1 Di ayi anɔɔ sɛmaa, Yaa Oletatɛ Nɔɔfo Anania ku Yuda batii banɔɔfo bawo ku kanyadikitɛ wɔ bɔɔlɛɛ ni Tertulo baakyɛ Kaesarea. Baawa Felike nfũ alɛ bɔɔbadiki Paulo sikpile mantɔkɔ nwɔ.

2 Nioso obe wɔ baalɛɛ Paulo bawako nii, Tertulo lakye kasɔ ku lɛkakatɛ alɛ, “Ɔnɔɔfo loo wɔ buobu ni, obe kpinwu ditɔɔwa alɛ busi ni di atoko ɔkyɛ ole kamɛ nɛ, diekye di ninumbe ku lɛsaatofo le fɛɛyɔ fɔɔkpaa wo ni oso. Butɔɔnya kafɔɔ kakyi kpinwu biene ka nintɔɔwa ni di kasɔ loo ka mmle suoto. 3 Lɛsaa le mmle nle lɛsaa le niebuo ni awo Yuda batii bamuu anu. Nioso buɔpɛ fɔ sɛfa. 4 Noomiɛ nlɛ nlalaasa fɔ obe, nioso buotikitifɔ lekoto bulɛ faale wo sibualɛ fankyɔɔ wo kotoko di ɔlaa kakui wɔ bukle ni di osuɔtɔ wɔ mmle suoto.

5 “Diekye butɔɔnya bulɛ kudu kpeetɛ ale, akyɛ ookyi aba aba ookpee kudu di Yuda batii nntɛɛ di kayi kamuu. Eekple ale kafɔɔ dikudi le ninle ni Nasaret batii dikudi lalaale tunletɛ. 6 Diɛkyakaa nii, aamiɛ alɛ ɔɔkpɔnɔnfɔsa Yuda batii Yaa Olekatakɔ, ninfɛ buamufũ nwɔ nɛ. Buamiɛ bulɛ buɔkanko nwɔ di kufiofa loo kanya fiɛ. 7 Kafɔɔ bakpɛtɛ banɔɔfo ɔnɔɔfo Lisia lawa aabafũ nwɔ di nnɛɛ loo kamɛ ku osie. Ni aabuɛ alɛ, batii ba niɛyɔ ni ɔlaa di Paulo suoto bawa di anu lɛfɔ nɛ. 8 Nse afɔ omu lɛfɔ fɛɛkaalɛ nwɔ sɛlaa yi, fabanya falɛ sɛlaa se buobuɛ ni di suoto nɔɔ simuu nte nkpo.”

9 Ni di Yuda batii bamuu lasi kanya baabuɛ alɛ, sɛlaa se simuu di Tertulo lebuɛ ni di suoto nɔɔ site nkpo.

10 Obe wɔ di Ɔka wɔ mmle lawii ni Paulo kɔnɛɛ alɛ akakatɛ nii, Paulo labuɛ alɛ, “Teete, n-ye nlɛ fatɔɔka Yuda batii sɛlaa di alɛɛ kpinwu kamɛ. Nioso suoto kɔyɔɔ mi alɛ madiki suoto kanya di anu lɛfɔ. 11 Fɛ mmle faye nii, diɛbla fɛ lefosi ayi anyɔ nɛ, lɛkyɛ Yerusalem nlɛ kɔlata ole di Yuda batii Yaa Olekatakɔ kamɛ. 12 Yuda batii diɛnyɛɛ alɛ kɔnanfi ɔlaa ku otii di Yaa Olekatakɔ, ee banyɛɛ kokpee kudu di Yuda batii kasiisakɔ ee lɛkpaka lɛba lewo. 13 Batii ba mmle nnaa lɛsalɛsaa babayila ni di suoto mambuɛ alɛ, sɛlaa se boobuɛ mi ni di suoto nte ni nkpo. 14 Kafɔɔ, lefũ lekpee nlɛ, kosumu bawa loo Yaa di osuku wɔ boobuɛ alɛ diɛlɛ nii. Kafɔɔ lefũ asaa ya amuu bɛɛkpana ni di Mose kufiofa kamɛ ku Yaa ɔlaa babuɛtɛtɛ akũ kamɛ lenu. 15 Nkpe osuku onyu fɛ mmle di mma kafɔɔ bakpe ni osuku onyu alɛ batii biene ku bakpiletɛ, Yaa masɛnkɛsa ma ankyeko bakpi kamɛ. 16 Ta nle mmle oso, kokpee osie nlɛ disibu biene kawɛ mi di Yaa ku batii anu.

17 “Alɛɛ kpinwu nsinnaa in di Yerusalem nɛ. Ninfɛ lɛkyɛ nlɛ kɔlaata bapiitɛ asaa, ninta ole kafɔɔ nta Yaa. 18 Obe wɔ latɔɔbla ni disi ɔkpaasu amanle nwu, ni di Yuda batii bawo labanyɛɛ di Yaa Olekatakɔ ninfa nɛ. Diele munko adu bakpeetɛ niawɛ ninfa. Kudu kuninwii kafɔɔ ditawɛ ninfa. 19 Yuda batii bawo niakye ni Asia kasɔ niawɛ ninfa. Nse mma dikaatɛ alɛ manwa ɔkyɛ lɛfɔ ninfũ, nse ɔlaa owo nkpe ma di suoto nii, mambuɛ. 20 Ee batii ba ninsi ni ninfũ, ta ma babuɛ okpile wɔ lɛpɔɔ baalo mi ni, di obe wɔ di Yuda batii bakantɛ banɔɔfo lakankoe ni. 21 Ɔlaa wɔ ko latakatɛsa sɛlɔ katoo labuɛ ni ninle alɛ, ‘Bɔɔkankoe ninfũ miɛ ta lefũ lenu nlɛ bakpi mataka ni oso.’ Kaalɛ ma nse nle mmle ninle mi okpile wɔ lɛbla ni.”

22 Nioso Felike wɔ ninye ni ofũ onu osuku nwu nwaa, latɔkɔ Yuda batii ba mmle alɛ, “Bidiɛ biesoko dilaase di obe wɔ di bakpɛtɛ banɔɔfo ɔnɔɔfo Lisia mawa ni fiɛ nimbudisa ɔlaa wɔ mmle.”

23 Ni aatɔkɔ bakpɛtɛ ɔnɔɔfo alɛ baakpaa Paulo baalaakpee leeyo nɛ. Kafɔɔ batambla nwɔ amumu, baalolaa nwɔ banyu, bata kafɔɔ basiɛwo nɔɔ osuku se lɛsaa lewo lefĩ nwɔ baabla batɔɔ.

24 Di ayi awo sɛmaa, Felike ku ɔsɔfɔ nɔɔ Drusila wɔ ninle ni Yuda otii lawa, ni aata baakpaa Paulo baawako, ni aatɔkɔ ma Yesu Kristo ofũ onu ɔlaa nɛ. 25 Di obe wɔ di Paulo lasiɛ aatoodiki sɛlaa kasɔ di nkpa biene osiɛ suoto aatɔɔtɔɔ nii, ku suoto omufũ oklee ku Yaa lɛkanko le nikɔwa nii, lɛyɛkɛ lapɛ Felike. Ni aatɔkɔ Paulo alɛ, “Taka faatɔɔkyɛ. Nse lɛwɛ obe nwaa makple nlɛɛ fɔ.” 26 Aabu kafɔɔ alɛ Paulo matɔkɔ alɛ, oomiɛ koto kowo ammufũ nwɔ kɔɔkpaa, nioso obe lele anta manlɛɛ Paulo mantɔɔ manko nwɔ mankakatɛ.

27 Di alɛɛ anyɔ sɛmaa, baadiki Felike, ni baayɔ Porkio Festo baawako kasiɛkɔ nɔɔ nɛ. Kafɔɔ ta Felike lamiɛ alɛ Yuda batii babɔmbɔ nwɔ ni ɔlaa oso, aata Paulo lakple aasiɛ di leeyo katenkɔ.