2 Kolinti
Polokafo mono wenena Kolinti numudo minamo ya lufuwa kofa aiga wi fulo gedami ka
Komu Ka
Polokafo Masedonia ebalo minami kamenalo ya Yesu koli kikito umamo wenena Kolinti numudo ido Akaiya ebau minamo wenena ya lufuwa ama kofa aiga wi fulo gedami ne. Komu lufuwa wi fulo gedaigu yau mona melamo yamu goduto, ido loga-miga o edamo ka yamu itibito logimami ka ya koliti meyalo melafemo, ido koliti kolámoti o minafe? loto, lono lakoina olami we Taitusi ya Kolinti numudoka uto kani ya kolitoto, itibito oto lonumuto ya kolinagolowe, loto ilifi melaito wiye. Uto kani kolitoto, itibito oto ya eti limo, Kolinti wenena Polo kala koliti maleka ya seni-muluni olu eleyapa wiyafa, ido liliga yate Polo ya aposolo ona ya minámaiye, loti lanako, seni-muluni eleyapa wiyámae, loto loumaito, kolito ya lufuwa ama ya kofa wi fulo gedami ne. (2 Kolinti 7:5-9)
Polokafo lufuwa ama wiyaigu ya wenena maleka seni-muluni eleyapa wiyamo yamu alikani oto, Yesu Kilisto kala yaki api gilibito, ido neta ko ánamo wenena yamu koliti neta ma gimalo, loto logimami ne. Ido aposolo ona minámaiye, loti namomu lo-lo amo wenena ya namo moda aposolo ona kula minowe, loti kolinagilae, loto aimola monala melami kala ido keina naba kolami kala ya lufuwa ama wito Taitusi umaito, oluto uto gimami ne.
1
Lo oloto melami ka
Aiyo, linate Goti wenenala Kolinti numudo monolo mau wi-wi amo, ido felegaga wenenala muki Giliki eba kuliya Akaiya mika negu-negu minamo, linate muki ya namo Polo, Kilisto Yesu aposolola, Gotikafo kala lalo kito lonolalo ya fulo nedaito olu minomo we ya mono wenenate Timotite minoto, lufuwa ama ya wi fulo gedowe. Eyalo.
Metefo Gotidokati ido Wekola Yesu Kilistodokati ya nasafili mona ido you amene mona ya linatedoka mino gedenaiye.
Metefo Goti ebola ka
Wekolate Yesu Kilisto Gotila minoto Melafo minoto imo we kuliya ya olu faka lokele. Amo ya Metefo siya-mulunau kolami mona aboga ya ne. Ido sete-muludeu keina kolonimo kamenalo ya ade olu faka lo lede-lede imo we Goti ya ne. Keina mona-mona lamodoka fede lomami kamenalo ya amokafo ade olu faka lo lede-lede o minaiye. Eti o ledami, ya wenena ma keina mona-mona fede giminami, ya amokafo lalimo ade olu faka lo ledami yamaidana oto wenenawa ani olu faka lo gedenawae, loto eti o ledami ne. Moda kolafe? Kilisto keina naba-naba kolami mona yamo lamoguka naba-naba faitoto nemo yamaidana oto ya Kilisto lulau mino edonimo yamu Gotikafo ade olu faka lo lede-lede imo mona yaki lamoguka naba-naba faitoto ne.
Keina lamodoka fede lumunami yakafo linate adi olu faka loto olu omudi kenaiye, loto linatemu kolito keinawa ya olu lomami ne. Ido lamo ade olu faka lo ledenami ya moda linatedoka yaki lonowa oluto adi olu faka lageto ya lamo keina kolonimo yamaidana oti linate yaki keina kolinawagu yau auma witi nedi minenawamole, loto linatemu kolito ade olu faka lo ledami ne. Ido linateki lamoki lakoina keina kolonimo yamaidana oto ade olu faka lo ledami mona yaki lakoina olu minone, loto koloninako, yamu linate moda auma witi nedi minenagilae, loto auma wito koli minone.
Ena mono wenenane-motao, lamo Esia ebalo minonido keina ma fede lomami ya linate kolife lenawae, loto ka ama ya logiminagolowe. Kolalo. Lamo aya ebalo minonimo ya keina naba-naba yakafo olu afima o ledaito ya aumate fuli lito moda fulunube? loto koloba, ido Gotikafo wenena folaguti olu nedi gede-gede omo we ya koli kikito numuti, linanimo aumatina yamu kolámenawae, loto oude-lute-kateu yau fulunumo kawa olu oloto pi lomaiye, loto kolone. 10 Eti loto koloba, ido aya fulunumo monawa nosa naba ámaigu yauti olu omude kami we yakafo oiya ama yaki olu omude kenami ne. Ido neta-mata yaidana-amaidana kofa-kofa oloto pi lumuto lofo fulunae, loto enami, ya amokafo kofa-kofa olu omude kenami ne, loto koli kikito umuto kiyaba o ede minone.
11 Yamu ya linate yaki ade olu faka loti lamomu koliti loumu-umu o minalo. Etiti wenena mukite loumunawamo kawa ya Gotikafo kolito nasafili o ledageto, ya wenena mukite lamomu koliti siyane, lalole, loti ebola loumunawae, loti loumu-umu o minalo.
Polokafo mona ona kula yako Kolinti wenena mele gedami ka
12 Etito ya sete-mulude lalo koli-koli onimo ka ya logiminagolowe. Kolalo. Lamo moda felegaga mo limo monalo moinonimo ya Gotidokati ne. Mikaleka ama ka manedeu negu yauti monawa ya melámone. E’e, Goti nasafilila yakafoko adelo olu faka lito mikaleka wenena muki omunido ya monawa melone. Ido linate kiliyanigu ya moda oto dito aya monawa meloninako, yamu ka ma ukadelo minámaito moda oude-lute-kateu lalo koli-koli onimo ka ya lo oloto melone.
13-14 Yamu kolalo. Lufuwa wi fulo gedonigu ya ka ailo-ailo ma wiyámone. E’e, linate moda katoti monawa kolife lenawado, yamako wi-wi one. Etito komu ya lamomu koliti kefoma kolife loti kolafa, ido aiga ya moda kolife lo fuli lenawamo ne, loto sene-muluneu kolito kiyaba o minowe. Moda kolafe? Wekolate Yesu kamenalalo ya lamo linatemu kolito alikani enumo yamaidana oti linate yaki lamomu koliti alikani enawamo ne, loti kawa mona ya koli fuli lenawamo ne, loto kolito ya kiyaba o minowe.
15 Aya yamu kolito linate ya kamena lele ya lalo kolinawamo ne, loto komu linatedoka oto geyetoto, 16 ya linatedokati uto Masedonia ebalo minoto, ya itibito Masedonia ebalekati ya kofa linatedoka enae, loto kolowe. Ido yaloti ya linate ane olu faka loti Yudia ebaleka nilifi melenawamo ne, loto kolowe.
17 Namo ya eti loto kolito lomo ya moda itibi-natibi oto fa ka lofe? Ido eti enae, loto kolomo, ya mikaleka mona meleto kamena lawoko ya faifa O, loto, ido E’e, loto, lelewai ya olu lawoko ito lofe? E’e, etito minámaiye! 18 Goti ya ka ona aboga nenako, yamu lamo ka logimonimo ya faifa O, loto ido E’e, loto lakoina ekeleto ádone.
19 Moda kolafe? Linate kiliyanigu yau Goti nalafo Kilisto Yesu ya namole Sailasile Timotile kala kuwa lo oloto melonimo we yakafo O, loto ido E’e, loto lelewai olu lawoko meleto ádaiye. E’e, amo ya kamena-kamena moda O, lotoko ya liye. 20 Aya yamu kolalo. Gotikafo eti enae, loto lo mele lomami ka muki ya Kilistodoka moda O, lotoko ne. Etito nemoma nenako, yamu amodokati ya lalimo moda Onale, loto Goti kuliya olu faka lo minone.
21 Ena linateki lamoki Kilisto lulau mino edonimo mona olu auma wi ledami we, ido yá nowala fili ledami we ya Goti aimola ne. 22 Amokafo aimola lebonala o ledami ne. Ido aiga lumunami neta yauti komu apito lomami neta ya aimola Ouna luteu mele ledami, ya etito netawa muki lumunagoliye, loti kolinagilae, loto luteu mele ledami ne.
23 Ena Goti oune-lune-kane neyefe limo we omunalo ya ka ona ama logiminagolowe. Kolalo. Linate keina naba-naba kolitenawae, loto linatedoka Kolinti numudo ya kofa itibito ámowe. 24 Eti lomo ya linate koli kikitina ya kiyabala we naba ya minone, loto ádowe. E’e, koli kikitina yakafo olu auma wi gedageto auma witi nedi minae, loto kolomoma nenako, yamu lalo kolinawae, loto linateki lakoina amo lonola olonimo wenena minone, loto lowe.