Poloma꞉ Timodi pa꞉ta꞉ tapaeyeke titina꞉ wapee
1
Polo I̱ta꞉ mo Ketiso Yesuna꞉ aposolo hali halome. Nika꞉ da꞉taasa꞉ Koda꞉ma꞉ make mo epena꞉ yu wia haloma꞉ Ketiso Yesu yaapoma꞉ do e pokono lelepeme.
Do wape Timodi neke pa꞉ta꞉ wape pitolome. Mo Koda꞉ pa꞉ta꞉ hone tulaaseme ekina꞉ta꞉ neketa꞉ ota꞉ ya weki haleme. Mo Apa꞉ Koda꞉ pita꞉ Ketiso Yesu nika꞉ Tekehali ipilikana꞉ma꞉ mo tamba꞉ mina꞉la꞉eki make a꞉ta꞉ma꞉ homa꞉la꞉eki make puki lopaasa꞉eki make neke pa꞉ta꞉ kina꞉e.
Makeaasa꞉ hau wala꞉la꞉ ekina꞉ kinki pita꞉la꞉ pimanu
I̱ma꞉ mo hande Ma꞉sedonia nane pulu hata꞉ loa꞉ tupa꞉ ame make neketa꞉ mo Epesese nane pa hao hapeke alome. Koto pa꞉ta꞉ haleme mandane haliwekima꞉ iki makeaasa꞉ haumanu walo halemeeki na walepepee loelena꞉yeke loa꞉me. Mo haliweki ika꞉ napeke na pitiki pimanu make ika꞉ apa꞉meina꞉ atekena꞉ atekena꞉ bikimanu yata꞉po hata꞉ alemeeki make paeyao mina꞉pa꞉laena꞉ lapeke. Kutu piki pi lo haleme ekima꞉ ikana꞉ma꞉ Koda꞉na꞉ epeaalo pa꞉la꞉ ekimanu mina꞉ na tamba꞉ mikita꞉ ape ape la꞉ tiaalieke. Mo epeaalo pa꞉la꞉eki manuta꞉ nika꞉ hone tulaaloma꞉ ekima꞉ homeke mia꞉peke ya꞉la꞉me. Mo iki pa꞉ta꞉ na lapepee lapeke alo ekina꞉ teketa꞉ kota꞉ mo wanda꞉hali ika꞉ hone teke yako pea make ika꞉ puki lopao make ika꞉ Yesu pa꞉ta꞉ ota꞉ hone tulao halimi ekima꞉ make koto haumanu pilimi ekima꞉ ika꞉ ika꞉ kone pukima꞉ homa꞉ alualu pea haena꞉yeke loa꞉me. Mandane wanda꞉halima꞉ do haumanu mina꞉pa꞉lao mo hande popeke na piki pimanu hotu haleme ekima꞉ epeke hau pea꞉peke ya꞉la꞉ pota꞉manu handa꞉pa꞉peke na ya꞉la꞉me. Ikana꞉ma꞉ Koda꞉na꞉ pi ula꞉eki manuna꞉ wala꞉la꞉ hali haluekee hone wia hata꞉ dupa꞉pa꞉peke dupa꞉pa꞉peke pimanu wopu alemepate pa mo ika꞉ aleme pi kone hone wopu na u make koto pina꞉ teke make hone wopu na witelememe. Mo Koda꞉na꞉ Lo Pi manuma꞉ la꞉ ula꞉ tupa꞉ homeke pu haya꞉ka꞉na꞉ta꞉ epelieke hone witoloma꞉pate pa dupiki hone make witoloma꞉me. Mo lo pi manuta꞉ mo epeke wanda꞉hali tikitiki yaaluekema꞉ na ula꞉pate pa mo ika꞉ you hali pa꞉ta꞉ homu na piki pa pi yambolo haleme wanda꞉hali pa꞉ta꞉ ula꞉me. Dupae. Koda꞉ hoki walaa hoke hau pu haleme wanda꞉hali pa꞉ta꞉ make Koda꞉ hone ma꞉nda꞉ na wiki kenke alemanu pa꞉ta꞉ homeke hone u haleme wanda꞉hali pa꞉ta꞉ make inkiki ateke kone lu make mandane wanda꞉hali lu homao haleme wanda꞉hali pa꞉ta꞉ make kutupa mo 10 yola꞉la꞉ hau pu haleme wanda꞉hali pa꞉ta꞉ make mo wanda꞉ pa꞉ta꞉ pita꞉la꞉ hauta꞉ pa hali yankeke pa꞉ta꞉ kone pita꞉la꞉ wanda꞉hali pa꞉ta꞉ make mandane wanda꞉hali pake mina꞉la꞉ wanda꞉hali pa꞉ta꞉ make yayapiki pi lo haleme wanda꞉hali pa꞉ta꞉ make ya pi alo kone Tekehalina꞉ biki lo haleme wanda꞉hali pa꞉ta꞉ make kutu piki hau piteleme wanda꞉hali paeyao pa꞉ta꞉ hone witolo hata꞉ koto lo pimanu wia pa꞉la꞉me. Do lo pimanu ula꞉ ekita꞉ mo epeke tikitiki piki mana꞉ pimanu a꞉mbaasa꞉ hoke haumanu sa꞉sa꞉ puluekema꞉ ula꞉me. 11 Koto wala꞉peke mana꞉ pi epeketa꞉ mo pa̱a̱ pita꞉la꞉ ta꞉na꞉ piki Koda꞉ma꞉ I̱ma꞉ la halonoyeke ka꞉la꞉ Pi Seliapo pa꞉ta꞉ ula꞉me.
Poloma꞉ Koda꞉na꞉ a꞉ta꞉ma꞉ homeeke ekina꞉ keiyae leekeeki
12 Ya e pokono wele peaasa꞉ Ketiso Yesu nika꞉ Tekehali pa꞉ta꞉ keiyae pi alome. Ipika꞉ e I̱ma꞉ ana꞉na꞉ pokaalieke hone wia I̱ ma̱leke lieke ekina꞉ keiyae alome. 13 Amba꞉ta꞉ I̱ma꞉ ota꞉ Ketisona꞉ biki hoke pi pi alo hata꞉ make ipika꞉ wanda꞉hali ka꞉nda꞉ma꞉ homa꞉ tiao make iki tekipuleke laasa꞉ hali haowa꞉me. Kutu pua꞉ ekita꞉ I̱ma꞉ Ketiso pa꞉ta꞉ hone na tulao make mo pua꞉ ekina꞉ teketa꞉ hone wopu na wiki hata꞉ pueke handaa Koda꞉ma꞉ I̱ pa꞉ta꞉ a꞉ta꞉ma꞉ homeekeme. 14 Nika꞉ Tekehalima꞉ ipika꞉ a꞉ta꞉ma꞉ homa tamba꞉ mina꞉la꞉eki I̱ pa꞉ta꞉ wopu kua꞉niaeyekeme. Kutupa make mo nika꞉ Ketiso Yesu ame̱le̱ molome hone tulaasa꞉eki pita꞉ pukima꞉ homa꞉la꞉eki yaapo I̱ pa꞉ta꞉ make kia꞉me.
15 Ota꞉ opua hone tulaapeke ya꞉la꞉ ota꞉ pi ma꞉nda꞉ta꞉ dupa. Ketiso Yesuma꞉ hoke hau pu haloma꞉ wanda꞉hali da꞉taaluekema꞉ yeke do kenkena꞉ epeekeme. Koto ekina꞉ mo hoke hau wopu pita꞉la꞉ halita꞉ I̱ ya꞉pate 16 Koda꞉ma꞉ I̱ pa꞉ta꞉ a꞉ta꞉ma꞉ homeekeme. Ipikana꞉ma꞉ koto I̱ pa꞉ta꞉ a꞉ta꞉ma꞉ homeeke ekina꞉ teketa꞉ Ketiso Yesuma꞉ mo wetepe hone tulao da꞉ta꞉la꞉eki mulu peleme wanda꞉halima꞉ ipika꞉ a꞉ta꞉ma꞉ homa꞉la꞉eki I̱ pa꞉ta꞉ pieketa꞉ iki pa꞉ta꞉ make pina꞉ I̱ pa꞉ta꞉ amba꞉la wala꞉la꞉me. 17 Mo lekema꞉ handa꞉peke na yo make homa꞉peke na yo piki da꞉ta hao hala꞉ Kini hali ipiki homeke kone Koda꞉ hala꞉me. Ipika꞉ biki tieke ota꞉ kende wina꞉ mea a꞉meiyaena꞉ la꞉na꞉e. Kutu pina꞉e.
18 Ya weki Timodio. I̱ma꞉ amba꞉ neke hone witolo hata꞉ la꞉ wia꞉ pita꞉ koto la꞉ wia꞉ tupa꞉ kone ame nakana꞉ma꞉ pea꞉peke alome. Koto la꞉ wia꞉ pi manuta꞉ naka꞉ a꞉nda꞉ pita꞉la꞉ ale leke miniki hata꞉ a꞉nda꞉ epeke tupa꞉ pea꞉peke. 19 Kutupa naka꞉ hone tulaleeki wopu miniki hata꞉ naka꞉ hone tekemanu ha̱i̱ peaapa꞉na꞉ wopu handeteke hapeke. Mandane haliwekima꞉ta꞉ ika꞉ hone tekemanu pendulu baemeke handaata꞉ ika꞉ hone tulaaseme ekita꞉ mo hande sisima kawasota꞉ toopina꞉ tulaaso yambolo hoeta꞉la꞉ tupa꞉ ika꞉ hone tulaasemeeki make koto tupa꞉ kone ota꞉ hoeyaasememe. 20 Mo haliweki ame̱le̱ haepeke hali yaapo ipilika꞉ biki Haimeniasi pita꞉ A꞉lekesa꞉nda yaapota꞉ koto hau pipikime. Ipiliki tanda mina꞉ mo Sadanina꞉ kiki pa꞉ta꞉ pa꞉na꞉ tapaowa꞉me. Kutu pu ekima꞉ta꞉ ipilikana꞉ma꞉ mo hande Koda꞉na꞉ biki laasepeeki mina꞉pa꞉laena꞉ tamba꞉ milieke.