Su Guna nek Sulat ni San Pablo ri ni
Timoteo
Pesi'una
Si Timoteo, begu neng mektetu'u riin ni Christ nek taga Asia Minor. Su gama'en gena' Judeo bu' su gina'en Judeo. Mibaal giin nek sementaun bu' sumusunud ni Pablo riin seng misyunen. Su Guna nek Sulat ni Pablo ri ni Timoteo migasuy metendeng sek telu ne gembagel ne ngag betang.
Guna se dlaunan, sulat keni sala nek penegul kuntra se ngak sayep ne ngak penendu'an riin sek simbaan. Duma ini sek pengena'ena' se ngag Judeo bu' se nga gena' Judeo, nek pisingkal ri sek pektu'u ne sug benwa nek pikengelan ta melaat bu' su getaw meluwas ma'ad bu' me'angkenen su dlinain nek tinawan bu' pebiyan sek pedleketubu', maa' sek pedliyaw sek santa' nek pekaan bu' su gendi' peksuway. Su keruwa', giin suk pektendu' metendeng sek pedlegeseg sek simbaan bu' sek peksimba duma rema su kina'iya bu' pegunta'en run sek pedleketubu' ne gembaya' baalen sek sala ne nga gubispu bu' ne ngang menggegabang ri sek simbaan. Bu' se ketelu, pimendu'an si Timoteo se gembaya'en baalen arun mbaal giin neng melengas nek sesugu'en neng menibeli riin ni Jesus Christ bu' metendeng se ngag baalenen tu sed duma ne nga dlumpuk ne ngang mektetu'u.
Ngang Misulat ri sek Sulat keni
I. Pesi'una 1.1-2
II. Penegul Kuntra sek Sayep ne ngak Penendu'an 1.3—3.16
III. Ngak Pemandu' metendeng sek Terbahu ni Timoteo 4.1—6.21
1
1 Seni'a Timoteo,
Sulat keni buwat ri ni Pablo, ne gapustulis ni Christ Jesus pebiyan seng mandu' ned Diwata, neng Menleluwas ta bu' ni Christ Jesus nek pedderama ta.
2 ✡ 1.2: Su Ngak Pimbaal 16.1. Miksulatu ri seni'a Timoteo, sung metuud neg bata'u riin sek pektu'u.
Megbegay siya ri seni'a sud Diwata ne Gama' bu' si Christ Jesus ne Ginu'u ta ne kepiya, dlelaat, bu' kelinaw.
Ngak Penegul kuntra sek Sayep ne ngak Penendu'an
3 Liyagan'u neng mekpebilin'a seg Efeso, maa' se ginandyu'u ri seni'a seng mikpagawu seng Macedonia. Ay duunik santa' tawan neng minendu' nek sayep ne ngak penendu'an, bu' kina'enlan mendu'an mu ilan neng melali. 4 Telu'ay mu ilan nek peleliyan nilan run suk pektu'u se nga gesuyen neg binaal ma'aray ne getaw bu' metaas ne nga dlistaan se nga ngalan ne nga gepu'an nilan, neng mekepegaddat ma'aray ri sek salasala senilan. Bu' ndi' ini mekegabang se ketuyu'an ned Diwata, neng misuunan pebiyan sek pektu'u. 5 Su ketuyu'an sek pemandu' keni giin suk pegangken sek petail neg buwat se dlimpiyu nek pengena'ena', seng melengas ne kunsinsiya, bu' metuud nek pektu'u. 6 Duunik santa' tawan neng mineleng na run nini bu' mibalag tendeng se genda'ik paluun ne ngak pekpengaddat keni. 7 Liyagan nilan ne mbaal ne ngang mentetendu' ri se Kesugu'an ned Diwata, ma'ad nda' nilan mesabut su ngak pintalu' nilan awas su ngag betang nek pimeges nilan nek tu'uwan.
8 Na, misuunan ta ne su Kesugu'an melengas bu' gemiten ini se ginsaktu nek pebiyan. 9 Bu' kina'enlan peddelendemen ne su kesugu'an nda' baalay para se ngang metareng ne getaw bu' ndi' para se ngang melinepasen bu' ngang melisupaken, para se nga gendi' mendek ri sed Diwata bu' ngang mekesesala', para se nga gena' diyusnun awas se nga gena' bala'an, para se nga getaw neng mekpatay se nga gama' awas gina' nilan, para se ngang mememunu', 10 para seg imural neng mikighilawas, para se ngang muubay sek sama ne nga dlai awas sama ne nga dlibun, para se ngang mengidnap, para se ngag belusen bu' ngang minintigus neg balus awas se ngang megbaal nek supak seng metuud nek penendu'an. 11 Penendu'an ketu mi'ita' ri seng Melengas ne Gesuyen nek piniyal ri senaan nek pesuun, sung Melengas ne Gesuyen neg buwat seng mekegega'em bu' mbaya' siya'en ned Diwata.
Pekpesalamat tendeng se Dlelaat ned Diwata
12 Mikpesalamatu riin ni Christ Jesus ne Ginu'u ta, neng migbegay ri senaan nek sekeg para seg baalen'u. Pisalamatan'u giin ay inilala naun ne keseligan bu' tinendu' naun arun menibeli ri seniin, 13 ✡ 1.13: Su Ngak Pimbaal 8.3; 9.4-5. isan nud diin mimentalu'u neng melaat ri seniin, linutus, bu' tinampela'u giin. Ma'ad linelaatanu ned Diwata tendeng ay gena'u pa neng mektetu'u bu' nda'u mekesuun seg binaal'u. 14 Bu' binegay ne Ginu'u ta sung midlekapin ne kepiyaan rini senaan bu' binegayan naun nek pektu'u bu' petail ned diin senita ne ngang misalabuuk ri ni Christ Jesus. 15 Metuud ini nek telu'en, mbaya' duwaten bu' tu'uwan: mirini si Christ Jesus seg benwa arun sek pedluwas se ngang mekesesala'. Labawu neng mekesesala' ri senilan, 16 ma'ad melilelaaten sud Diwata ri senaan arun mpe'ita' ni Christ Jesus suk tileng nek pekpelugbaken sek peguwiten ri senaan, ne dlabaw se ngang mekesesala', gisip dlendasan para se dlaun nek tambinai' neng mektu'u ri seniin bu' mekerawat se ketubu' ne genda'i gekteben. 17 Para se Gari' ne genda'i gekteben, genda'i kemetainen bu' ndi' me'ita', sug buntung ned Diwata. Siya'en'a siya ne nga getaw bu' mektalu' ne ge'eman'a se genda'i gekteben! Metuman siya.
18 Dya'a Timoteo, gisip bata'u, piyal'u ri seni'a sugu' keni, pi'unut ini ri se ngak talu' ne ginasuy metendeng ri seni'a nud diin. Gamit mu su ngak talu' ketu gisip ngag besi arun mekesukul gupiya, 19 bu' ingatay mu suk pektu'u mu bu' dlimpiyu ne kunsinsiya. Duma ne nga getaw nda' penginengeg ri se nga kunsinsiya nilan bu' tendeng run nini pidlaatan nilan suk pektu'u nilan. 20 Sud duma ri senilan gilan si Himeneo bu' si Alejandro, nek sinilutan'u pebiyan sek pekpiyal ri senilan tu se ga'em ni Satanas; mektendu' ini ri senilan neng melali sek pekpesipala tu sed Diwata.