Yesusu tianuwopi nikau saina
Akereki kuna
Mua nakau Yesusu tianuwopi nikau sainae Lukue xayawoyai asinaku kuna purotai xosa xuwauworetai. Luku kirenie mua nakau rania xayawotai.
Xoiteupo Supo Youyae Yesusupo tianuwopi ime atarinikati Yesusupo asinaku kuna “Yerusalemu uteirineri Samaria uteineri Yutia uteineri pani xokupa ou yau uteipa xowoteneai paiya mua nakau xosa xekeunuku” (1.8 xekoa).
Yesusu taiwopi saina Yuta xopu sarina xurise utu kokaipa xina xetau ou yau xou xanauwotaire Yesusu tianuwoteneai nakaue asiworotai. Kristusupo saina xeika nuko taiwoteneai xuiapu nikau ekinikioma xeika paie, ekime Xoiteue Israilipo xuimiapimi xosa sokisoki kuna kunawoyai taina xiri ou papaiwotaire rania Lukue atarisikepure xina. Kire kokaipa sapire nakau Yesusu tianuwopie kunawotai paiya, Xoiteupo Supo Youyapu saina, paiya Xoiteupo Youya. 50-teu asau xuwe xati Xoiteue Israili weinikitati ati puroneai asaure nanuneri kokaipa xoye neteneai xosa Yesusupo tataiwopi teu xosa ximuximu Xoiteupo Supo Youyae kotai.
Xurise Xoiteupo Supo Youyae inipo nanunanu taitainikina sokisoki tiniketai. Mua nakau xosa xekeukiriai rania Yesusupo tianuwopi teue Yesusupo asinaku kuna xetau xuimiapimi kanikiepure xineria, xokupa kuna paiya xuwau uteiwoneai.
Kakeri xokupa xuiapue pa asinaku kuna taiwori Yesusu taiwoteneaie sokisoki woteneai xekeukiriai. Nakau Yesusu tianuwopie xokupa Yesusu tianuwopire asiworotai, pana Poluno Pitanoe kakexeteneai kapiaure paiya xiri xokupa kuna tuku. Pita nu Yesusu taiwoteneai xuiapu oroinikepi saina sokisoki teyai. Kakati Yesusue Polu yauworina nupo saina tepinaure nu xiri akereki apuni kutu tumuworetai.
Kireu kuna masa nakau xosa paiya, Polu xosa kapia akipa xetaire Lukue asiworopure xina paiya “sinie” kakikiniai xetai.
Paire xokupa sipa apue nanuneri kireu yause Luku nukoini Polu xeika texeyai xati, pa kuna masa yauwa kunauna “sinie” xetai xeteneai.
Yesusupo Tianuwopie Yesusupo Kuna Yerusalemu Tiniketeneai
1
YT 1.1—8.3
Yesusue Sokisoki Kuna Kunauna Xoiteupo Supo Youya Xesautia Kopina Xetai
1 Tiopilusu, ye ekime xayautiai nakau xosauwa, ximuximuni kutu Yesusue xokupa saina tina xokupa xuiapu taitainikipa, 2 kouna kounawati Xoiteue mena xouro sou xowotai yauseure xayautiai. Xoiteupo Sokisoki Supo Youyae Yesusu kawati mana Yesusu nukoe tumunikikereyai tianuwopie saina tepinerire kuna kaniketai. Kakatia xurise Xoiteue xouro sou xowotai. 3 Ximuximua tatau xemena xumotaina, xurise xiyeri ekeoma tina tianutianuwopi xosa maiyeniketai. Nu ekeoma purina xineri ati sipawopinerire, xokupa kapia kaketai. Nu 40-teu asau xosa xekori, Xoiteue xuiapu yakunikepina yauseure kaniketai. 4 Nini xeika purotai yauseni, ipaki kanikina, “Tini Yerusalemu kaki xanari wetaku. Xauwae sapi tinikepine xi kunawati paire ekime katikiaina, yakuwa. 5 Yonie xuiapu enero ene iserinikeyai. Pana Xoiteupo Supo Youya xosa ene isakuai yause xekepu xuwe,” niketai.
6 Pa yause xosa tianutianuwopie xirini kununurou, kotouneri, “Kokaipa, mua yause xosa Israili kokemu saina tuwau xiyeri sokisoki tina, sanawa yakuwopina kokemu xepinare, e xuwe?” woteneai. 7 Kakeri nue xiyeri ipaki kanikina, “Xauwae iyaretai yause xeika asau xeika paiya tinipo sapi xati sipawakuaixe. Xuwe. Nukoini pa xokupa sapi yakuna. 8 Pana sewai Xoiteupo Supo Youyae kou tini xosa puratia, tini sokisoki takuai. Kakinaria, taki ekitikieni xekeikiriaire Yerusalemu kuna tinikinari, Yutia sanawayau tinikinari, Samaria Tistiriki tinikinari, ou papaiwotai xokupa sanawa tinika,” niketai.
Yesusue mena xouro xowotai
(Muanumu sieni kuna: Mak 16.19 xeika Luk 24.50-53)
9 Yesusue pa kuna kunauwati, xekeu puroria, xouro xowotai. Kire iyoue ximiakerati pani xekeu puropu xuwe. 10 Nu xourati pani mena xekeu puroria, sapauni aimore apue nini xeika tumuwoteneai. Nini nekei karai tuku. 11 Ipaki kunaunexeri, “Tini Kalili apimi, tini ama aini tumunuku mena xekeunukuna? Yesusua Xoiteue sowati, tini wetiki mena xouro xounana, mua xekoari mena xouro xowotai kapiareini xiyeri kopina,” niketai.
Yutasipo iri tepinaure kire apu tumuworeteneai
12 Yesusupo tianutianuwopie Oripu xeteneai totou wetineri, Yerusalemu xiyeri xowoteneai. Oripu totoua Yerusalemu tomuro kireni kilomita sie xosa purina. 13 Erewese minika xouneri, xouro niko purirouneri ata kamoro maneteneai. Ninipo weniniki teu muai, Pita, Yoni, Yemusu, Entru, Pilipu, Tomas, Patolomiu, Matyu, Alpiusipo nirau Yemusu, Saimon nu Seloti apu kinipo apu, Yutasia, nu Yemusipo nirau. 14 Pa xokupa apu teue kunununeri xonikitumaixi kunikunirouneri. Xui teu, Yesusupo ana Maria xeika, Yesusupo xataumana xeika, ninie rania kouneri nini xeika kunikunirouneri.
15 Pa yause xosa Yesusure xoniki suwoteneai xuiapu nikau xoka 120-teu sie. Pitae nini xopu tumuna ipaki kuna tinikina, 16 “Xataimana, ekime Xoiteupo Supo Youyae kakati Tepitie kire kuna kunawoyai Xoiteupo nakau xosa purina. Apu teu ime atarinikati, Yesusu soki teteneai apu Yutasire kunawoyai. Tepitie kunawoyai sie mua kapia akipa xetai. 17 Ekime Yutasie sini tuku lixina, sini tikiriai sie saina tetai,” niketai.
18 Pa apu Yutasie pa xoxi kapia tetai xosaupo xe tina, kire ou masa isayaxetai. Kakerina xurise pa ouro titikiri xouna ukaukemu porouwati, kamoropu sine muri ouro kusawotai. 19 Paire xokupa apu Yerusalemu puroteneaie sipawoteneai. Ninipo kunairae, pa ou wenumu Akeltama. “Akeltama” wenumu muanumu kuna sie, “Ou Yawi Tuku.”
20 Pitae pani ipaki kunauna, “Mua kuna Nakau Siri xosa xayawoniaiya muanumu, ‘Nu puroyai wese paiya, aini puropinana, kire apu wetau pa xosa puropu watixe.’ Kire kuna masa mua nakau xosa muanumu kuna tuku, ‘Kire apue nupo saina tepina xeyai.’
21 “Pa xati Kokaipa Yesusue siko xeika xokupa yause xowori kori wati, siko xeika texeteneai apu xopuropu kire tumuworepu, 22 ximuximu Yonie xuiapu ene iserinikati, Yesusue saina xotapa sari tipa kouna kouna Xoiteue sowati wesiki xouro xowotai yause xetai. Kire apu nukou ekeini pa xokupa kapia xekotai tumuworikiri sini xeika saina tina Yesusu xiyeri sarotaire kuna uteiwopina,” niketai.
23 Pitae kaki kunawati, aimore apu tumunikereteneai. Kire nu Yosepu, wenuneri Parsapasi xeteneai, nuni Yastusu wenumu tuku, kire apua Matiasi. 24-25 Kakerineri ipaki kunikunineri, “Kokaipa ne xokupa apu nikau xonikikemu sipa. Yutasipo iri tina Yesusupo tiantianuwopi saina tepinaure aimore apu tumunikerinukuna, yurau xonieutiai atarisike. Yutasie mua saina wetina nu puropina wese xosa xowotai,” xeteneai. 26 Kakeri yuerau pa saina tepinaure xe pureworia, Matiasipoe putawotai. Kakati Matiasi Yesusupo tianuwopi 11-teu tuku iyareteneai.