A wroko fu den
Boskopuman
Wan wortu na fesi
Lukas na a skrifiman fu a buku disi. A e ferteri ini a buku disi fu a wroko fu den boskopuman fu Yesus, baka di den kisi a Santa Yeye. A e ferteri tu fu a fasi fa Masra Yesus opo go na heimel, nanga san psa tapu a Pinksterdei (Bosk 1 nanga 2). Moro fara Lukas e ferteri fu Petrus nanga a gemeente na Yerusalem (Bosk 3-12). Baka dati a wroko fu Paulus e kon moro tranga na fesi. A buku e ferteri wi fa Paulus waka lontu fu panya a Bun Nyunsu.
A gronprakseri fu a buku no de ini a fosi presi fu meki wi sabi san den apostel du èn san den ondrofeni, ma fu ferteri fa a wroko fu Masra Yesus Kristus go moro fara. Lukas e bribi tak' a Bun Nyunsu de gi ala sma na heri grontapu.
San de ini a buku disi:
A Bun Nyunsu e panya ini Yerusalem (1:1 – 6:7)
A Bun Nyunsu e panya go na Yudea, Galilea nanga Samaria (6:8 – 9:31)
A Bun Nyunsu e panya go te na Antiokia ini Siriakondre (9:32 – 12:25)
A Bun Nyunsu e panya go na westsei te na a distrikti Asia (13:1 – 16:5)
A Bun Nyunsu e panya go na Grikikondre (16:6 – 19:20)
A Bun Nyunsu e panya go te na Roma (19:21 – 28:31)
1
A pramisi fu a Santa Yeye
1 Teofilus, ini a fosi buku di mi skrifi, mi ben ferteri yu fu ala den sani san Yesus ben du nanga san A ben leri, *Luk 1:1-4 2 te kon miti a dei di Gado teki En go na heimel. Ma fosi dati, A ben komanderi den man di A ben teki leki boskopuman fu En, san den ben mus du. A du dati nanga yepi fu a Santa Yeye. 3 Baka di Yesus nyan pina èn dede, A sori Ensrefi na den man disi èn A du furu sani fu meki den kon si krin tak' A kon na libi baka. A du dati ini wan ten fu fotenti dei, èn A ferteri den fu a fasi fa Gado wani tiri libisma.
4 Wan fu den dei dati, di Yesus ben e nyan makandra nanga den, A taigi den taki: “No gwe libi Yerusalem, ma un mus tan wakti tapu san mi P'pa ben pramisi unu. Mi ben taigi unu fu a pramisi dati kba. *Luk 24:49 5 Yohanes ben e dopu sma nanga watra, ma baka wantu dei un sa dopu nanga a Santa Yeye.” *Mat 3:11; Mrk 1:8; Luk 3:16; Yoh 1:33
Yesus opo go na heimel
6 Di den ben de makandra nanga Yesus, den aksi En taki: “Masra, na now Yu o gi Israel en eigi kownu baka leki fa a ben de fosten?”
7 Yesus piki den taki: “Un no abi fu sabi a ten noso a yuru di a sani dati o psa. Na a P'pa abi makti èn na En o meki a psa oten A wani. 8 Ma unu o kisi krakti te a Santa Yeye kon na un tapu. Dan un sa de kotoigi fu Mi na ini Yerusalem, na ini heri Yudea nanga Samaria, èn te na den moro fara presi fu grontapu.” *Mat 28:19; Mrk 16:15; Luk 24:47-48
9 Baka di A taki den sani disi, Gado teki En go na heimel let' na den fesi. Dan wan wolku tapu En, èn den no ben kan si En moro. *Mrk 16:19; Luk 24:50-51 10 Di den ben e luku go na loktu ete, fa A e gwe, dan wantron so tu man ini weti krosi ben tnapu na den sei. 11 Den man taigi den taki: “Un man fu Galilea, fu sanede un tnapu dyaso e luku go na loktu? A srefi Yesus disi, di Gado teki go na heimel, o drai kon baka tapu a srefi fasi fa un si tak' A go na heimel.”
Wan tra sma mus teki a presi fu Yudas
12 Dan den man kmopo fu a bergi di den e kari Oleifbergi, go baka na Yerusalem. A bergi disi no ben de fara fu Yerusalem. A no ben doro wan kilometer. 13 Di den doro ini a foto, den go na a kamra na sodro pe den ben e tan a ten dati. Den nen fu den man ben de: Petrus, Yohanes, Yakobus, Andreas, Filipus, nanga Tomas. Bartolomeus, Mateus, nanga Yakobus a manpikin fu Alfeus. Dan yu ben abi ete Simon fu a grupu fu den Seloten, nanga Yudas a manpikin fu Yakobus. *Mat 10:2-4; Mrk 3:16-19; Luk 6:14-16 14 Ala den man disi ben tan begi leki wan man makandra nanga Maria a m'ma fu Yesus, den brada fu En, nanga wantu tra umasma.
15 Wan fu den dei dati, Petrus opo tnapu fu taki nanga den bribisma. A dei dati wan hondro nanga tutenti (120) sma so ben kon makandra. 16 Petrus taigi den taki: “Brada, a sani san skrifi ini a Santa Buku abra Yudas Iskariot ben musu fu psa. Langa ten na fesi, a Santa Yeye ben meki kownu David taki fu Yudas, di ben tyari den sma go grabu Yesus. 17 Yudas ben de wan fu unu, èn a ben kisi a srefi wroko fu du leki unu.”
18 Nanga a moni di Yudas ben kisi fu a ogri di a du, a bai wan pisi gron. A fadon langalanga nanga fesi, en bere priti opo, èn en heri inibere kon na doro. *Mat 27:3-8 19 Ala den sma fu Yerusalem kon yere a tori dati. Dat' meki den e kari a pisi gron dati na ini den eigi tongo: Akeldama. Dati wani taki: Brudu gron.
20 Petrus taki moro fara taki: “A skrifi ini a buku fu den Psalm taki:
Meki a oso fu en tan leigi,
no meki no wan sma
go libi drape.
A skrifi tu taki:
Meki wan tra sma
du a wroko fu en. *Ps 69:26; Ps 109:8
21-22 Fu dat'ede un mus teki wan tra sma di kan ferteri makandra nanga wi, tak' Yesus opo baka na dede. A mus de wan sma di ben waka nanga unu sensi a pisten di Masra Yesus teki dopu na Yohanes, te kon miti a dei di Gado teki En go na heimel.” *Mat 3:16; Mrk 1:9; Luk 3:21; Mrk 16:19; Luk 24:51
23 So den bribisma tyari tu man kon na fesi: Matias nanga Yosef. Den sma ben sabi Yosef tu leki Barsabas, èn tra sma ben kari en Yustus. 24-25 Dan den sma begi taki: “Masra, Yu sabi ala sma ati. Sori wi sortu wan fu den tu man disi Yu ben teki na fesi kba fu wroko leki Yu boskopuman na a presi fu Yudas, di libi a wroko fu go na a presi di fiti en.” 26 Baka dati den hari wan lot èn a lot fadon tapu Matias. So a tron wan boskopuman fu Yesus tu neleki den tra erfu man.