18
Yohane Lanu Alɛ Babilon Okpoo Ntoobiɛ.
1 Nle mmle sɛmaa, lanya Yaa tɔkyɛntɛ bamba onwii kosoo ankye osi anwa kasɔ. Aawɛ osie kplɛ, lɛkpa nɔɔ kafɔɔ lakpa di kasɔ kamuu suoto. 2 Ninfɛ aafaa ku sɛlɔ siene aabuɛ alɛ,
“Kutoobiɛ lo! Babilon okpoo kplɛ nwu niefũ ni leyooto ntoobiɛ!
Kutookple anwuna kpile kasiɛkɔ.
Nfa nfɛ di anwuna kpile biala ku bakansiɛ ba ninankpa ni kɔmɛ ku mba mankyidi ni biala nfɛ nsi.
3 Diekye nnle mmuu batii,
ntoonyi okpoo nwu lɛsɔnɔkpee boosiɛ fɛ nta.
Kutɔɔkyɔnkyɔ kasɔ ka mmle baka bamuu kuokpee di lɛsɔnɔkpee ninwu kamɛ.
Kayi ka mmle basaasunsutɛ kplɛ kafɔɔ ntookple basaawɛntɛ ta okpoo nwu nkpo ɔkɔnsɔ akleesaa kpile oso.”
4 Ni lakple lanu sɛlɔ bamba lakye osi siabuɛ alɛ,
“Batii nii, bidie di okpoo nwu kamɛ biwa.
Mmle okle minamabla ni sikpile se ɔɔbla ni,
alɛ letokonanfi le nimawa ni di okpoo nwu batii suoto, dilaawa ye ni di suoto!
5 Diekye okpoo nwu nkpo sikpile ntɔɔpɔ siɛtaka fɛ dituu siɛlaadu osi.
Yaa kafɔɔ ntoonyuma ɔsaabla kpile wɔ bɔɔbla nii.
6 Bibla nwu fɛ mmle okle
di nnwɔɔ kafɔɔ aabla ye ni.
Bibla nwu bikyisa sɛɛnyɔ kamɛ fɛ mmle okle di nnwɔɔ kafɔɔ aabla ye ni kanya.
Opũ wɔ kamɛ aakusii nta aata ye ni yi, ayee bikusii di nwu nkpo okle kanya bitɔɔ sɛɛnyɔ kamɛ.
7 Ni mmle okle di okpoo nwu nkpo latakatɛsa ni suoto katoo di sikpile ninnwu asaa ɔwɛ kanya yi,
bita nwu kuwɛ dibuo, kuowi kulaase di sikpile ninwu kanya.
Diekye okpoo nwu nkpo nte fɛ ɔsanko wɔ nimbuɛ ni di otu nɔɔ kamɛ alɛ,
‘Ɔkasanko nle, nsi di lɛkakpomii nii suoto.
Ninle kpisɔfɔ, diidii kafɔɔ namawi kaku!’
8 Nle mmle oso, di dii ninwii kamɛ abuo kamawa nwɔ di suoto,
dile ni sifiɛ ku sɛnyaami ku kɔka.
Babayɔ ɔtɔ manwɔɔsɔɔ fɛɛ,
diekye Saate Yaa wɔ nimakanko nwɔ nii, nnwɔɔ ninlenke nɛ.
9 “Nse kasɔ ka mmle baka ba niakyɛ ni okpoo nwu nkpo baalaakpee ni asɔnɔ kaamɛ ninwu, baale ni nkpa lɛnya ɔtɔ wɔ ninkofiɛ ni kɔyɔ, babafaa kaku, manwi sɛnyaami diisi ninwu. 10 Baka ba mmle nwu nkpo kamayila fanfa mantoonyu lɛsaa nwu nkpo, diekye bɔɔyɛkɛ alɛ okpoo nwu nkpo dibuo nwu okle kamawa ma di sutoto. Bababuɛ alɛ,
‘Diɔkpɛ nyaami lo! Diɔkpɛ nyaami lo!
Okpoo wɔ ninkpe ni osie!
Babilon, okpoo kplɛ nwu nintoofũ ni leyooto!
Di lebombo ninwii kamɛ pɛ ni bɛɛnanfi fɔ kootoko nɛ!’
11 “Kayi ka mmle basaasunsutɛ kplɛ bamuu mawi kaku ku sɛnyaami, diekye otii kuonwii diloosinya ma asaa. 12 Otii kuonwii diloosinya ma koto sɛɛle ku koto fututu ku afuɔ ya niefũ ni kɔya ku annii ya niefũ ni kɔya ku abula biene lɛma sɛɛle ku abula biene lɛma wɛɛfɛɛ ku abula biene kplɔkplɔ ku abula biene fututu ku awoso ya ninkpe ni ɔkɔnɔ ku asaa ya bɛɛyɔ bato anyɛɛ bɛɛbla nii ku n-ya bɛɛyɔ awoso ya niefũ ni kɔya bɛɛbla nii ku abɔɔsaa sɛɛle bɛɛbla nii ku n-ya bɛɛyɔ abɔɔsaa wɛɛfɛɛ bɛɛbla nii ku ayo otofo afuɔ ya niefũ ni kɔya. 13 Ku afata ya ninkpe ni ɔkɔnɔ osie kanya manlɛɛ nya ni sinamɔn ku kutu akpeesaa ya nimpɛ ni ɔkɔnɔ ate ate ku oluufii ku klobo ku nnɔnyi kɔnɔnkɔnɔ be niefũ ni kɔya ku nta ku nnaafũ ku nnɔfɔ ku akpaa ku banankyue ku bafoso ku bapɔnkɔ ku abɔɔsaa bakeke ku balanle ku bia batii ɔyɔ ɔta ole.
14 “Basaasunsutɛ labuɛ alɛ, ‘Asaa biene ya amuu foomiɛ falɛ awɛ fɔ nii ntooyu fɛɛ. Lɛsaawɛ lɛfɔ ku sekpeele lɛfɔ kafɔɔ ntooyu, diidii kafɔɔ flabasinnya ni!’ 15 Basaasunsutɛ ba niekple ni basaawɛntɛ di asaa nwu nkpo osunsũ kamɛ di okpoo nwu nkpo kamɛ, kamayila fanfa, diekye bɔɔyɛkɛ alɛ okpoo nwu nkpo dibuo nwu okle kamawa ma di suoto. Babawi kaku ku sɛnyaami mambuɛ alɛ,
16 ‘Diɔkpɛ nyaami lo! Diɔkpɛ nyaami lo! Obe onwii kamɛ,
okpoo kplɛ wɔ mmle niefũ ni leyooto sekpeele nɔɔ niale abula fututu biene ku abula sɛɛle biene,
okpoo wɔ mmle niayii ni pɔ ku koto sɛɛle ku afuɔ ya niefũ ni kɔya ku annii ya niefũ ni kɔya nɛ lo!
17 Kafɔɔ di lebombo ninwii kamɛ atooyu lɛsaawɛ nɔɔ nwu nkpo fɛɛ!’
“Ni di seklo kplɛ basaate ku banyayilatɛ lɛma ku osuku bakyɛntɛ ku batii bamba ba ninsunsũ ni asaa di lekpo suoto layila fanfa nɛ. 18 Ni baawi kaku ku kudu osie kanya di obe wɔ baanya ni kɔyɔ ko nikodie ni di ɔtɔ nwu nikofiɛ nwu nii, baabuɛ alɛ, ‘Okpoo kuonwii diiwɛ fɛle okpoo kplɛ wɔ mmle okle!’ 19 Ninfɛ baalɛ kɔtɛ baakpete di asi lɛma, baawi kaku ku sɛnyaami baabuɛ alɛ,
‘Yɔɔsa! Yɔɔsa ko buɔta okpoo kplɛ wɔ mmle niafũ ni leyooto.
Kule okpoo wɔ di batii ba bamuu niawɛ ni seklo kplɛ
baatɔɔkyɛ ni nintu osi lawɛ ni lɛsaawɛ lɛma baakyeko nwu ni kamɛ!
Di lebombo ninwii kamɛ lɛsaa biala ledie nwɔ di nnɛɛ kamɛ!
20 Aye ba bamuu ninkpe ni di osi bita suoto siyɔɔ ye.
Aye Yaa batii bamuu ku batɔkyɛntɛ nɔɔ ku Yaa ɔlaa babuɛtɛtɛ, bita suoto siyɔɔ ye!
Diekye Yaa ntɔɔkanko okpoo nwu nkpo eelo nwu lɛpɔɔ di lɛsaa le aabla ye ni suoto oso.’ ”
21 Nni nkpo sɛmaa, Yaa tɔkyɛntɛ siene onwii layɔ kufuɔ kplɛ kunwii aafuki aakpee di lekpo kamɛ, ni aabuɛ alɛ,
“Nkpo okle di Yaa kamayɔ Babilon okpoo kplɛ wɔ mmle anfuki aan-yu kaasɔ osie kanya ku ɔblɔ nɛ.
Diidii kafɔɔ balabasinnya nwu.
22 Sinu lɛsansaa le bɛɛyɔ sikũ bɛɛbla ni ku sinu basantɛ ku kakyukyoe ku dikyukyoo
alaasinkple adie diidii kaamɛ lɛfɔ!
Nnɛɛ kamɛ bakpɛmblatɛ kuonwii
dilasinkple abla ɔkpɛ kaamɛ.
Blaasinnu kafɔɔ kukuɔ kukunwii sɛlɔ kaamɛ lɛfɔ.
23 Diidii kafɔɔ blaasinnya
kandiɛ kuonwii lɛkpa kaamɛ lɛfɔ.
Blabasinnu bakafɔɔ ku bakafɔɔ basa sɛlɔ
kafɔɔ kaamɛ lɛfɔ.
Asaa bayatɛ lɛfɔ niale basientɛ kaayi ka mmle kamuu,
ni fɛɛyɔ sɛbɔ ɔpɛ lɛfɔ fɛɛkyɔnkyɔ batii bamuu kaayi ka mmle nɛ.
24 Yaa lananfi Babilon kootoko, diekye aanya Yaa ɔlaa babuɛtɛtɛ,
ku Yaa batii ba baalo ni ntɔ di okpoo nwu kamɛ,
nwaako ku batii ba bamuu baalo ni ntɔ kaasɔ ka mmle suoto.”