Su Gempiya ne Gesuyen nek Sinulat ni
San Mateo
Pesi'una
Sek panahun ne rini pa si Jesus Christ seg benwa, sung nasud neg Israel pidlegesegan sek tribu neg Roma. Aas su gari' seg Roma giin sung midlegeseg seng nasud neg Israel. Giin nini suk pigetaran neng meleget ne ngak sundalu neg buwat sek tribu neg Roma neng mikengel ri se dlugar neg Israel.
Midlised gupiya sung nasud neg Israel tendeng ay miksugu' su gari' se nga getaw Roma neng megbayad ilan neg buwis ri se goberno bu' pimendu'aan su ngang meneningil neg buwis ned duma nilan neng meningil neg buwis. Ma'ad linengetan su nga getaw Israel tendeng ay dinugangan nu ngang meneningil neg buwis sug biyaran nilan.
Si Mateo sala rema neng meneningil neg buwis. Ma'ad sek tinelu'an giin ni Jesus nek sumunud ri seniin, binelengen rayun suk terbahuun bu' miktuman riin ni Jesus. Sala rema giin sek sepulu' bu ruwa' nek tinu'unan nek pinili' ni Jesus sek peddunut ri seniin bu' sek pegasuy ri seng Melengas ne Gesuyen.
Keni neg bahin nek sinulat ni Mateo, sinulat ini para se nga getawan seg Israel. Inesuyan ilan metendeng ri sek pimandu' ni Jesus bu' se ngag baalenen. Bu' kinelaru gupiya ni Jesus ri se nga getaw neg buwat seng Nazaret ne giin gaid sung Misiyas, nek sinulat ni Moses bu' ngak propeta. Ay sinulat nilan suk saad ned Diwata nek sugu'en sung Misiyas rini seg benwa, suk sala nek pinili' neng medlegeseg ri sek tribu neg Israel bu' giin rema sung medluwas riin senilan. Aas pidderama ne nga getaw Israel nek tumanen ned Diwata suk saaren bu' pigelatan nilan suk peddateng neng Misiyas. Aas sinulat ini ni Mateo arun su nga getaw Israel mektu'u riin ni Jesus ne giin gaid sung Misiyas, suk pinili' ned Diwata neng medlegari' riin senilan.
Ngang Misulat ri se Dlibru keni
I. Suk Pigbuwatan bu' Pegegetaw ni Jesus Christ (1.1—2.23)
II. Sung Ministiryu ni Juan neng Membebendyag (3.1-12)
III. Suk Pegbendyag bu' suk Pektintal ri ni Jesus (3.13—4.11)
IV. Suk Pekpenibeli ni Jesus ri se nga Getawan ritu se Galilea (4.12—18.35)
V. Buwat se Galilea pagaw seg Jerusalem (19.1—20.34)
VI. Su Ketapusan nek Simana ni Jesus ritu seg Jerusalem bu' seng megaud seg Jerusalem (21.1—27.66)
VII. Suk Peketubu' Puli' bu' su ngak Pekpe'ita' ni Jesus (28.1-20)
1
Su nga Gepu'an ni Jesus Christ
(San Lucas 3.23-38)
1 Giin nini su dlistaan nu nga gepu'an ni Jesus Christ, neg Bata' dlai ni David; bu' si David gasal ni Abraham.
2-6a Buwat ni Abraham tampan ni Gari' David, giin nini su nga dlistaan nu nga gepu'an:
Si Abraham, giin su gama' ni Isaac;
bu' si Isaac, giin su gama' ni Jacob;
bu' si Jacob, giin su gama' ni Judah bu' nu ngak pateren;
bu' si Judah mikepengesawa riin ni Tamar bu' duuni ngag bata' nilan ne gilan si Perez bu' si Zera;
bu' si Perez, giin su gama' ni Hezron;
bu' si Hezron, giin su gama' ni Ram;
bu' si Ram, giin su gama' ni Aminadab;
bu' si Aminadab, giin su gama' ni Nahason;
bu' si Nahason, giin su gama' ni Salmon;
bu' si Salmon mikepengesawa riin ni Rahab bu' sug bata' nilan si Boaz;
si Boaz, giin su gama' ni Obed bu' su gina'en si Ruth;
si Obed, giin su gama' ni Jesse;
bu' si Jesse, giin su gama' ni Gari' David.
6b-11 ✡1.11: 2 Nga Gari' 24.14-15; 2 Nga Cronica 36.10; Jeremias 27.20. Buwat ni David tampan sek pekpe'awa' se nga getaw Israel tu se dlugar nilan pagaw tu seng nasud neg Babilonia, giin nini su nga dlistaan nu nga gepu'an:
Si David, giin su gama' ni Solomon bu' su gina'en sawa nud diin ni Urias;
bu' si Solomon, giin su gama' ni Rehoboam;
bu' si Rehoboam, giin su gama' ni Abias;
bu' si Abias, giin su gama' ni Asa;
bu' si Asa, giin su gama' ni Jehosafat;
bu' si Jehosafat, giin su gama' ni Joram;
bu' si Joram, giin su gama' ni Usias;
bu' si Usias, giin su gama' ni Jotam;
bu' si Jotam, giin su gama' ni Ahas;
bu' si Ahas, giin su gama' ni Hesekias;
bu' si Hesekias, giin su gama' ni Manases;
bu' si Manases, giin su gama' ni Amos;
bu' si Amos, giin su gama' ni Josias;
bu' si Josias giin su gama' ni Jeconias bu' nu ngak
pateren.
12-16 Dluwat sek pekpepe'awa' se nga getaw Israel tu seg Babilonia tampan migegetaw si Jesus, giin nini su nga dlistaan nu nga gepu'an:
si Jeconias, giin su gama' ni Salatiel;
bu' si Salatiel, giin su gama' ni Zorobabel;
bu' si Zorobabel, giin su gama' ni Abiud;
bu' si Abiud, giin su gama' ni Eliakim;
bu' si Eliakim, giin su gama' ni Asor;
bu' si Asor, giin su gama' ni Zadok;
bu' si Zadok, giin su gama' ni Akim;
bu' si Akim, giin su gama' ni Eliud;
bu' si Eliud, giin su gama' ni Eleazar;
bu' si Eleazar, giin su gama' ni Matan;
bu' si Matan, giin su gama' ni Jacob;
bu' si Jacob, giin su gama' ni Jose neg bana ni Maria. Si Maria giin su gina' ni Jesus ne giningelanan neng Misiyas.
17 Aas duunik sepulu' bu' paat ne nga gesalan buwat riin ni Abraham tampan ni David. Bu' duun remaik sepulu' bu' paat ne nga gesalan buwat riin ni David tampan sek panahun ne su nga getaw Israel pipe'awa' tu se dlugar nilan pagaw tu seg Babilonia bu' duunik sepulu' bu' paat ne nga gesalan buwat sek pekpe'awa' se dlugar nilan pagaw tu seg Babilonia tampan migegetaw sung Misiyas.
Suk Pegegetaw ni Jesus Christ
(San Lucas 2.1-7)
18 ✡1.18: San Lucas 1.27. Na, maa' nini suk pebiyan sek pegegetaw ni Jesus Christ. Si Maria ne gina'en pengesuwaan na ni Jose. Se genda' ilan pa pektipung, mitindawan ni Maria neng migberes giin pebiyan se Gispiritu Santu. 19 Mbuus, si Jose keni suk pemenaan ni Maria, metareng ini ne getaw bu' ndi'en liyagan ne mpiiran si Maria ri se dlaun ne getaw. Aas migena'ena' giin neg belengen si Maria ne ndi' mekpesuun. 20 Saanay pigena'ena' pa ini ni Jose, enlengay niyu, sug anghel ne Ginu'u pebiyan sek teginepen mikpe'ita' ri seniin, laungen, “Jose, gasal ni David, ndi'a mendek sek pekpengesawa riin ni Maria ay sug bineresen buwat se Gispiritu Santu. 21 ✡1.21: San Lucas 1.31. Bu' megbata' giin ne dlai bu' ingelanay mu sug bata' neg Jesus, tendeng ay luwasenen su nga getawaan buwat ri se ngak sala' nilan.”
22 Na, mihitabu' ini arun metuman suk tinalu' ne Ginu'u pebiyan sek propeta, neng miktalu', 23 ✡1.23: Isaias 7.14 (LXX). “Enlengay niyu, sud delaga ne genda' pa mayan me'ilebetay megberes, bu' megbata' giin ne dlai. Bu' bata' keni ingelanan neg Emmanuel” ne su guluganen, “Sud Diwata duma senita.”
24 Rayun sek peketanud ni Jose, pingesawaan si Maria sumala' sek tinalu' nug anghel ne Ginu'u ri seniin. 25 ✡1.25: San Lucas 2.21. Ma'ad nda'en ilebetay si Maria tampan nda' ini pegbata' ne dlai. Bu' iningelanan ini ni Jose neg Jesus.