhima gw’omuntu, abona amenge gâbo, bulyâl’Ow’Enyanya ye nn’obumanye bwoshi, alolerîze ebimanyîso by’amango. 19 Anayêrekane ebyàgezire n’ebyâyisha; amanyîse n’ebifulike. 20 Ntà nkengêro ahabire, ntà kanwa kamuhuzire§42, 20 Ntà kamuhuzire: Nyamuzinda ntâco ahabire, ayîshi byoshi.. 21 Ebinja byâge byoshi àbirhondesire n’oburhimanya, bulya ali w’ensiku n’amango, ntâco ankayûshûlirwa, na ntâco bankamunyaga, arhalagîrîri oku ihano lya ndi. 22 Emikolo yâge yoshi erhahimwa bwinjà, kw’eri kula omuntu akalolêreza enkunyakunye. 23 Ebyo byoshi ho bibà binali by’ensiku n’amango, na ngasi mango biyumva oku adesire. 24 Ebiremwa byoshi bigenda bibirhi-bibirhi biyêrekerîne, ntâco ajizire cirhayûmânîni. 25 Ngasi ciremwa ciyêrekîne obwinjà bw’ecindi, ndi wankarhama n’okusingiriza irenge lyâge?