32
Israel apanawa pue kau inainamba rua dewasaiena
1 Israel apanawa Moses wadiwa odene alene wankasaleidio intawa eweie lewanton. Sa baiwa mo antone Aron mampe wimone enane panane waienase, “E no bainimba god da dewasawo banlanempa. Apana sa Moses Isibt bedewe wainitano banlaneno nonetana, mai atentepona dima me mampe segalen.”✡Aposel 7.40
2 Ita Aron mo sipoamone wanase, “E komakoma gold mampe dewalala manamanaila, obanla mona ita anoanola asiwo otawiaitane mainawo winlena!”
3 Tane apana uduudu antone mo asiwo komakoma otaubamone otene Aron mampe anton. 4 Me gold sa otamone dewasano sisiwano ita pue kau mona bunawa inainamba rua dewasano segalen. Ita apana ema ewane mukantone wane waienase, “O Israelwa, god ipa ema no banlaneno Isibt ete nonetana!”✡1 Kin 12.28; Aposel 7.41
5 Aron apana epe dewantoio ewamone me pulo sumpa watawa nambanepe pue kau dewasan ita sabamo gagalolene wanase, “Imonepi no Iawe God mampe oda dewasata.”
6 Imonemba tadinaida apana pue isiwa otene wimone pulo sumoiena ituwialepia baiwa tane wanwan euda pulowa dewasaiena naiena. Ita sape mo waine nana ita esa naiena. Tane mo esa nane uwau koakoaleno ninantoie ita dewa kadiuida daitada rebareba dewamoie.✡1 Korint 10.7
7 Iawe God Moses diene wanase, “E tauwadea ie aita ipawa e apanaa Isibt bedewe waimoio banlamoano nomoiena muba kadikadintone miramiranton. 8 Mo tauwadea os ne anaanana waeuwamona eiena. Ita mo muba pue kau mona bunawa inainamba rua dewasane wadaposisaie ita pulowantoie. Ita mo waia nitu sa mo godiu Isibt bedewe waimoio banlamono nomoiena.
9 Ne ateina apana ema nuau badowaia. 10 E mai ne bodanea, ne nuana kadiidalen mo kadimopa. Tane e ita e nosinosia dewamopo uwa daitada apanawa uaraia segantopu.”
11 Tane Moses Iawe God mampe iririlene wanase, “O Iawe God e mukaa debamaia mampe e apana ema banlamoano Isibt ene nomoiena. Sa baiwa e mai nuaa kadiidalepio mo kadimoa, dia. 12 Naita e mo kadimoa Isibt apanawa etapue wapuase,
‘E insaisa kadiwa insee baiwa Israel apanawa banlamoano wadiwa wimon ita sape e kadimowo diaidantopu.’ E mai nua kadilepio kadimoa. 13 Insea e nolaa dewalala Abraam, Aisak ita Iakob mampo eba eboawo badowa sauaitene waanase,
‘Ne e nosinosia dewamopo uaraia kipora uba tampe wineia rua segantopu. Ita nosinosia bola ema uduudu sauamona wadapu ita mubaauwanalepie winakasalepi.’ ”✡Bumpai 22.16,17; 17.8
14 Sa baiwa Iawe God Israel apanawa kadimopona insaisawaledia en.
15 Ita Moses ene leulene seu tabataba nata adiwe ita danawe anaana girumalala awanene wadi ene iene alen. 16 Seu ema nata tabatabau ipa God dewasan ita me mebaipa sa osowe girumalen.
19 Tane Moses iene wisene mo waimoia tampolene kokoitau kau enedia ita do mo biantoio ewamon. Ita me nuawa kadiidaleno seu sa tabatabau dogo osowe aubamono epatuwialeno sisiwane dianton wadi sa atowe. 20 Me pue kau apana dewasaiena wadene ia bedewe suno intuwan. Ita me einsisideno isana wanaleno wadene esa bedewe memenaubene Israel apanawa diamone ita dewamono naiena.
21 Ita Moses Aron diene wanase, “Apana ema e manawo dima dewasaiena ita e mo banlakadisamoano kadi debamaia dewasaiena?”
22 Ita Aron me sipoasane wanase, “Debamana, e mai nuaa kadilempo do wanempa. E apana ema dewau atena mo insaisau kadi os dewasampe waimompa menamode. 23 Sa baiwa mo ne dianeieno pue kau inainamba rua dewasana no banlanempe onianempa baiwa. Mo ne dianene waienase,
‘Apana sa Moses Isibt bedewe wainitano banlaneno nonetana, mai atentepona dima me mampe segalen.’
24 Ne mo diamone wanase, ‘Mo mida mampo bena oaoaua gold mampe dewalala winompa otawiantopu.’ Ita rua mo otawiantone ne neieno ia bedewe aubamono pue kau segalene wisen.”
25 Ita Moses Aron ewena me mai apana oniadewasamopia rua, dia, sa baiwa mo emalawoau apanawa mampo ewaewau apana koakoau rua seganton. 26 Tane Moses mo waimoia bolawa intawa moape enene mukaleidie wadiase, “Apana mida Iawe God baiwa eneilana ne mainawo winlena!” Me epe wadio Liwai damba apanawa me mampe wimone auweiena.
27 Ita Moses mo diamone wanase, “Iawe Israelwa Godiu ema epe wan,
‘E uduudu isimala moamoaua otamone bola wainila bedewe aitane bola sa uduudu bedewe sosolaida, baida sosola ita sosola tanlawoa uduudu bomonatuwapi.’ ”
28 Tane Liwai damba apanawa Moses aiawa ruawantone antone ita walama sa bedewe apana wisiawa uduudu 3,000 bomoiena.
29 Ita Moses mo mampo gagalolene wanase, “E Iawe God aiawa etale ruawaitene dewa dodomana dewasale eba obanla ita sosola tanlawoa bomolana. Sa baiwa Iawe God sauwa euda e osolawo itune empualene awowalen ita me pirisiwa wanaitane me nolawaitonuna baiwa.”
30 Ita imonemba Moses apana mampo gagalolene wanase, “E kadi rebarebaida dewasalana. Tauma ne leunteape Iawe God mampe anteape e adilawontape Iawe God waaisisapo e kadila dewasalana insepidabuasapi.”
31 Ita Moses leulene Iawe God mampe alene diene wanase, “Apana ema kadi rebarebaida dewasaiena! Mo gold otene dewasaieno kokoitau kau segaleno muba godiu wanasane wadaposisaie. 32 Ne menanedia mo kadi dewasaiena e inseadabuasa. Tane naita mo kadiu e mai inseadabuasaa mo mida e sonabamoana ebou e bukaa bedewe winedia bedewe ne os ebona e sinieaaubea.”✡Gagalo 3.5
33 Tane Iawe God sipoasane wanase, “Apana mida ne adianananene kadiwa dewasana apana sa ebowa ne bukana bedewe winedia ne siniepaaubepa. 34 Tauma aite ne apanana bola dienawo banlamoe aitaa. Ne enselina bautalepie e banlaepi, ita ne walamana wisepio mo kadiu sipoasapo kadi dewasaiena matangelawa donsapu.”
35 Ita sape Iawe God matangela debamaia dewasane kero kadiwaida wanaubeno apana osouwoleno poka etaidasaiena. Ipawa Aron pue kau inainamba rua dewasane ituno mo wadaposisaiena.