1 Mo hone tulaaluekema꞉ pita꞉la꞉eki manuta꞉ dupae. Hali homekema꞉ mo mulueke hone wita꞉la꞉ ekita꞉ ipika꞉ hone tukiki pa꞉ta꞉ ota꞉ mea miniki hata꞉ make ipika꞉ lekema꞉ handa꞉peke na ya꞉la꞉ ale manuta꞉ honema꞉ hone witolota꞉ ota꞉ ula꞉me alo hata꞉ ipika꞉ hone tulao handeteke hala꞉me. 2 Amba꞉ kiake haemeke wanda꞉hali ika꞉ hone tulao hao haemeke ekina꞉ta꞉ Koda꞉ma꞉ iki pa꞉ta꞉ ta꞉na꞉ma꞉ homo hayekeme. 3 Nika꞉ hone tulaasome ekima꞉ta꞉ do ya yu paeyaona꞉ ula꞉ ala꞉ta꞉ ala꞉ta꞉ paeyaota꞉ Koda꞉ ipika꞉ pima꞉ kone wepiekeme. Kutupa do nika꞉ lekema꞉ handa꞉peke ya꞉la꞉ alemanu paeyaota꞉ mo handa꞉peke na yeke yeke alemanu mea wepia wina꞉ leekeme hone witoloma꞉me.

4 Mo hande Eipoloma꞉ Koda꞉ pa꞉ta꞉ hone tulaota꞉ ipiki pa꞉ta꞉ pa hala꞉la꞉ alemanu haleekeme. Koto hone tulaaso hata꞉ haleeke ekima꞉ta꞉ mo hande Keinina꞉ pa hala꞉la꞉ ale ota꞉ lombei peakeeki haleekeme. Eipoloma꞉ Koda꞉ pa꞉ta꞉ ipika꞉ hone tulaaso hata꞉ haleeke ale epeke tupa꞉ haleeke handaa Koda꞉ma꞉ ta꞉na꞉ma꞉ homolo hata꞉ Eipolota꞉ tikitiki piki halie leekeme. Eipolota꞉ amba꞉ kiaake homeeke yekepate ipika꞉ hone tulaeyeke ekima꞉ta꞉ wanda꞉halina꞉ hone pa mea u tiao hala꞉me.

5 Hone tulaasa꞉eki homeke homekema꞉ mo hande Inokota꞉ na homeke pa haena꞉ kone Koda꞉ma꞉ hepeni nane mea peekeme. Kutu pieke ekima꞉ta꞉ do kenkena꞉ ma꞉nda꞉ma꞉ pa handa꞉peke na yeekeme. Mo Baiboloma꞉ alota꞉ Koda꞉ma꞉ Inoko oli hepeni nane a̱i̱ na mea peeke do kenkena꞉ pa hata꞉ta꞉ Koda꞉ ta꞉na꞉ma꞉ homao hayekeme. 6 Ma꞉nda꞉ hali epima꞉ hone na tulake hata꞉ Koda꞉ ta꞉na꞉ma꞉ homaapeke na ya꞉la꞉me. Ekipeke. Hali homeke ma꞉nda꞉ma꞉ a꞉nda꞉ Koda꞉ teke pa꞉ta꞉ puluekema꞉ pia꞉ka꞉na꞉ta꞉ kota꞉ titina꞉ amba꞉la ipika꞉ honema꞉ta꞉ Koda꞉ ota꞉ hala꞉me laa ipikana꞉ma꞉ mo ipiki ota꞉ wei moneao haleme wanda꞉hali iki epeaasa꞉ ota꞉ epeke yenki mola꞉me hone tulaapeke ya꞉la꞉me.

7 Koda꞉ma꞉ wetepe epolo pieke hau manuta꞉ Noa pa꞉ta꞉ kinki piekeme. Koto hau manuta꞉ Noama꞉ handa꞉peke na yekepate kone ipika꞉ hone tulaaso hata꞉ Koda꞉na꞉ pi opiekeme. Koto leeke Koda꞉na꞉ kakena꞉ homolo mo wepie leeke kawaso tieke wepiekeme. Koto kawasoma꞉ta꞉ ipiki make ipika꞉ wekiwanda꞉ make peteleekeme. Noama꞉ mo hande Koda꞉ma꞉ leeke pi telia pieke handaa Koda꞉ma꞉ mo hone tulaasemeke hala꞉la꞉ tikitiki piki hauta꞉ Noa pa꞉ta꞉ haleekepate paa pa haemeke mandane wanda꞉hali paeyaota꞉ ota꞉ hoeyaeyekeme.

8 Eipoloha꞉ma꞉ ipika꞉ hone tulaeyeke ekima꞉ Koda꞉na꞉ kakena꞉ homa mo hande kuluekee laa pi la꞉ wieke kenke pa꞉ta꞉ peekeme. Ipika꞉ teke da mina꞉pa꞉lao mo ipiki mateke kenke pa꞉ta꞉ peekeme. 9 Koto la꞉ wieke kenkena꞉ da ma꞉nda꞉ hali leke hata꞉ kone Koda꞉ pa꞉ta꞉ hone tulao hao hayekeme. Ipikita꞉ palai da pa꞉ta꞉ hayekeme. Koda꞉ma꞉ Eipoloha꞉ma꞉ pa꞉ta꞉ la꞉ wieke tupa꞉ kone mo Aisa꞉ke Dieikope yaapo pa꞉ta꞉ make leeke opua miniki hata꞉ pa palai da pa꞉ta꞉ kone hao haepekeme.

10 Pa ekipeke. Eipoloha꞉ma꞉ mo Koda꞉ma꞉ hone pambao wia a꞉ela꞉ daonita꞉ handeteke hayekeme. Koto daonita꞉ mo kukutu pea꞉peke na yeke pa hao halo pa꞉la꞉ ka꞉ta꞉ manda a꞉ela꞉me.

11 Eipoloha꞉ma꞉ta꞉ koke yaalo weki mendia꞉peke nate paeyeke yekepate kone ipika꞉ hone tulao hayeke ekima꞉ weki mendia꞉peke yekeme. Seta make weki kenohali wanda꞉ hayekeme. Eipoloha꞉ma꞉na꞉ honema꞉ta꞉ mo hande Koda꞉ma꞉ la꞉ wieke pita꞉ ota꞉ na tunkulieke laa hone bao hayekeme. 12 Ipikita꞉ ota꞉ teke siki pa꞉ta꞉ homa꞉peke yekepate koto homa꞉peke somesiki pa꞉ta꞉ yama꞉ kone opeeke wanda꞉halita꞉ pa oli yana꞉ hombulanka꞉ hala꞉ tupa꞉ o ikali houna꞉ ka꞉ka꞉la꞉ ula꞉ tupa꞉ haemekeme.

13 Do aloma꞉ titina꞉ haeme haliwekina꞉ Seta peaata꞉ iki paeyao hone tulaa paleke homemekeme. Ikana꞉ma꞉ mo hande Koda꞉na꞉ la꞉ wieke ekimanu na mimikipate pa papate yolo peeke handaa pa ika꞉ lekema꞉ homeke handaata꞉ mokoto ya꞉la꞉pate pila꞉mee laa ta꞉na꞉ma꞉ homeke homemekeme. Do kenkena꞉ koto tapakema꞉ alota꞉ Nika꞉ da teke do dia꞉ ya꞉la꞉pate nikita꞉ pa ta꞉ka꞉li haloma꞉me laa peneme yao lemekeme. 14 Wanda꞉hali manuma꞉ kutupiki pi lemeka꞉na꞉ta꞉ kota꞉ nikana꞉ma꞉ hone witolota꞉ Ikana꞉ma꞉ ika꞉ hao hapeke yu weitelememe hone ulumekee. 15 Ikana꞉ma꞉ mo hande mina꞉pa꞉laeme kenke pa꞉ta꞉ hone pa na umoneao haemekeme. Hone pa umoneao haemeka꞉na꞉ yoluta꞉ kota꞉ ikita꞉ pa ana꞉na꞉ la꞉ka꞉la polo pimime. 16 Kotoeki na pikita꞉ do kenke ota꞉ lombei piki kenke ma꞉nda꞉ hepeni nane ula꞉eki pa꞉ta꞉ puawee hone wimikime. Koto ekima꞉ta꞉ ikana꞉ma꞉ Koda꞉ pa꞉ta꞉ Nika꞉ Koda꞉o laa la꞉na꞉yeketa꞉ ipikana꞉ma꞉ yaala꞉ma꞉ na homeekeme. Pa ekipeke. Koda꞉ ipikana꞉ma꞉ ika꞉ pua hapa꞉peke daoni ma꞉nda꞉ tikitiki yao wiaeyekeme.

17 Koda꞉ma꞉ Eipoloha꞉ma꞉ makea handeeke dina꞉ta꞉ Eipoloha꞉ma꞉ma꞉ hone tulaaso hata꞉ ipika꞉ eiyeke Aisa꞉ke lia haluekema꞉ peekeme. Koda꞉ma꞉ ipiki pa꞉ta꞉ weki wandiki wopu kuluekee laa pi la꞉ wieke pi miniki hayekepate kone Eipoloha꞉ma꞉ ipika꞉ weki siki homeke kone Koda꞉ pa꞉ta꞉ lia haluekema꞉ tikitiki yaeyekeme. 18 Koda꞉ma꞉ amba꞉ Eipoloha꞉ma꞉ pa꞉ta꞉ pi la꞉ witolo alota꞉ Naka꞉ weki Aisa꞉ke pa꞉ta꞉ yama꞉ta꞉ wekiwandiki wopu sa꞉mba꞉lawalueke leekeme. 19 Kutupa Eipoloha꞉ma꞉ ipika꞉ honema꞉ta꞉ Aisa꞉ke lua꞉ka꞉na꞉ta꞉ kota꞉ Koda꞉ma꞉ paa mea tiaapeke ya꞉la꞉me hone wiekeme. Kutu pieke ekima꞉ta꞉ ipika꞉ amba꞉ homeeke weki paa handa꞉ miki nono piekeme.

20 Aisa꞉kema꞉ ipika꞉ hone tulao hayeke ekima꞉ta꞉ ipika꞉ weki Dieikope Iso yaapo ipiliki pa꞉ta꞉ wetepe epolo pia꞉ la꞉ wita꞉la꞉ epeaasa꞉ pimanu la haleekeme. 21 Dieikopema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ haena꞉ mo Diosepena꞉ weki yaapo homeke homeke lo wamo pita꞉la꞉ hau piekeme. Kutu puluekema꞉ta꞉ ipikana꞉ma꞉ tumapu pita꞉ tiao hata꞉ Koda꞉na꞉ biki mea a꞉meiyaaso yeni piekeme. 22 Diosepema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ yeke mo Isulai tapakema꞉ Idiepi kenke mina꞉pa꞉lao polo pimiki ekina꞉ pi la꞉ witolo hata꞉ alota꞉ ipika꞉ wonku piki loke pa꞉ta꞉ pea꞉peke hauna꞉ pimanu make la haleekeme.

23 Mosesina꞉ inkiki ateke yaapoma꞉ make ipilika꞉ hone tulao haepeke ekima꞉ta꞉ ipilika꞉ weki Mosesi mendipiki hoki naneta꞉ sumba꞉ tepo tukiki pa꞉ta꞉ mondu panka꞉ wipikime. Ipikita꞉ ota꞉ epeke weki seliapo yeke handaata꞉ mo kini halina꞉ pi wieke ekina꞉ paala꞉ma꞉ na homepekeme.

24 Mosesima꞉ make hone tulao hayeke ekima꞉ ipiki weki hali hata꞉ alota꞉ I̱ta꞉ mo kini halina꞉ wanekena꞉ weki dia꞉me leekeme. 25 Ipikana꞉ma꞉ mo hoke haumanu puluekema꞉ hosikima꞉ ta꞉na꞉ma꞉ homa pea꞉peke yeekeme. Pate kutu piteme tupa꞉ta꞉ mo Koda꞉na꞉ wanda꞉hali ame̱le̱ hata꞉ ka꞉nda꞉ muluekema꞉ ma̱leke liekeme. 26 Ipika꞉ honema꞉ta꞉ I̱ma꞉ mo Ketiso bikina꞉ yaala꞉ma꞉ homoa꞉ka꞉na꞉ta꞉ kota꞉ koto hauma꞉ta꞉ mo Idiepi nane ula꞉ mani make koloma꞉ wepiki alemanu paeya tapao ota꞉ lombei pa꞉la꞉me hone wiekeme. Kutu pieke ekita꞉ ipikana꞉ma꞉ mo wetepe mulu pieke epeke yenkina꞉ hone u hayekeme.

27 Mosesima꞉ ipika꞉ hone tulao hayeke ekima꞉ta꞉ mo kini halina꞉ mineke pankekeeki pa꞉ta꞉ paala꞉ma꞉ na homeke Idiepi kenke mina꞉pa꞉layekeme. Ipikana꞉ma꞉ mo handa꞉peke na yeke Koda꞉ handeke nono pea pa hone ma꞉nda꞉ na wiki da̱o̱la hayekeme. 28 Ipika꞉ hone tulao hayeke ekima꞉ mo hande Lombei Pu Pa Yapena꞉ sipisipi ma꞉na꞉ lita꞉la꞉ hau kini piekeme. Kutupa mo homaasa꞉ enisoloma꞉ mo Isulai wanda꞉halina꞉ mupeke wekitonu liaama꞉na꞉ lombei pina꞉yeke mo sipisipina꞉ wema꞉ ika꞉ da pota꞉ kake ti nina꞉ kitaape laa leekeme.

29 Mo Isulai wanda꞉hali ika꞉ hone tulaemeke ekima꞉ta꞉ mo hande Wepiki Dawala Ikali ana꞉na꞉ yuma pemekeme. Pate mo Idiepi haliwekima꞉ta꞉ make ikana꞉ma꞉ yumimiki tupa꞉ yumulua꞉ patema꞉ pu hao mo hande ikalima꞉ iki paeyao kili miekeme.

30 Mo hande Isulai wanda꞉halima꞉ nate watake hata꞉ mo hande Dietiko daoni hopa꞉liao sama꞉ pimikime. Kutu pitolo hata꞉ ika꞉ hone tulaemeke ekima꞉ mo hande hopa꞉liao pieke daonina꞉ toopi pape tieke londa꞉laeyekeme. 31 Mo Isulai wanda꞉halima꞉ tapaeyeke kika ikiki hali yaapo tamba꞉ mieke hali yolo hayeke wanda꞉ Leiha꞉pema꞉ mo hande Koda꞉ pa꞉ta꞉ homu na piki wanda꞉hali ame̱le̱ na homeke ipika꞉ hone tulaeyeke ekima꞉ deteekeme.

32 Mo mandane ekimanu ma꞉nda꞉manu la kionope. Dia꞉me. Mandane haliweki Kidioni Ba꞉teke Sa꞉misoni Diepita Deipidi Samuele amedama꞉ pimikieki make mandane potopede haliwekima꞉ pimikieki make wopu moka꞉lalo polopate nate leke dia꞉ya꞉leke wopu na moka꞉lalueke. 33 Ikana꞉ma꞉ hone tulaaso hata꞉ a꞉nda꞉ pea mandane kenkemanu bepolayekeme. Ikana꞉ma꞉ tiki tiki hau pitolo hata꞉ Koda꞉ma꞉ kulueke laa la꞉ wieke ekimanu miekeme. Kutupa mo laeono manuna꞉ kake a꞉mbaemekeme. 34 Mo uleke tieke hake ti tiekemanu honiaemekeme. Mo bainasima꞉ lia꞉pekeeki make wendimikime. Ikita꞉ detepiki some hombo yekepate honkopu haemekeme. Kutupa mo a꞉nda꞉na꞉ta꞉ ikana꞉ma꞉ honkopu tieke wopu hao mo hande kenke ma꞉nda꞉ tapakena꞉ ame tonu bepolaemekeme. 35 Mandane wanda꞉wekima꞉ make hone tulaemeke handaa ika꞉ tapake homemeke wanda꞉hali Koda꞉ma꞉ mea tiao ika꞉ ame̱le̱ haena꞉ leekeme. Mo a꞉nda꞉ tunkiliki haliwekima꞉ mea tanda halaa homaena꞉ leeke haliwekima꞉ta꞉ mo ika꞉ ka꞉la꞉pa꞉ tapao haena꞉ leeke ekita꞉ kiaemekeme. Kutu pimiki ekina꞉ teketa꞉ Koda꞉ma꞉ iki epeke da꞉taa haena꞉ lena꞉ yeke pimikime.

36 Iki mandane tapaketa꞉ mandane wanda꞉halima꞉ hoke tupa꞉ kitata pu make dopitama꞉ yombu pimikime. Mandane wanda꞉halita꞉ kiki anke tonkao dipula mea pua꞉tiki pimikime. 37 Kutupa mandane tapaketa꞉ toopima꞉ lia꞉tiki pu make mandane tapaketa꞉ soma꞉ tukikina꞉ tunkula꞉ alu pea꞉tiki pu make mandane tapaketa꞉ bainasima꞉ lia꞉tiki pu pimikime. Ikita꞉ nate hali haemeke ekima꞉ sipisipi o nanikosi yonkeleke daumanu yama pominolo haena꞉ ma꞉nda꞉ma꞉ ka꞉nda꞉ma꞉ homa tiatiki pieke handaa pindipa pomua꞉tiki pimikime. 38 Do kenkena꞉ hoke wanda꞉halima꞉ mo koto epeke wanda꞉halita꞉ iki taapuna꞉ hapeketa꞉ ota꞉ ana꞉ na pieke yekeme. Ikita꞉ a꞉nda꞉ma꞉ tulu limiki wanda꞉hali hata꞉ hapiki kenke pa꞉ta꞉ make pote tea꞉ pa꞉ta꞉manu make puaata꞉ ika꞉ da manuta꞉ toopi ka꞉ka꞉na꞉ pa꞉ta꞉ hao haemekeme.

39 Mo wanda꞉halima꞉ta꞉ ika꞉ Koda꞉ pa꞉ta꞉ hone tulaaso hata꞉ pimikieki manuma꞉ta꞉ ota꞉ kende wiki biki melememe. Koto pelemepate Koda꞉ma꞉ kuluekee laa la꞉ wieke ekita꞉ ikana꞉ma꞉ a̱i̱ na mimikime. 40 Koda꞉ma꞉ niki pa꞉ta꞉ make epeke hau ma꞉nda꞉ pealuekema꞉ hone pambao wiekeme. Koto pambao wieke honeta꞉ Koda꞉ma꞉ iki homeke dia꞉ yekepate pa niki tonka꞉na꞉ mandake epeaalueke laa hone piekeme.