49
Yakuba à nùmpanŋa jwumpe jwo mà yyaha tíi ná u pyìibil'e
1 Lire kàntugo, ka *Yakuba si u jyaabii yyere maa jwo: «Yii a ma, yii i mpa bínni na taan, karigii nimpaŋkii cyi sí nɔ yii na ke, mii sí cyire jwo yii á. 2 Yakuba jyaabii, yii a ma yii i mpa bínni, yii lógo yii tuŋi *Izirayɛli*Yakuba mɛge kà ku ɲyɛ Izirayɛli ɲwɔ na.
3 Urubɛn, mu u ɲyɛ mii jyaŋi niɲcyiiŋi,
Mu u ɲyɛ mii nànte yaage, mii à mu si mà mii ta nàɲjiiwe.
Pèente mu à ta ke, tir'a fànha tò mu sìɲɛɛbii sanmpii woore na.
Fànhe ku ɲyɛ mu i ke, kur'à ɲyaha mu sìɲɛɛbii sanmpii woge na.
4 Ŋka mu na ɲyɛ mu à jwo lwɔhɔ ŋkemu k'à dùgo ɲî a fworo na fwu ke, mu tɛɛnm'à pɛn.
Mu à dùgo ma tuŋi yasínniŋke ɲuŋ'i, maa wwɔ̀ ná ma tuŋi cwoŋi w'e.
Lire kurugo, mu saha sì yyaha yyereŋi ta mɛ
5 Simiyɔn ná *Levi kapyiiŋkii ɲyɛ niŋkin,
pi maha pi kàshikwɔnŋwɔhɔgii lwúu marii kakyaare pyi.
6 Mii ɲyɛ a sìi ná pi e pi ŋgwòŋi i mɛ
Pi kapyiiŋkii mú sí ɲyɛ a táan mii á mɛ
Ɲaha kurugo yɛ mà pi lùyiriwuubii yaha, pi à sùpyire tà bò, pi pege kurugo.
Mà pi yaha bàhage na, pi à nùpyahii cyì sirakapanya *kwɔ̀n.
7 Mii à pi láŋa pi lùyirini kurugo, ɲaha na yɛ lùyirini l'à pi wà lire kapiini mpyiŋi na.
Mii à pi láŋa pi lùyirintoroni kurugo, ɲaha na yɛ lùyirintoroni l'à pi wà lire kapiini mpyiŋi na
Mii sí pi tùluyi pyi yi láha yiye na Izirayɛli kìni i,
Yi sí n-tɛ̀ɛn n-tɛ̀ɛn yiye Yakuba kìni†Yakuba kìni ná Izirayɛli kìni ɲyɛ niŋkin puni yyaha kurugo.
8 *Zhuda, mu sìɲɛɛbii sí raa mu pêre,
mu sí ma cyɛge taha ma zàmpɛɛnbii kaɲɛkwuunni na,
mu sìɲɛɛbii sí raa niŋkure sínni mu á.
9 Mii jyaŋi, Zhuda, mu na ɲyɛ mu à jwo cànraga
ku maha sà ɲaare maa sige yaare tà cû a kyà,
maa núr'a pa sínni, maa tooyi sànhana.
Mà ku yaha tasínage e, jofoo u sí ɲɛɛ n-jwo na uru sí ku kɔ̀rɔ n-yîrige yɛ?
10 *Saanre kàbiini sì n-fworo Zhuda pyɛnge e mɛ,
ɲùŋufente kàbiini sí n-kwôro u tùluge cye e,
*supyishiŋi sanŋi sí raa làampuŋi kaan u á,
si ŋkúu u á.
11 Zhuda, mu *ɛrɛzɛn cikɔɔge sí ɲwɔ sèe sèl'e,
fo si mpyi mu mɛ́ɛ ká dùfaanŋke pwɔ k'e, lire sì yaaga kɛ̀ɛge mɛ.
Mu sí raa ma vàanntinŋke jyíi ɛrɛzɛnŋi lwɔh'e
s'a ma vàanntinmbwɔhe jyíi ɛrɛzɛnŋi sinmpe e.
12 Mu ɲyiigii sí raa ɲî ɛrɛzɛnŋi lwɔhe cye kurugo,
nùjirimpe sí mu ŋkyanhagii pyi cyi fíniŋɛ.
13 Zabulɔn tatɛ̀ɛnge sí n-pyi suumpe lwɔhe ɲwɔge na,
batoo nimbwoo sí raa yyereli kuru cyage e,
mu kìni sí n-kàre sà nɔ fo Sidɔn kànha na.
14 Isakari fành'à ɲyaha dùfaanŋa fiige,
u tatɛ̀ɛng'à bɛ yatɔɔre tabyige na,
15 u à tatɛ̀ɛnge ɲya k'à ɲwɔ,
kìni mú s'à táan ke,
ka u u wá na báaraŋi niŋgaŋi pyi
mu à jwo biliwe.
16 Dan sí u kìni shiinbii shwɔ u zàmpɛɛnbii na,
Izirayɛli tùluyi sanɲyi fiige.
17 U na ɲyɛ mu à jwo wwɔ̀ ŋgemu u à sínni kuni i ke,
mu à jwo màcwɔn kuɲcwɔre e,
u maha shɔnyi nɔni tooyi na, shɔndugubil'a sì wá na ɲcwo.
18 Kafooŋi Kile, mii à tɛ̀ɛn ná l'e na mu sí mii shwɔ.
19 Gadi wi ke, kakuumpyiibii pìi sí n-pa n-cwo u na, si u tun.
Ŋka u sí pi kɔ̀rɔ n-caala.
20 Ashɛri wi ke, yafaayi sí raa ɲwɔge u kìni i.
Saanbii ɲjyìŋi niɲcɛnŋi sí raa ntaa l'e.
21 Nɛfitali na ɲyɛ mu à jwo cèŋɛ, ŋkemu ku ɲyɛ kuy'á ke, ku maha cèmpyire nisìnante sini.
22 Yusufu fành'à ɲyaha mu à jwo sige dùfaanŋa ku ɲyɛ lwɔhɔ ɲwɔ na;
mu à jwo sige dùfaanmbile kafaawaga ɲuŋ'i.
23 Sintaayifeebil'à taha u fye e,
maa u ŋwɔ ná tàanbil'e, maa u kànha sèl'e.
24 Ŋka u sintaag'à kwôro u cye e,
Yakuba u Kileŋi Siŋifol'à fànha kan u cyey'á.
Uru Kileŋi u ɲyɛ Izirayɛli kàanmucyafooŋi,
uru mú u ɲyɛ Izirayɛli taŋwɔhɔge.
25 Mu tuŋi u Kileŋi u sí mu tɛ̀gɛ,
Kile Siŋi Punifoo u sí jwó le mu á,
si nìɲyiiŋi zànhe kan mu á,
si jwó le mu á,
si ɲìŋke lùbilibii kan mu á,
si mu pyìibii pyi pi ɲyaha;
si mu yatɔɔre pyi ti púgo.
26 Jwóobii Kile à le mu tuŋ'á ke,
pir'à fànha tò ɲaɲyi niɲjyeyi yacɛnyi na,
Kile u jwó le Yusufu á amuni,
Kile u jwó le u á,
uru ŋgemu u ɲyɛ u cìnmpyiibii ɲùŋɔ na ke.
27 Bɛnzhama na ɲyɛ mu à jwo sige pwun katege wu.
Ɲyɛ̀ge na, u maha sige yaare tà cû a kyà,
yàkoŋke u maha tà táa táa u pyìibii na.»
28 Ɲyɛ Izirayɛli tùluyi kɛ ná shuunniŋ'à fworo mpii shiin kɛ ná shuunniŋi i. Pi tuŋi Yakuba jwumpe nizanmpe pu mpyi mpe mà yyaha tíi ná pi puni niŋkin niŋkinŋi i, wà ná wà wumɔ ɲyɛ a pyi niŋkin mɛ.
Yakuba kwùŋi kani
29 Ɲyɛ lire kàntugo, ka *Yakuba si yi jwo a waha u jyaabil'á na: «Mii aha bú ŋkwû, yii i sà na tò na tulyeyi tatoŋke e, ɲaŋgyige ku ɲyɛ Kyiti shinŋi Efirɔn kɛrɛge e ke, wani yii sí n-sà mii tò na tulyeyi taan. 30 Kuru ɲaŋgyige na ɲyɛ Makipela kɛrɛge e, Mamire cyage e, *Kana kìni i. *Ibirayima u à kuru cyage shwɔ Kyiti tùluge shinŋi Efurɔn á, mà pyi u kwùu tatòŋɔ. 31 Wani Ibirayima ná u cwoŋi Sara, ná Ishaka ná u cwoŋi Erebeka à tò, wani mii à na cwoŋi Leya tò mú. 32 Kuru kɛrɛge ná ɲaŋgyige ku ɲyɛ k'e ke, yire pun'à shwɔ Kyiti shiinbil'á.»
33 Ɲyɛ Yakuba à puru jwumpe jwo a kwɔ̀ u jyaabil'á ke, maa tooyi dùrugo yasínniŋke na, maa sínni, ka u múnaani si fworo u e.