16
Paulus e seni taki sma odi
1 Mi wani du wan bun wortu gi wi sisa Febe, di de wan dinari ini a gemeente na Kenkrea. 2 Un teki en na un mindri leki wan sma fu Masra, tapu wan fasi di fiti sma fu Gado. Un mus yepi en tu nanga san a abi fanowdu, awinsi san a de. Bika fu en sei a yepi furu sma, èn a yepi mi tu.
3 Taki Priska nanga Akwila odi gi mi. Den e wroko makandra nanga mi gi Kristus Yesus. *Bosk 18:2 4 Den sma disi ben kan lasi den libi fu di den yepi mi. Ma a no mi wawan e taki den tangi, ala den gemeente fu den sma di no de Dyu, e taki den tangi tu. 5 Un mus taki a gemeente di e kon makandra ini den oso odi tu.
Un taki mi lobi brada Epenetus odi gi mi. A de a fosi sma fu a distrikti Asia di teki bribi ini Kristus.
6 Un taki Maria odi tu, di ben wroko so tranga gi unu.
7 Un taki Andronikus nanga Yunias odi gi mi tu. Den na mi kondreman di ben de na straf'oso makandra nanga mi. Den man disi na prenspari man na mindri den boskopuman fu Yesus, èn den ben e bribi na ini Kristus fosi mi tron wan bribisma.
8 Taki Ampliatus odi. Mi lobi en fu di a e bribi ini Masra.
9 Taki Urbanus odi gi mi. Neleki wi, a e wroko gi Kristus. Un taki mi lobi mati Stakis odi tu. 10 Taki Apeles odi. A de krin tak' en na wan trutru sma fu Kristus.
Un taki den ososma fu Aristobulus odi tu.
11 Taki Herodion, a kondreman fu mi, odi.
Un taki den ososma fu Narsisus odi di de fu Masra.
12 Taki den sisa Trifena nanga Trifosa odi. Den e wroko tranga gi Masra.
Un taki mi lobi mati Persis odi tu. A wroko bun tranga gi Masra.
13 Taki Rufus odi. Masra ben teki en gi Ensrefi. Un taki en mama odi, di de leki wan mama gi mi tu. *Mrk 15:21
14 Un mus taki Asinkritus, Flegon, Hermes, Patrobas, Hermas nanga den tra brada di de nanga den, odi tu.
15 Un taki Filologus nanga Yulia, Nereus nanga en sisa, nanga Olimpas nanga ala den sma fu Gado di de na den, odi tu.
16 Un taki makandra odi nanga wan santa bosi. Ala den gemeente fu Kristus seni taki un odi.
Paulus e warskow gi kruktu leriman
17 Brada nanga sisa, mi e begi un tangitangi fu un luku bun nanga den sma di e tyari prati kon na un mindri, èn di e meki trawan bribi sani san no e agri srefsrefi nanga a tru leri san un kisi. Un no mus bemui nanga den. 18 Bika den sortu sma disi no e dini Kristus, wi Masra. Na densrefi den e dini. Nanga den moi wortu, èn nanga a switi taki fu den, den e bedrigi den sma di no e si tak' den e pruberi fu puru den na a pasi fu Masra. 19 Ala bribisma kon sabi now tak' un e du Gado wani. Dat' meki mi abi prisiri nanga unu. Ma mi wani fu un sabi heri bun san na bun, èn fu un hori unsrefi fara fu den sani san no bun. 20 Gado di e gi freide, sa broko a makti fu Satan her'esi na ondro un futu.
Meki a bun-ati fu wi Masra Yesus de nanga unu.
Wantu tra bribisma e seni taki sma odi
21 Timoteus, di e wroko makandra nanga mi, e seni taki un odi. Lusius, Yason nanga Sosipater, den kondreman fu mi, e seni taki un odi tu. *Bosk 16:1-3
22 Mi Tertius, di poti a brifi disi na tapu papira, e taki un odi ini a nen fu Masra.
23 Gayus, seni taki un odi tu. Mi e libi na en oso, pe a gemeente e kon makandra. *Bosk 19:29; 1Kor 1:14; Bosk 19:22; 2Tim 4:20
Erastus, a man di e luku den moni tori fu a foto, nanga wi brada Kwartus, e seni taki un odi. 24 Meki a bun-ati fu wi Masra Yesus Kristus de nanga un alamala. Amen.*Wantu manuscript no abi vers 24.
Gado mus kisi grani!
25 Gado abi makti fu meki un kon tranga. Disi na a Bun Nyunsu fu Yesus Kristus di mi e ferteri unu. Na wan kibritori di ten na ten sma no ben sabi. 26 Ma now Gado di e libi fu têgo, taki tak' a mus kon na krin. A ben meki den profeiti skrifi en fu ala folku kan teki bribi èn du a wani fu Gado. 27 Na Gado wawan, di abi ala koni, mus kisi grani fu têgo fu di A seni Yesus Kristus kon. Amen.