TEŊ HƲ BA AA SABA TƖYA
HIIBURU TƖMMA
1
Wɩɩsɩ tɩŋa ʋ Biye tɩyaŋ a basɩ wɩya tɩya ma
Faafaa hʋ tɩyaŋ, Wɩɩsɩ gyɩ leŋ ʋ tɩŋdaala tɩŋ ŋmaŋgyamaa rɛ a villi basɩ wɩya a tɩya á naabaala. Amɛ gyɩnaŋ sɩgballɩya no kɛ, ʋ Biye tɩyaŋ nɛ ʋ tɩŋa, a basɩ wɩya tɩya ma. Wɩɩsɩ Biye no tɩyaŋ nɛ ʋ tɩŋa a marɩ dʋnɩya kɩŋ kɩŋ buloŋ a bɩl lɩɩ ʋ mɛ a kpa dʋnɩya kɩŋ kɩŋ buloŋ tɩya ʋ. Biye hʋ tɩyaŋ nɛ á kɩ na Wɩɩsɩ gaŋdarɩ aa maga gɛɛ. Ɛɛ Wɩɩsɩ aa kɩya, ɛɛ tɩɩ rɛ biye hʋ mɛ kɩɩ, ka ʋ kaŋ ʋ wɩbii hʋ aa kaŋ dee a kɩ deŋ dʋnɩya kɩna buloŋ. Ʋ aa sasɩ á wɩbɔmɔ ta hal tɩyaŋ, ʋ hɔŋ Bakɔɔ noduu logiŋ tɩyaŋ nɛ wɩɩsɩbee tɩyaŋ.
Wɩɩsɩ Biye hʋ rɛ tee Wɩɩsɩ Malɩkasɩ
Ɛɛ wɩya Wɩɩsɩ Biye hʋ rɛ tee malɩkasɩ buloŋ. Feŋ hʋ mɛ Wɩɩsɩ aa kpaa tɩya ʋ, ʋ rɛ tee feŋ hʋ malɩkasɩ hʋ aa kana.
Beewɩya, Wɩɩsɩ ha bɩ maakyiye basɩ tɩya malɩka buloŋ a baa:
“Ɩ yaa ŋ Biibaal lɛ,
mɩyaŋ nɛ yaa ɩ kuwo gyɩnaŋ.” Ʋ bɩl bɩ basɩ tɩya malɩka kɩdɩgɩ buloŋ mɛ a baa:
“Ŋ sɩ yaa ɩ Kuwo,
dɩ ɩ mɛ yaa ŋ Biye.”
Amɛ saŋa hʋ ʋ aa kyɛ dɩ ʋ ta ʋ Biihɩyawʋ hʋ dɩ ʋ ko tuu dʋnɩya, ʋ basa rɛ a baa,
“Malɩkasɩ buloŋ maga dɩ ba kɩ kyʋwalɩ ʋ rɛ.”
Wɩya hʋ Wɩɩsɩ aa basa a mʋ tile ʋ malɩkasɩ tɩyaŋ nɛ nyɛ: Ʋ baa,
“Ŋ leŋ ŋ malɩkasɩ kɩɩ gɛɛ anɩɩ puwo
a leŋ ŋ tʋŋtʋnna mɛ kɩɩ gɛɛ anɩɩ diŋgel.”
Amɛ wɩɩ hʋ ʋ aa basa a tile ʋ Biye hʋ tɩyaŋ nɛ nyɛ: Ʋ baa,
“Wɩɩsɩ, ɩ koro sɩ we doŋ a kaŋ kɩ mʋ deŋdeŋ.
Tɩpʋlʋŋ nɛ sɩ yaa ɩ kuworidaatɩgɩɩ dɩ ɩ kaŋ kɩ deŋ ɩ nala.”
“Ɩ kyo wɩweliye rɛ aŋ haasɩ wɩbɔmɔ.
Ɛɛ rɛ tɩŋ mɩyaŋ ɩ Wɩɩsɩ kpa ɩ yohuŋ a te ɩ dɔŋtɩŋsɩ buloŋ, a leŋ ɩ teŋ fɩyɛlɩ.
10 Ʋ bɩl baa,
“Ɩ á Tɩɩna, ɩ rɛ taa taŋha buŋbuŋ hʋ tɩyaŋ,
a ta wɩɩsɩnyuu mɛ.
11 Wɩɩsɩnyuu abee taŋha buloŋ sɩ nyʋgɩsɩ, amɛ ɩ kɛ ha sɩ we doŋ.
Ba buloŋ sɩ bɩrɩmɩ kɩbɩnɩya, a kɔsɩ anɩɩ gannɩ aa kɔsɩ gɛɛ.
12 Ɩ sɩ kaŋ ba kpeme anɩɩ gal.
Ba sɩ bɩrɩmɩ kɩbɩnɩya anɩɩ gannɩ.
Amɛ ɩ kɛ bee bɩrɩmɩ. Ɩ mɩɩbol mɛ bɩ sɩ maakyiye teŋ.”
13 Wɩya hʋ Wɩɩsɩ bɩl aa basa tɩya ʋ rɛ nyɛ: Ʋ baa,
“Ko hɔŋ ŋ noduu logiŋ,
ka dɩ ŋ yuwo di ɩ dɔmɔ buloŋ teŋ.”
Malɩka bee rɛ Wɩɩsɩ ha maakyiye basɩ wɩɩ no tɩya?
14 Bekine rɛ yaŋ yaa malɩkasɩ? Ba yaa dʋŋsɩ rɛ, a tʋma kɩ tɩya Wɩɩsɩ. Wɩɩsɩ aa tɩŋ ba rɛ ba mʋ kɩ pɛ nala hʋ ʋ aa sɩ laa ta tɩyaŋ.