1 Mzm. 110:1Waikw o hatnimakw e! Hulasokwe yal mormyorif harharkwe ti e de, ti kyoat yala e ma mmyorif huruk myor Kristuske desy. Koldyesikemo, kyaki-kyaki ne musti mo myal ralamy kralanare ti wen sra eraske. Ti wen desike Kristuske tyaklulw ti Hulasokwe seri wanke. 2 Lemadendye kyaki-kyaki ne musti mo minenenas Hulasokwe yor ktela ibuke bo, de kete mryekan a ktela atyat mamin ti nuske ktem ne de. 3 Kali mmyaty myor a Kristuske de, ode mimorif harharw kyor Kristuske ne Hulasokwe ihunik ma kimin I bo, ma irire ti nuske ktem ne lema bisa ma ratos. 4 Keskyede, kyoat Kristuske ana mya huruk, desikeo nuske ktem ne mumu ne ana rseak I a yor ity, ti wasi madelah desy, kali tamorif neke desi Kristuske.

5 Kali ei ne mmyorif harharw ti Kristuske de, dendye musti mo mtyunik ktela atyat mimaboka o miala ti nuske ktem ne ba elik. Neke wamfwetare ror wamwanire kete it de yala tot atyat ti it, kete myala ktela maray o ktela atyat manety inamnyekunare dakun. Ktela atyat desikre mumu, kete mdyakin ma myala. Ode kete myaboka nam atyat sai ta sai bo. Ode kete myobak ma mimesa nam sai ta sai dakun, kali iry mamesa nam desy, wasi mormyorifke kimin ti nam imesa desikre, yola dene iry a masambayan ode maou ti adarke ne. 6 Kali ktela atyat desikre mumu khyury ma Hulasokwe kyeyer ma ana yukun iry a lema matomolu wasi haretare ne. 7 Ode ei ne dakun o heit a mimorifke myala ktela atyat desikre dakun. 8 Keskye senweke, musti mo mtyunik ktela atyat ida nekre dakun, neke: kete mkyeyer, kete ralamire masbu, kete mimnisik iry, kete mihes irire ma anitare kiray, kete mihakiny, 9 Ef. 4:22ode kete it de ikakmet a it dakun. Kali wasimy mormyorif mamuna atyat desikre mtyunik ba de, kyor wasimy ktela atyat heit a miala desikre dakun. 10 Kej. 1:26; Ef. 4:24Ode senweke wasimy mormyorifke harharw de, kali Hulasokwe yal mormyorif harharw desy ti e, ma sew kyaki ne Hulasokwe yala wasimy mormyorifare ma kbyaa kbya nini ana kola I, ma mhye I bain-bain. 11 Lemadendye khyali mimorif harharw neke, kete mikea ohe, iry a Yahudike i desy, dete lemamo iry a lema Yahudike i ne, ode iry lema ratosa tenanke*Ratosa tenanke kyalamo ti tel mabuske rbohe, sunat. i desy, dete lemamo iry a ratosa tenanke i ne, ode mwakunke i desy, dete lemamo iry a mamin ti utanke i ne, ode atke i desy, dete lemamo iry a lema atke i ne. Dendye lema takea iry, kali Kristuske myesan a lan lahuk I ti irkye ode nam ribun mamin ti nuske ktem ne mumu, ode I ne dakun o imin ti iry matohakare mumu ne ity ralat a kralanare.

12 Ef. 4:2Waikw e, Hulasokwe yilik e ma wasi iry nelnyely a e de, ode lyobak e. Lemadendye ei ne musti mo mlyobak iry, ode msyusu ralamy erasare ti irire dakun, ode mnyauk tenamire ma babaf, ode myala ral lublubke, ode kete samlurw o mkyeyer, de mikita bo. 13 Ef. 4:32Ode kete it de yatil it, de kolnye iry salik rasal ti e, desikemo musti mo msyos wait sal desikre ba, kola ne ity Ebutke isos salamire ba ne. 14 Dendye musti mo myala ktela desikre mumu, keskye eras lan lahukke, neke it de lyobak it, kali loblobak desike kyeti kyahuk e ti sasam.

15 Lemadendye kolnye Kristuske ika eras yor e de, desikemo mlyura inaka eras desy ma khyareta ti ralamire, kali Hulasokwe yilik e ma miktemtem ne myety ral sasamke, ma mmyorif ti inaka eras desy. Ode sew kyaki nekre musti mo msyambayan ma msyalak eraske ba ti Hulasokwe. 16 Ef. 5:19-20Ode musti mo msyosan mamak Kristuske tunanare ma kimin ralamy kralanare, ma myal hehei lulw o lyaw a inal ti e ne, ma it de yajar it, ode it de syurat it. Ode miora Mazmur o inaora miora ma mileru Hulasokwe ne, ktyabal inaoranare dum ma Hulasokwe Memeanke kyal ti e dakun, ma kolnye miora inaora desikre mo, miora kyor ralamy kralanare bain-bain, ma msyalak eraske ba ti Hulasokwe.

17 Lemadendye tun sai ta sai mitanuk desy, dete lemamo ktela sai ta sai miala desy, musti mo mtyanuk ode myala ma ksyusu ohe, ity Ebut Yesuske imin ti ralamy kralanare de. Ode kyaki-kyaki ne msyalak eraske ba ti ity Amat Hulasokwe, kali Yesuske yety lulkwe ma ity, ma ti tsara Hulasokwe.

18 Ef. 5:22; 1Ptr. 3:1Hei enen e, musti mo mnyauk tenamire ma babaf ma mtyomolu laimire, kali ktela desikre mlay ma ktyoha ity Ebutke ibuke.

19 Ef. 5:25; 1Ptr. 3:7Ode amam e, musti mo mlyobak sawamire, de kete myala myalkyaw sir.

20 Ef. 6:1Hei naman e, musti mo mtyomolu ode mtyoha enamy o amamy ti nam sai ta sai bo, kali ktela desike ne ity Ebutke idakin ne. 21 Ef. 6:4Hei amam e, kete myala anamire ma ralatare ksunw ma ratil e, kali koldyesikemo ana ralatare kakan ma lema rbu ma rala namit-namit.

22 Ef. 6:5-8Hei waikw o hatnimakw maka at e, musti mo mtyomolu ode mtyoha wasimy amam lan mamin ti nuske ktem ne ti nam sai ta sai bo. Klala kete wasimy amam lanare ramin, desikeo mkyarya eras ma myala ralatare ma rdakin e, de biar ma lema ramin, musti mo myal ralamy kralanare bain-bain ma mkyarya ode mtyomolu sir, kali ei ne mimtaut ity Ebut Yesuske. 23 Ode kolnye mkyarya nam sai ta sai bo, desikemo mkyarya a myor ralamy kusunare, kola ne mikarya ti ity Ebut Yesuske ne, de kete ti irkye bo. 24 Kali mhye ohe ana ity Ebutke yal ksewanke ti e, neke msyaa e ti watamy a isosan ti eke, kali Kristus neke wasimy Amam Lanke, ode I neke mkyarya ti I. 25 Ul. 10:17; Ef. 6:9Keskyede kolnye myala sal, desikemo ana Hulasokwe yukun e ma ktyoha ktela miala desikre, kali lema iseak mat.