Matiu
Gagalo euda Iesu Keriso umanawa Matiu girumalena
1
Iesu nosinosiwa ebou
(Luk 3.23-38)
Ema ipa Iesu Keriso nosinosiwa ebou: Iesu Keriso me ipa warere Dawid atanosiwa, tane Dawid me ipa Abraam atanosiwa. 2-6 Abraam ita warere Dawid wisena Iesu nosinosiwa uduudu 14, mo ebou reresawa ipa ema epe:
Abraam Aisak mamba, Aisak Iakob mamba, ita Iakob Iuda wanwamba do mambu. Iuda, me ipa Peres ita Sera mambu, mo inau ipa Tama. Tane Peres Esron mamba, Esron Ram mamba, ita Ram Aminadab mamba. Aminadab me ipa Nason mamba, Nason Salamon mamba, ita Salamon Boas mamba, ita Boas inawa ipa Raab. Tane Boas Obed mamba, ita Obed inawa ipa Rut. Obed me ipa Iese mamba ita Iese warere Dawid mamba.
7-11 Warere Dawid ita Israel apanawa mo bolau ene Babilon banlamone antoiena walamawe wisena Iesu nosinosiwa uduudu 14, mo ebou reresawa ipa ema epe:
Dawid ipa Solomon mamba, tane bauta Solomon inawa Uria manainapa wandie ita ema aupe me Dawid naisena. Ita Solomon Reobeam mamba, Reobeam me ipa Abaia mamba, ita Abaia Asa mamba. Asa ipa Ieosapat mamba, ita Ieosapat Ieoram mamba, tane Ieoram me ipa Usia mamba, ita Usia Iotam mamba. Iotam ipa Akas mamba, Akas me ipa Esekia mamba, ita Esekia Manase mamba. Manase ipa Amon mamba, ita Amon Iosia mamba, tane Iosia ipa Ioiakim wanwamba do mambu.
12-17 Israel apanawa bolau ene Babilon bedewe banlamone antoiena walamawe ita Iesu Keriso segalena walamawe me nosinosiwa uduudu 14, mo ebou reresawa ipa ema epe:
Ioiakim ipa Sealiel mamba, Sealiel Serubabel mamba, ita Serubabel Abiud mamba. Abiud Elaiakim mamba, Elaiakim ipa Asoa mamba, ita Asoa Sadok mamba. Sadok Akim mamba, Akim ipa Eliud mamba, ita Eliud ipa Eleasa mamba. Eleasa Matan mamba, ita Matan Iakob mamba, ita Iakob ipa Iosep mamba. Iosep sa Meri naisena. Ita Meri Iesu gamosan, me ipa Keriso God sonabena apana inamopia baiwa.
Iesu Keriso muwa
(Luk 2.1-7)
18  Luk 1.27Iesu Keriso muwa ema epe inta winin: Iesu muriwa mulen me inawa Meri tarabensaiena apana ebowa Iosep naisepi. Mo anaanau ruawantone nainaiidantopua anuwa nambenambe waimoie mai etepu deasapona, dia. Tane Meri awoa wandie dauwa etene atenlen me Aleu kakaiwa mukawa mampe bulen. 19 Iosep Meri bulena umanawa etene insenase Meri apana da busan, sa baiwa nainai inguguraleidie. Tane Iosep apana euda, walama uduudu dewa dodomana os dewasadie Meri anaanau ainpundena osowe mai sabamo mala osowe itupe ebowa kadisapona menasapona, dia. Tane me dainawa nainai epona insaisawaleidie. 20 Me nainai eewa insaisawaleidio Tatamba enseliwa auwen bedewe mampe segalene diene wanase, “Iosep, Dawid atanosiwa, Meri naisea, mai inguguraite ea! Me Aleu kakaiwa mukawa mampe bulen. 21  Luk 1.31Me oto mona gamosapio ita e me ebowa itue waase, ‘Iesu.’ Ebo sa ipawaida ipa me God apanawa kadi bedewe waimoia inamopi. E ebo sa itua, ipawa Iesu ipa apana kadi bedewe inamopi.”
22 Dima Meri ita Iosep mampo segalena, mai di segalepona, dia. Tane dima Tatamba God mapo perowetawa mampee wana ideita segalepia baiwa ema segalen. Ita God me perowetawa insaisawa waneno wane wanase, 23  Aisaia 7.14“I sanaa mai apana do itula bulepie oto mona gamosapi, ita mo me ebowa itupue wapuase, ‘Imanuel.’ ” Ebo Imanuel ipawaida ipa God no do.
24 Iosep ituleidie auwen bedewe God enseliwa mampe segalene gagaloleno dialeno me enenwisene dima Tatamba enseliwa diena rua dewasane Meri naisen. Ita mo nata duwa antone waimoie. 25  Luk 2.21Mo nata awodea waimoie mai etepu deasapona, dia, mo oto mulepia anuwa di waimoie. Tane oto muleno Iosep me ebowa itune wanase, ‘Iesu.’ Ema aupe mo nainaiida ruawa etepu deasaie awodea waimoie.

1:18: Luk 1.27

1:21: Luk 1.31

1:23: Aisaia 7.14

1:25: Luk 2.21