A brifi fu Paulus gi den bribisma na
Galasia
Wan wortu na fesi
Den bribisma di no de Dyu no ben sabi efu den ben mus hori densrefi na a wèt fu den Dyu. A sani disi ben de wan bigi problema gi den fosi gemeente. Paulus skrifi a brifi disi fu tyari leti kon ini a tori. A tori disi taki tu ini a gemeente na Yerusalem. Drape den seti en bun. Nanga a brifi disi Paulus wani taigi a gemeente tu tak' den mus libi nanga bribi, èn tak' den mus firi densrefi leki fri sma ini Kristus.
San de ini a buku disi:
A bigin fu a brifi (1:1-5)
A leri fu Paulus kmopo fu Kristus (1:6 – 2:21)
A bribi e meki wi kon fri fu a wèt (3:1 – 5:12)
Wi kon fri fu lobi tra sma (5:13 – 6:10)
A kba fu a brifi (6:11-18)
1
Odi
1-2 Gi den gemeente na Galasia,
Disi na wan brifi fu Paulus. Mi na wan boskopuman fu Yesus, fu di Yesus Kristus nanga Gado a P'pa, di ben meki Yesus opo baka na dede, ben wani dati. A no libisma seni mi go, èn a no libisma poti mi fu du a wroko disi. Mi nanga ala den brada nanga sisa di de nanga mi, e seni odi gi unu.
3 Wi e winsi tak' Gado wi P'pa, nanga wi Masra Yesus Kristus, sa sori un bun-ati èn gi un freide. 4 Leki fa Gado wi P'pa ben wani, Yesus Kristus gi En libi fu wi sondu ede, fu ben kan ferlusu wi puru ini a takru grontapu pe wi e libi now. 5 Meki Gado, wi P'pa, kisi glori fu têgo èn ala ten! Amen.
Wan Bun Nyunsu nomo de
6 Mi e ferwondru tak' so esi un e drai un baka gi a Wan di kari un kon na En, nanga a bun-ati fu Kristus. Èn now un e gi yesi na wan tra bun nyunsu. 7 Ma a sani dati no de wan bun nyunsu kwet'kweti. Ma na wantu sma wani bruya unu, èn den e suku fu drai a Bun Nyunsu fu Kristus. 8 Ma awinsi wi srefi noso wan engel fu heimel ben sa tyari wan bun nyunsu gi unu di no de a srefi leki a Bun Nyunsu san wi ben tyari gi unu, dan meki a fluku fu Gado de na en tapu! 9 Mi ben taki en kba na fesi, now mi e taki en ete wan leisi: Efu wan sma e tyari wan bun nyunsu gi unu di no de a srefi leki a Bun Nyunsu san un ben kisi kba, dan meki a fluku fu Gado de na en tapu. 10 Mi no e suku fu kisi sma na mi sei, ma mi e suku fu Gado de na mi sei. Mi no e pruberi fu meki sma lobi mi. Efu mi ben du dati, dan mi no bo de wan wrokoman fu Kristus.
Fa Paulus du tron wan boskopuman fu Yesus
11 Brada nanga sisa, mi kan taigi un disi: A Bun Nyunsu san mi e preiki no kmopo fu libisma. 12 Bika mi no kisi en noso leri en fu wan libisma, ma na Yesus Kristus ben tyari en kon na krin gi mi. 13 Un yere fu a fasi fa mi ben libi fos'fosi ini a Dyubribi. Mi ben de fayafaya na a gemeente fu Gado baka fu du en ogri, èn mi ben suku fu puru en na pasi. *Bosk 8:3; 22:4-5; 26:9-11 14 Ini a Dyubribi mi skopu en moro fara leki furu fu den tra Dyu fu mi speri. Nanga mi heri ati mi ben e du ala muiti fu hori san den afo fu mi ben leri. *Bosk 22:3
15 Ma fosi mi gebore, Gado ben poti mi aparti gi Ensrefi, èn ini En bun-ati A kari mi. *Bosk 9:3-6; 22:6-10; 26:13-18 16 A ben feni En bun fu meki mi si En Manpikin, fu mi ben kan go ferteri den sma di no de Dyu, abra En. Di a sani disi psa, mi no go na no wan libisma fu go suku rai. 17 Sosrefi mi no go na Yerusalem na den wan di ben de boskopuman fu Yesus kba fosi mi. Ma mi go na Arabia, èn fu drape mi drai go baka na Damaskus. 18 Dri yari baka dati mi go na Yerusalem fu go luku Kefas.*Kefas na wan tra nen fu Petrus. Dan mi tan tin-na-feifi dei nanga en.*Bosk 9:26-30 19 Mi no miti nanga no wan fu den tra boskopuman fu Yesus, boiti Yakobus a brada fu Masra. 20 San mi e skrifi dya no de wan lei. Gado na mi kotoigi. 21 Baka dati mi go na den kontren fu Siria nanga Silisia. 22 Ma den gemeente fu Kristus ini Yudea no ben leri sabi mi ete. 23 Den ben yere nomo tak' a man di ben waka e du den ogri, e preiki a bribi now san a ben suku fu puru na pasi. 24 Na so den ben gi Gado glori fu san A ben du na ini mi.