1 Yesuma꞉ koto pimanu laata꞉ oli ya nane handa꞉liao hata꞉ alota꞉ Apa꞉o. Hande di amba꞉ epa꞉la꞉me. Naka꞉ wekima꞉ naka꞉ bikita꞉ mea a꞉meiyaena꞉yeke naka꞉ wekina꞉ biki nakana꞉ma꞉ mea a꞉meiyapeke. 2 Nakana꞉ma꞉ ipikita꞉ wanda꞉hali paeyaona꞉ you haena꞉ laata꞉ Nakana꞉ma꞉ ipiki pa꞉ta꞉ halo pele wanda꞉hali paeyaota꞉ ipikana꞉ma꞉ da꞉tao hao haena꞉yeke lele ekina꞉ loa꞉me. 3 Deto hala꞉ ekita꞉ dupae. Neke homeke ota꞉ Koda꞉ haleeki make nakana꞉ma꞉ tapaale hali Yesu Ketiso hala꞉eki make telipina꞉ handa꞉la꞉ekie. 4 Neke tieke haleeki do kenkena꞉ hata꞉ walaata꞉ kutupa nakana꞉ma꞉ wale e make poko paeyaowa꞉me. 5 Apa꞉o. Amba꞉ do kenke a̱i̱ na wepiki hata꞉ neke yaapo hata꞉ mua꞉ pa̱a̱ piki kapu tieketa꞉ kotoeki kone ameta꞉ naka꞉ leke popelekena꞉ hano kie.

6 Nakana꞉ma꞉ do kenke pa꞉ta꞉ mea ki haliweki pa꞉ta꞉ neke haleeki peneme yaowa꞉me. Koto haliwekita꞉ naka꞉ eki haena꞉ I̱ pa꞉ta꞉ mea kime. Kutupa naka꞉ pi make opimime. 7 Nakana꞉ma꞉ I̱ pa꞉ta꞉ ki alemanu paeyaota꞉ neke pa꞉ta꞉ kone mua꞉ ekita꞉ ame handelememe. 8 Nakana꞉ma꞉ I̱ pa꞉ta꞉ la ki pimanu paeya꞉ tapao iki pa꞉ta꞉ waloa꞉me. Kutu pua꞉peke handaa ikana꞉ma꞉ opua mimime. I̱ta꞉ neke yaapo epoloeki make ota꞉ekie laa nakana꞉ma꞉ I̱ tapaeeki make opitelememe.

9 Do haliweki pa꞉ta꞉ hone witolo hata꞉ yeni pitolome. Kenke wanda꞉hali pa꞉ta꞉ hone witolo hata꞉ yeni na piki nakana꞉ma꞉ I̱ pa꞉ta꞉ ki haliwekita꞉ naka꞉eki kone koto haliweki pa꞉ta꞉ hone witolo hata꞉ yeni pitolome. 10 Yaka wia halo alemanu paeyaota꞉ naka꞉ ekie. Kutupa naka꞉ wia hale alemanu paeyao make yaka ekie. Koto pa꞉la꞉ ekina꞉ koto haliwekima꞉ yaka biki mea a꞉meiyalememe. 11 Ameta꞉ I̱ta꞉ do kenkena꞉ pa na hake neke pa꞉ta꞉ epolo polopate do haliwekita꞉ do kenkena꞉ pa ha pelia halimikie. Yako piki Apa꞉o. Nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ iki handeteke haena꞉ lapeke. Dikita꞉ homeke kone halopa꞉ tupa꞉ iki make homeke tupa꞉ haena꞉yeke loa꞉me. 12 I̱ta꞉ do haliweki ame̱le̱ hata꞉ta꞉ nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ kone iki wotu handeteke haowa꞉me. I̱ma꞉ iki handeteke haowa꞉ pita꞉ta꞉ hali ma꞉nda꞉ na alu pia꞉pate pa mo Baibolo buka pa꞉ta꞉ wape pa꞉la꞉eki yaena꞉yeke hande alu pulu pa꞉la꞉ hali homekee. 13 Ameta꞉ neke pa꞉ta꞉ epolo polopate do kenkena꞉ hata꞉ta꞉ I̱ma꞉ do haliwekima꞉ yaka ta꞉na꞉ pa꞉la꞉eki mea tumbao haena꞉yeke do pimanu alome. 14 Naka꞉ pita꞉ I̱ma꞉ iki pa꞉ta꞉ amba꞉ la haloa꞉me. Koto polo ekina꞉ do kenke wanda꞉halima꞉ta꞉ iki pa꞉ta꞉ honditi pu halememe. I̱ta꞉ do kenkena꞉eki na halo tupa꞉ koto haliweki make do kenkena꞉eki na haleme ekina꞉ pitelememe. 15 I̱ma꞉ do honke alo ekita꞉ do haliweki kenke pa꞉ta꞉ na haena꞉ yoka꞉ muelena꞉ laa na loa꞉pateta꞉ hande Hoke Halima꞉ iki hoeyaama꞉na꞉ nakana꞉ma꞉ handeteke halena꞉yeke honke alome. 16 I̱ta꞉ do kenkena꞉eki na halo tupa꞉ iki make do kenkena꞉eki na halememe. 17 Nakana꞉ma꞉ naka꞉ ota꞉ pi lele ekima꞉ do haliwekita꞉ yakopiki haliweki haena꞉ lapeke. Naka꞉ pita꞉ ota꞉ ekie. 18 Nakana꞉ma꞉ I̱ do kenkena꞉ tapae tupa꞉ta꞉ I̱ma꞉ do haliweki kenke ta꞉ta꞉ ta꞉ta꞉ pa꞉ta꞉ tapaowa꞉me. 19 I̱ma꞉ do haliweki pa꞉ta꞉ hone witolo hata꞉ I̱ ya kone neke pa꞉ta꞉ kitolome. Kutupa do haliweki make ota꞉ naka꞉eki haena꞉yeke pitolome.

20 I̱ma꞉ do haliweki homeke pa꞉ta꞉ hone witolo hata꞉ yeni na piki ika꞉ pua walo pelemeeki opua I̱ pa꞉ta꞉ hone tulao halo peleme wanda꞉hali pa꞉ta꞉ make hone witolo hata꞉ yeni pitolome. 21 Paeyaota꞉ homekeeki haena꞉yeke yeni pitolome. Apa꞉o. Neketa꞉ I̱ yaapo haleeki make I̱ neke yaapo haloeki make iki make koto tupa꞉ diki ame̱le̱ haemeka꞉na꞉ta꞉ epelieke. Kenke wanda꞉halima꞉ nakana꞉ma꞉ I̱ tapaaleeki hone wina꞉yeke ikita꞉ homekeeki haemeka꞉na꞉ta꞉ epelieke. 22 Nakana꞉ma꞉ I̱ pa꞉ta꞉ hande ki biki tieketa꞉ I̱ma꞉ iki pa꞉ta꞉ haloa꞉me. Diki homeke kone halopa꞉ tupa꞉ iki make homekeeki haena꞉yeke pua꞉me. 23 I̱ta꞉ iki pa꞉ta꞉ haloeki make neketa꞉ I̱ pa꞉ta꞉ haleeki make ikita꞉ ota꞉ homekeeki haena꞉yeke loa꞉me. Kenke wanda꞉halima꞉ta꞉ nakana꞉ma꞉ I̱ tapaaleeki make I̱ pa꞉ta꞉ pukima꞉ homele tupa꞉ do haliweki pa꞉ta꞉ koto homeke pukima꞉ homeleeki make hone wina꞉yeke loa꞉me.

24 Apa꞉o. Do haliwekita꞉ nakana꞉ma꞉ I̱ pa꞉ta꞉ keleme. Koto pele ekina꞉ I̱ halo alena꞉ iki make koto pa꞉ta꞉ haena꞉ yaka pa̱a̱ piki biki tieke moloeki handena꞉yeke I̱ma꞉ hone pa꞉la꞉me. Koto biki tieketa꞉ nakana꞉ma꞉ keleekie. Do kenke a̱i̱ na wepieke dina꞉ kone I̱ pa꞉ta꞉ pukima꞉ homele ekina꞉ keleme. 25 Tiki tiki piki Apa꞉o. Kenke wanda꞉halima꞉ neke na handelemepate I̱ma꞉ta꞉ neke handolome. Kutupa do haliwekima꞉ta꞉ nakana꞉ma꞉ I̱ tapaale ekita꞉ handelememe. 26 Naka꞉ hale ekita꞉ I̱ma꞉ iki pa꞉ta꞉ waloa꞉pate pa wala꞉tiki pulueke. Nakana꞉ma꞉ I̱ pa꞉ta꞉ pukima꞉ homele ekita꞉ iki pa꞉ta꞉ make pitina꞉yeke kutupa I̱ make iki pa꞉ta꞉ hanoyeke pulueke.