A fosi brifi fu Paulus gi den bribisma na
Tesalonika
Wan wortu na fesi
A gemeente na Tesalonika ben de wan yongu gemeente. Den ben mus gro ete ini bribi. Ma ini a gemeente wan prakseri ben de abra a konbaka fu Kristus. Wantu sma ben e bribi tak' Kristus bo kon es'esi baka. Trawan ben e aksi densrefi efu den dedesma o opo baka na skinfasi te Kristus kon baka. Fu dat'ede Paulus skrifi den, fu kraka den ini a bribi èn fu meki den sabi trutru tak' Kristus sa kon baka.
San de ini a buku disi:
A bigin fu a brifi (1:1)
Paulus nanga a gemeente na Tesalonika (1:2 – 3:13)
Fa bribisma mus libi (4:1-12)
Te Yesus o kon baka (4:13 – 5:11)
A kba fu a brifi (5:12-28)
1
Odi
1 Gi a gemeente na Tesalonika, di de fu Gado a P'pa nanga fu Masra Yesus Kristus, *Bosk 17:1
Disi na wan brifi fu Paulus, nanga Silfanus nanga Timoteus. Wi e winsi tak' Gado sa sori un bun-ati èn gi un freide.
A bun eksempre fu a gemeente na Tesalonika
2 Wi e taki Gado ala leisi tangi gi un alamala te wi e prakseri unu ini begi. 3 Wi e tan memre na fesi Gado wi P'pa den sani di un du fu di un e bribi, èn tak' un e tan wroko nanga lobi sondro fu weri. Wi e tan memre a howpu tu di un abi ini un Masra Yesus Kristus, di de fu si ini a fasi fa unu e hori doro.
4 Brada nanga sisa, wi sabi tak' Gado lobi unu, èn A teki unu leki sma fu En. 5 Bika di wi tyari a Bun Nyunsu gi unu, a no ben de soso wortu. Ma a ben abi krakti, sobun a krakti fu a Santa Yeye, èn wi sabi krinkrin tak' a tru. Un srefi sabi fa wi ben tyari wisrefi di wi ben de na un mindri, èn fa wi ben e suku bun gi unu. 6 Un teki a eksempre fu wi nanga a di fu Masra. Aladi un ben nyan furu pina, un teki a boskopu nanga wan prisiri di a Santa Yeye srefi gi unu. *Bosk 17:5-9 7 Na sowan fasi unu srefi tron wan eksempre gi ala den bribisma na Masedonia nanga Akaya. 8 Bika a wortu fu Masra kmoto na unu drape, panya go moro fara. A no na Masedonia nanga Akaya wawan, ma na ala sei den sma yere fu a bribi fu unu ini Gado. Dat' meki wi no abi fu taigi den sma noti moro fu a bribi fu unu. 9 Bika den srefi e ferteri fa unu ben teki wi na un mindri èn fa un libi den kruktu gado fu dini a trutru Gado di e libi. 10 Moro fara den e ferteri fa un e ferwakti tak' En Manpikin di A meki kon baka na libi, sa drai kon baka fu heimel. Na En na Yesus di e puru unu ini a strafu di o kon.