Suk Sulat ni San Pablo para se ngak taga
Colosas
Pesi'una
Suk Sulat ni Pablo para se ngak taga Colosas sinulat para sek simbaan se Colosas, sala se nga dlunsud seg Asia Minor sek sebangan seg Efeso. Simbaan keni gena' binakud ni Pablo, ma'ad simbaan keni mibakud ri se dlugar ne ritu binatik ni Pablo su gembagel ne ketengeren seng miksugu' giin ne ngang mengwawali buwat seg Efeso, su guluwan nek siyudad se nga getaw Roma sek probinsiya seg Asia. Mirengegan ni Pablo ned duuni gena' metuud neng mentetendu' ritu sek simbaan se Colosas neng miktendu' arun mekilala su nga getaw ri sed Diwata bu' mekaangken seng metuud ne keluwasan, kina'enlan nek sumimba ilan sek santa' ne “gispirituhanen ne nga geseg bu' ngang mingetendanan.” Dugang pa run nini, ngang mentetendu' keni miktalu' kina'enlan suk sala sumunud tu sek pinain neng mi'enaran maa' sek pektuli' bu' kina'enlan sumunud ri seg istriktu nek pemala'ud metendeng ri se ngak pekaan bu' sed duma pa ne ngag betang.
Miksulat si Pablo arun sek peksupak se ngak penendu'an keni ginamit sung metuud ne nga Christian neng minsahi. Su ketibuukan nek sembag ni Pablo giin nini: si Jesus Christ giin sung mekegbegay seng metuud ne keluwasan, bu' ngak penendu'an keni bu' ngak pebiyan ne ginamit sed duma, seng metuud mikepelayu' tumu' ini ri seniin. Pebiyan ri ni Christ, binaal ned Diwata sug benwa bu' pebiyan rema ri seniin uwiten ini puli' ritu seniin. Riin ra sek pekesalabuuk ri ni Christ duunik pedderama se keluwasan sug benwa. Pi'ita' ni Pablo nek penendu'an keni, duuni gembagel ne gembaalen para se nga ketubu' ne ngang mektetu'u.
Mbaya' mesuunan ne si Tikicus sung miguwit sek sulat keni tu se Colosas para ni Pablo. Inunutan giin ni Onesimus, su gulipen, ne tendeng ri seniin sinulat ni Pablo su dlibru nek Filemon.
Ngang Misulat ri sek Sulat keni
I. Pesi'una 1.1-8
II. Su Getaw bu' Terbahu ni Christ 1.9—2.19
III. Pekpekematay bu' Pedleketubu' ri ni Christ 2.20—4.6
IV. Penapus 4.7-18
1
1-2 Seniyu ne nga getawan ned Diwata ri se Colosas, neng metinumanen ne ngak sambat ri sek pekesalabuuk duma ni Christ.
Sulat keni buwat ni Pablo, nek pebiyan se keliyag ned Diwata mibaal ne gapustulis ni Christ Jesus, bu' buwat sek pated ta ne si Timoteo.
Sud Diwata ne Gama' ta megbegay siya ri seniyu ne kepiya bu' kelinaw.
Pegampu' sek Pekpesalamat
Kanunay ami mikpesalamat ri sed Diwata, su Gama' ne Ginu'u ta ne si Jesus Christ, seng migampu' ami para seniyu. Ay mikerengeg ami metendeng sek pektu'u niyu ri ni Christ Jesus bu' sek petail niyu para se dlaun ne nga getawan ned Diwata. Seng minateng ri seniyu sung metuud neng minsahi, su Gempiya ne Gesuyen, mirengeg niyu suk pedderama neg binegay. Aas, suk pektu'u bu' suk petail niyu misingkal ri sek pidderama niyu, nek tinegana ri seniyu tu se dlangit. Su Gempiya ne Gesuyen miguwit ne ngak pengumpiya bu' midlelaup sek tibuuk neg benwa, maa' seng mihitabu' ri seniyu se guna nek pekerengeg niyu metendeng se kepiya ned Diwata bu' misabut niyu neng metuud gaid ini. 1.7: Colosas 4.12; Filemon 23. Mitu'unan niyu su kepiya ned Diwata buwat ni Epafras, suk pinetail ta nek sama sesugu'en, neng metinumanen neng mikpenibeli ri ni Christ teles para senita. Tinelu'aan ami sek petail neg binegay ne Gispiritu ri seniyu.
Tendeng run nini ne keterengan, kanunay ami migampu' para seniyu, gatad pa sek pekerengeg nami metendeng ri seniyu. Pinengi nami ri sed Diwata neng mesuunan siya niyu su keliyagen, duma se dlaun nek tinawan bu' pekpenabut neg binegay ne Gispirituun, 10 arun mekehimu amu sek pedleketubu' sumala' se keliyag ne Ginu'u bu' megbaal kanunay seng mekepedleliyag ri seniin. Su ketubu' niyu medlekelebu'an se dlaun ne kelasi neng melengas ne ngak terbahu bu' meddugang suk sinuunan niyu ri sed Diwata. 11-12 Mbaal amu siya neng meligen duma se dlaun nek sekeg buwat seng meketetingala ne ga'emen, arun mekaantus amu se dlaun ne ngag betang duma sek pekpelugbak. Bu' duma se dleliyag, pekpesalamat amu ri se Gama', neng migbaal seniyu ne mbaya' mekaambit sek tinegana ned Diwata para se nga getawaan tu sek pedlegeri'an se kerelaag. 13 Linuwasen ita buwat se ga'em ne kereleman bu' miguwit ri senita tu sek pedlegeri'an sek pinetailen neg Bata', 14  1.14: Efeso 1.7. ne giin sung midlekat ri senita bu' mikpasaylu ri se ngak sala' ta.
Su Getaw bu' sug Baalen ni Christ
15 Si Christ giin sung me'ita' ne gawi' ne gendi' me'ita' ned Diwata. Giin su gulang Bata', labaw se dlaun ne ngag betang neng mibaal. 16 Ay pebiyan ri seniin, binaal ned Diwata su dlaunan tu se dlangit bu' rini seg benwa, su ngag betang neng me'ita' bu' su gendi' me'ita' duma na su gispirituhanen ne nga ga'em, su nga ginu'u, su nga geseg, bu' su ngang mingetendanan. Binaal ned Diwata suk tibuuk ne nga dlangit bu' benwa pebiyan ri seniin bu' para seniin. 17 Si Christ diin na daan se genda' pa mbaal su dlaun ne ngag betang, bu' ri sek pekesalabuuk duma seniin, mi'imetang su dlaun ne ngag betang ri se ginsaktu ne dlugar nilan. 18  1.18: Efeso 1.22-23. Giin su gulu se dlawasen ne giin suk simbaan; giin suk pigbuwatan ne ketubu' se dlawas. Giin su guna neg Bata' neng mitubu' puli' buwat se kemetain, arun giin ra su dlabaw se dlaun ne ngag betang. 19 Ay pebiyan se gegulingen ne keliyag ned Diwata ne sug Bata' mekaangken sek tibuuk ne kina'iya ned Diwata. 20  1.20: Efeso 2.16. Pebiyan seg Bata', mikegukum rayun sud Diwata ne mpeneguli' ri seniin suk tibuuk ne nga dlangit bu' benwa. Sud Diwata migbaal ne kelinaw pebiyan sed dugu' neg Bata'en ritu se krus bu' arun me'uwit puli' tu seniin mismu su dlaun ne ngag betang seg benwa bu' se dlangit.
21 Nud diin melayu' amu buwat sed Diwata bu' kuntra amu niin tendeng seng melaat neg binaal niyu bu' pengena'ena'. 22 Ma'ad nemuun, pebiyan se kemetain se dlawas neg Bata'en, piseguli' amu ned Diwata ri seniin, arun mekaatubang amu ri seniin, neg bala'an, dlimpiyu, bu' nda'irunik sala' ri seng metungenga'aan. 23 Tumu', kina'enlan neng mekpeddayun amu neng mengmetinumanen ri seng meligen bu' siguru nek penligen, bu' kina'enlan ndi' niyu tugut su gegulingen niyu ne mpareg buwat sek pedderama neng mi'angken niyu seng mirengeg niyu su Gempiya ne Gesuyen. Baal se Gempiya ne Gesuyen keni ne gaku', si Pablo mibaal nek sesugu'en. Gempiya ne Gesuyen keni neg winali tu se dlaun ne nga getaw ri seg benwa.
Suk Terbahu ni Pablo gisip Sesugu'en ri sek Simbaan
24 Bu' nemuun pidleliyagu metendeng se ngak pegantus'u para seniyu, ay pebiyan ri se ngak pegantus se dlawas'u, mekegabangu sek pektileng se ngak pegantus ni Christ ne nda' pa metubus para se dlawasen, ne giin suk simbaan. 25 Binaalu ned Diwata nek sesugu'en ri sek simbaan bu' piniyalan se ngag baalen para se kepiyanan niyu arun sek tileng mewali sung minsahiin, 26 ne inedluren se gempayat na ne ngak panahun buwat se nga getaw ma'ad nemuun pirayagen na tu se nga getawaan. 27 Ay pelanu ned Diwata ne mpesuun su ginedluren tu se nga getawaan, su keratu' bu' sung meketetingala ne ginedlud ne inandamen para se dlaun ne nga getaw. Su ginedlud giin si Christ ned diin seniyu, neng migulugan nek pesiddengegan amu ned Diwata ritu se dlangit. 28 Aas winali nami si Christ tu se kada sala. Duma se dlaun nek tinawan, pinegulan bu' tinendu'an ilan nami arun sek peguwit se kada sala tu seng metungenga'an ned Diwata gisip metandeng ne getaw neng misalabuuk duma ni Christ. 29 Arun mbaal ini, minantuu gupiya, ginamit su ga'em ni Christ neng migbegay ri senaan nek sekeg.

1:7 1.7: Colosas 4.12; Filemon 23.

1:14 1.14: Efeso 1.7.

1:18 1.18: Efeso 1.22-23.

1:20 1.20: Efeso 2.16.