FILEMON
Pol One Towe eite Filemon ma'e Lese Ausawi
Filemon Peri Tutawe
Meni ape Filemon ma'aru, etiri tomu ne'ese iroteye. Le wiyawi yahowa'i iro siye lu tomu ne'ese a'i iroteye. Pol lu taune ma'e Jisas lo peri au te'e fiyariteye su, meni Filemon Jisas ne tote tawesi umasiteye. Nowe me'iye su, wiyawi yahowa'i iro siye meni ta wiyawi lo arunatiyewe, omo Rom ma'e iteroti. Omo Rom sahe Pol Jisas lo peri au te'e fiyariye su, wiyawi yahowa'i iro siye meni ape aiwawe a'i Jisas ne tote tawesi umasiteye. Serai Pol kalabus wesi sahe meni ape iyape Onesimus le ne au pati ferafereiteye. Serai Pol meni ape meni Filemon ma'e si tame eimawesawiyei ne toteye. One towe eite sahe Pol meni Filemon apou te'eye, “Meni ape, Onesimus, le ane ne wiyawi erasi au pati ferafereiteye. Le Jisas ne aiwawe a'i umasinamiteye. Serai ne le ne kaiyemo aiwawe a'i eritere.”
1
Ane Pol kalabus wesi sahe irosiya. Ane Jisas lo peri au te'eteye su, lu tamo lai ane kalabus wesi ma'e hene ani arosai. Sosu ane Timoti aiwawe notosi one towe eite meni Filemon ma'e ausawiyei. Filemon, ne kaiyemo notosi lo, sosu ne Krais lo wiyawi notosi aiwawe a'i ta'anesiya. Notosi one towe eite taune Apia ma'e, nati wafei nomo lo aiwawe ausawiyei. Sosu notosi one towe eite meni Arkipus ma'e ausawiyei. Le Krais lo wiyawi ta'ane siye meni. Le notosi mase Owane Sitewi lo wiyawi ta'ane tohotenamisiya. Sosu aiwawe notosi lu taune werese ma'e, Owane Sitewi lo yo seni umasiye ape, wesi no Owane Sitewi lo peri wanuwei ne ta'uweraisiya ape, one towe eite aiwawe a'i ausawiyei. [Kl 4:17; 2 Ti 2:3] Fene werese lu taune yahowa'i a'i ne. Owane Sitewi lai marepi wisere a'i lo fene ma'e aunamiyei. Sosu Owane Sitewi, Tai nomo lo, sosu aiwawe Meni Owane Jisas Krais, lowesi marepi fetane a'i fene ma'e auwei.
Pol Owane Sitewi ma'e Filemon ne au te'e wisereyesiya.
Mi mi weriyei ane fene ne totesiya su, ane Owane Sitewi ano ma'e au te'e wisereyesiya. Wiyeme! Ane lu taune tomu ne'ese lo peri wisere a'i fene ne wanuwe. Peri ape apou a'i te'esiya. Ne a'i lai Meni Owane Jisas lo marepi kairefi a'i se tote anite tawesisiya. Sosu aiwawe ne le ma'e marepi erasi a'i tote wawesiyenamisiya. Sosu aiwawe ne a'i lai lu taune werese Jisas lo marepi umasiteye ape, marepi erasi a'i tote wawesiyenamisiya. Serai ane Owane Sitewi ma'e ne ne au te'e wisereyesiya. Ane Owane Sitewi ma'e ne ne au ei towerisiya. Ne lai lu taune ma'e Jisas lo peri au te'enamisiya. Lu taune peri no wanuwei su, lowe fara'u Jisas lo marepi umasinamiyei. Ne Owane Sitewi lo marepi lowe ma'e au te'eyei su, marepi no au kairefiyeyei. Ne ane ne marepi erasi a'i totenamisiya. Ne, kaiyemo, lu taune werese ma'e Jisas lo peri wanu umasinamisiya ape, ne marepi lowe lo au kairefiyeye. Serai ane Owane Sitewi ma'e ne ne au te'e wisereyesiya. [2 Ko 7:4]
Filemon, ne meni Onesimus si hene anire.
Ane ne ne marepi erasi a'i tote wawesiyesiya. Sosu ne Krais lo marepi umasiye su, ane fara'u Krais lo iyape se, sosu kairefi lo se ne ma'e au te'eyei. Serai ne peri ano fu umasire. Ahowa! Weiya! Ane lai ne ma'e peri kairefi a'i se au te'e ta'ane. Ane ne ma'e marepi eresene a'i se au te'esiya. Sosu ane Pol ya'ariyei meni owane. Sosu kalabus wesi sahe ironamisiya ape, ane ne ma'e ei toweriyei. 10 Ane ne ma'e meni eime ano Onesimus ne ei towerisiya. Ane kalabus wesi sahe iroteye su, ane Jisas lo peri le ma'e au te'eteye. Le Jisas lo peri wanuwe su, Jisas lo marepi umasinamiteye. Serai meni ape meni eime ano wou a'i henerai. [Kl 4:9; 2 Ko 4:15] 11 Tu, meni ape, Onesimus, le wiyawi yahowa'i a'i ta'ane siye meni no. Le wiyawi ta'aneye su, le ne ma'e au luwaruweye. Ahowa, pereye le ane ma'e marepi wisere a'i au ferafereisiya. Sosu ne ma'e aiwawe a'i le lai ne ma'e etiri wisere a'i irowei. 12 Serai ane meni ape ne ma'e si tame eimawesawiyei. Meni ape marepi ano wou a'i ne. 13 Tu marepi ano apou a'i toteye. Ane Onesimus ane aiwawe iroteyei ne einamiyei. Meni ape ane mase iroteyei su, le yaru no ane mase au pati ferafereiyei. Ane kalabus wesi sahe irosiya su, le ane ma'e au pati ferafereirowa. 14 Ahowa, ane Onesimus einamiyei su, yo seni ano luwaru a'i heneraiyei. Serai ane marepi he'i a'i apou toteye. Tu ane ne ma'e ei toweriyei, ne meni Onesimus fara'u ane ma'e si tame pati ferafereiyei ne eimawesaire. Ane marepi no tatai anirowata. Ahowa, meni ape si tame aiyerowa su, ne marepi wisere a'i no se si tame eimawesaiyei.
Pol lai meni Filemon ma'e Onesimus ne au te'eye.
15 Sosu a'i pe marepi ano tere'e apou totesiya. Onesimus lai ne, Filemon, wesi no nowe oso a'i se arunatiyewe fi. Etiri ape wisere a'i ne. Pereye nowe eite se, Onesimus Jisas lo peri wanu umasisiya. Serai Onesimus, ne, Filemon, si tame ma'e iyei ne totesiya. Le mi mi pasi pasi ne aiwawe si tame iyei ne totesiya. 16 Le ne ma'e heneraiyei su, le wiyawi meni yahowa'i no ta'ama. Ahowa, le a'i lai a'i kaiyemo wisere a'i no tene! Ane meni ape ne marepi erasi a'i tote wawesiyenamisiya. Sosu aiwawe ne meni ape marepi erasi wiyeme a'i tote wawesiyete. Meni ape ne ma'e iyei su, le kaiyemo wiyeme a'i ne ne heneraiyei. Le etiri werese no ne ma'e au pati ta'aneyei. Ne, Onesimus aiwawe a'i, fenesi Jisas lo marepi umasinamisiya. Serai fenesi Jisas lo lu feni henerai tepa'asiye. [1 Ti 6:2] 17 Serai ane ne etiri ta ei towerisiya. Ne a'i lai yereme ano irosiya su, meni ape aiyeyei su, ne le marepi wisere a'i se au feraferei anire. Apou a'i ane ne ma'e aiyerowa su, ne ane marepi wisere a'i se eriteyei. 18 Sosu peri tere'e ane ne ma'e au te'esiya. Meni ape ne ne au luwaruweye su, sosu etiri ta ta'areiye su, ne etiri werese le ta'areiye ape, iyape ano se etere. 19 Ane Pol one towe eite ereti ano a'i ne ma'e lese ausawisiya. Ane etiri werese meni ape ta'areiye ape, ne ma'e itiya'u auwei. Ane ne ma'e peri ape au te'ereme ta'ama. Tu naifa ane Jisas lo peri ne ma'e au te'eye. Ne peri ano wanuwe su, ne Jisas lo marepi tote tawesi umasinamiteye. Serai, apou wou a'i ane marepi hepene he'i a'i auwe. Serai ne etiri ta ane ma'e neri a'i itiya'u pei aure. 20 Marepi ano apou a'i toteye. Kaiyemo ano, Jisas lo iyape se, ne lai marepi ano au kairefiyere. Serai ne marepi ano Krais lo kairefi se ne lai marepi ano au fetaneyere. 21 Ane etiri ape so'oruwesiya. Ne a'i lai peri ano umasiyei. Serai ane ne ma'e one towe eite au lesesiya. Ne one towe siye te'eyei su, ne etiri werese papu irosiya ape, umasiyei. Wiyeme! Apou a'i ne etiri werese au irowei. Sosu etiri tere'e tere'e ne a'i lai meni Onesimus ne au wisereye irowe.
22 Sosu a'i pe ane peri tere'e ne ma'e au te'esiya. Ne wesi oweriye ta au ta'uwe naneire. Sosu ne mi mi weriyei Owane Sitewi ma'e ane ne au ei towerisiya. Serai ane kalabus wesi arunatiyei su, ane ne sewiyeyei ne aiyerowa. [Fl 1:25; 2:24] 23 Sosu peri ye'ewi au te'esiya. Meni tere'e iyape Epafras, ane aiwawe kalabus wesi sahe irosiya ape, ne ma'e eritesawiyei. Meni ape Krais Jisas lo peri au te'e fiyariye. Sosu lu tamo meni ape kalabus wesi ma'e hene ani fu arosawi. [Kl 1:7] 24 Sosu aiwawe lu tamo tere'e ne ma'e eritesawiyei. Meni Mak, meni Aristarkus, meni Demas, meni Luk. Lowe werese ne ma'e eritesawiyei. Lu werese ape mo ane aiwawe wiyawi ta'anesiya. [Kl 4:10-12,14; 1 Ti 4:10-11] 25 Sosu a'i pe ane Owane Sitewi ma'e apou ei toweriyei, Meni Owane Krais Jisas lo marepi fetaneye a'i hepene no saro aiwawe ironamiteyei. One towe eite papera.