Suk Sulat ni San Pablo para se ngak taga
Galacia
Pesi'una
Se ginetaran sek pegwali su Gempiya ne Gesuyen metendeng ri ni Jesus Christ bu' dinawat se nga getaw ne gena' Judeo, mituwa' suk saak bu' kina'enlan ba gaid sek sala ne getaw nek sumunud ri se Kesugu'an ni Moses arun mbaal giin neng metuud ne Christian. Mingeterengan si Pablo ne ndi' na ini kina'enlan. Ngani', sung metuud nek sukuran se ketubu' riin ni Christ giin ma'ad suk pektu'u, nek pebiyan run nini su dlaunen piseguli' ri sed Diwata. Ma'ad ri se ngak simbaan se Galacia, seg Asia Minor sala sek probinsiya seg Roma, duuni nga getaw nek sinumupak riin ni Pablo bu' miktu'u ne suk sala kina'enlan sumunud ri se Kesugu'an ni Moses arun mpemetareng giin ned Diwata.
Suk Sulat ni Pablo para se ngak taga Galacia sinulat arun mpuli' riin seng metuud nek pektu'u bu' metendu'an su nga getaw neng mibalag se gena' metuud nek penendu'an. Linebanan ni Pablo su ketengeren gisip gapustulis ni Jesus Christ. Pimetuuraan ini gupiya ne suk pekegapustulisen migbuwat sed Diwata, bu' gena' pebiyan se ga'em ne getaw; bu' labaw se dlaunan, sung misyunen para se nga gena' Judeo. Bu' tinikesaan nek pebiyan sek pektu'u su nga getaw mpeneguli' ri sed Diwata. Se ketapusan ne kapitulu, pi'ita' ni Pablo ne suk pedleketubu' ne ngang mektetu'u riin ni Christ migbuwat sek petail neg bunga sek pektu'u riin ni Christ.
Ngang Misulat ri sek Sulat keni
I. Pesi'una 1.1-10
II. Pigendun run Pekebaal ni Pablo ne Gapustulis 1.11—2.21
III. Su Gempiya ne Gesuyen se Kepiya ned Diwata 3.1—4.31
IV. Migbegay si Christ ne Kegewasan bu' Ketendanan 5.1—6.10
V. Su Ketapusan nek Penegul bu' Pengumusta 6.11-18
1
1 Seniyu ne ngang mektetu'u riin se ngak simbaan se Galacia,
Sulat keni buwat ni Pablo, ne suk pekegapustulisen gena' buwat se getaw awas sek pebiyan ne getaw, ma'ad buwat ni Jesus Christ bu' sed Diwata ne Gama', neng mikpetubu' puli' ri seniin buwat se kemetain. 2 Mingumusta su dlaun ne ngang mektetu'u rini ned duma ri senaan tu se ngak simbaan se Galacia.
3 Sud Diwata ne Gama' ta bu' su Ginu'u ne si Jesus Christ megbegay siya ri seniyu ne kepiya bu' kelinaw.
4 Arun sek pedluwas ri senita buwat seng melaat nek panahun keni, si Christ mikpiyal ri se gegulingenen para se ngak sala' ta, sumala' se keliyag ned Diwata ta bu' Gama', 5 ned diin Seniin suk peksaya' se genda'i gekteben. Metuman siya.
Suk Sala ne Gempiya ne Gesuyen
6 Mitingalau ri seniyu! Midderali' amu rayun tumeliyud sed Diwata neng miktawag ri seniyu pebiyan se kepiya ni Christ, bu' dinawat niyui dlain ne gempiya ne gesuyen. 7 Sek pekemetuud nda'irun nai “dlain ne gempiya ne gesuyen,” ma'ad tinalu'u ini tendeng ay duuni nga getaw neng miksamuk ri seniyu bu' miktinguha' sek pegiles se gempiya ne gesuyen metendeng riin ni Christ. 8 Ma'ad isan bu' gami awas anghel neg buwat se dlangit sung megwali ri seniyu se gempiya ne gesuyen ne gena' maa' seg winali nami riin seniyu, silutan siya giin ned Diwata tu se gimpirnu! 9 Tinalu' na nami ini nud diin, bu' nemuun talu'u ini puli': bu' duuni dlain neng megwali riin seniyu ne gena' maa' seng mirawat na niyu, silutan siya giin tu se gimpirnu!
10 Nda'u penantu arun mekepedleliyag tu se nga getaw. Liyagan'u nek pedleliyagen sud Diwata. Minantuu ba arun mekepedleliyag se nga getaw? Bu' minantuu pa run nitu, gena'u na nek sesugu'en ni Christ.
Pigendun run Pekebaal ni Pablo ne Gapustulis
11 Nga kepeteran'u, tugutay niyau sek pegasuy ri seniyu, ne su gempiya ne gesuyen neg winaliu gena' buwat se getaw. 12 Nda'u merawat ini buwat se isan ta' ne getaw awas duuni getaw neng miktendu' run nini ri senaan. Si Jesus Christ mismu neng mikpe'ita' ri senaan bu' migbegay se gempiya ne gesuyen.
13 ✡ 1.13: Su Ngak Pimbaal 8.3; 22.4-5; 26.9-11. Misuunan na niyu pigendun'u pedleketubu' gisip Judeo. Linutus'u su ngang mektetu'u riin sed Diwata bu' pinentuwan'u gupiya ne laaten ilan. 14 ✡ 1.14: Su Ngak Pimbaal 22.3. Labawu sek pekemetinumanen ri sek tinu'uwan neg Judeo sinangkali' se ngad duma ne ngag Judeo ne ngak sepad'u, bu' labawu pa gaid sek pekemetinumanen ri se ngak penendu'an bu' se ngak pemetasan ne nga gepu'an ta.
15 ✡ 1.15-16: Su Ngak Pimbaal 9.3-6; 22.6-10; 26.13-18. Ma'ad tendeng se kepiya ned Diwata, pinili' naun isan se genda'u pa me'etaw, bu' tinawag naun sek pekpenibeli ri seniin. Bu' seng mi'ukumaan 16 nek perayagen ri senaan sug Bata'en, arun mewaliu su Gempiya ne Gesuyen metendeng ri seniin tu se nga gena' Judeo, nda'u peritu se isan ta' ne getaw para mekpesambag, 17 awas merituu seg Jerusalem arun kumita' se nga gapustulis neng mi'una pa ri senaan. Tumu', mirituu seg Arabia, bu' rayun mipuli'u sed Damascus. 18 ✡ 1.18: Su Ngak Pimbaal 9.26-30. Telu taunu na run ritu, dluwat itu, mirituu seg Jerusalem arun duuning mesuunan'u buwat ni Pedro, bu' mikengelu duma seniin seled sed duwa' simana. 19 Nda'iruni dlain ne gapustulis ne kinita'u. Sung mi'ita'u si Santiago, suk pated ne Ginu'u.
20 Landunik sinulat'u metuud. Sud Diwata mikesuun ne nda'u pegbalus!
21 Sek peketubus itu, mirituu se nga dlugar sek Syria bu' Cilicia. 22 Sek panahun ketu, su ngak sakup se ngak simbaan seg Judea nda' pa mekilala ri senaan. 23 Misuunan na run nilan landunik tinalu' nu ngad duma: “Su getaw ne ginamit sek pedlutus ri senita, nemuun migwali ri sek pektu'u nek pinentuwaan pedlaatay nud diin!” 24 Aas sinaya' nilan sud Diwata tendeng ri senaan.