Su Keruwa' nek Sulat ni San Pablo para se ngak taga
Tesalonica
Pesi'una
Mikpeddayun su kesamuk sek simbaan sek Tesalonica tendeng sek pekpuli' ni Christ. Su keruwa' nek sulat ni Pablo para se ngak taga Tesalonica giin suk sembag sek tinu'uwan ne su gendaw sek pekpuli' se Ginu'u minateng na. Lineddeng ni Pablo penendu'an keni pebiyan sek pekpesabut ri senilan, ne se gendi' pa mpuli' si Christ, medlegari' pa reli' sung melaat bu' kelaatan ri sed diyalem sek pedlegeseg seng meketetingala ne geseg ne iningelanan “sung Melaat ne Getaw” ne giin sung meksupak riin ni Christ.
Pi'ita' ni Pablo su gembagel nek pedlekina'enlan ne su ngang membebasaan mekpebilin neng meligen ri sek pektu'u nilan isan pa se nga kesamuk bu' pegantus nilan. Kina'enlan mekpeddayun ilan sek pegbaal para sek pengetubu'an nilan, maa' rema run nini sug binaal ni Pablo bu' sed duma pa nek sementaunen neng mekterbahu. Inuliksegen ilan rema sek pekpeddayun sek pegbaal neng melengas.
Ngang Misulat ri sek Sulat keni
I. Pesi'una 1.1-2
II. Suk Pegukum sek Peddateng ni Christ 1.3-12
III. Mituwa' sung Melaat ne Getaw 2.1-12
IV. Pimili' Amu arun Meluwas 2.13-17
V. Pegampu' Amu para Senami 3.1-5
VI. Pekpetuges Amu 3.6-16
VII. Pekpenangid 3.17-18
1
1 ✡ 1.1: Su Ngak Pimbaal 17.1. Seniyu ne ngang miktipung ne ngang mektetu'u riin sek simbaan sek Tesalonica, gamu neng misakup riin sed Diwata ne Gama' bu' riin se Ginu'u ne si Jesus Christ.
Sulat keni buwat ni Pablo, ni Silas,* 1.1 Silas: awas Silvano. Enlengay niyu Su Ngak Pimbaal 15.22-18.5. bu' ni Timoteo.
2 Pegampu' nami tu sed Diwata ne Gama' ta bu' tu se Ginu'u ne si Jesus Christ neg begayan amu siya ne kepiya bu' kelinaw.
Suk Pegukum sek Peddateng ni Christ
3 Nga kepeteran, kina'enlan se dlaun nek panahun mekpesalamat ami ri sed Diwata tendeng seniyu. Mbaya' gaid neg baalen nami ini ay suk pektu'u niyu middugang gupiya bu' miksamet remaik pekpinetailay niyu. 4 Aas pisigarbu amu nami ri se ngang mektetu'u se ngak simbaan ned Diwata tendeng sek pekpeddayun niyu sek pegantus bu' sek pektu'u ri sek titenga' se dlaun nek pedlutus bu' kelised neng mesegaran niyu.
5 Keni mikpemetuud neng metareng suk pegukum ned Diwata, bu' tendeng run nini, mbaya' amu para sek Pidlegeri'aan nek pigentusan niyu. 6 Ay baalen ned Diwata sung metareng: pe'entusenen sung mikpe'antus ri seniyu, 7 bu' pepenguleliin amu ne ngang migantus maa' ami run rema. Baalenen nini sek pekpe'ita' se Ginu'u ne si Jesus buwat se dlangit duma se nga ge'eman ne ngag anghelen. 8 Seng midliga' ne gapuy, silutanen su nga getaw ne genda' pegilala ri sed Diwata bu' genda' pektuman seng Melengas ne Gesuyen metendeng ri se Ginu'u ta ne si Jesus. 9 ✡ 1.9: Isaias 2.10. Megantus ilan sek silut ne giin su genda'iruni ketapusan ne kerela'an bu' mbuwag ilan ri se Ginu'u bu' se ketingelaan ne ga'emen. 10 Keni mehitabu' se Gendaw neng mateng su Ginu'u arun sek peddawat sek peksaya' buwat se nga getawaan bu' pekpesiddengeg buwat se dlaun neng miktu'u. Gamu rema mperunut ri senilan ay miktu'u amu ma seng minsahi neg winali nami ri seniyu.
11 Giin nini su keterengan ne kanunay ami megampu' para seniyu. Migampu' ami ri sed Diwata ta neg baalen amu niin ne gembaya' ri se ketubu' nek pektawagen riin seniyu. Migampu' ami rema nek pebiyan ri se ga'emen, metuman niyu su dlaun nek pingangut niyu neng melengas bu' mbaal niyu ini tendeng sek pektu'u niyu. 12 Seng maa' nini nek pebiyan, su ngalan ne Ginu'u ta ne si Jesus mpesiddengegan tendeng seniyu, bu' gamu mpesiddengegan rema tendeng ri seniin pebiyan se kepiya ned Diwata ta bu' se Ginu'u ne si Jesus Christ.