PAULO ḠENA TORETORE VAḠA-RUARUANA TESALONIKA EKALESIARI ḠERI
2 Tesalonika vaḡa-foforina guruḡari
Paulo na mai fefa vaḡa-ruaruana tu mo fefa giniguinena etoreato ma ḡue imaima sebona (6) evanaḡiato murinai ma etoreato. Mo tu ḡia roḡo Korinto ai etanuto-ḡoi nuḡanai etoreato.
Mai fefa nuḡanai siri baregona tu karoa 2:3.
Paulo na mai ḡena fefa vaḡa-ruaruana etoreato mainai tu Tesalonika ekalesiari 1) ḡevaḡa-midigu midigurito-ḡoi nuḡanai evaḡa-gwadarito; 2) Iesu ḡena ḡenoḡoi-iaḡoma vaḡa-ruaruana guruḡari kotari ma ekira-vararito; 3) evaḡa-naḡirito, ḡeri veḡabidadamai beḡene ruḡa-gwaḡiḡi bene iaḡo mo, Iesu Vereḡauka bene ḡenoḡoi, ema elaunaḡirito maki, asi beḡene ḡubulefi.
Paulo na ḡena fefa vaḡa-ruaruana tu maiḡesi eboioḡaiato:
1. Nuḡari evaḡa-gwaḡiḡirito, ekirarito, Keriso tu ma beiaḡomani - karoa 1
2. Loriri beḡene vetore korana Keriso ḡofaḡofana tu beiaḡoma-guineni roḡo - karoa 2
3. Ekalesia aiḡesina beḡene tanu maḡurina - karoa 3
1
1 Ḡai tauma toitoi, Paulo, Silas, e Timoteo na Tamara Barau ema Vereḡauka Iesu Keriso ḡena ekalesia Tesalonika nuḡanai ḡatore-vinimini.
2 Barau ḡita Tamara ema Vereḡauka Iesu Keriso ḡerina varevare-bara e maino ḡemi ai bene tanu.
Keriso ma beiaḡomani ḡaronai, Barau na tarimarima ḡeri rakava voiri bevinirini
3 Tarikakama mabarami, ḡai na tu Barau baḡana tanikiu-vinia ḡaro mabarari ai ḡomi daimi ai. Moḡesi baḡa veini tu maoro, korana ḡemi veḡabidadama ebarego-rakavani, ema ḡemi veuravini karomi mabarari ḡeri ai maki ebaregoni. 4 Moḡa lorinai ḡomi ḡavaḡa-raḡemini Barau ḡena ekalesia nuḡari ai. Ḡavaḡa-raḡemini korana ḡomi tu enabe ḡelaimini e ḡevaḡa-midigu midigumini, senaḡi ḡemi veḡabidadama ḡoḡabi-gigitariani.
5 Mo veiḡa mabarari na Barau ḡena vevaḡa-maoro vetoḡana namona ḡevaḡa-moḡoniani, moḡa anina ḡomi tu ilaila ḡia ḡena Basileia boḡo ḡabiani, korana mo Basileia dainai ḡomidigu-midiguni. 6 Barau tu maoro veiḡari moḡo beveini: Ḡomi dei na ḡevaḡa-midigu midigumini tarimari ḡia na ma bevaḡa-midigu midigurini. 7 Ema ḡemi midigumidigu ḡerina bevaḡa-iaḡaraḡimini ema ḡai maki. Moḡesi beveirani Iesu Vereḡauka ma ḡena aneru ma seḡuka baregori ḡesi guba na beḡe mariḡoni ḡaronai. 8 Ma karava moremorena ḡesi beiaḡomani; Barau asi ḡekorana-iaḡiani tarimari ema ḡera Vereḡauka Iesu ḡena Vari Namona asi ḡeḡabi-raḡeani tarimari ḡeri rakava voiri bema vinirini. 9 Ḡeri rakava voiri tu maiḡa: Ḡia tu Vereḡauka ḡenana e ḡena mama seḡukana ḡenana ma fakari beḡe tanuni, midigu vanaḡivanaḡi beḡe ḡabini. 10 Mo tu beḡorani Keriso ma beiaḡomani ḡaronai, ḡena tarimarima mabarari na beḡene vaḡa-raḡea, ema ḡevaḡa-moḡoniani tarimari na beḡene vaḡa-namoa ḡana. Ḡomi maki ḡia ḡesi, korana ḡaḡobata-vinimito, ḡoḡabi-raḡeato nai.
11 Moḡa lorinai vanaḡivanaḡi ḡomi iatami ai ḡaḡuriḡurini. Ḡera Barau ḡanoḡiani, ḡemi maḡuri bene vaḡa-namori, korana ḡia na ekeamito tu boḡono maḡuri ḡana. Ḡia seḡukana na ḡemi ura namori mabarari ai bene vaḡa-ḡaunami, ema ḡemi veḡabidadama dainai ḡoveirini ḡauveiri e veiḡari bene vaḡa-ḡuḡururi. 12 Monana, Iesu Vereḡauka arana beḡene vaḡa-raḡea ḡomi daimi ai, ema ḡomi beḡene vaḡa-raḡemi ḡia bakunai. Ḡita ḡera Barau e Vereḡauka Iesu Keriso na ḡeri varevare-bara ḡerina moḡeri dagara mabarari beḡene vaḡa-ḡorari.