ಫಿಲಿಪ್ಪಿಯವರಿಗೆ ಬರೆದ ಪತ್ರಿಕೆ
ಪಿಲಿಪ್ಪಿವಾಲಾವೊನೆ ಬರ್ದಲ ಪತ್ರ
ವಳಕ
ಪೌಲಾ ಕ್ರಿಸ್ತ ಹುಟ್ಟಲಪರ ಕಮ್ಸಿ ಕಮ್ಮ 61 ವರಕ್ಹಮಾ ಎ ಪತ್ರ ಫಿಲಿಪ್ಪಿ ಗಾಮನಾ ಸಬೆವಾಲಾವೊನೆ ಬರ್ದ್ಯೊ ಎ ಟೈಮ್ಮಾ ತೆ ಜೆಲ್ಮಾ ರ‍್ಹಯಲ (1 ಅದ್ಯಾಯಾ 13 ವಚನಾ). ಎ ಪತ್ರ ಫಿಲಿಪ್ಪಿ ಗಾಮ್ಮಾ ರ‍್ಹಯಲ ಸಭೆನೆ ಬರ್ದಲ ವ್ಹೈ. ಅಪೊಸ್ತಲ ಬರ್ದಲ ಪುಸ್ತಕಮಾ ಫಿಲಿಪ್ಪಿನಾ ಹುತಿ ಹಮೆ ದಕ್ಹಿಯೊ ವಿಚಾರೊ ಶಿಕ್ಕ ಸಕಿಯೆಸ. ಫಿಲಿಪ್ಪಿ ಗಾಮ ಮೆಕೆದೊನಿಯಿ ಪ್ರಾಂತ್ಯನಿ ರಾಜಧಾನಿ ಥೈತಿ. ಎ ಸಭೆ ಮೆಕೆದೊನಿಯಾಮಾಭಾಂದಲ ಪೈಲಾನಿ ಸಭೆ ಥೈತಿ ಪೌಲಾ ವರಿ ಸಿಲಾಸ ಎ ಸಭೆ ಶುರು ಕರ‍್ಯಾ ವರಿ ತ್ಯಾ ರ‍್ಹತಾಮಾ ತ್ಯುನೊನೆ ಯಕ್ಕ ರಾತ ಜೆಲ್ಮಾ ಘಾಲ್ಯಾತಾ. ಎ ಪತ್ರ ಬರ್ದಾನೆ ಪೌಲಾ ಘನಿಯೊ ಉದ್ದೆಶೊ ವಸ. ತೆ ಎ ಮೌಕೊ ಅಪೆ ಜೆಲ್ಮಾ ಛೆ ಕೈನ ಐಕಿನ ತ್ಯುನೆ ಮೊಕ್ಲಲ ಉಡುಗರೆನಾ ಹುತಿ ಧನೈವಾದ ಕವಾನು ಉಪಯೊಗ ಕರಸ. (4 ಅದ್ಯಾಯಾ 10 ತಿ 19 ವಚನಾ) ತೆ ಜೆಲ್ಮಾ ರ‍್ಹಯಲ ತ್ಯುನಿ ಪರಸ್ಥಿತಿ ಹುತಿ ಬರ್ದ ವರಿ ತಿಮೊತಿ ವರಿ ಎಪಫ್ರದಿತ ಸಭೆನು ವಳಕ ಕರಿನ ದಿವಸ (2 ಅದ್ಯಾಯಾ 19 ತಿ 30 ವಚನಾ) ಇಮ್ಮ ತ್ಯುನೊನೆ ಸ್ವಾಗತ ಕರಾನಾ ಹುತಿ ವರಿ ತ್ಯುನೆ ನಾಯಕತ್ವ ಮರ್ಯಾದಿ ದಿವಾನಾ ವರಕ್ಹು ಕರ‍್ಯೊ.
1) ಪೌಲಾ ಪಿಲಿಪ್ಪಿ ಸಭೆನೆ ವಂದನೆ ಕತೊ ಪತ್ರ ಶುರು ಕರಸ. 1:1-2
2) ಪಾಚಾ಼ತೊ ತೆ ತಿನಿ ಸ್ತಿತಿನಾ ಹುತಿ ದಕ್ಹಿಯೊ ಮಹಿತಿಯೊ ವಾಟಿಲಿವಸ. ವರಿತ್ಯುನೊನೆ ರ‍್ಹಯಲ ತರಕ್ಹನಾ ಹುತಿ ವಾಟಿಲಿವಸ 1:3—2:30
3) ಪಾಚಾ಼ತೊ ತೆ ಕ್ರಿಸ್ತನಿ ಜಿವ್ನಾ ಕರಾನಾ ಹುತಿ ಘನ್ನಾ ಕಾರ್ಯ ರುಪಮಾ ವಾಟ ದೆಕಾಡಿನ ದಿವಸ 3:1—4:9
4) ಪೌಲಾ ಪಿಲಿಪ್ಪಿ ಸಭೆನೆ ತ್ಯುನೆ ಮೊಕ್ಲಲ ಉಡಗರೆನಾ ಹುತಿ ಧನ್ಯವಾದ ಕೈನ ತಿನು ವಂದನೆ ಕತೊ ಪತ್ರ ಮುಕ್ತಾಯಾ ಕರಸ.4:10-23
1
1 ಯೆಸು ಕ್ರಿಸ್ತನೊ ಆಳ ಥಯಲ ಪೌಲಾ ತಿಮೊಥಿ ಫಿಲಿಪ್ಪಿವಾಲಾವೊನೆ ಬರ್ದಾನು ಪತ್ರ. ಯೆಸು ಕ್ರಿಸ್ತನಾ ಮುಲಕ ಕ್ಹುದಾ ಪರಿಶುದ್ಧ ರ‍್ಹಯಲ ಮನಕ್ಹೊನೆ ಕ್ಹಾರಾ ಮ್ಹೊಟಾ ಮನಕ್ಹೊನೆ ಸಭೆಮಾ ಸೆವೆ ಕರಾಲಾವೊನೆ ಹಮೆ ಎ ಪತ್ರ ಬರ್ದಾಡ್ಯಾಸ. 2 ಮಾರೊ ಬಾ ಥಯಲ ಕ್ಹುದಾಕ್ಹು ವರಿ ಯೆಸು ಕ್ರಿಸ್ತ ತುಮೊನೆ ಕೃಪಾ ವರಿ ಶಾಂತಿ ಮಳಾದೆ.
ಪೌಲಾನಿ ಪ್ರಾಥನಾ
3 ಹಮೆ ತುಮೊನೆ ಶೆ ಕರ‍್ತಾ ಟೆಮ್ಮಾ ಕ್ಹುದಾನೆ ಸೊತ್ರಾ ಕರಿಯೆಸ, 4 ಮಿ ಕ್ಹಾರಾವೊನಾಹುತಿ ಹಮೆಶಾಬಿ ಖುಶಿಕ್ಹು ಪ್ರಾಥನಾ ಕರಾವಾಲೊ ಥೌಸ. 5 ಕಾಕದ್ಯಾಮ ತುಮೆ ಪೈಲಾತಾಬಿ ಹಜು಼ನ ಲಕ್ಕಾಬಿ ಸುವಾರ್ತೆ ಪ್ರಚಾರಮಾ ಮದತ ಕರಾಲಾ ಥಯಾಸ ಕೈನ ಮಾರಾ ಕ್ಹುದಾನೆ ಕೃತದನ್ಯತಾ ಸುತ್ತಿ ಕೌಸ. 6 ಎ ಚೊ಼ಕು ಕಾಮ ತುಮೊಮಾ ಶುರುಕರಲವಾಲೊ ತೆ ಚ಼ಲೈಲಿನ ಜ಼ಾವಲೊ ಯೆಸು ಕ್ರಿಸ್ತ ಆವಾನಾ ದಿನಮಾ ಪುರ್ಣತನೆ ಲಾವಸ ಕೈನ ಮನೆ ಬರೊಕ್ಹೊ ಛೆ. 7 ತುಮೊಮ್ಮಾ ರ‍್ಹಯೆಲ ಮನೆ ಗ್ವತ್ತ ತಾವಾನು ಚೊಕ್ಹು ವ್ಹೈ. ಮಿ ಭಂದನಮ್ಮಾ ರ‍್ಹತಾಮ್ಮಾಬಿ ಸುವಾರ್ತೆ ನಾಹುತಿ ವಾದ ವಿವಾದಮಾ ತುಮೆ ಕ್ಹಾರಾ ಮಾರಾ ಕ್ಹಾತೆ ಕ್ಹುದಾನಿ ಮರ್ಗಾಮಾ ವಾಟೊ ಲಿವಾಲಾ ಥಯಾಸ ತುಮೊನೆ ಮಾರಾ ಮನಸ್ಸಮ್ಮಾ ಮ್ಹೆಲ್ಯುಸ. 8 ಕ್ರಿಸ್ತ ಯೆಸು ರ‍್ಹಯಲ ಮರಗಾಕ್ಹು ತುಮಾರಾಹುತಿ ಕೆಕ್ಲೊಕೆ ಆಸ ಕರುಸ. ಇನೆ ಕ್ಹುದಾಜ಼ ಸಾಕ್ಷಿ ವ್ಹೈ. 9 ವರಿ ತಮಾರಿ ಮಯಾ ಹಜ಼ು ಘನಿ ಥಾತಿ ಕ್ಹಾರು ಗ್ಯಾನ ವಿವೆಕ ತಮೊನೆ ಮಳಾದೆ ಕೈನ ತಮಾರಾಹುತಿ ಪ್ರಾರ್ಥನಾ ಕರುಸ. 10 ಚೊಕ್ಹು ಕೆಟನು ವಳಕಾನು ಫರಕ ಹುತಿ ಚೊ಼ಕುಜ಼ ರ‍್ಹಯೆಲ ಇನಿಲಿವಾಲಾ ಥೌ; ಕ್ರಿಸ್ತ ಆವಾನಾಮಾ ತುಮೆ ಪರಿಶುದ್ಧ ರ‍್ಹೈನ ಸುಜ಼ ತಪ್ಪ ನೈಸೊವಾಲಾ ಥೌ. 11 ಯೆಸು ಕ್ರಿಸ್ತ ಮುಲಕ ಥಯಲ ನಿತಿ ಕವಾನು ಫಲಕ್ಹು ಭರಲವಾಲಾ ಥೈನ ರ‍್ಹೌ ಕೈನ ಕ್ಹುದಾನೆ ಘನತೆ ವರಿ ಸ್ತೊತ್ರ ಕೌ ಕೈನ ಮಾಂಗಿಲ್ಯುಸ. 11 ಯೆಸು ಕ್ರಿಸ್ತನಾ ಮುಲಕ ರ‍್ಹಯೆಲ ನಿತಿ ಕವಾನು ಫಲ ಭರೆಯೆಲ ವಾಲಾರೊನೆ ರವಾನು ರ‍್ಹಯೆಲ ಕ್ಹುದಾನೆ ಮರ್ಯಾದಿ ಸ್ತೊತ್ರಾ ಕರ‍್ಯಾ ಕೈನ ಮಾಗಿಲಿದ್ಯಾ.
ಜಿವ್ನಾ ಕರಾನಾ ಹುತಿ ಕ್ರಿಸ್ತ
12 ಭಾಯೊ ಮಾರಾಕ್ಹಾತೆ ಥಾವಾನು ಕ್ಹಾರು ಸುವಾರ್ತೆ ಕವಾನಾಹುತಿ ಮದತ್ತ ಥೈ ಕೈನ ತುಮೆ ತಿಳ್ದಿಲ್ಯು ಕೈನ ಮಾರು ಮನಸ್ಸ ಕರುಸ. 13 ಕಿಮ ಕದ್ಯಾಮ ಮಿ ಯಕ್ಕ ಜೆಲಮ್ಮಾ ರ‍್ಹಯೆಲ ಕ್ರಿಸ್ತಾನಾಹುತಿ ಹೈ ಕಯೆನ ರಾಜಾ಼ನು ಘರ ಕೈದಾಲಾ ಕ್ಹಾರಾ ಜ಼ನಾವೊನೆ ವರಿ ಬಿಜಾ಼ವೊನೆಬಿ ಗೊತ್ತ ಥೈಯು. 14 ತೆನೈಸೊ ಭಾಯೊಮ್ಮಾ ಘನ್ನಾ ಜ಼ನಾ ಮನೆ ಜೆಲಮಾತ್ತಾ ಕರ್ತಾಮ್ಮಾ ಭರೊಕ್ಹೊವಾಲಾ ಥೈನ ಕ್ಹುದಾನಿ ವಾಕ್ಯ ಭೆವಾಚಿ ಕವಾನಾಹುತಿ ಹಜ಼ು ಹೆಚಕ್ಗಿ ಧೈರ್ಯ ವ್ಹಂದಿಲಿದ್ಯಾಸ.. 15 ದಕ್ಹಾ ಜ಼ನಾ ಸಂಗಟ ಘಾಲ್ಲಿನ ಭೆದ ಭಾವ ಹುಟ್ಸೌ ಕೈನ ಮನಸ್ಸಕ್ಹು ವರಿ ಬಿಜಾ಼ ದಕ್ಹಾ ಜ಼ನಾ ಚೊ಼ಕಿ ನಡತೆಕ್ಹೊ ಕ್ರಿಸ್ತನೆ ಪ್ರಚುರ ಕರಸ. 16 ಯುನೆತಬಿ ಮಿ ಸುವಾರ್ತನಾ ವಿಷಯಮ್ಮಾ ಉತ್ತರ ದಿವಾನಾಹುತಿ ನ್ಹ್ಯಾ ಘಾಲೆಲಹುತಿ ತಿಳ್ದಿಲಿನ ಮಯಾಕ್ಹು ಪ್ರಸಿದ್ದಿ ಕರಾಡಾಸ. 17 ತೆ ಬಿಜಾ಼ ತರಾನಾ ರ‍್ಹಯೆಲ ಮನಕ್ಹೊ ಮಿ ಬೆಡಿಯೊಕ್ಹು ಭಂದಾಯಲ ರ‍್ಹತಾಮಾಬಿ ಮನೆ ತ್ರಾಸ ದ್ಯುಕೈನ ವಿಚಾರ ಕರಿನ, ಕ್ಹರಿ ನೈ ರ‍್ಹಯೆಲ ಖುದ್ದನಾ ಉದ್ದೆಶ ಕ್ಹು ಕ್ರಿಸ್ತನೆ ಪ್ರಸಿದ್ದ ಕರಸ. 18 ಕಿಮ್ಮೆಬಿ ಥಯುತಬಿ ಸು? ಕಿಮ್ಮೆಬಿ ರ‍್ಹೈನಕಾ ಕಯಾ ತರಿಕಾ ಕ್ಹುಬಿ ರ‍್ಹೈನಕಾ ಮಶಕರಿಮಾ ರ‍್ಹೈನಕಾ ಕ್ಹರಿಕ್ಹು ರ‍್ಹೈನಕಾ ಕಿಮ್ಮೆಬಿ ಕ್ರಿಸ್ತನಾ ವಿಷಯ ಕ್ಹಾರಿ ಜ಼ಗಾ ಗೊತ್ತ ಥಯಾರೆ ಅನಾಹುತಿ ಮಿ ಖುಶಿ ಥೌಸ ಆಗೊಬಿ ಖುಶಿ ಥೌಸ. 19 ತುಮೆ ಮಾರಾಹುತಿ ಪ್ರಾಥನಾ ಕರಾಡಾಸ ವರಿ ಯೆಸು ಕ್ರಿಸ್ತನಿ ಆತ್ಮಾಮನೆ ಮದತ ಕರಾಡಿಸ. ತಿನಾಹುತಿ ಮಾರೊ ತ್ರಾಸ ಮನೆ ರಕ್ಷಣೆ ಕರಸ ಕೈನ ಮನೆ ಗ್ವತ್ತ ಛೆ. 20 ಕಿಮ್ಮ ಕದ್ಯಾಮ ಮಿ ಕೈ ವಿಷಯಮಾಬಿ ಸರ್ವಮ್ಯಾವಾಚಿ ಹಮೆಶಾ ಲಿಂಗತ ಹಮ್ನಾಬಿ ಧೈರ್ಯಕ್ಹು ಛೆ. ಮಿ ವಾಚೊತಬಿ ಸೈ ಛೆ ಮರ್ಯೊತಬಿ ಸೈ ಛೆ ಮಾರಾ ಅಂಗನಾ ಮುಲಕ ಕ್ರಿಸ್ತನಿ ಮಹಿಮಾ ಥೌ ಕೈನ ಮಾರಿ ಆಸ ವ್ಹೈ. 21 ಮನೆತೊ ವಾಚ಼ು ಕೈನ ಕವಾನು ಕ್ರಿಸಜ಼ ವ್ಹೈ. ಮರ‍್ಯೊತುಬಿ ಪೈದೊಜ಼ ಛ್ಹೈ. 22 ಮಿ ಜಿವ್ತೊ ರ‍್ಹಯಾತಬಿ ಫಲದಿವಾನು ಕಾಮ ಮನೆ ರ‍್ಹವಸ. ತೆನೈಸೊ ಮಿ ಮರುಸ? ನೈತೊ ವಾಚು಼ಸು? ಸು ಇನಿಲ್ಯು ಕೈನ ಮನೆ ತಿಳ್ದಾಡು ನತ್ತಿ. 23 ಎ ಬೆಮಾ ಸು ಇನಿಲ್ಯು ಕವಾನು ಕಠಿನ ಛೆ. ಯ್ಹಾತ್ತಾ ಗೈನ ಕ್ರಿಸ್ತನಾ ಕ್ಹಾತೆ ರ‍್ಹೌ ಕೈನ ಮಾರಿ ಆಸ ವ್ಹೈ, ತೆ ಘನು ಚೊಕ್ಹು ವ್ಹೈ. 24 ತೆನೈಸೊ ಮಿ ತೊ ಅಂಗಮಾ ಅರಾಮ ಥಯಲವಾಲಾ ತ್ಯುಮಾರಾಹುತಿ ತುಮೊನೆ ಘನು ಅವಶ್ಯಕ ಛೆ. 25 ತಿನಾಹುತಿ ತುಮೊನೆ ಕ್ರಿಸ್ತನೊ ಭರೊಕ್ಹೊ ಅಗು ಭಡಾನು ವರಿ ಕ್ಹುಶಿ ಥಾವಾನಾ ಹುತಿ ಮಿ ಜಿವ್ತೊ ಥೈನ ತುಮಾರಾ ಕ್ಹಾತೆ ರ‍್ಹೌಸ ಕೈನ ಘಟ್ಟ ಮನಸ್ಸಕ್ಹು ನಂಬ್ಯೊಸ. 26 ಇಮ್ಮ ಮಿ ಫರಿನ ತುಮೊಕನ ಆವಾನಾ ಹುತಿ ತುಮೆ ಯೆಸು ಕ್ರಿಸ್ತನಾ ವಿಷಯಮಾ ಕ್ಹುಶಿ ಕರಾನೆ ಮಕ್ಹು ಘನು ಮದ್ದತ್ತ ರ‍್ಹವಸ. 27 ಇಮ್ಮ ಕ್ರಿಸ್ತನಾ ಸುವಾತೆಮಾ ಯೊಗ್ಯ ಥಯೆನ ಚ್ಯಾಲಿ ಜಾ಼ವೊ. ತೆಲಾಮಾ ಮಿ ಅಯೆನ ತುಮೊನೆ ದೆಕ್ಕಯವಾಲಾ ಕ್ಹರಿಜ಼ ವೆ. 28 ತಮೆ ತಿಮ್ಮ ರಹೆಲಕ್ಹು ದುಶ್ಮನೊ ಹಾಳಥಾವಾನೆ, ತಮಾರಾ ರಕ್ಷಣೆನಾ ಹುತಿ ಯಕ್ಕ ವಳಕ ಛೆ. ತೆ ಕ್ಹುದಾಕ್ಹು ಥಯಲ ಪೈಲಾಜ ವಳಕ ಥೈಸ. 29 ಕ್ರಿಸ್ತನಾ ಉಪ್ಪರ ಭರೊಕ್ಹೊ ಮ್ಹೆಲಾನು ಯಕ್ಕ ನ್ಹೈವೈ ತಿನಾಹುತಿ ದುಖ ಕ್ಹಾವಾನಾ ಹುತಿ ತಮನೊನೆ ವರಾ ಥೈನ ಮಳಿಸ. 30 ಇಮ್ಮ ತಮೆ ಮಾರಾಮ್ಮಾ ದಿಕ್ಹೆಲ ವರಿ ಮಾರಾ ಹುತಿ ಪುಚಾನು ತೆ ಹೊರಾಟ ತಮನೊನೆ ಬಿ ಥಾವಾಸ.