Su Keruwa' nek Sulat neg buwat ni
San Pedro
Pesi'una
Na, su keruwa' nek sulat neg buwat ni Pedro sinulat para se guna ne nga Christian. Su dlabi gembagel ne ketuyu'an run nini giin suk pekpelali se gena' metuud nek penendu'an bu' sug imural neng mibaal ne kelebu'an sek penendu'an ketu. Suk sembag se ngak prublima keni mbaangan riin sek pekpebilin seng metuud nek sinuunan riin sed Diwata bu' riin se Ginu'u ne si Jesus Christ. Suk sinuunan ketu pisuun ne nga getaw neng mikiita' riin ni Jesus bu' mikerengeg ri sek pekpenendu'en. Gembagel gupiya su kegules seng miksulat se ngak penendu'an ritu seng mikpetu'u ne ndi' na mpuli' si Christ. Miktalu' giin ne su keterengan neng milangan suk pekpuli' ni Christ giin ne sud Diwata ndi' “meliyag ned duunik sala neng matay bu' ndi' su dlaun meddiksu' bu' meleng ri se ngak sala' nilan.”
Ngang Misulat ri sek Sulat keni
I. Pesi'una 1.1-2
II. Suk Peketinawag bu' suk Pekepinili' 1.3-21
III. Su nga Gena' Metuud ne ngang Mentetendu' 2.1-22
IV. Suk Pekpuli' ni Christ 3.1-18
1
1 Seniyu neng miktu'u riin ni Christ,
Gaku' si Simon Pedro sung minibeli bu' gapustulis ni Jesus Christ. Pinuwitan'u amu nek sulat, gamu neng mikerawat neng maa' kelaga' sek pektu'u nami pebiyan sek pekemelibegain ned Diwata ta bu' Menleluwas ne si Jesus Christ:
2 Na, me'angken siya niyu sud dugang pa gaid ne kepiya bu' kelinaw pebiyan sek pekesuun niyu ri sed Diwata bu' riin ni Jesus ne Ginu'u ta.
Suk Peketinawag bu' suk Pekepinili' ned Diwata
3 Ginamit ned Diwata su ga'emen arun sek pegbegay se dlaun ne kina'enlan ta para sek pedleketubu' sek pekeddiyusnun. Binaalen ini pebiyan sek pekesuun ta ri seniin neng miktawag ri senita arun mekaambit ita ri sek pekege'emaan bu' kepiyaan. 4 Seng maa' nini nek pebiyan, binegayaan ita se gimpurtanti bu' melaga' ne ngag begay nek sinaaren, arun pebiyan ri se ngag begay keni mekeliyaw amu seng mekepedlaat ne gayak ned dini seg benwa bu' mekaangken sek pekedDiwataan. 5 Seng maa' nini ne keterengan, baal niyu sung megenep niyu, aas penantu amu gaid arun merugang sek pektu'u niyu su gempiya neg betasan; sung merugang se gempiya neg betasan giin suk sinuunan; 6 bu' sung merugang sek sinuunan giin suk pekpegeng ri se gegulingen; bu' sung merugang sek pekpegeng ri se gegulingen giin suk pekeme'inentusen; bu' sung merugang sek pekeme'inentusen giin suk pekeddiyusnun; 7 bu' sung merugang sek pekeddiyusnun giin suk pekpetail gisip mekpated; bu' sung merugang sek pekpetail gisip mekpated giin suk pekpetail ri se dlaunan. 8 Ay giin nini su nga kina'iya ne kina'enlan niyu, bu' meksilaun nini riin seniyu, mbaal amu neng me'ulikseg bu' mekpalu riin sek sinuunan niyu riin se Ginu'u ta ne si Jesus Christ. 9 Ma'ad, bu' nda' ini riin seniyu, maa' amu neg buta ne ndi' mekiita' bu' mikelingaw nek pinasaylu na su ngak sala' niyu nud diin.
10 Aas nga kepeteran, penantu amu gaid neng mesiguru niyu ne gamu metuud gaid nek tinawag bu' pimili' ned Diwata. Bu' baalen niyu ini, ndi' niyu gaid belengen suk pektu'u niyu. 11 Tendeng seng maa' nini nek pekebiyan, begayan amu seg hingpit ne ketenged sek pekseled ritu se genda'iruni gekteben nek Pedlegeri'an se Ginu'u ta bu' Menleluwas ne si Jesus Christ.
12 Aas, perelendeman'u amu kanunay se ngag betang keni, isan misuunan na niyu ini bu' mingganget na gupiya su kemetuuran neng mirawat niyu. 13 Wa'a, pigena'ena'u ne ginsaktu nek perelendeman'u amu saanay tetubu'u pa, 14 ay misuunan'u ne gendi'u mekpayat pa se ketubu'* 1.14 Se Griego nek tinuntulan tulda. keni sumala' se kelaru nek tinalu' ri senaan se Ginu'u ta ne si Jesus Christ. 15 Bu' penentuwan'u rayun nek perelendeman amu arun se kanunay me'ena'ena' niyu suk tinalu'u isan dluwat se kemetain'u.
Sung Mikiita' se Gembagel nek Pesiddengeg riin ni Christ
16 Nda' ami pegasuy seg binaalbaal ne nga gesuyen se ginasuy nami ri seniyu sung metendeng seng mekegega'em nek pekpuli' se Ginu'u ta ne si Jesus Christ. Ma'ad mi'ita' nami mismu sung metuud nek peketinameren. 17 Ay ritu ami gaid seg binegayan giin se gembagel nek pesiddengeg buwat sed Diwata ne Gama', bu' duunik talu' buwat se Dlabi Ge'eman neng miktalu', “Giin nini sug Bata'u nek pinetail'u gupiya. Pidleliyagu ri seniin!” 18 Bu' suk talu' keni, mirengeg nami buwat se dlangit saanay duma ami ri seniin ritu seg bala'an neg bentud.
19 Aas middugang suk peksalig nami seng minsahi ne ginasuy nu ngak propeta. Mbaya' niyu ini pengebeten gupiya, tendeng ay maa' ini nek sulu' neng meddelaag ri seng merelem tampan sek peksebang se Gendaw bu' sek peddelaag sek pemulaw ri se nga gena'ena' niyu. 20 Labaw ri se dlaunan, peddelendem niyu ini ne nda'iruni isan ta' ri senita sung meketuntul seng minsahi ned Diwata ne ginasuy nu ngak propeta. 21 Ay nda'iruni ginasuy nu ngak propeta neng migbuwat ri se keliyag ne getaw ma'ad su Gispiritu Santu sung migunut ri senilan sek pegasuy seng minsahi neg buwat sed Diwata.