1 Nioso, nse otii owo lɛkanko otii wo nɔɔ, eelo nwɔ lɛpɔɔ di ɔlaa owo suoto, ninnwɔɔ kafɔɔ asi nkpa nwu okle, anaa lɛnyadiki kuninwii. Diekye nnwɔɔ omu nɔɔ suoto atoolo lɛpɔɔ nɛ. 2 Bamuu loo buye bulɛ Yaa lete ninkpe osuku alɛ aakanko batii ba nimbla ni asaa ya mmle okle. 3 Ni nse afɔ fɛ otii kaayi nimbla ni asaa ya mmle okle foolo bawo lɛfɔ lɛpɔɔ, feenyu falɛ faatoso Yaa lɛkanko? 4 Sɛɛ bienyu bilɛ kasakasa oso di Yaa kole wo sifutulɛ, ɛɛwɛ otu ɔtɛ kaasɔ kafɔɔ ɛɛta wo? Nwaako biye bilɛ, Yaa kole wo sibualɛ se mmle okle diekye Omiɛ alɛ akyakaako wo buokyi siitu loo kamɛ.

5 Ta bikpe ni setokopĩ, biesĩ minankyi ni siitu lee kamɛ oso, Yaa kɔwa ye ku letokonanfi nwaa di dii le eediki eese alɛ abakanko ni batii bamuu di osuku tinini suoto. 6 Diekye Yaa mata otii biala koto di ɔkpɛ wɔ ɛɛbla ni kanya. 7 Batii ba niekpee ni okyiini di lɛsaa biene ɔbla kamɛ, beetikanko ni leklekle ku dibu ku nkpa biene osiɛ nkpaamaa, Yaa mata ma nkpa be ninnaa ni kaloo. 8 Kafɔɔ batii ba nimbɔmbɔ ni kalɔ, beesĩ ni ɔlaa biene nwu koto ɔkyɔɔ, batikanko ni asaa kpile ɔbla nkpaamaa Yaa manya ɔblɔ ankpee ko ma annanfi ma kootoko osie kanya. 9 Batii ba bamuu nikɔbla ni okpile, babawɛ dibuo, blɔbawɛ kafɔɔ ɔnyɛɛ ɔtɛ. Yuda batii ninle bakasale diibuo le mmle kamɛ, fiɛ diɛ mba ninanle ni Yuda batii kafɔɔ matikanko. 10 Kafɔɔ mba nimbla ni asaa biene, Yaa mata ma leklekle ku dibu ku suoto lɛyɔɔ. Yuda batii ninle bakasale nimawɛ ni asaa ya mmle, fiɛ di mba ninanle ni Yuda batii kafɔɔ matikanko. 11 Diekye Yaa nínnyu di otii anu aakanko.

12 Batii ba bamuu di Mose kufiofa dienii nii, kafɔɔ bɛɛbla ni okpile, Yaa mananfi ma kootoko ku kukpi manwɔɔ, anamayɔ ni kufiofa nwu. Batii ba kafɔɔ ninsi ni di Mose kufiofa nwu kalɔ bɛɛbla ni okpile, kufiofa nwu di Yaa mayɔ ankanko ma nɛ. 13 Diekye diele batii ba di onu ko boonu ni kufiofa nwu ninte tinini diɛ Yaa anu. Kafɔɔ batii ba nimbla ni diɛ kofiofa nwu nkpo kanya ninte tinini. 14 Nwaako, batii ba ninanle ni Yuda batii Mose kufiofa nwu dienii ma. Kafɔɔ nse situ lɛma se nintɔkɔ ma ni ɔlaa kaamɛ lɛma nta ma mambla asaa ya di Mose kufiofa kotuo nii, ni ɔsaabla lɛma kotuo alɛ bakpe kufiofa kaamɛ lɛma kuntɛ baaye Mose kufiofa nwu. 15 Nle mmle kotuo alɛ Yaa lɛkpana Mose kufiofa nwu diɛ situ lɛma kamɛ. Situ lɛma kafɔɔ ntɔkɔ ma alɛ nwaako kute nkpo. Obe owo kafɔɔ, disibu lɛma nlo ma lɛpɔɔ, obe owo kafɔɔ mantofo alɛ boololaa mambla. 16 Nioso ɔlaa biene wɔ suoto koyie ni lɛkya, kotuo alɛ Yaa mata Yesu Kristo nkanko batii disi kamɛ awofasaa amuu di lɛkankoyi nwu suoto.

17 Aye ba kafɔɔ kobuɛ nlɛ Yuda batii bile nii, bietika ni anu di Mose kufiofa suoto, minkanta bilɛ Yaa batii finle bile. 18 Mimbuɛ kafɔɔ bilɛ biye lɛsaa le niɛyɔɔ ni Yaa kafutu, bietekete kafɔɔ lɛsaa biene diɛ kufiofa nwu kamɛ biediki lɛsaa le ninlɛ nii. 19 Minnyu kafɔɔ bilɛ aye ninle ninu biɛta banumbiɛtɛ, ku lɛkpa biɛta batii ba ninsi ni diɛ ditunu kamɛ. 20 Mimbuɛ kafɔɔ bilɛ aye ninka babuutɛ, mintuo kafɔɔ mba ninayibe ni anu asaa. Biefũ bienu osie kanya kafɔɔ bilɛ lɛsaatofo ku onukwale lete ninsi diɛ kufiofa nwu kamɛ. 21 Ni aye ba nikotuo ni batii bamba asaa, bitootuo suoto lee asaa nwu? Minyie Yaa ɔlaa biene nwu lɛkya minta batii bilɛ, batan-yu, kafɔɔ aye bamu mɔ, bilooyu? 22 Mintɔkɔ batii bilɛ batankpee asɔnɔ, kafɔɔ aye bamu bilookpee asɔnɔ? Biɛtaka biyɛ diɛ afiɔ ɔtɔ suoto, kafɔɔ bilooyu kafiofa asaa bile? 23 Bikle Yaa kofiofa biɔkanta, sɛɛ bieye bilɛ sinunsɔ kɔkpɛ Yaa minankyɛ ni diɛ kufiofa nɔɔ nwu suoto? 24 Bɛɛkpana diɛ Kɔkpana Klekle Kukũ kamɛ alɛ, “Aye Yuda batii nkpa kpile oso, yɛta alɛ batii ba ninanle ni Yuda batii, kɔlɛɛ Yaa leyooto kpile.”

25 Nse biele kufiofa nwu, ni lɛsɔkɔsɔkɔ lee obudi nle lɛsaa le niefũ ni kɔya. Kafɔɔ nse bíele kufiofa nwu, ni lɛsɔkɔsɔkɔ obudi amanle ya biɛbla ni nle lɛsaa fukuti. 26 Nse otii wɔ ninanle ni Yuda otii, anambudi ni lɛsɔkɔsɔkɔ kafɔɔ lele kufiofa nwu, Yaa dilaanyu nwɔ fɛ otii wɔ niebudi ni lɛsɔkɔsɔkɔ? 27 Otii wɔ niele ni kufiofa nwu kafɔɔ anambudi ni lɛsɔkɔsɔkɔ, abalo ye lɛpɔɔ. Kuntɛ aye bɛɛta kufiofa nwu, biebudi asɔkɔsɔkɔ. Diekye bíele kufiofa nwu.

28 Diele suoto sina suoto mannya Yuda otii biene mantɛ nsũ. Lɛsɔkɔsɔkɔ obudi biene nwu kafɔɔ diesi diɛ suoto sina ɔkpɛ wɔ baatii nnya ni diɛ otii suoto. 29 Kafɔɔ otii wɔ ninle ni Yuda otii biene ninle otii wɔ diɛ ɔkpɛ nɔɔ ɔbla kamɛ diotuo alɛ atɔɔyɔ otu nɔɔ ɛɛta ni Yaa. Diele suoto sina se beebudi ni diɛ kufiofa kanya. Kafɔɔ diefe ni di Yaa Ninwuna suoto. Diele otii kaayi kafɔɔ nintakatɛsa otii nwu leyooto katoo, kafɔɔ Yaa.