5
Tinyē soboonto ꞉chiito nyēē kiikuchamta Lakwataab Yēyiin
1 Chii ake tukul nyoo chāmtooy kule Kāārārookiintēēt ꞉Yēēsu, kubo ꞉chiichoo Yēyiin. Nto nyoo chāmē kwaaniitaab leekweet, kuchāmē mbo nkinee leekweet.Yoowa. 4:25 2 Kiinkētē kule kēēchāmē lōkōkaab Yēyiin yoo kēēchāmē Yēyiin ānkēērubē mākuutēkyii. 3 Kiyēē ibooru kule kēēchāmē Yēyiin ku kēēriib mākuutēkyii, āmānyikisyēēch ꞉mākuutēchoo.Mat. 11:30 4 Chii ake tukul nyoo bo Yēyiin, kubiirtooy miyootyēēt nyēē mii kōōrooni. Yoo kakiikaasee keey Yēyiin, +mākiibēl kōōrēēt.Yoowa. 16:33 5 Ng'oo ꞉nyēē isyēēntooy kōōrēēt ēē? Nyēē isyēēntooy ku nyoo chāmtooy kule Lakwataab Yēyiin ꞉Yēēsu.Room. 8:37-39; 1Yoowa. 4:4
6 Yu kichōōnii ꞉Yēēsu Kiriistō kōōrēēt, kibununēē bēēko āk korotiik.*Ibooru ꞉ng'ālyoontēēt ‘korotiik’ ām yu kule ‘meet’. Isōōtē ꞉biiko alake kule ibooru ꞉ng'ālyoontēēt ‘bēēko’ ‘kwootēēk’ kuu yoo iboorunoot ām Yoowaana 3:5, nto alak, kōōsōōtē kule ibooru ‘bēēkaab bātisāniisyēēt’. Mēēbērē kibununēē bēēko baateey, nteenee kibununēē bēēko ākoo korotiik. Mwooyē ꞉Tāmirmiryēēt ng'aleechu, ānkumwooyē ꞉Tāmirmiryēēt kiyēē bo man.Yoowa. 19:34; 16:13 7 Miitē ꞉tukuuk sōmōku chēē iboorwēēch kule kichō ꞉Yēēsu kuu chii. 8 Tukuuchooto ku: Tāmirmiryēētaab Yēyiin, bēēko āk korotiik. Ibooru ꞉tukuuchu sōmōku kiito akeenke. 9 Yoo kēēchāmē kiyēē mwoowēēch ꞉biiko ii, +makeecham sōō, nyēē tyaa kiyēē mwooyē ꞉Yēyiin kurubta keey ākoo Lakwanyii! 10 Chii ake tukul nyoo chāmtooy Lakwataab Yēyiin kōōnkētē man kule inee ꞉nyooto. Nto chii nyoo māchāmtooy ng'aleechu, kumwooyē ꞉nyoo kule ng'wiin ꞉Yēyiin kuuyu manaachamta kiyēē mwooyē ꞉Yēyiin kurubta keey ākoo Lakwanyii.Room. 8:16; Kala. 4:6
11 Kimwoowēēch ꞉Yēyiin kule kiikukōōnēēch *soboontaab kibchuulyo. Kēēnyōōru soboonooto kubununēē Lakwanyii. 12 Chii nyoo boonto Lakwataab Yēyiin kutinyē soboontaab kibchuulyo. Nto nyoo māboonto kumātinyē soboonooto.Yoowa. 5:24 13 Āsirwook akweek choo ōkoosēē keey Lakwataab Yēyiin ng'aleechu sōōnkēt kule ōboontē soboontaab kibchuulyo.Yoowa. 20:31
Ng'ālyoo nyēē /kiiwoong'tēē
14 Kēēboontēē mooyēēt kule yoo kēētēēbē kiyēē chāmwēēch ꞉Yēyiin, mākukāswēēch. 15 Yoo ākoo kiinkētē kule kāswēēch ām kiy ake tukul nyoo kakeesaay, kiinkētē ām yooto kule kēēnyōōru kiyēē kēētēēbēē.Yoowa. 15:16Māārkō 11:24
16 Yoo ikāsē kuyēyē ꞉ng'eetaabkoomēt ng'ōōkisto nyēē ‑mēēsākyinē kōōboot soboontaab kibchuulyo, isaay Yēyiin kunyōōchi kaat. Yooto, mākōōkoochi ꞉Yēyiin chiichoo ꞉soboontaab kibchuulyo. Mii ꞉ng'ōōkisto nyēē yēyē chiito kōōboot soboontaab kibchuulyo. Mēēbērē kāāmwoowu kule isaay ām ng'ōōkisto nyēē wuu nyoo.Māārkō 3:28-29 17 Miyaat ꞉ng'ōōki ake tukul. Nteenee, mii ꞉alake chēē māyēyē chii kōōboot soboontaab kibchuulyo.
18 Kiinkētē kule mēēbērē tāsē taay ꞉chii nyēbo Yēyiin kuyēyē ng'ōōki. Riibē ꞉Lakwataab Yēyiin chiichoo nyēē mākoy kutiiny ꞉Kibrōkōsyoontēēt.Yoowa. 17:15; 1Yoowa. 3:6 19 Kiinkētē kule kēēbooyē ꞉acheek Yēyiin. Nteenee bāwu ꞉Kibrōkōsyoontēēt kōōrēēt.Yoowa. 12:31; Kala. 1:4 20 Kiinkētē mbo subak kule kiikuchō ꞉Lakwataab Yēyiin ankiikuyeyeech kiinkēt Yēyiin nyoo manta. Kēēyēku cheechii kuuyu kēēbooyē Lakwanyii. Kubooyiit man ꞉inee ku Yēyiin anku soboontaab kibchuulyo.Yoowa. 1:14, 18; 17:3; 20:28
21 Biikyuu, kāāmwoowook, osaanee keey kiy ake tukul nyēē imuuchē kootabaaneenaak wōlēē mii ꞉Yēyiin.1Kōōr. 10:14; 1Tēēs. 1:9
5:1 Yoowa. 4:25
5:3 Mat. 11:30
5:4 Yoowa. 16:33
5:5 Room. 8:37-39; 1Yoowa. 4:4
*5:6 Ibooru ꞉ng'ālyoontēēt ‘korotiik’ ām yu kule ‘meet’. Isōōtē ꞉biiko alake kule ibooru ꞉ng'ālyoontēēt ‘bēēko’ ‘kwootēēk’ kuu yoo iboorunoot ām Yoowaana 3:5, nto alak, kōōsōōtē kule ibooru ‘bēēkaab bātisāniisyēēt’.
5:6 Yoowa. 19:34; 16:13
5:10 Room. 8:16; Kala. 4:6
5:12 Yoowa. 5:24
5:13 Yoowa. 20:31
5:15 Yoowa. 15:16
5:15 Māārkō 11:24
5:16 Māārkō 3:28-29
5:18 Yoowa. 17:15; 1Yoowa. 3:6
5:19 Yoowa. 12:31; Kala. 1:4
5:20 Yoowa. 1:14, 18; 17:3; 20:28
5:21 1Kōōr. 10:14; 1Tēēs. 1:9