1 Ɔlaa obuɛ wɔ mmle nte nkpo alɛ, nse otii owo komiɛ alɛ ale bafũbanutɛ tunletɛ, ɔkpɛ nwaa eediki. 2 Yaa babi tunletɛ yi, dikpe nii anle otii wɔ baatii ninankakatɛ nwɔ ni di suoto, an-yɔ ɔsanko onwii, anle numbentɛ, anle otii wɔ ninkpee ni otu, anle otii wɔ baatii mbu nii. Dikpe nii antofo mmle manfũ ni bafɔɔ ku otii wɔ ninfuo ni asaa otuo. 3 Dinaa alɛ anle tasiɛntɛ, ku otii wɔ ninantɛ ni suoto kaasɔ. Dikpe nii anle otii wɔ niɛyɔɔ nii, ambɔmbɔ ni suoto lɛyɔɔ. Dinaa alɛ anle otii wɔ nimbɛbɛɛ ni anu kooto suoto. 4 Dikpe nii anle otii wɔ nikofuo ni leyo nɔɔ batii onyu nwaa, anta babi nɔɔ mbu nwɔ nii, mankyɔɔ nwɔ ni ɔlaa kotoko. 5 Nse otii owo diloofuo nnwɔɔ omu nɔɔ leyo onyu, lɛ abafuo bafũbanutɛ oklee anleko ma katũ? 6 Dinaa alɛ bafũbanutɛ tunletɛ lele otii fɔle wɔ ninayimuɔ ni di ofũ onu kamɛ, alɛ silaatu nwɔ atakatɛsa suoto katoo alalaa fɛ mmle di Abonsam labla nii, dikple nwɔ letokonanfi. 7 Dikpe nii anle otii wɔ baatii ba ninansi ni kaasiisakɔ nɔɔ kobu nii, mmle okle manakpee nwɔ ni sinunsɔ alaabuo ni di Abonsam okũ wɔ ɛɛkyɔɔ ɛɛtɛ ni kamɛ.

8 Nkpo kafɔɔ, dikpe nii, bafũbanutɛ kasiisakɔ bakyakaakotɛ kale batii ba ninkpe ni nkpa biene nɛ. Mammufũ ɔkpɛ nwu mambla osie kanya. Balaale batii ba ninyi ni nta kpinwu mansiɛ ni ku koto banumbɛbɛɛtɛ 9 Dikpe ni kafɔɔ beemufũ ofũ onu ɔlaa biene nwu beediki ni kayi beeklee osie kanya ku otu biene wɔ nintɔkɔ ni otii ɔlaa. 10 Kafɔɔ fiɛ baadiki ma ni fɛ kasiisakɔ bakyakaakotɛ, dikpe nii mansɔ ma mannyu nse beewo fiɛ baata ma ɔkpɛ nwu mambla. 11 Basɔfɔ lɛma kafɔɔ, dikpe ni beele basanko ba ninkpe ni nkpa biene. Dinaa alɛ beele batii ba nimbuɛ ni batii suoto sɛlaa. Nioso dikpe ni beele basanko ba nimmufũ suoto manklee nii, manlolaa asaa amuu mambla nii. 12 Kasiisakɔ kyakaakotɛ yi, dikpe ni ɔsanko onwii an-yɔ, anlolaa babi nɔɔ ku leyo nɔɔ batii bamuu anklee nwaa. 13 Bakyakaakotɛ ba ninlolaa sɛkpɛ lɛma mambla ni nwaa, manwɛ dibu mankyeko batii nfũ. Nkpo oso manwɛ sɛkambi mankakatɛ di Yesu Kristo ofũ onu ɔlaa suoto manta batii.

14-15 Kuntɛ kɔkpana ɔlaa wɔ mmle nkyesee fɔ, konyu osuku nlɛ di obe kakui kamɛ mawa manya fɔ. Kafɔɔ nse kokpi kamaa ku ɔwa, kukũ ko mmle mata fɔ fantofo mmle okle dikpe ni batii kasiɛ ni nkpa di Yaa leyo, dile ni batii ba niefũ Yaa wɔ ninkpe ni nkpa beenu nii. Mma ninle lɛsɔse ku lɛkpaka le ninkle ni nwaako ɔlaa nwu nɛ. 16 Yaa owofalaa wɔ beediki ni kanyi buofũ buonu nii, lemuɔ. Kuonwii kafɔɔ dilabafuo nwu osĩ. Nnwu nile alɛ,