Un no sabi suma skrifi a brifi disi. A brifi skrifi gi den Dyusma (Hebrewsma) di teki bribi ini Masra Yesus Kristus. Den ben lasi ati fu di den ben abi furu problema èn fu di tra sma ben leri den wan kruktu leri.

A skrifiman fu a brifi disi e skrifi den fu den no libi a bribi. A e warskow den fu den no drai go dini Gado tapu a owru fasi leki fa a wèt fu a Dyubribi e taki. A e sori den tak' san Yesus Kristus du gi wi, bigi moro den sani san a wèt fu a owru ferbontu du gi wi. A e sori den tak' Yesus Kristus bigi moro ala sani san de, èn tak' A bigi moro den wrokoman fu a owru ferbontu leki Moses nanga Aaron. A e sori den tu tak' a nyun ferbontu na wan moro bun ferbontu. A sma di poti en fertrow na tapu Yesus, e teki prati ini den pramisi fu Gado (3:14). A skrifiman e taigi den moro fara tak' den kan kon sondro frede na Gado fesi fu feni yepi (4:16), tak' den mus tan hori doro na a bribi (10:35), èn tak' den mus teki a eksempre fu den fosten bribisma.