1 I̱ta꞉ Poloma꞉ ya kone iki pa꞉ta꞉ honke alome. I̱ta꞉ hande iki ame̱le̱ halo dina꞉ta꞉ homu pea dete polopate iki mina꞉pa꞉lao papate halo dina꞉ta꞉ tanda pola꞉me lo hala꞉ma꞉ somema꞉ loa꞉me. Ketisona꞉ homu toloma꞉ lita꞉la꞉eki pita꞉ a꞉ta꞉ma꞉ homolo hata꞉ puki hala꞉la꞉ ekima꞉ta꞉ I̱ma꞉ iki honke alota꞉ 2 I̱ epoa꞉ka꞉na꞉ta꞉ tanda piono na sutiaamena꞉ yeke loa꞉me. I̱ma꞉ta꞉ mo nikana꞉ma꞉ kenkena꞉ hone pa꞉la꞉ hau pa꞉ta꞉ yama꞉ pitoloma꞉me laa aleme tapake pa꞉ta꞉ta꞉ I̱ma꞉ tanda pia꞉peke ya꞉la꞉me laa hone ulume. 3 Nikita꞉ do kenkena꞉ ota꞉ haloma꞉pate nikita꞉ kenkena꞉ hone pa꞉la꞉ hau pa꞉ta꞉ yama꞉ a꞉nda꞉ na pitoloma꞉me. 4 Mo nikana꞉ma꞉ a꞉nda꞉ pitolo hata꞉ wia haloma꞉ kolepe a꞉ndeli manuta꞉ do kenkena꞉ ekima꞉ dia꞉ya꞉la꞉me. Pate mo hande honkopu hake a꞉nda꞉ pape hoeyao haloma꞉ Koda꞉na꞉ wele wopupiki kolepe a꞉ndelima꞉ pu haloma꞉me. Nikana꞉ma꞉ta꞉ makeaaso ape ala꞉ ekimanu hoeyao haloma꞉me. 5 Mo Koda꞉ hone wiaapa꞉na꞉ sa꞉sa꞉ puluekema꞉ mea tiao pu halemeeki paeyao nikana꞉ma꞉ mea lopao haloma꞉me. Nikana꞉ma꞉ta꞉ honemanu paeyao minaata꞉ Ketisona꞉ pi opua homu pina꞉ lo haloma꞉me. 6 Kutupa ikana꞉ma꞉ pi opua oto pa꞉ta꞉ halimieki handa꞉ wia paeyaalimi dina꞉ta꞉ kota꞉ mo pi opua oto pa꞉ta꞉ na hao halimieki panisi pealuekema꞉ nikita꞉ tikitiki yao halumeke.

7 Ikana꞉ma꞉ta꞉ mo ala꞉ta꞉ ala꞉ta꞉na꞉ hama꞉ naneeki handelememe. Iki ame̱le̱ ma꞉nda꞉ma꞉ ipikita꞉ Ketiso pa꞉ta꞉ tunaalome ala꞉ some hala꞉pe. Kota꞉ ipikana꞉ma꞉ ipika꞉ hau pita꞉la꞉eki kone pa hone wina꞉e. Pa ekipeke ipikana꞉ma꞉ pita꞉la꞉ tupa꞉ kone niki make Ketiso pa꞉ta꞉ tunaaloma꞉me. 8 Kota꞉ mo Tekehalima꞉ niki ka꞉la꞉ handeteke hala꞉ ekina꞉ pi tieke lawa꞉pate I̱ta꞉ yaala꞉ na pa꞉la꞉me. Iki na hoeyake mea daeyamono ka꞉la꞉ handeteke hala꞉ ekina꞉ loa꞉me. 9 Mo yaka tameiya꞉ manuma꞉ta꞉ iki paala꞉ tiaasa꞉eki handoemena꞉ hone na ulume. 10 Ma꞉nda꞉ma꞉ta꞉ I̱na꞉ do la꞉lieke. Polona꞉ tameiya꞉ manuta꞉ tanda pea honkopu hala꞉pate pa mo ipika꞉ loke piti niki ame̱le̱ hala꞉ dina꞉ta꞉ ipikita꞉ dete pea ipika꞉ pi manuta꞉ teke na ula꞉me laa lelieke. 11 Koto ala꞉ somema꞉ta꞉ dupa hone wia꞉peke ya꞉la꞉me. Mo nikita꞉ papate hata꞉ tameiya꞉na꞉ laasoma꞉eki pita꞉ mo iki ame̱le̱ hata꞉ pulu poloma꞉eki yaapo pa꞉ta꞉ta꞉ eki ma꞉nda꞉ ta꞉ta꞉ na pa꞉la꞉me hone wia꞉peke ya꞉la꞉me.

12 Ota꞉ ya꞉la꞉pate nikana꞉ma꞉ta꞉ mo niki dupoloma꞉me o nika꞉ kone mo ikita꞉ manda haloma꞉me laa lo haleme tapake pa꞉ta꞉ na yola꞉ pamboloma꞉ta꞉ pa iki ota꞉ hoke ana꞉ na piki haliwekie. Ikana꞉ma꞉ta꞉ ika꞉ halemeeki tombo muluekema꞉ ika꞉ hone pa꞉la꞉ tombo mina꞉la꞉ ale wepia maka mea handolo hata꞉ dupiki somee laa lo halememe. Kutu pu halemepate 13 nikana꞉ma꞉ nika꞉ hakoko litoloma꞉ ekita꞉ tombo ula꞉eki na ankulalumeke. Mo Koda꞉ma꞉ nika꞉ e tikitiki yaala꞉ tombo taapu halieke. Do ekita꞉ mo iki ame̱le̱ nikana꞉ma꞉ pokoloma꞉ e make apa꞉taasa꞉me. 14 Kutupa ikita꞉ koto tombo taapu haleme ekina꞉ta꞉ nikita꞉ koto tombo mina꞉pa꞉lao mopate leke na poma꞉me. Mo iki pa꞉ta꞉ hande Ketisona꞉ Pi Seliapo mea epoma꞉ dina꞉ loa꞉me. 15 Koto ekina꞉ta꞉ nikana꞉ma꞉ta꞉ mo Koda꞉ma꞉ nika꞉ tombo wia yekeeki ankulao mopate leke pokeme tapakena꞉ ena꞉ hakoko na litoloma꞉me. Kotoeki na pikita꞉ nikana꞉ma꞉ hone witoloma꞉ ekita꞉ ika꞉ hone tulaaseme ekita꞉ daetolo hata꞉ iki ame̱le̱ e wopu pokuluekema꞉ hone wopu witoloma꞉me. Koto ekita꞉ mo Koda꞉ma꞉ la꞉ ula꞉ tombo pa꞉ta꞉ hoto paeyao hata꞉ pokomono loa꞉me. 16 Kutu paata꞉ nikana꞉ma꞉ mo Pi Seliapota꞉ mo papate hala꞉ tutu ma꞉nda꞉ pa꞉ta꞉ walolo hata꞉ mo hali ma꞉nda꞉na꞉ amba꞉ pokea꞉ ena꞉ kenke pa꞉ta꞉ hakoko na liomono yeke loa꞉me.

17 Pate mo Baiboloma꞉ alota꞉ Ma꞉nda꞉ epima꞉ pi latia pomulueke hone wia꞉ka꞉na꞉ta꞉ kota꞉ ota꞉ Koda꞉ma꞉ pa꞉la꞉ ekina꞉ pi latia pomua꞉peke ya꞉la꞉me la꞉la꞉me. 18 Ma꞉nda꞉ma꞉ I̱ta꞉ epeke halie hone wita꞉la꞉ ekima꞉ta꞉ kota꞉ ipikita꞉ epeke hali dia꞉ya꞉la꞉pate pa mo Koda꞉ma꞉ ipiki pa꞉ta꞉ epeke halie lea꞉ka꞉na꞉ta꞉ kota꞉ koto someta꞉ ota꞉ epeke hali hala꞉me.