5
1 Marĩ ire masĩa. Sugʉ paía opʉ, masaka watope Marĩpʉ beyepísũdi ããrĩ́mi. Masakaya ããrĩburi ããrĩpererire Marĩpʉre sẽrẽbosagʉ ããrĩ́mi. Irasirigʉ Marĩpʉre ĩgʉ̃sã sĩdʉarire sĩbosagʉ ããrĩ́mi. “Ĩgʉ̃sã ñerĩ iridea waja ĩgʉ̃sãrẽ wajamoãbirikõãka!” ãrĩ sẽrẽgʉ̃, Marĩpʉ ĩũrõ waibʉre wẽjẽ soepeobosagʉ ããrĩ́mi. 2 Paía opʉ marĩ irirosũta ĩgʉ̃ turari merã ĩgʉ̃ ñerĩ iridʉarire tau kãmutamasĩbemi. Irasirigʉ pémasĩmerãrẽ, ñerõ irirãrẽ bopoñarĩ merã ĩãmasĩmi. 3 Turabi ããrĩsĩã, gajirãrẽ iribosarosũta ĩgʉ̃ basi ñerõ iridea waja Marĩpʉ ĩũrõ waibʉre wẽjẽ soepeomi.
4 Neõ sugʉ ĩgʉ̃ gããmerõ paía opʉ ñajãmasĩbemi. Marĩpʉ gapʉ ĩgʉ̃rẽ beyepími, iripoeguemʉ Aarṍrẽ ĩgʉ̃ beyepíderosũta. 5 Cristode ĩgʉ̃ gããmerõ paía opʉ ñajãbiridi ããrĩmí. Marĩpʉ ĩgʉ̃rẽ Opʉ pídi ããrĩmí. Ãsũ ãrĩdi ããrĩmí ĩgʉ̃rẽ:
Yʉ magʉ̃ ããrã mʉ. Dapagã merã mʉ, yʉ magʉ̃ ããrĩrĩ́rẽ masakare masĩmakʉ̃ yáa, ãrĩdi ããrĩmí.✡Sal 2.7
6 Gajirogue ĩgʉ̃ya werenírĩ gojadea pũgue ĩgʉ̃ magʉ̃rẽ ãsũ ãrĩdi ããrĩmí:
Melquisedec paí ããrĩderosũta mʉ ããrĩníkõãgʉkoa, ãrĩdi ããrĩmí.✡Sal 110.4
7 Cristo i ʉ̃mʉgue ããrĩgʉ̃́, bʉro oreri gaguinírĩ merã Marĩpʉre ĩgʉ̃ turari merã ĩgʉ̃ boaburire taumasĩgʉ̃rẽ sẽrẽdi ããrĩmí. Ĩgʉ̃, Marĩpʉ gããmerĩ ditare iridʉamakʉ̃ ĩãgʉ̃, ĩgʉ̃ sẽrẽrĩrẽ pé, ĩgʉ̃rẽ gũñaturamakʉ̃ iridi ããrĩmí. 8 Cristo, Marĩpʉ magʉ̃ ããrĩkeregʉ, bʉro ñerõ taridi ããrĩmí. Ñerõ tarikeregʉ, Marĩpʉ dorerire tarinʉgãrõ marĩrõ ĩgʉ̃rẽ õãrõ yʉjʉri merã irire iritariweredi ããrĩmí. 9 Ĩgʉ̃ curusague boagʉ, ããrĩpereri Marĩpʉ ĩgʉ̃rẽ iridoredeare iripeodi ããrĩmí. Irasirigʉ ããrĩpererã marĩrẽ ĩgʉ̃rẽ yʉjʉrãrẽ taudi ããrĩmí, ĩgʉ̃ pʉro perebiri okari opaburo, ãrĩgʉ̃. 10 Irasirigʉ Marĩpʉ ĩgʉ̃rẽ: “Melquisedec paí ããrĩderosũta mʉ ããrĩníkõãgʉkoa”, ãrĩ pídi ããrĩmí, marĩya ããrĩburire sẽrẽbosabure.
Jesucristore bʉremurĩrẽ piriri, ãrĩrã, ĩgʉ̃rẽ gũñaturaníkõãrõ gããmea, ãrĩ gojadea
11 Cristo paía opʉ nemorõ ããrĩrĩ́rẽ wári werenemodʉadáa. Mʉsã pémasĩturabirimakʉ̃, irire weremasĩbirikoa. 12 Mʉsã yoaripoe Cristore bʉremubʉ. Irasirirã dapagoraguere gajirãrẽ Marĩpʉyare buerimasã ããrĩbukoa. Mʉsã irasũ ããrĩbonerã, dapagoraguedere neõ buepʉrorirã irirosũta ããrĩkõãa. Õpĩkũ mirĩrã, baari baagamasĩmerã, majĩrãgã irirosũta ããrĩkõãa. Irasirirã gajirã buerimasã mʉsãrẽ buepʉrorideare dupaturi buero gããmea. 13 Õpĩkũ mirĩrã majĩrãgã irirosũ ããrĩrã́no, “I ñerĩ, i gapʉ õãrĩ ããrã”, ãrĩ beyemasĩbema. 14 Baari bʉriri gapʉ mʉrã baari ããrã. Mʉrã ããrĩrã́no, õãrõ buenerã, õãrĩrẽ, ñerĩrẽ beyemasĩrãgue ããrĩ́ma.