3
Yesu Kayilakɔ Lɛtaka Katoo Kalenke Mose Kale.
1 Nkpo oso babiloo, aye ba di Yaa lɛlɛɛ alɛ biasɛko nwɔ ni kafa nɔɔ asaa, ɛɛbla ye ni klekle, bibu diisi di Yesu wɔ eekyesee alɛ ale ni Oletatɛ Nɔɔfo di ofũ onu loo n-yɛ ni di suoto binyu. 2 Aabla asaa di osuku kanya aata Yaa wɔ nialɛɛ nwɔ alɛ abla nwɔ ni ɔkpɛ fɛ mmle okle di Mose labla ni asaa di osuku kanya di Yaa leyo kamɛ. 3 Fɛ mmle okle di otii wɔ nietofo ni leyo nfũ dibu anlenkee ni leyo nimu yi, nkpo okle kafɔɔ di Yesu lefũ dibu alenke Mose nɛ. 4 Diekye leyo biala, otii nietofo ni. Kafɔɔ Yaa ninle otii wɔ niɛbla ni lɛsaa biala. 5 Mose labla lɛsaa biala di osuku kanya di Yaa leyo fɛ kpɛmblatɛ. Ni aadiki sɛlaa se di Yaa kɔwa ni ɔbabuɛ aatuo nɛ. 6 Kafɔɔ Kristo nnwɔɔ ɔɔbla asaa di osuku kanya fɛ Obi wɔ nin-yɛ ni di Yaa leyo kanya. Awo ninle nwɔ leyo nwu nkpo nse buokpee situ, buotika nwɔ anu lɛɛsaa le buonyu osuku munta ni osie kanya.
Ɔnyɛɛ Katɛkɔ Nkpe Diɛta Yaa Batii.
7 Nkpo oso fɛ mmle okle di Yaa Ninwuna labuɛ alɛ,
“Nse bienu Yaa sɛlɔ miɛ yi,
8 bitanwɛnsa situ lee osie,
fɛ mmle okle di bawa lee labla nii,
baataka baayila ni di Yaa suoto,
fɛ mmle okle baabla ni dii nwu nkpo baawɛ ni di ɔfaafuu kamɛ,
di obe wɔ baasɔ nwɔ baanyu nii.
9 Nfa di bawa lee lasɔ mi baanyu,
baawolaa mi kaanya nɛ,
nu baanya asaa ya labla ni di alɛɛ ofosi ana kamɛ.
10 Nkpo oso ɔblɔ lafiɛ mi di batii nwu nkpo suoto,
ni labuɛ nlɛ, ‘Obe lele beeyu di situ lɛma kamɛ,
diekye bayinya sisuku nii batɛ nsũ.’
11 Nkpo oso ɔblɔ lafiɛ mi, ni laka ntam osie kanya nlɛ,
‘Diidii blɔbabuo kasɔ ka suoto nlɛ kamata ma mantɛ ni ɔnyɛɛ!’ ”
12 Babiloo, bilolaa binyu nwaa bilɛ, kuonwii kaamɛ lee diɛwɛ otu kpile wɔ ninanfũ kunu nii, alɛ aakple di Yaa wɔ ninkpe ni nkpa nkpaamaa. 13 Kafɔɔ, bika bawo obe lele fɛ mmle okle di miɛmiɛ wɔ beebuɛ ni lɛkaako ye ni oso, alɛ okpile dilaakyɔnkyɔ kuonwii lee alɛ aawɛnsa otu nɔɔ osie.
14 Diekye nse buotika anu di Kristo suoto osie kanya diɛlaase di kayɛntɛlekɔ fɛ mmle okle buakye ni kasɔ yi, ninfɛ fiɛ bubawɛ lele ku nnwɔɔ nɛ. 15 Nnya ɔlaa wɔ di Kɔkpana Klekle Kukũ lebuɛ ni. Alɛ,
“Nse bienu Yaa sɛlɔ miɛmiɛ yi,
bitanwɛnsa situ lee osie fɛ mmle baawa lee labla ni,
di obe wɔ baataka baayila ni di Yaa suoto.”
16 Bawe niale batii ba nianu ni Yaa ɔlaa fiɛ baataka baayila nwɔ di suoto? Mma niale batii ba bamuu di Mose lakpaa aakyeko Egipte kasɔ suoto nɛ.
17 Bawe di Yaa lanya ɔblɔ aakpeeko alɛɛ afosi ana amu? Mma niale batii ba niabla ni okpile di Yaa lata ma baakpi ni di ɔfaafuu kasɔ nɛ. 18 Obe wɔ di Yaa laka ntam aabuɛ alɛ, “Diidii blɔbabuo kasɔ ka suoto nlɛ kamata ma ni ɔnyɛɛ ɔtɛ,” bawe aalaka? Mma niale batii ba niataka baayila nwɔ ni di suoto nɛ. 19 Nioso buɔnya bulɛ batafuo kasɔ nwu nkpo obuo, diekye, batafũ baanu.