Mbia Cheẽ 2 JUAN 1
SEGUNDA CARTA DEL APOSTOL
SAN JUAN
1
Achesecuate jendese, ɨ Juan
Juan ndei se. Ameɨte se. A aɨco ã mbesa mbesa ndeje a, Ari. Dios chiirabo tuchɨ chõ nde re. Nderiirĩ je abe aɨco ã mbesa mbesa a. Co aɨco nyesecua tuchɨ jendese co. Dios rese quia jẽɨngo tuchɨte nguiã ũquɨ̃. Nyebe Dios quiato riqui nguiã nyesecua jate jendese ũquɨ̃. Achesecua tuchɨte quia jendese co. Dios cheẽ nguiatu siqui beɨte quia nandechɨangui re co.
Dios rei nanderu. Jesucristo rei eriirĩ. Sã ũquɨ̃ ndiqui turã jendese. Sã ũquɨ̃ ia eã tuchɨ riqui jendese. Sã ũquɨ̃ ndiqui jembia beɨ tuchɨ. Ũquɨ̃ ndiqui nyesecua tuchɨ jendese ũquɨ̃. Ũquɨ̃ ñee ñooño eã tuchɨ quia ũquɨ̃.
Nderiirĩ mo ngue chɨ tuchɨ Dios cheẽ ndese seje ra. Seya tuchɨ que ũquɨ̃ mose ra. Nandechesecua ja chõ nguia nandechɨese. Dios cheẽ yasu eã ño ã nde. Dios cheẽ ñiinda beɨ chõ ñene. Nandechesecua mose nandechɨese, nandeɨco Dios cheẽ nduɨ sɨ́ ã. —Jenyesecua chõ jenyɨese, ɨ quiatu ngue Dios nande je re. Cose ndare beɨ chõ jẽɨngo nguiã ũquɨ̃ andu ã.
Aba mbɨɨrɨ̃ ɨrɨ̃sa
Mbia tubɨrɨã ndiqui aba mbɨɨrɨ̃ ɨrɨ̃te ã cote. Jesucristo que tu ibate sɨ mbiarã nda, ɨ sereã nea. Cristo ucuayãsa, ɨ chõ ũquɨ̃ je re. Aba mbɨɨrɨ̃ ɨrɨ̃sa, ɨ abe que ũquɨ̃ je ra. Cochee chõ jẽɨngo. Mbae jẽsaã ɨru ɨru eã sacuã Dios je. Ũquɨ̃ mose ra Dios jenyɨsaã sɨbɨshorõ turã tuchɨ jẽje. Emo ɨcha mose Cristo cheẽ sɨ, Dios resenda eã ño ũquɨ̃ nde. Emo siqui beɨ mose Cristo cheẽ ndese, Dios resenda tuchɨ chõ ũquɨ̃ nde. Cristo resenda abe no. 10 Emo mbia mbaaquiatu quiatu mose Cristo cheẽ nduɨ sɨ eã, ũquɨ̃ jẽisi turã eã ño nguia jenyuchúaa. Jeñee turã turã aroneate ee. 11 Ae ñee turã nguia ee ũquɨ̃ nɨɨ nae, ae abe chõ eɨcuã ndiqui nguiã erã sɨ́.
Juan embesa huɨ beɨ
12 Mbae tasenei ja tuchɨ jẽje, ae rei que se ra. Ambesa oco sereãte mondo jẽje. Tambuchecua tuchɨ chõ oso ñee jẽje, ae que se ra. Nandeya tuchɨ sacuã nandechɨese.
13 Dios chiirabo tuchɨ chõ ndenongue re. Eriirĩ ja saludos mondo quia ndeje aque. Amén.