55
Iawe God apana gadompau makoleidia nisomode
Iawe God wadiase,
1 “E mida gadompala makoleidia,
winlene esa nana,
e mida manlawo mane dia,
winlene nana wadane nana,
winlene wain ita ama sogapa nana, mai malesawa do.✡Gagalo 21.6; 22.17
2 E manela mai nana kadiu osouwo di diasanuna,
nana dainea e nailano mai pokaleipona mai nolawaitana.
Ne aiana asisusane ita nana euda nane pokalepi,
nana ema euda daudaua nane nuaeuitana.
3 Ne aiana etane mainawo winlena,
ne asisuneane ita e inaida wadana,
ne sauana badowa winakasala e manlawo wapa,
ne e nuawadawadalepe euda manlawo dewasapa, warere Dawid mampe sauantena rua.”✡Aposel 13.34
Iawe God perowetawa wadiase,
6 “E tauma Iawe God manlawolena mampe banusane donsana,
tauma me tanlawolena mampe me iririsana.
7 E kadiwa dewalala kadiwa ene leuitana,
ita insaisala kadiu insamoilana emona.
E leuitane Iawe God mampe aitano me e nuaparelalepie saulepi,
e no Godimba mampe rauparitano kadila uduudu insadabuamopi.”
8 Iawe God wadiase, “Ne insaisana ipa mai e insaisala rua,
ne dewana ipa mai e dewala rua.
9 Uba mai maida ionoido winedia rua,
ne dewana ipa ionoidolen mai e dewala rua,
ne insaisana ipa ionoidolen mai e insaisala rua.
10 Unu ita giou obasa do uboe ieia,
mai di ieipona,
mo tawo butasaie bibiasaio,
ina inintoi,
ita apana iraintoie nana nai.✡2 Korint 9.10
11 Epe rua ne aiana mai di leulepie mainawo wisepi,
tane ne dima menanedia nolawa dewasapio segalepi.
Me dima uduudu ne menanena dewasapituwapi,
ita insaisana uduudu dewasapie diasapituwapi.”