15
Yéesu ɓayussa ga fíkíi Pílaat
(Mëccëe 27: 1-2,11-14; Lúkkaa 23: 1-5; Saŋ 18: 28-38)
1 Ga kímaa cuut, sarahohcaa ɓiyaakɓaa, yaakcaa yaawúuꞌcaa, jëgíroh-waascaa na ɓuwaa tes boku ga paanaa yaawúuꞌcaa wiyaakwaaɗa, hídohussa kituukiꞌ yen ga iñaa aaw ga Yéesu. Ɓa poklukkari, ɓa ɓayyari, tíkussari ga yah Pílaat. 2 Pílaat meekissa Yéesu an:
- Fu Yërí en buurii yaawúuꞌciine?
Yéesu taassari an:
- Fu yii woꞌka.
3 Sarahohcaa ɓiyaakɓaa yabussa Yéesu ga enaama ciyewin. 4 Pílaat meekisissa Yéesu an:
- Fu taasoone? Man fu keloh ga iñcii ɓa yammbaaɗa!
5 Wayee Yéesu taasissii, iñaama jaahalla Pílaat.
Yéesu tíkussa kikaan
(Mëccëe 27: 15-26; Lúkkaa 23: 13-25; Saŋ 18: 39–19: 16)
6 Ga feet Paakaa en ɓéeɓ, Pílaat méyíꞌɓa ɓoꞌ yíinoo ga ɓuwaa abu ga kasuɗa, yaa mbooloomaa waaꞌɗa. 7 Waama, lak laakin ɓaa en ga kasu, teeku Barabaas, ya na ɓuwaa taabee nariɗa. Ɓa apee ɓoꞌ ga heñaagaɓa na nguuraa Roomɗa. 8 Mbooloomaa lappa bi ga kaan Pílaat, ɓa meekissari ya tumiꞌɓa iñaa ya meereeɓa kitumiꞌɗa. 9 Pílaat meekissaɓa an:
- Ɗú waaꞌ mi méyíꞌtúu buurum yaawúuꞌciine?
10 Ya woꞌee iñaama ndaga ya ínoheera an kisootukoh Yéesu tahee bi sarahohcaa ɓiyaakɓaa tíkussari ga yahci. 11 Wayee sarahohcaa ɓiyaakɓaa ɓaa obis ɓuwaa ɓa woꞌ Pílaat ya namiꞌɓa kiméyíꞌ Barabaas. 12 Pílaat ɓeɓsissa daa karam an:
- Kon mi tuman na, na ɓii ɗú teek buurii yaawúuꞌciiɗa?
13 Ɓa ɓaa fiipis an:
- Daayaari ga kuraa!
14 Pílaat meekissaɓa an:
- Iñii yibóníꞌyii ya tumɗa ya?
Wayee ɓa ɓaa wëñ kifiip didóolíꞌ an:
- Daayaari ga kuraa!
15 Pílaat waaree kisóosíꞌ keeñcaa ɓuwaa, ya méyíꞌtaɓa Barabaas; lëehíꞌta ya feeklukka Yéesu na karawaas, ya erohhari kidaaƴsunee ga kuraa.
Soldaaꞌcaa ɓaa ñaawalsoh Yéesu
(Mëccëe 27: 27-31; Saŋ 19: 2-3)
16 Soldaaꞌcaa ɓayussa Yéesu ga ɗuuƴ kaanfaa haꞌ-kúlkaa (wërí en ga Peretuwaaraa*15: 16 Peretuwaaꞌ wërí en ga daa gúwernëeꞌ wala ɓuwaa kuliyuk soldaaꞌcaa dëkɗa. En ga Roomaa, peretuwaaꞌ jomin kiꞌen kaanfaa buuraa fiyaakfaa. Malkat Mëccëe 27: 27; Saŋ 18: 28; Tumeen 23: 35.), ɓa nëgírohha soldaaꞌcaa fodaa gaɓaɗa ɓéeɓɓa. 17 Ɓa ekka Yéesu kúltí fiyoꞌoh†15: 17 Kúltífaa fiyoꞌohfaama hëwrohu na píis wilëekíꞌ-dooli, ee buuꞌcaa na ɓuwaa ɓiyaakɓaa ɓërí laakfa kiꞌekuk. cor, ee ɓa tíkíꞌtari ga hafaa iñaa fodii baanu-buuꞌ, terohu na lúp, wíillawa. 18 Lëehíꞌta ɓa ɓaa këñíꞌti an:
- Pesa, buurii yaawúuꞌcii!
19 Ee ɓa feekiri ga haf na dooꞌ, ɓa toosi ga ɗookci, ee ɓa ƴíꞌi ga fíkíici fodii ɓaa ɓa eꞌ céeꞌ. 20 Waa ɓa lëehíꞌtari kiñaawalsoh fodaama, ɓa nísíꞌtari kúltífaa fiyoꞌohfaa, ɓa ekissari kúltícaagari. Lëehíꞌta ɓa ɓayyari fooh, kidaaƴneeri ga kuraa.
Yéesu daayussa ga kuraanaa
(Mëccëe 27: 32-44; Lúkkaa 23: 26-43; Saŋ 19: 17-27; Galaat 3: 13)
21 Soldaaꞌcaa gítínussa ɓaa woꞌu Simoŋ ee dëk Síreen, paam ɓiꞌËlíksaan na Rufus✡15: 21 Mëdírohat na Room 16: 13. , kiníkuk kuraanaa Yéesu. Lak ya en na kipaaf, ya meyoh yooncaa. 22 Ɓa ɓayya Yéesu bi ga ɗekataa woꞌu Golgotaa, wërí en «Loon-haf». 23 Ɓa eꞌtari biiñaa atukohu na mëkín kedikkaa woꞌu míiꞌɗa‡15: 23 Anahaagari lëelɗin ɓoꞌ. Ɓa ereewa Yéesu, an en ɗanaa ya yéegoo mesiklaatcaa., wayee ya saŋnga. 24 Ɓa daaƴcari ga kuraanaa, ɓa warohha kúltícaagari, ɓa yípee tukiisii kiꞌínoh iñaa ɓaa en ɓéeɓ laakanɗa.✡15: 24 Malkat Kañcaa 22: 19. 25 Enee ga wahtu yooꞌ-yooꞌ ga waa ɓa daaƴci ga kuraanaaɗa. 26 Iñaa bínsee ga ɗook kuraanaa ee ɓéestíꞌ iñaa tahhi kiꞌapuɗa enee: «Buurii yaawúuꞌcii». 27 Ɓa daaƴca ga kuraa fodaagari tumoh-kofeel ɓanak, yii ga yahci ñaam, yíinoo ga yahci seŋ. [ 28 ]§15: 28 (Fodaama iñaa Këyítfaa woꞌeeɗa matta, an: «Ya kíduunun ga tumoh-kofeelcaa.») Woꞌeencuma hotukkii ga këyít ciyewin ga këyítcaa ɗeɓ kibíduɗa. Malkat Lúkkaa 22: 37; na Ísayíi 53: 12.
29 Ɓuwaa kooree daama ɓaa paafɗa, ɓaa këkít haf, ɓaa ɓassi an:
- Aca! Fu yii fu woꞌ an fu ƴah kipook Kaanfaa Kooh ee fu tawahisfa ga bes kaahayɗa✡15: 29 Malkat Kañcaa 22: 8; Marka 14: 58; Saŋ 2: 19. , 30 somaa haffu, fu yoosuk ga kuraanii!
31 Sarahohcaa ɓiyaakɓaa ɓan na jëgíroh-waascaa, ga ɗuuƴɓa, ɓaa ñaawalsoh Yéesu an:
- Ya músalin ɓuwii ɓíinoo ee ya mínoo hafci kimúsal! 32 Ya Kiristaanii, buurii ɓu-Isarayeel, ya yoosukat kimma ga kuraanii ati ɗí mín kihot ee ɗí gëm!
Ɓuwaa daaƴsee ga kuraa fodaa Yéesuɗa, ɓaa ɓassi ɓan.
Kaanaa Yéesu
(Mëccëe 27: 45-56; Lúkkaa 23: 44-49; Saŋ 19: 28-37)
33 Ga wahtaa nohaa tuuk ga ɗookɗa, bi ga wahtu kigoonaluk, Kooh ñúussa kërúus ga kúlkaa tóoh. 34 Ee ga wahtu kigoonaluk, Yéesu lessa koonaa didóolíꞌ an:
- Élóyí, Élóyí, lema sabaktani? (Wërí en: «Koohyiigoo, Koohyiigoo, iñii tah ya fu foñnjoo?»*15: 34 Kañcaa 22: 2 ee woꞌu ga kiꞌArameyee. )
35 Ga ɓuwaa enee daamaɗa, laakka ɓuwaa, daa ɓa keloheeri ɓa dalla kiwoꞌ an:
- Súkúrukat, yii ɓay Ili!
36 Yíinoo gaɓa foolla, ɓeɓpa epoos, ñoonndawa ga biniigaꞌ, ya pokkawa ga siñdaa dooꞌ, lëehíꞌta ya noonndawa Yéesu ya ɗuuƴwa✡15: 36 Mëdírohat na Kañcaa 69: 22. , ee yaa woꞌ an:
- Íisat rek ɗu malak ati Ili hayyi kihay kiyóosíꞌ ati na!
37 Wayee Yéesu lessa koonaa kiyaak, lëehɗukka.
38 Rídóonaa wiyaakwaa✡15: 38 Malkat Eksoot 26: 31-33. poksee ga ɗuuƴ Kaanfaa Kooh, kún ɗekataa wëñ kiselaꞌɗa dalla kiɗaꞌ kom kanak, aboh ga ɗook bi ga kakay.
39 Soldaaraa yiyaakyaa kuliyuki ɓoꞌ ɓitéeméeꞌ ga heñɗa ee tuukee ga fíkíi Yéesuɗa, daa ya hotee ga kaanaa Yéesu waama, woꞌꞌa an:
- Kayoh-kayohɗa, ɓii yii enee Kowu Kooh!
40 Laakeera ɓan ɓeticaa ensee diꞌúsaayíꞌ, ɓaa malak ga. Mërí-Malleen bokee gaɓa, na Salomee na Mërí eew ɓiSaak yijutuut na Yosee. 41 Ɓeticaama ɓërí taamsee na Yéesu ee ɓaa toputuꞌussi ga waa ya en ga Gëlíléeɗa. Laakeera daama ɓan ɓeti ɓiyewin ɓiliis ɓaa taamsee nari Yéerúsaleem.
Yéesu ɓayussa loycaa
(Mëccëe 27: 57-61; Lúkkaa 23: 50-56; Saŋ 19: 38-42)
42 Ga besaa waayukaa feetaa, ennda goonataa besaa Sabat, lak Kooh yaa hooɓ, 43 Yoseef ee dëk teeraa Arímatee†15: 43 Arímatee ɗekataa hanoh Yéerúsaleem ga iñaa aaw aasaaꞌ-noh ee díkaantiɓa tumin kíloomeet 35. Malkat ɓan Mëccëe 27: 57., hayya. Iñaa ɓoꞌ yiyaak ga ɓuwaa bok ga paanaa yaawúuꞌcaa wiyaakwaaɗa. Ee ya ɓan ya sekee Nguuraa Kooh. Ya laakka fít kikaꞌ ga Pílaat kimeekisohhi faraaffaa Yéesu. 44 Kiteel kikaankaa Yéesu betta Pílaat. Ya ɓaylukka kon soldaaraa yiyaakyaa kuliyuki ɓoꞌ ɓitéeméeꞌ ga heñɗa, kimeekissi ati Yéesu maañin kikaan. 45 Daa soldaaraa taaseeri ga iñaama, ya onnda Yoseef kiɓeɓ faraaffaa. 46 Yoseef lommba píis fodii mëlíkaan, yóoskíꞌta Yéesu ga kuraanaa, múullari ga píisaa, lëehíꞌta faanneerari ga noŋ-loyaa yotu ga atoh. Lëehíꞌta ya pírgínnda atoh wiyaak, laŋnga halaa loyaa. 47 Mërí-Malleen na Mërí eew ɓiYoosee ɓaa malak ga daa Yéesu ekohuɗa.
*15:16 15: 16 Peretuwaaꞌ wërí en ga daa gúwernëeꞌ wala ɓuwaa kuliyuk soldaaꞌcaa dëkɗa. En ga Roomaa, peretuwaaꞌ jomin kiꞌen kaanfaa buuraa fiyaakfaa. Malkat Mëccëe 27: 27; Saŋ 18: 28; Tumeen 23: 35.
†15:17 15: 17 Kúltífaa fiyoꞌohfaama hëwrohu na píis wilëekíꞌ-dooli, ee buuꞌcaa na ɓuwaa ɓiyaakɓaa ɓërí laakfa kiꞌekuk.
✡15:21 15: 21 Mëdírohat na Room 16: 13.
‡15:23 15: 23 Anahaagari lëelɗin ɓoꞌ. Ɓa ereewa Yéesu, an en ɗanaa ya yéegoo mesiklaatcaa.
✡15:24 15: 24 Malkat Kañcaa 22: 19.
§15:28 15: 28 (Fodaama iñaa Këyítfaa woꞌeeɗa matta, an: «Ya kíduunun ga tumoh-kofeelcaa.») Woꞌeencuma hotukkii ga këyít ciyewin ga këyítcaa ɗeɓ kibíduɗa. Malkat Lúkkaa 22: 37; na Ísayíi 53: 12.
✡15:29 15: 29 Malkat Kañcaa 22: 8; Marka 14: 58; Saŋ 2: 19.
*15:34 15: 34 Kañcaa 22: 2 ee woꞌu ga kiꞌArameyee.
✡15:36 15: 36 Mëdírohat na Kañcaa 69: 22.
✡15:38 15: 38 Malkat Eksoot 26: 31-33.
†15:43 15: 43 Arímatee ɗekataa hanoh Yéerúsaleem ga iñaa aaw aasaaꞌ-noh ee díkaantiɓa tumin kíloomeet 35. Malkat ɓan Mëccëe 27: 57.