1 Sabat walamawa dialeno imonembawa Sande walama pumpu Meri Magdalin Iesu etepa naepe ituienawo alene seu debamaia bo nagawa enenbodae winedia rialene nambe winedio ewen. 2 Me bo nagawa epe ewene tauwadea ene weuwane Saimon Pita ita wawe alala da mida Iesu nuawadawadaidasana mampo wisene dima ewena benemawalene diamone wanase, “No Tatamba etepa mo wadane antoieno aupawa ne ewanasuden, bo nagawa di winakoaleide. Ne mai atentapona me naepe ituiena.”

3 Pita sowa nata aia ema etane tauwadea bolau waimoia ene bo nagawa ewapua awa weuwane antoie. 4 Ita mo nata antoie Pita sowa weuwaidasana baiwa bautalene bo nagawa mampe wisen. 5 Me mai bo nagawa bedewe odapona, dia. Me tampe enene wirorolene bo nagawa bedewe gara Iesu lomantoiena di winamoio ewamodie. 6 Tane Saimon Pita muriwalene wisene bo nagawa bedewe odene alene gara Iesu lomantoiena di winamoio ewamon. 7 Ita do gara da Iesu uwawa lomantoiena mida nukulene awoa itundewalena ewen. 8 Mape Pita sowa bautalene bo nagawa mampe wisene moape enedia Pita wawe odene alene bo winena aupawa ewene Iesu bo bedewe enenwisena sumanaiwalen. 9 Wawe alala mapo ita Iesu bo bedewe enenwisena walamawe me bo bedewe enepiwisepia umanawa buka bedewe girumamono wineia mai atentoipe waimoipe, dia.

10 Ita wawe alala nata sa bo nagawa ene leuntone duwo antoio 11 Meri leulene bo nagawa mampe wisene moape enene ke wadie wiroroleidie bo nagawa bedewa ewedie. 12 Ita me ke wadie bo nagawa bedewa ewedie enedio God enseliwa nata garau sapusapuaida tautaulala naepe Iesu ituienawo aupawe waimoio ewamodie. Tane ensel dea uwawa winenawo wandie ita sowa da wawa wineienawo wandie. 13 Mo nata i ke wadio ewane waitarasane waienase, “E dima kewa waie wainiana?” Ita me sipoamone wanase, “Mo ne Tatana etepa wadane antoiena, ita ne mai atenteapona me naepe ituiena, sa baiwa nuana polaida wano waine ke wadina.”

14 Me epe wane aupe leulene Iesu enedio ewen. Tane me ewene ewakoasane mai atensapona me mida enedie. 15 Ita sape Iesu Meri waitarasane wanase, “I, e dima kewa waie eneiana? Mida banusaiana?” Meri insenase apana sa me epe waitarasadia irai sa oniedia apanawa, sa baiwa me diene wanase, “Sona, naita e Iesu etepa wade nambe ituama, ne menanedia benemawa dianeawo anteape wadape leusape bolawe itupadewanteapa.” 16 Meri epe wano Iesu me mampe wane wanase, “Meri!” Ita me Iesu aiawa dauwa etene atenlene me mampelene enene ebowa wane wanase, “Raboni.” Sa ipa muba aiauwo wan, ita ebo sa ipawaida ipa Debamamba. 17 Mape Iesu me diene wanase, “E mainawoitenee eneiana ne walama kerauda os bedewe Mamana mampe leuntape a baiwantedina mai wadaitunea, dia! Tane e ene aite ne sosonaida ne benemana diamowo etapua ne leunteape me mida ne Mamana ita e do Mamala wandia mampe anteapa. Me ipa ne Godna ita do e Godila wande.”

18 Ita Meri Magdalin Iesu diena ruawalene me benemawa wadene wawe alala mampo alene wisene nuaeu do diamone wanase, “Sosona, ne Tatamba ewane me do gagalontite.” Ita Meri mo diamone wanase, “Dima uduudu Tatamba dianena rua ne e dialedina.”

19 Ita Sande sa rawiwa wawe alala du dea bedewe auwenatue waimoie. Tane mo Iuswa eiau wadaitumopua sawantone du moawa gudusabodamone waimoie. Ita Iesu mampo wisene enenaubene auwamone wanase, “Sau euda e manlawo winepi!” 20 Me epe auwamone witapa tutusamoiena ita do tebipa eneiena pirawa euwamono eweiena. Ita wawe alala Tatamba mampoido enedio ewane nuaeu debamaia nuau nopesan. 21 Mape Iesu mo osowe auwamone wanase, “Sau euda e manlawo winepi! Mamamba ne tawo emawo waaubanena rua ne e waaubaledina.” 22 Iesu mo epe diamone aupe nonaupa mo osouwo sune wanase, “Aleu kakaiwa e bedelawolepio wadana! 23 ✡Matiu 16.19; 18.18E nolene aitane nolaitonuno apana e benemala wadapue mamposapua God mo kadiu insadabuamopi. Tane e aitane nolaitonuno apana e benemala etapue epua mo kadiu winakasalepi.”

24 Iesu wawe alala mampo wisene sabamoleno eweiena walamawe wawe alala 12 sou dea Tomas, ebowa da waia Ragaraga, mai mo do, dia, me nambe leidie. 25 Ita mo Tomas ewane nuaeu do benemasane waienase, “Somba, no Tatamba mainimbo wiseno ewatana!” Mo epe waio Tomas leusane diamone wanase, “E me benemawa os dianeilana baiwa mai sumanaintipona, dia. Ne me witapa tutusamoiena pirawa ewape sumanainteapa. Ita do menanedia ne witana uraupa mampe me pirawa sa wirasape ita do me tebipa eneienawo witana itupe tauma sumanainteapa, mai di!”

26 Ema aupe wiki dea dialeno wawe alala osowe du deawaa bedewe mo auwene du moawa gudusabodamone waimoie, tane Tomas do wisene wawe alala isiwa bedeuwolene wandie. Mo du moawa gudusabodamone waimoio Iesu wisene enenaubene auwamone wanase, “Sau euda e manlawo winepi!” 27 Iesu mo auwamone aupe me Tomas diene wanase, “Ne witana tutusamoiena pirawa ewee witaa uraupa mampe wirasaa, do witaa aubee tebina eneiena pirawa osowe itua ita insakoa dewawa ee sumanaitaa!”

28 Iesu epe diedio Tomas sumanaiidalene wanase, “E ne Tatana ita Godna!” 29 Tomas sumanailena wano Iesu me diaidasane wanase, “E ne ewaneana baiwa sumanaitiana, tane mo mida ne mai ewaneapona di sumanaibu ne mainawo ituia mo sau euda wadeiena apanawa.”

30 Iesu ginasa eueuwa pokawaau uara me wawe alala emauwo dewamodio eweiena. Ita ginasa sa uara buka ema bedewe mai girumalepono wineipona, dia. 31 Tane ginasa eueuwa pokawaau isiwa Iesu dewamona buka ema bedewe girumaleno wineia, sa ipa e sumanaitana Iesu ipa Keriso God Otopaida. Ita e sumanaitana bedewe me ebowe e inaida donsane wadana.