Jekamba nindisik Pol yanga Tesalonaikak lindanjik or kayeri
1
An Pol, Sailas fre Timoti nga ni lihi, jekamba kason jir sios yanga Tesalonaikak lindanjik amu kayenduwa. Jir Avui Wasilaka nga Wasilaka nihi Jisas Krais nga tiyanda ma jira. Jirnjik Avui Wasilaka nihin a sawenak or nga Wasilaka Jisas Krais nga waprupshi frihi nga waphimbiji frihi nga fri halashinak jihik si naka. Ro 1:7
Tesalonaikak fehenda ma ondo nomorawu si talari wolo kwambuk sindari lir
Jisasin hishindiyanda ma jirin, Avui Wasilakan ji hishiowenda nombo nga, jihi ambek ji anarupshinda nombo nga, osmu wasilakak nanduwa. Oson ni misihi ermba ermbak jirin ni hishihi, Avui Wasilakan armesarmek ni mbanda nir. Os sios anandik ni iwa wolo erem ji unda oson ni sawehe hi jihin ni hauowenda nir. Nir mbele mbele ma kava jirin li unda nga, nomorawu os orok ji kishanda nga, ni sawehe karem ni mbanda nir, �Tesalonaikak fehenda ma ondo kwambuk li sihi, nomorawu lihik si talawan kishanda lir,� karem ni mbanda nir. 2 Ko 7:4; 1 Te 2:19
Avui Wasilakan yawur ji tiyanda osik nomorawu jihik talawak ji kishanda oso osmu mukunduwa, Avui Wasilaka mbele mbele ni undan armek or oweioweiheyehe kormbak or mbakwan. Jir orin ji hishiowenda osik or mbanak hevenik ikwa jir. Hako ma ol orin kumasinda ondo or mbanak hik ikwa lir. 6-7 Os Wasilaka Jisas hevenin or halaha kormbak hi ukruharanda nindik or tawa wolo, ensel orhi kwambu ngashi ondo nga takwa ri. Oso wolo Avui Wasilaka or ushinak nomorawu os ji kishanda oso mendek si nanak jir nga nir nga jipjip ni likwa nir. Uhu ma ol jirin kavakavak unda ma ondon wasan or hanak, nomorawu kava indingan ermba ermbak er kishakwa lir. Os erem or ukwa oso mainomendingak or mbaha or ukwa sir. Ro 12:19; 1 Te 3:13 Os erem si nakwa wolo ma ol Avui Wasilakan tiyakwak hishinda ambu ondo nga Wasilaka Jisas Krais mashi orhin misikwan turanda ondo nga nor unak kavak nakwa lir. Uhunda ma ondo avak wasa lihin erem lakwa lir. Ais 66:15 Ma ol erem nanda ma ondo avak Avui Wasilaka or mbashinak, orin li halaha, kwambu orhi os ukruharanda ngashi nga li halaha, home mendek li i lihi, nomorawu wasilaka oson ermba ermbak er kishakwa lir. Ais 2:10 10 Wasilaka nihi Jisas avak or tanak ma ol orin hishiowehe orhi mak nahanda ondo amber hi orhin metenjek li hauowehe rupkapshikwa lir. Unak jir er nga rupshikwa jir. Mberem ushiwak? Jir Avui Wasilakahi mashi os jihi nindik ni sawerin ji misihi kwambuk toltangriri jir. Kl 3:4
Avui Wasilaka Tesalonaikak linda man or jelyakmbaha Pol le orin li saweri
11 Nir ermba ermbak Avui Wasilaka jirin or jelyakmbaha nimu sawenduwa. Ushinak mbele mbele jivi os ji ukmbaha or mbahanda nom ji uka. Erem ji uhu avak misokome orhik jivik ji naka. Avui Wasilaka kwambu orhin jirin or hakmbaha nimu sawenduwa. Ushinak nombo os orin ji hishiowenda jihi oso si unak jivijivi os ji ukwak ji hishinda nom ji uka. Kl 1:9; 1 Te 1:2-3 12 Jisas Krais Wasilaka nihi God indinga oto waprupshi orhi jihik si nashihindak, Avui Wasilakan nimu sawenduwa. Unak hulaima nokopma jirin li heyehe Wasilaka nihi Jisashi hin li hauowenak, or nga hi jihin or hauowekmbahan.

1:2: Ro 1:7

1:4: 2 Ko 7:4; 1 Te 2:19

1:6-7: Ro 12:19; 1 Te 3:13

1:8: Ais 66:15

1:9: Ais 2:10

1:10: Kl 3:4

1:11: Kl 1:9; 1 Te 1:2-3