5
Lefosobi Nwu Latikiti Kukũ Nwu Baatĩi Nii.
1 Nle mmle sɛmaa lanya otii wɔ ninsi ni di lɛkakpomii nwu nkpo suoto nkle kukũ kunwii bɛɛkatu ni di koletanɛɛ nɔɔ kamɛ. Bɛɛkpana asaa di kukũ nwu nkpo kamɛ ku sɛmaa, bɛɛyɔ atĩisaa akuɛnsĩ beetĩi kũ kanya. 2 Ninfɛ lanya Yaa tɔkyɛntɛ sientɛ onwii labuɛ ku sɛlɔ siene alɛ, “Owe niesiɛko alɛ aafiɛ atĩisaa akuɛnsĩ nwu nkpo antikiti kukũ nwu nkpo?” 3 Kafɔɔ otii kuonwii nnaa di osi ee kasɔ ka mmle suoto ee baakpi kamɛ aafuo ni kukũ ko mmle otikiti, annyu kũ ni kamɛ. 4 Nioso lawi kaku osie kanya diekye batawɛ otii kuonwii niesiɛko aafuo ni kukũ ko mmle otikiti annyu kũ ni kamɛ.
5 Ninfɛ baanɔɔfo nwu nkpo onwii lɛma latɔkɔ mi alɛ, “Tanwi. Nyu! Kyata wɔ niekye ni Yuda kafaabi kamɛ, ale ni Dawid leyo kamɛ obi finle, ntoolenkee alɛ aafuo atĩisaa akuɛnsĩ nwu nkpo ofiɛ antikiti kukũ nwu nkpo.”
6 Ninfɛ lanya lefosobi ninwii n-yɛ di lɛkakpomii nwu nkpo ntɛɛ, asaa nwu nkpo ana ninkpe ni nkpa ku banɔɔfo nwu nkpo lamana ni baakyi. Diate fɛle olo baalo lefosobi nwu nkpo. Diawɛ akya akuɛnsĩ ku anu akuɛnsĩ ya ninle ni Yaa Ninwuna le aakyesee ni kayi ka mmle kamuu. 7 Lefosobi nwu nkpo lakyɛ aalaafũ kukũ nwu nkpo di otii wɔ ninsi ni di lɛkakpomii nwu nkpo suoto, koletanɛɛ nɔɔ kamɛ. 8 Obe wɔ aafũ ni kukũ nwu nkpo, asaa nwu nkpo ninkpe ni nkpa ku banɔɔfo afosi anyɔ bana nwu nkpo lase ntũ kaasɔ baata lefosobi nwu nkpo. Obiala lɛma laklee sinu lɛsansaa le bɛɛyɔ sikũ bɛɛbla ni ku koto sɛɛle babɛɛsi di siluufii layii ni kamɛ pɔ. Siluufii se mmle nle Yaa batii sɛlaa ɔpɛ. 9 Baasa onu fɔle alɛ,
“Feesiɛko alɛ faafũ kukũ nwu nkpo,
fanfiɛ atĩisaa nwu nkpo.
Diekye afɔ baalo.
Diefe ni nintɔ lɛfɔ nwu faawii ni suoto oso,
ni fɛɛta koto baatii disi feefũ ma fɛɛta Yaa nɛ.
Beekye ni nfaabi ate ate kamɛ, ku sele ate ate babuɛtɛ kamɛ
ku batii ate ate kamɛ ku kale biala kamɛ.
10 Fatɔɔbla ma beekple olebatatɛ sɛɛka lɛfɔ kalekɔ fɛɛta Yaa loo.
Babale sɛka kafɔɔ kaasɔ ka mmle suoto.”
11 Lakple lanyu nii, lanu Yaa batɔkyɛntɛ kpinwu manamafuo ni ɔka sɛlɔ kɔmana lɛkakpomii nwu ku asaa nwu ana ninkpe ni nkpa ku banɔɔfo nwu nkpo mankyi. Yaa batɔkyɛntɛ nkpe nkpe nwu nkpo, 12 latoobuɛ ku sɛlɔ siene alɛ,
“Lefosobi nwu nkpo baalo ni lesiɛko,
alɛ aafũ osie ku lɛsaawɛ ku lɛsaatofo ku ɔnyɛɛ,
ku dibu ku leklekle ku katansa!”
13 Ninfɛ lanu asaa ya amuu di Yaa lɛbla ni di osi ku kasɔ ka mmle suoto ku kasɔ kamɛ ku n-ya nisi ni leekpo kamɛ latɔɔsa onu baatoobuɛ alɛ,
“Otii wɔ ninsi ni lɛɛkakpomii nwu nkpo suoto ku Lefosobi nwu,
baata katansa ku dibu ku leklekle ku ɔnyɛɛ, dinaa ni kaloo!”
14 Ninfɛ di asaa nwu ana ninkpe ni nkpa labuɛ alɛ, “Diwa kaanya.” Ninfɛ baanɔɔfo nwu nkpo kafɔɔ lase ntũ kaasɔ baasumu Yaa ku Lefosobi nwu nɛ.