2
Cristo seteã tuchɨ que tu ra
Jesucristo jembɨu turãte quia co. Cristo nyesecua mose jendese, jẽyate riqui ũquɨ̃. Espíritu Turã abe riqui jendese ũquɨ̃. Jendua turãte equia emo ndese ũquɨ̃. Nyebe aɨco nguiã ñee jẽje. Seyate aɨco raque jendese co. ¡Secheẽ jemumbayã tuchɨ quiatu quia jẽ! ¡Sembia tuchɨ quiatu se jẽ! ¡Jendua ata atachɨ̃ nda jẽ! ¡Hue rɨ̃ ja chõ jẽɨngo ndua jẽ! ¡Hue rɨ̃ ja chõ jẽɨngo nyesecua nyɨese no jẽ! ¡Abeɨ chɨãte ra jẽɨngochɨ̃ jẽ! ¡Jenguasu ra jẽsaã saãchɨ̃! ¡Jẽseteã ño jẽɨngo! —Nde chõchɨ̃ ndeturã sesɨ, ¡jenye chõ jenyue! “Se chõ jẽ” ¡jenyechɨ̃ nda jẽ! Emo mbaerã abe rese quia nandeɨco ndua. Sã Jesucristo riqui ndua eãte uchɨese no. Erã sɨ chõ nandeɨco ndua nande abe jẽ. Dios rã sɨ rei que Jesucristo ra. Ñimbuseteã tuchɨ que u íbii ra. Ererecua rã eã ngue eru íbii ra. —Dios rã sɨ chõ taɨco beɨ se, ɨã ngue u íbii ra. Mbia rerecua tuchɨ rei que Jesucristo ra. Huiico mose ibate. Mbia mo na ngue eru íbii cote ra. Mbia mbaecha reã na ño ngue eriqui íbii cote ra. Mbia rimba rã. Mbia mo na ño ngue ae ra. Ibii eɨco mose cote. Mbia rerecua que esaã saã eãte quia ra. Siqui mingue chõ ngue equia ra. Dios cheẽ ngue emumbayã mbeɨ mano nyee ra. Embucha ji que mano ira rese ra. Aba ɨreɨ̃te mano ira rese. Nyebe Dios riqui nguiã Jesucristo mbuchecua beɨte co cote. Mbia rerecuarã tuchɨ Dios Jesucristo mingo co cote. 10 Mbia ra ngoi ja chee ngũíã ndese Jesucristo je ñee. Ae siqui ja íbii. Ae siqui ja ibátee no. Ae siqui ja ibiqui rɨ̃. Ũquɨ̃ ja ra ñee turã Jesucristo je. 11 —Jesucristo rei mbia rerecua ja, ɨ chee ra ũquɨ̃ ja ñee. Ũquɨ̃ mose ra Dios ia tuchɨ cote.
Secheẽ jẽisi chooño eẽ ño nguiã, ɨ Pablo
12 Secheẽ ngue jemumbayãte quia seɨco mose jendese. Ɨshote aɨco jẽsɨ co. Secheẽ jemumbayã tuchɨ quiatu quia ɨsho seɨco mose abe. Cochee jiri quiatu jẽɨngo Dios je. Jẽɨngo beɨ tuchɨ quia erese. Jenderao chee ra ibate mbae ɨcuã sɨ. 13 Dios quirãcuã ndiqui jeñɨangui re ũquɨ̃. Dios quia mbae turã nyoseɨ uquia nguiã jẽje. Dios mɨɨ ño jemingo nguiã ubi rese.
14 Mbae turã jẽsaã turã ja chõ. Ñee ɨcuã ɨcuã ndocoɨ̃. Teã teã ndocoɨ̃. 15 Eɨ̃ nda mbia mo ñee ɨcuã ɨcuã eã jẽje. Eɨ̃ nda jẽɨcuã eã emo je. Dios riirĩ ño jẽ nde. Sã nyasitata riqui mbae resae jate itondáruu no. Eɨ̃ ño jẽ nde. Nyasitata rã sɨ chõ jẽ nde. Mbia ɨcuã ndesae ja. 16 Jẽɨngo mbia mingo beɨsa renei nenei tuchɨ mbia je ũquɨ̃. Nyebe ra seya tuchɨ jendese Cristo tu mose. Secheẽ jẽisi chooño eã ño nguiã. Jaembaaquiatu chooño eã ngue Cristo rɨɨ̃ nda. 17 Secheẽ nguire jẽɨngo Dios ɨcuate ũquɨ̃ cote. Secheẽ nguire jendete jemee tuchɨ mose Dios je, seya tuchɨte ra jendese cote. Mbia nda seɨquia rei nguiã Jesucristo rɨɨ̃, seya beɨ ra aɨco jendese, jendete jemee tuchɨ mose Dios je. 18 Jeñimbia chõ nguia serese. Sã seyate aɨco co no.
Timoteo tamondo jẽje Epafrodito rese, ɨ Pablo
19 Jesús eno ɨ mose, Timoteo tamondo rã jendea. Eɨ̃ nda seya jirandu mose jendese. 20 Timoteo rã sɨ ãte emo ndua tuchɨ jendese. 21 Umbaerã achõ ndese chõ eataque riqui nguiã ndua ndua. —Ã tasaã saã mbeɨ Jesucristo je, ɨ ãte equia ũquɨ̃. 22 Sã eriirĩ ndiqui mbae raã naa ngu rese no. Eɨ̃ sɨ que Timoteo quia serese ra. Jesucristo cheẽ nenei nenei mose serese. Siqui turã mbeɨte que equia serese ra. Ũquɨ̃ jẽɨcuate quia ũquɨ̃. 23 Nyebe ra Timoteo amondo jendea. Ã tatea rã nyii. Mbia ra setarõ ji mɨɨ mbeɨ a reae. Sembusẽ nda re no ae. Ũquɨ̃ tatea rã nyii. Ũquɨ̃ ndeare ra Timoteo amondo jendea. 24 Aɨ̃ mbeɨte ndua Dios rese a. Ae ra sembusẽ jeɨ reae. Semondo ra jendea cote reae.
25 Epafrodito abe tamondobe jẽje. Ae jemondo seje nyii seraarõ sacuã nae. Seresenda turãte riqui seje co. Dios cheẽ nenei nenei serese. Senongue rã tuchɨ eriqui seje co. 26 Mae sete equia jendese co cote. —Mbia jiranduchɨ̃ serasi rese re, ɨ equia jenɨɨ co. Nyebe eya eã ndiqui nguiã nduate jendese cote. 27 Ae beɨ. Erasi tuchɨ que eriqui rei ra. Mano serɨ̃ tuchɨ rei que equia ra. Dios ia eã tuchɨ que eriqui erese ra. Nyebe embucherõ nguiã. Serɨɨ̃ abe que Dios embucherõ nda. Sembia jiri sacuã. Sã mbae riqui eɨ̃ eɨ̃ ja tuchɨ sembia eã se no. 28 Nyebe Epafrodito amondo nguiã jẽje aque. Jembia sacuã erasiã ndese cote. Seya eã nda sasẽ jiri jemae mose erese cote. 29 Nanderesenda tuchɨ chõ ae Jesucristo rese re. Ngasẽ mose pee, jẽya chõ erese. Jẽisi turã ño. Eraanguia rese jẽɨngo turã mbeɨ Jesús quiato. 30 Jesucristo rɨɨ̃ ngue mano serɨ̃ serɨ̃te ra. Jesucristo cheẽ nenei nenei mose. Siquiche ãte que equia ra. —Amanochɨ̃ nda se re, ɨ ãte que equia ra. Sereaquiatu turã tuchɨ que equia ra. Ɨshote quiatu ngue jẽɨngo nguiã jẽ. Sereaquiatu aronea.