LA CARTA A LOS
HEBREOS
1
Jesucristo mɨɨ ño Dios cheẽ mbuchecua nguiã
Dios que ucheẽ mbiasa asa tuchɨ quia mbia nandei ñiinda je cose ra. Hue rɨ̃ ji eã ngue eriqui ucheẽ mbiasa asa ee ra. Dios cheẽ mbuchecua checuasa atate que aque mose ra. Eɨ̃ eã ño namo nde. Jesucristo mɨɨ ño Dios cheẽ mbuchecua checua nguiã nande je co cote. Dios nguiirĩte mbucheẽ nande je cote. Ae mɨɨ ndese chõ ngue Dios ibi ao nyii ra. Dios que emɨɨ mbae ja rerecuarã nda. Dios nininya rã sɨ tuchɨ chõ Jesucristo nininya re. Dios rã sɨ tuchɨ chõ ae re. Ae chõ mbae mingo ja nguiã ucheẽ quirãcuã je co. Ae que mano nandeɨcuã mbutiã sacuã nda. Aquere eñɨ ngoi beɨ ngu rese ibate pe cote.
Jesús quia rei ɨ tuchɨ ángeles sɨ
Jesucristo quia rei ɨ tuchɨ ángeles sɨ. “Seriirĩ tuchɨ” ɨ chõ Dios nguiã ee. Ã ngue Dios ñee ãte ángeles mo je ra:
Seriirĩ ño nde re.
Ndereco que amee ndeje ra,
ɨ ãte que Dios ángeles mo je ra.
Nderu chõ se re.
Seriirĩ ño nde re,
ɨ ãte que Dios ángeles mo je ra. Dios nguiirĩ mbu mose íbii que ñee nda:
Sã ángeles riqui adorar ɨ ja seriirĩ je,
ɨ que ra. Ã ngue Dios ñee ángeles rɨɨ̃ nda:
Quɨrɨrɨã tu asi rã tuchɨ chõ ángeles re.
Serimba chõ ángeles re.
Tata rendi rã tuchɨ,
ɨ que Dios ñee ángeles rɨɨ̃ nda. Nguiirĩ je quiatu que ñee ã nda:
Nde rei Dios. Ererecuarã mbeɨ ra nde.
Ererecua turã tuchɨ ereɨco nde co.
Mbae turã eresaã sete quia co.
Mbae ɨcuã nguia erechoseɨ chɨãte nguiã.
Nyebe Dios riqui nguiã nembia tuchɨ nderesenda mo sɨ.
10 Nde que mbae erechao ja tuchɨ ibi jenda nyii ra.
Ndeo je que ibei erechao no nda.
11 Ũquɨ̃ nda ua ja chee.
Nde quia ra ereɨco beɨ.
Tiru ɨma na ja chee ra ũquɨ̃.
12 Sã mbia riqui tiru ɨma mombo no.
Eyasu rerequia erendaque re.
Eɨ̃ sɨ ra ibi cote. Ibei abe no.
Nde quia ra eɨ̃ mbeɨ ereɨco.
Eremanoa mbeɨ ra nde quiatu,
ɨ que Dios ñee Jesucristo je ra. 13 Ã ngue Dios ñee ãte ángeles mo je ra:
Ecoi sejii. Nde abe ra ererecua serese.
Ae ndeucuãyãte quia nae, ũquɨ̃ je ra ndequirãcuã ateacuquia tuchɨ.
Ndequirãcuã tuchɨ chee ra ũquɨ̃ sɨ,
ɨ ãte que Dios ángeles mo je ra. Jesús mɨɨ je que ñee ũquɨ̃ nda. 14 Dios riirĩ eã ño ángeles re. Dios rimba chõ ñene. Ae ra Dios mingo beɨ, ũquɨ̃ ndaarõ sacuã ño ngue Dios ángeles mɨɨ nguiã.