6
1 Gisip mikterbahu ami duma sed Diwata, megandyu' ami ri seniyu, ne ndi' niyu baalen ne genda'ik paluun su kepiya ned Diwata neng mirawat niyu. 2 ✡6.2: Isaias 49.8. Penginengegay mu bu' landunik tinalu' ned Diwata:
“Seng minateng suk panahun para senaan sek pekpe'ita' ri seni'a ne kepiyau,
mirengeg'u dya'a;
seng minateng su gendaw para senaan sek pedluwas'u ri seni'a,
inebangan'u dya'a.”
Penginengeg'a! nandaw giin nini su guras sek peddawat se kepiya ned Diwata; nandaw giin su gendaw se keluwasan!
3 Ndi' nami liyagan ne su isan ta' mekepemura riin sek terbahu nami, aas minugaling ami ne ndi' megbetang neng mekeseknu riin seg biyanan se isan ta'. 4 Tumu', se dlaun neg betang neg binaal nami, mikpe'ita' ami ne gami metuud ne ngak sesugu'en ned Diwata pebiyan sek pekemelipelugbaken neng migantus se nga kesamuk, ngak pegantus, bu' nga keliseran. 5 ✡6.5: Su Ngak Pimbaal 16.23. Binentul ami, pinerisu, bu' inabang pegeelay; milebiyanan ami mekterbahu, bu' kanunay ami ne nda'irunik tulug awas kaan. 6 Pebiyan seng melengas nek pedleketubu', sek tinawan, sek pekemelipelugbaken, bu' kepiya, pi'ita' nami su gegulingen nami gisip ngak sesugu'en ned Diwata pebiyan se Gispiritu Santu, pebiyan seng metuud nek pekpetail nami tu se nga getaw, 7 pebiyan seng minsahi nami ne kemetuuran, bu' pebiyan se ga'em ned Diwata. Suk pekemetareng nami giin sug besi nami sek peksulung se kuntra nami bu' sek pekpenaliped se gegulingen nami. 8 Pisiddengegan ami bu' pikpiid; tinampela' ami bu' sinaya'. Ginelal ami gisip belusen, tumu', migasuy ami se kemetuuran; 9 maa' ne genda' ami me'ilala, tumu' mi'ilala ami ne dlaunan; mi'ita' ami niyu neng maa' mimatay, ma'ad sumala' seng mi'ita' niyu, tetubu' ami pa gusay. Isan metuud sinilutan, ma'ad nda' ami petayay; 10 isan pesi' migu'ul, pidleliyag ami kanunay; isan pupus ami, ma'ad binaal nami neng meratu' sung melaun ne nga getaw riin se gispirituhanen; bu' isan pa nda'irunik petigayun nami, tumu' mi'angken nami gaid su dlaun ne ngag betang.
11 Ngak pinetail ne nga kepeteran riin se Corinto, migasuy ami riin seniyu se genda'i dlipedliped; pinetail amu nami gupiya. 12 Nda' nami pegengay suk pekpetail nami riin seniyu, ma'ad gamu sung mikpegeng sek pekpetail niyu ri senami. 13 Migasuyu nemuun ri seniyu maa' ne nga gembata'u: pe'ita' niyu ri senami suk sama nek pekpetail neg binatik nami para seniyu. Aas, petail niyu ami rema.
Penegul kuntra sek Pekseked se nga Gena' Mektetu'u
14 Ndi' amu pekseked se nga gena' mektetu'u; pegendun ma pekseked se ngang metareng bu' se ngang melaat? Pegendun ma pektipung sed delaag bu' se kerelem? 15 Pegendun ma peguyun ni Christ bu' ni Satanas? Pegendun ma peksama seng mektetu'u se gena' mektetu'u? 16 ✡6.16: a 1 Corinto 3.16; 6.19. b Levitico 26.12; Ezra 37.27. Pegendunen ma peguyun sek templo ned Diwata bu' se ngad diwatadiwata? Ay gita suk templo neng miktetubu' ned Diwata! Sud Diwata miktalu',
“Megbaalu nek pekengelan duma se nga getawanan'u
bu' mekengelu duma ri senilan;
mbaalu ned Diwata nilan
bu' gilan mbaal ne nga getawan'u.”
17 ✡6.17: Isaias 52.11. Aas miktalu' su Ginu'u,
“Kina'enlan belengen niyu ilan
bu' pain niyu su gegulingen niyu buwat senilan.
Ndi' amu megikap ri seng melemu',
bu' duwaten'u amu.
18 ✡6.18: 2 Samuel 7.14; 1 Nga Cronica 17.13; Isaias 43.6; Jeremias 31.9. Gaku' mbaal ne gama' niyu,
bu' gamu mbaal ne nga gembata'u ne nga dlai bu' nga dlibun,
miktalu' su Ginu'u ne dlabi neng Mekegega'em.”