5
Kilisto wenenala ya mikaleka mona olu fulo edonimo ka
Wenena mukite Yesu ya Gotidokati mikaleka ilifami we Kilisto ne, loti koli kikito umamo wenena muki ya Gotidokati oloto piyamo wenena ya minae. Ido melafo senimuluni umu minamo wenena ya nomilipala yaki lakoina seni-muluni gimi minenagilae. Etito Goti sete-mulude umuto ka lido meyalo melemele o minonido, ayalo ya nomilipala-mota setemulude gimi-gimi o minone, loto koli minone. Goti ya sete-mulude umu minonimo mona ya ka lido meyalo mele-mele o minonimo mona ya ne. Ido ka lo melami ya keina ámaiye. Gotidokati oloto piyamo wenena muki ya mikaleka mona olu fulo ede-ede o minae. Mikaleka mona olu fulo edonimo auma ya koli kikitonimo ya ne.
Gotikafo Nalafo yamu lo oloto melami ka
Kema wenena yate mikaleka mona olu fulo ede-ede o minae? Yesu ya Goti Nalafo ona kula ne, loti koli kikito umamo wenena yako eti o minamo ne.
Yesu Kilisto ya noki wanuki yau oloto piyami we ne. Nokiko yau ámaiye. E’e, noki wanuki yau lakoina oloto piyami ne. Ido Ouna ya ka ona kula aboga nenako, Ouna ya eyefe loto lo oloto mele-mele imo we ne. 7-8 Yamu Ounaki noki wanuki lelei-lawokoi (3) yate ka lawokoko lamo yamo Yesu monala ya olu oloto pife lo minae.
Ena wenena yate neta ma eyefe loti lo oloto melenawamo ka ya moda koli-koli one. Ido Gotikafo Nalafo monala eyefe loto lo oloto melami ka ya Goti aimola lo oloto melami kalama nenako, yamu kawa ya fa wenena kanina olu fulo edami ka ya ne. 10 Goti Nalafo koli kikito umamo wenena lunigu yau lo oloto melami kawa ya moda koli minamo ne. Ido Goti koli kikito umámamo wenena ya Nalafo yamu lo oloto melami ka koli kiki ádamo yamo Goti ka su we ne, loti lo edamoidana iye.
11 Ido lo oloto melami ka ya etito ne: Gotikafo kofawa minowa-minowa oto minomo dinumo mona moda lomaito, ido aya kofawa minomo dinumo monawa ya Nalafodoka ne. 12 Nalafoki ekelamo wenena ya kofawa minomo dinawamo monawa ya moda olu minae. Ido Nalafoki ekelámamo wenena ya kofawa minomo dinawamo mona olámae.
Kofawa minomo dinumo mona kolife lenumo ka
13 Linate Goti Nalafo kuliya koli kikito umamo wenena ya kofawa minowa-minowa oto minomo dinumo mona ya moda olu minonimo ne, loti kolife lo minenawae, loto lufuwa ama ya wi fulo gedowe. 14 Ido amo omunalo ya eti loto auma wito mino koli umu minone: Amo kala lalo kiyaido ya neta mamu loumogetoma ya moda koli lumu minaiye, loto kolife lo minone. 15 Ido ka yaidana-amaidana muki loumonimo ya moda koli minaiye, loto kolife lonimo, ya netawa yamu loumonimoma ya moda olu minone, loto kolife lone.
16 Ena makafo mono wenenala nosámami mona ma mele minenaido eyenami, ya nosámami monawa yakafo ofo fulunami mona minámageto eyetoma, ya amomu kolito Goti loumageto, kofawa minenami mona ya umunami ne. Eti lomo, ya gini fulunami mona melámamo wenena yamu lowe. Ido nosámami mona ma ya lofo fulunami mona ya nemo ne. Yaidana mona melenawamo yamu Goti loumalo, loto ádowe. 17 Efe ádami mona muki ya moda nosámami mona nefa, ido nosámami mona ma ya lofo folámenami mona ya ne.
18 Ido Gotidokati oloto piyamo wenena muki ya nosámami mona melemo idámamo ne. E’e, Goti Nalafo yakafo koto kiyaba o gedainako, nosámami aboga yakafo olámenagoliye, loto kolife lo minone. 19 Lamo ya Gotidokati oloto piyone, loto kolito, ido mikaleka wenena, neta-mata, muki ya nosámami aboga kemanau ya minae, loto kolife lo minone.
20 Ido Goti Nalafokafo lumuto ya ona kula abogaki kutifina oto minenune, loto lute-kate olu lamena o ledaiye, loto kolife lo minone. Ido ona kula aboga lulau mino edonimo, ya Nalafo Yesu Kilisto lulau ya mino edonimo ne. Ya we ya Goti ona kula nemo, ya kofawa minowaminowa oto minomo dinumo aboga ne.
21 Nomilipane kefolao, wenena mate neta yaidana-amaidana yamu koliti kouba-naba o edamo neta ya linate ukadi-oudi-luti-kati koti kiyaba oti fulo gegeitalo. Modae.