1 Mandane Pa꞉tisi haliweki make mandane wape pea wala꞉tiki pu haemeke haliweki make Diutuseleme da mina꞉pa꞉lao a꞉pa Yesu lota꞉ pitolo alota꞉ 2 Pa ekipeke mo naka꞉ hoki nane telieleme haliweki nika꞉ ateke meiyekena꞉ mana꞉ pimanu ekipeke na opitolo pitelemepe. Ika꞉ ne noluekema꞉ta꞉ titina꞉ amba꞉la mo nika꞉ pimanu ula꞉ tupa꞉ ika꞉ kiki na tandepo halememe lemekeme.

3 Yesuma꞉ mo pi hombo peaaso iki pa꞉ta꞉ alota꞉ Kutaa make pa ekipeke handa ikana꞉ma꞉ make mo Koda꞉na꞉ pi ula꞉eki kiao pa ika꞉ waleme pimanu kone tolu halemepe. 4 Do ekina꞉ yeke loa꞉me. Hande Koda꞉ma꞉ la꞉ ula꞉ pima꞉ alota꞉ Naka꞉ ama꞉ apa꞉ yaapona꞉ oto pa꞉ta꞉ hapeke la꞉la꞉me. Kutupa pi ma꞉nda꞉ta꞉ Ipika꞉ apa꞉ ama꞉ pa꞉ta꞉ hoke pi lea꞉ka꞉na꞉ta꞉ ota꞉ homena꞉ lia꞉pa꞉peke laa la꞉ ula꞉pate 5 pa ikana꞉ma꞉ alota꞉ Hali ma꞉nda꞉ma꞉ ipika꞉ apa꞉ ama꞉ tamba꞉ mia꞉peke alemanu miniki hala꞉pate ipikana꞉ma꞉ ipiliki pa꞉ta꞉ alota꞉ Ipiliki kulu pua꞉ ale manuta꞉ amba꞉ Koda꞉ pa꞉ta꞉ haluekema꞉ la꞉ wia halome lea꞉ka꞉na꞉ kota꞉ koto pi opitolo hata꞉ 6 ikana꞉ma꞉ta꞉ koto halima꞉ ipika꞉ apa꞉ ama꞉ta꞉ tamba꞉ mia꞉peke laa la꞉ ula꞉ pi pea꞉peke ekita꞉ Pina꞉ma꞉ pea꞉peke na ya꞉ka꞉ta꞉me laa lo halememe. Kutupa koto piteme hau manuta꞉ kota꞉ ikana꞉ma꞉ ika꞉ waleme pimanu kone teli mea pu haluekema꞉ yeke Koda꞉na꞉ pi ula꞉ ekimanu hoki walo halememe. 7 Ikita꞉ ota꞉ makeaaso hau pu haleme some hombo ya꞉ka꞉ta꞉me. Hande Aisayama꞉ ikina꞉ la꞉ witolo hata꞉ leekeeki ota꞉ pi la꞉ wia꞉ka꞉ta꞉me. 8 Ipikana꞉ma꞉ leeke pita꞉ dupa

10 Yesuma꞉ mo wanda꞉hali ipiki pa꞉ta꞉ epena꞉yeke wi la꞉mipi pea iki pa꞉ta꞉ alota꞉ Ya pi opua hone wia꞉pa꞉peke. 11 Wanda꞉halita꞉ hama nane ula꞉ alemanu mea naloma꞉eki manuma꞉ iki na hoeyaalo pa꞉la꞉pate tukiki nane wia kake pa꞉ta꞉ opolu baasa꞉ ale manuma꞉ kone wanda꞉hali hoeyaapeke ya꞉la꞉me leekeme.

12 Koto leeke hoki naneta꞉ ipika꞉ hoki nane telimiki haliwekima꞉ ipiki pa꞉ta꞉ a꞉pa alota꞉ Mo hande Pa꞉tisi haliwekima꞉ pimi ekita꞉ neke na handepe. Nakana꞉ma꞉ le pi manuma꞉ ika꞉ puki tandama꞉ homaya꞉me lemekeme.

13 Ya hepeni hala꞉ Apa꞉ma꞉ na nokopeke pa opa꞉la꞉ waemanu paeyao yokilieke laa Yesuma꞉ hombo peaaso hata꞉ alota꞉ 14 Pina꞉ma꞉ hone ma꞉nda꞉ na wia꞉pa꞉pe. Ikita꞉ mo leke holu piki wanda꞉halina꞉ leke holu piki you haliweki halememe. Koto ekina꞉ta꞉ leke holu piki somema꞉ mo leke holupiki some ma꞉nda꞉ hatuku mea pea꞉ka꞉na꞉ta꞉ kota꞉ ipiliki telipuna꞉ hombo pa꞉ta꞉ hopulu paleke mandake lopilipikie leekeme.

15 Pidama꞉ alota꞉ Koto ale pina꞉ teketa꞉ niki wopu la kia꞉peke leekeme. 16 Kutupa Yesuma꞉ iki pa꞉ta꞉ alota꞉ Kota꞉ iki make pi teke hone na witelemepe leekeme. 17 Nala꞉ ale manuma꞉ hali homekena꞉ weleke pa꞉ta꞉ pua pita꞉ta꞉ hoke ale yapilieke hone na witelemepe. 18 Pate ipika꞉ kake pa꞉ta꞉ yama꞉ opolo ipu hala꞉ ale manuta꞉ ota꞉ ipika꞉ puki tukiki nanema꞉ opolu baalo ipula꞉me. Kotoeki manuma꞉ kone ipiki ha̱i̱ peaasa꞉me. 19 Kota꞉ koto some ipika꞉ puki pa꞉ta꞉ pita ipula꞉ hoke hone manuma꞉ta꞉ dupiki haumanu pu tialieke. Hali ma꞉nda꞉ lina꞉ lo o wanda꞉ pake na꞉na꞉ lo o hali yankeke pa꞉ta꞉ kone hoke hau pina꞉ lo o pake na꞉na꞉ lo o yapiki hau pina꞉ lo o wanda꞉halina꞉ biki hoeyaena꞉ lo 20 do hau manuma꞉ ipikita꞉ hoke hali haena꞉ lolo pa꞉la꞉pate pa mo na tandepeke kikima꞉ ne mea nala꞉ ekima꞉ta꞉ ipiki na hoeyaasa꞉me leekeme.

21 Yesuma꞉ koto alena꞉ mina꞉pa꞉lao Taiya Saidoni daoni yaapo nane peekeme. 22 Koto kenke nane hayeke Keinani wanda꞉ homeke Yesu pa꞉ta꞉ e̱ wi laa a꞉pa alota꞉ Deipidina꞉ eiyekeo. Ya wandiki pa꞉ta꞉ hoke temoko pila꞉ ekima꞉ ipiki ota꞉ epeke tupa꞉ na ula꞉me. Koto ekina꞉ I̱ pa꞉ta꞉ a꞉ta꞉ma꞉ homa꞉peke leekeme. 23 Koto leekepate Yesuma꞉ ipiki pa꞉ta꞉ pi homeke siki ma꞉nda꞉ ota꞉ na leekeme. Kutu pieketa꞉ mo disaipolo haliwekima꞉ ipiki pa꞉ta꞉ a꞉pa honke alo alota꞉ Ipikana꞉ma꞉ niki teliolo hata꞉ wi wopu la꞉ paleke ipula꞉ma꞉ ipika꞉ da pa꞉na꞉ tapae lemekepate 24 Yesuma꞉ ika꞉ pi hombo peaaso alota꞉ I̱ta꞉ mo hande Isulai tapake alu pula꞉ sipisipimanu leke haleme wanda꞉hali pa꞉ta꞉ tapaaleke handaa epolome leekeme. 25 Do pi opitolota꞉ koto kone mo wanda꞉ Yesuna꞉ anke teke pa꞉ta꞉ panda꞉ puniao lopolo alota꞉ Tekehalio. I̱ tamba꞉ mie leekeme. 26 Yesuma꞉ hombo peaasota꞉ dupa leekeme. Weki wandikina꞉ ne pa꞉ta꞉la꞉ mea kika pa꞉ta꞉ lopa moneaasa꞉ hauta꞉ epeke hau dia꞉me leekeme. 27 Mo wanda꞉ma꞉ alota꞉ Tekehalio. Koto pita꞉ ota꞉ alepate wanda꞉halima꞉ ne naa pelimi hoki nanema꞉ta꞉ popumanu mina꞉pelete pilimi ekimanu kika manuma꞉ talopu nemeka꞉na꞉ta꞉ a꞉pa꞉la꞉me leekeme. 28 Koto leeke Yesuma꞉ hombo peaaso alota꞉ Neketa꞉ hone wopu tulaasa꞉ wanda꞉ ya꞉ka꞉ta꞉me. Koto ekina꞉ta꞉ naka꞉ hone pa꞉la꞉ hauta꞉ ota꞉ pealueke leekeme. Yesuma꞉ koto alo haena꞉ kone mo wanda꞉na꞉ waneketa꞉ paa epeke tupa꞉ tiao hayekeme.

29 Yesuma꞉ koto pa꞉ta꞉ mina꞉pa꞉lao mo Ka꞉lili ikali leke nepoko lopa꞉la꞉ pua mo peiyene pa꞉ta꞉ a꞉meiya pua pitiekeme. 30 Koto pua pitina꞉ta꞉ wanda꞉hali tieke wopu Yesu pa꞉ta꞉ a꞉pa mombelemekeme. Iki ipulu hata꞉ta꞉ dola꞉pake piki leke holupiki anke lupa wiki pi na leke make kutupa mandane yenimanu haemeke wanda꞉hali wopu make Yesuna꞉ anke pa꞉ta꞉ a꞉pa wimiki handaa ipikana꞉ma꞉ epeao paeyaeyekeme. 31 Kutupa mo wanda꞉halima꞉ mo pi na leke wanda꞉halima꞉ pi lemekeeki hando make kiki anke lupa wiki wanda꞉halima꞉ paa epeke tupa꞉ haemekeeki hando make dola꞉pake piki wanda꞉halima꞉ paa epea pomimikieki hando make leke holu piki wanda꞉halina꞉ leke ki la epeke tupa꞉ hando pu pimiki eki paeyao handolo hata꞉ ikana꞉ma꞉ leke opo handa꞉ hake wiata꞉ Isulai wanda꞉halina꞉ Koda꞉na꞉ biki yeiya꞉ laemekeme.

32 Yesuma꞉ ipika꞉ hoki nane tolu haemeke haliweki ipiki pa꞉ta꞉ epena꞉ wi la꞉mipi pea iki pa꞉ta꞉ alota꞉ Do wanda꞉hali pa꞉ta꞉ ya pukima꞉ e̱ ala꞉me leekeme. Hoto tepona꞉ I̱ ame̱le̱ haememe. Kutupa ameta꞉ napeke ne ma꞉nda꞉ dia꞉me. I̱ma꞉ ika꞉ da nina꞉ tea꞉ma꞉ homa꞉ paleke tapaa tapaa pua꞉ka꞉na꞉ kota꞉ pota꞉ hopikina꞉ tea꞉ma꞉ pua homilimikie leekeme. 33 Ipika꞉ disaipolo haliwekima꞉ ipiki pa꞉ta꞉ alota꞉ Do hapu hala꞉ alena꞉ hata꞉ta꞉ do wanda꞉hali pa꞉ta꞉ neta꞉ hando pate mea halomana꞉pe lemekeme. 34 Yesuma꞉ iki pa꞉ta꞉ dupa lota꞉ pitolo alota꞉ Palaowa wala꞉ ekipu wia halemepe lota꞉ piekeme. Koto haliwekima꞉ alota꞉ Palaowa wala꞉ watake hata꞉ make ta꞉peli siki yaapo homeke pea wia haloma꞉me lemekeme.

35 Koto ekina꞉ Yesuma꞉ mo wanda꞉hali wopu pa꞉ta꞉ alota꞉ Kenkena꞉ pita꞉pe leekeme. 36 Kutupa Yesuma꞉ mo palaowa wala꞉ watake hata꞉ make mo ta꞉peli siki mu peata꞉ Koda꞉ pa꞉ta꞉ keiyae pi amba꞉la laata꞉ pindi pindi peaata꞉ ipika꞉ disaipolo haliwekima꞉ wanda꞉hali pa꞉ta꞉ hale hale pina꞉ yeke ipikana꞉ma꞉ iki pa꞉ta꞉ haleekeme. 37 Kutu pieketa꞉ wanda꞉hali paeyaoma꞉ ana꞉na꞉ naa weleke haemekeme. Kutaata꞉ mo wanda꞉halima꞉ naa putu piliki wiekeeki mo disaipolo haliwekima꞉ meaata꞉ ala꞉ta watake hata꞉ tumbaemekeme. 38 Mo hande palaowa wala꞉ sunu nemeke haliwekita꞉ wekiwanda꞉ na apa꞉take haliweki homeketa꞉ 4 daoseni halima꞉ nemekeme. 39 Yesuma꞉ iki paeyao tapaa tapaa peaata꞉ koto kone ipika꞉ disaipolo haliweki ame̱le̱ kawaso pa꞉ta꞉ pita Ma꞉ka꞉dani kenke nane pemekeme.