7
Na ba ja matgilhdhaꞌ gu Dios xijum gook ooꞌm daman maakob miil gu Israel kam jaꞌtkam nam miꞌ puiꞌ jiim na jax jix aaꞌ
1 Gio baꞌ moo miꞌ dhɨr jaꞌpni ñich jup tɨ tɨɨ, maakob sap gu noonbiꞌñ gu Dios maakob kap guguuk am na jɨꞌx oiꞌñgaꞌn, na mɨt puiꞌ jaꞌk ja tɨɨdak mu ja joot nam jix ioꞌm tɨ jɨlhbichdhaꞌ bɨɨx kap na jɨꞌx oiꞌñgaꞌn na baꞌ tum xichuiꞌdhaꞌ bɨɨx na jɨꞌk tuꞌx chu jaiꞌch bɨɨx kap, sia mu jaꞌp suudaiꞌ chɨr. 2 Baꞌ jumai jaꞌpni jurnip dɨr jaꞌk muiꞌp ba jim gu nobiiꞌñ gu Dios ji uaꞌdat guiꞌ na kɨꞌn ja matgilhchuꞌn gu Dios guiꞌ nam jɨꞌk kaichgɨdaꞌ. Baꞌ muiꞌ xi ja jiñkai gu jaiꞌ noonbiꞌñ nam mu jaꞌp guguuk maakob kap na jɨꞌx oiꞌñgaꞌn, na mɨt ja chia nam tu xichuiꞌdhaꞌ jɨbɨɨlh kɨꞌn bɨɨx kap na jɨꞌx oiꞌñgaꞌn, jup ja tɨtda:
3 ―Chakui pim jix ioꞌm tɨ jɨlhbichuꞌndaꞌ, nam guꞌ bɨɨx pu koꞌyaꞌ guiꞌ nam jɨꞌk tu dudua na jɨꞌx oiꞌñgaꞌn, sia bɨɨx pum xichuiꞌdhaꞌ gu tutua gam saiꞌ gio gu suudaiꞌ, nach guꞌ ka ja matgilhdhaꞌ guiꞌ nam jɨꞌk tuꞌ kaꞌm nɨidhat miꞌ puiꞌ tu kuugalhdhim na jax jix aaꞌ guch Gɨꞌkoraꞌ. Dai nach ka xi ja matgilhdhaꞌ na pim baꞌ moo muiꞌ ba tɨ jɨlhbichdhaꞌ.
4 Baꞌ gu nobiiꞌñ gu Dios xi ja matgilh ja kokobtaiꞌ am guiꞌ nam jɨꞌk tuꞌ kaꞌm nɨiꞌñ gu Dios nam jir Israel kam jaꞌtkam, xijum gook ooꞌm daman maakob miil (144,000) ja matgilh. 5 Mambhɨɨx daman gook miil ja matgilh guiꞌ nam jir bopxiꞌñ gu Judaa, gio guiꞌ nam jir bopxiꞌñ gu Rubeen jaꞌkbuiꞌ ɨp mambhɨɨx daman gook miil, gio guiꞌ nam jir bopxiꞌñ gu Gaad mambhɨɨx daman gook miil ɨp, 6 gio baꞌ guiꞌ nam jup jir bopxiꞌñ gu Aseer jaꞌkbuiꞌ mɨt jup ja matgilh mambhɨɨx daman gook miil, gio baꞌ guiꞌ nam jir bopxiꞌñ gu Neptalii jaꞌkbuiꞌ mɨt jup ja matgilh mambhɨɨx daman gook miil, gio gu bopxiꞌñ gu Manasees mambhɨɨx daman gook miil ɨp, 7 gio guiꞌ nam jir bopxiꞌñ gu Simeon mambhɨɨx daman gook miil ɨp, gio baꞌ moo guiꞌ nam Lebiip jir bopxiꞌñ jaꞌkbuiꞌ mambhɨɨx daman gook miil jamɨt jup ja matgilh, gio guiꞌ nam jir bopxiꞌñ gu Isakaar jaꞌkbuiꞌ mambhɨɨx daman gook miil jamɨt jup ja matgilh, 8 gio baꞌ moo guiꞌ nam jɨꞌk jir bopxiꞌñ gu Sabuloon jaꞌkbuiꞌ ɨp mambhɨɨx daman gook miil ɨp, gio baꞌ guiꞌ nam jir bopxiꞌñ gu Josee mambhɨɨx daman gook miil ɨp, gio baꞌ guiꞌ nam jup jir bopxiꞌñ gu Benjamiin jaꞌkbuiꞌ mɨt jup ja matgilh mambhɨɨx daman gook miil.
Gu Juan na ba ja tɨgiaꞌ muiꞌ gu jaꞌtkam jix chooto tɨ tɨꞌ kam
9 Baꞌ miꞌ dhɨr muiꞌ miꞌ bam maax jamɨt gu jaꞌtkam cham daaxix kam, jaꞌpni bɨɨpɨꞌ dɨr na paiꞌ daa gux ioꞌm Gɇꞌkam gio guiꞌ na jaꞌp ji buusan na gux kɨɨꞌ kasnir, pu cham jaroiꞌ maat nam jɨꞌk aix, puiꞌ pɨx tuꞌiiꞌ am. Bɨɨx kap dɨr miꞌ guguuk am gu jaꞌtkam na jɨꞌx oiꞌñgaꞌn kam, nam bɨɨx aixim tuꞌm tu ñiok gam bɨɨx aixim tuutuꞌm. Jix ioꞌm muiꞌ dho baꞌ ji gu jaꞌtkam nam mi guguuk, nam pu cham jɨꞌxdhaꞌ jaroiꞌ ja tɨɨmoꞌ siat tɨi ma ja jaꞌkɨlh. Bɨɨx jix chooto tɨ tɨꞌ am, gio nam jɨꞌmaꞌn ja daadaꞌ gu koꞌkmarak jaajaꞌ. 10 Baꞌp kaiꞌch am gɇꞌ kɨꞌn:
¡Jaꞌp moo gɇꞌkam kɨꞌn jix bhaiꞌ duu ji dhi Dios jich Gɨꞌkoraꞌ na bhaiꞌ dhaa atooxkor taꞌm nat jich uañ guch uaꞌtulhdharaꞌ,
nat guꞌ mu joot dhiꞌ na jaꞌp ji buusan na gux kɨɨꞌ kasnir na baꞌ puꞌñich aꞌmkam jum makgɨrtaꞌ na baꞌ kɨꞌn tu namkix kaꞌ guch uaꞌtulhdharaꞌ!
Gammɨjɨch jix bhaiꞌch chaatɨt tu daandaꞌ buiñor,
na guꞌr jix bhaiꞌkam.
11 Baꞌ gu muiꞌ cham daaxix kam gu noonbiꞌñ gu Dios nam bɨɨx xikoolh dhɨr guguuk miꞌ na paiꞌ daa, gio miꞌ nam paiꞌ bɨɨx xikoolh dhɨr daraa gu maaꞌn ooꞌm daman maakob guiꞌ nam jir jagɨꞌgɨr paꞌ, gio gu maakob sasoiꞌ, ja oꞌlhia kɨꞌn guꞌkɨk bhaiꞌ ji chu daanɨ mɨt buiñor gu Dios na miꞌ daa ɨrban. 12 Jup kaiꞌch am:
Maaxik dhor puiꞌ nam jax kaiꞌch dhich jaaduñ,
gammɨjɨch dho tuꞌ kaꞌm nɨidhat gɇꞌkamtuꞌndaꞌ dhi Dios jich Gɨꞌkoraꞌ na yaꞌ gɇꞌkam kɨꞌn daa,
na guꞌ maaxik jix ioꞌm jir Gɇꞌkam,
bɨxchuꞌx aichuꞌn na pu tu duñiaꞌ.
Gammɨjɨch gɇꞌkamtuꞌndat taxchaabgiꞌñdhaꞌ sia nar paiꞌ dhuuk kaꞌ gɨt.
Jaꞌpni tu tuiꞌkaꞌ.
13 Baꞌ maadɨt guiꞌ nam miꞌ bɨɨx xikoolh dhɨr daraa nam jir jagɨꞌgɨr paꞌ jup jiñ chɨtda:
―¿Jaroom daꞌ dhi jaꞌtkam jix chooto tɨ tɨꞌ kam nam yaꞌ guguuk? ¿Paam dɨr jaꞌk jiim?
14 Baꞌ aañ jup tɨtda:
―Cham ji nañ maat. Noꞌ pich miꞌ dhɨr iam jiñ aaꞌñ jiñ jaduuñ nap jix maat.
Baꞌ guiꞌ xiñ aagiꞌñ ɨp, jup jiñ chɨtda:
―Jir diꞌ am dho guiꞌ nam giilhim jum tulhiiñaimɨk mu jaꞌp oiꞌñgaꞌn bhaan nam duduakat gu ja tutkuꞌ bhaan, gio nam gammɨjɨ pux biiñak kat buiñor gu Dios siam jum tulhiiñ. Baꞌ xib yammɨ jaꞌk bap tuꞌiiꞌ am jix bhaiꞌm taatɨt, nat guꞌ bɨɨx dappaam tu ja uañ gu ja uaꞌtulhdharaꞌ guch Xoiꞌkam, dhiꞌ na jaꞌp ji buusan na gux kɨɨꞌ kasnir, kɨꞌn gu ɨꞌraꞌn nat jaax bhaan gu kuruus, na mɨt guꞌ soiꞌm ɨlhdhak tɨ jɨɨꞌñ buiñor. 15 Yaꞌ jɨꞌ bar diꞌ nam paiꞌ gammɨjɨ bɨɨmaꞌn bap tuiꞌkaꞌ gu Dios joidham jix jɨjɨkgɨm, jaꞌp ji buusniaꞌ nam gammɨjɨ yaꞌ pu ba tu juandaꞌ na paiꞌ tu chiopiꞌ gu Dios. Dhiꞌ baꞌ dɨɨlh ja buip tuꞌt ja nuukaꞌndaꞌ. 16 Yaꞌ dɨr jaꞌp jaꞌk cham paiꞌ dhuuk kax bhioꞌn kaꞌ am, ni nam cham paiꞌ dhuuk ka tanook kaꞌ, ni gu tanoolh ku cham paiꞌ dhuuk ja aꞌm ka tonniaꞌ, baꞌ cham paiꞌx chatoiñ kɨr kam tulhiiñaꞌ am. 17 Baꞌ xib yaꞌ dɨr jaꞌp jaꞌk gammɨjɨ yaꞌ pu ba oiꞌñkaꞌ am jix bhaiꞌm taatɨt, cham tuꞌ bhaan jum tulhiiñat ka suandaꞌ am nam jax jum tulhiiñaimɨk mu jaꞌp oiꞌñgaꞌn bhaan, na guꞌ yaꞌ gammɨjɨx bhaiꞌ tu tatdaꞌ buiñor dhich Gɨꞌkoraꞌ, gio na guꞌ gammɨjɨ ja bɨɨm oirɨdaꞌ dhiꞌ na jaꞌp ji buusan na gux kɨɨꞌ kasnir, jaꞌp ji buusniaꞌ na ja bipiaꞌdaꞌ jaꞌp na kakasnir, gio na gammɨjɨ ja iꞌchuꞌndaꞌ gux kɨɨꞌ suudaiꞌ nam kɨꞌn gammɨjɨx bhaiꞌm taat kaꞌ.