1 Nieshi nalibuka bwenêne la, n’omu kulibuka ntyo, nakahûna Nnâmahanga nanavugumula emirenge, nti: 2 Nêci, oli mushinganyanya, Yâgirwa Nyakasane, n’ebijiro byâwe bibà bishingânîne, amâjira gâwe gali ga bonjo na g’okuli. Wêne we otwîra igulu olubanja. 3 Na buno, Yâgirwa, onyibukage nâni, lolà omanye wakampana erhi byâha byâni birhuma, nîsi erhi buhwinja bwâni, kandi erhi n’ebyâha by’ababusi bâni ngasi aha banakugayikize hoshi. 4 Nabuzire bushimba amarhegeko gâwe, nâwe waleka barhuhagula, rhwajà bujà, rhwahinduka masheka na kagayo emwa ngasi mashanja banarhuhekaga bujà.

5 Nêci, mwa gano mango, obucîranuzi bwâwe bwa ngasi lubero buli bw’okunali omu kumpana erhi mabî gâni garhuma, bulya rhurhashimbaga amarhegeko gâwe, rhurhanakulikiraga olugendo lw’okunali emunda oli. 6 Buno, Yâgirwa, onjirirage nk’oku onabwîne osîmire, onarhegeke ntengemwo omûka, ncîshubirire katulo. Ci kuli kwinjà ncîfîre erhi kwo; ahâli h’ebîra bijâci by’obunywesi ndwîrhe nayumva, n’omungo munene gungwêrhe. Nyakasane, ojire mâshi nâni ntenge muli ezi mbaka, oleke nâni njè ahantu h’ensiku n’amango, orhanayasagya obusù bwâwe, Yâgirwa. Na kandi kuli nie kuli kukulu okufà ahâli h’okubona amalumwa ga bene aga omu buzîne bwâni n’okukaz’iyumva ebijâci bya bene ebi.

7 Muli ago mango naye Sara mwâli wa Ragweli w’omu Mediya anaciyumva ebijâci byarhenga kuli muguma omu bajà-kazi b’îshe. 8 Okwo bulya ali amâyankwa na balume nda banayîrhwa n’omuzimu mubî Asimodeya*3, 8 Asimodeya: liri izîno lya muzimu muguma. Sara ali nk’owazimuhirwe n’oyo muzimu mpu arhag’iheruka. Omu mango ga mîra bwenêne, erhi omuntu akafire erhi akalwâla, kanjikanji bakâg’imanya mpu bashetani erhi bazimu bamulwâzize erhi bamunizire (Rhulole muli Mat 9, 32; 12, 22; Luk 11, 14; 13, 11.16)., embere bajè haguma nk’oku binayandikirwe abakazi. Oyo mujà-kazi anacimubwîra, erhi: «Wênene okaz’iyîrha babalo: kali wamâjà kuli balume nda na ntâye ciru n’omuguma osag’ibà izîmi lyâge. 9 Carhuma wakarhulibuza, warhushûrha mpu kwenge babalo bafîre! Okajà aha bajire n’irhondo rhurhabonaga kuli we oli akarhabana, oli akanyere, ciru n’eriguma». 10 Olwo lusiku ababala bwenêne, arhenga omulenge n’erhi abà amasôkera enyanya omu mw’îshe, alonza okucîmanika. Erhi ashibirhanya aderha, erhi: «Nanga, lyo balek’ikayîsh’ijâcira larha n’okumubwîra mpu: walibusire mwânanyere muguma wanamurhonya, ci acîmanisirage omu buhanya bwâge. N’aho nanarhuma abungulukira ekuzimu erhi mungo gurhuma muli bulà bushosi bwâge. Okukulu kuli nie, arhali kucîmanika, ci kukahûna Nnâmahanga anyîrhe erhi kwo ahâli h’okukâyumva malumwa gabene aga omu kalamo kâni».

11 Ago mango alambulira amaboko embuga omu kabonezo, anacishenga, erhi: Oganze Yâgirwa Nyamuzinda w’olukogo n’izîno lyâwe lije irenge emyâka n’emyâka! 12 Buno, Yâgirwa, nyinamulîre amalanga n’obusù bwâni emunda oli. 13 Ojire akanwa kâwe katenze muli eri igulu ndek’icikayumva ebi bijâci. 14 Omanyire wêne Yâgirwa oku ncibà mwimâna, ntasâg’ihemuka n’obûko mulume. 15 Omanyire n’oku ntasâg’izinza izîno lyâni nîsi erhi izîno lya larha eno munda rhwadwîrhe bujà. Ndi mwanacûsha, na larha arhagwêrhi ciru ehindi hyâna hyankayîma omu byâge; arhagwêrhi oyu balondana naye, erhi wundi w’omu mulala gwa hôfi, nîsi erhi wundi kône w’omu mulala, olya nakaderha nti nacîlanga nyîsh’ibà mukâge. Namâhaza balume nda, bici byankacirhuma nalama? N’akabà orhalonzizi okunyîrha, Yâgirwa, oyumvîrhize ogu mulenge gwâni: ntacilonzizi nkazijâcirwa!

16 Ago mango eyo misengero ibirhi yanaciyumvîkana embere z’irenge lya Nyamuzinda. 17 Rafaheli anacirhumwa okugend’ifumya abo bantu bombi: Tobiti mpu obuhûrha bumurhenge omu Mûsa, ashub’ibona n’amasù gâge obulangashane bwa Nyamuzinda, naye Sara mwâli wa Ragweli mpu aj’ibà mukà Tobiya mwene Tobiti, anamurhenzekwo olya muzimu mubî Asimodeya, bulya Tobiya ye wali okwânîne okuyîma muli oyo mukazi, kulusha abandi boshi barhang’igilonza okumuyanka. Ago mango Tobiti agogonyoka halya muhanda gwâge, ajà omu nyumpa, Sara naye, mwâli wa Ragweli, anacibunguluka arhenga muli erya nyumpa y’enyanya.