hmo
Iuda Iskariote ese Iesu ena mase dala ia karaia
22
1 Idia hatubua lasi paraoa ena aria ladana Pasova, ia kahirakahira vadaeni. 2 Vadaeni dubu biagudia bona taravatu hadibaia taudia ese Iesu alaia totona dala idia tahua, hunia dekenai, badina be idia ese unai taunimanima momo dekenai idia gari.
3 Unai neganai Satani ese Iuda Iskariote, idia 12 tauna ta, ena lalona dekenai ia vareai. 4 Vadaeni ia be ia lao, dubu biagudia bona Dubu Helaga ena gima taudia danu idia hereva hebou, Iesu be edena bamona do ia henia idia dekenai. 5 Idia be idia moale, vadaeni idia gwauhamata ia dekenai, moni do idia henia idia gwau. 6 Iuda ia gwau, “Namo.” Vadaeni nega ia naria, taunimanima idia noho lasi neganai, ia ese Iesu do ia henia idia dekenai.
Aria idia karaia hegaegae
7 Idia hatubua lasi paraoa ena aria dinana, Pasova ena mamoe alaia dinana, ia ginidae. 8 Vadaeni Iesu ese Petero bona Ioane ia siaia, ia gwau, “Umui lao, Pasova do umui karaia hegaegae, vadaeni do ita ania.”
9 Idia ruaosi idia gwau, “Edeseni do ai karaia hegaegae?”
10 Vadaeni Iesu ese ia hamaorodia, ia gwau, “Hanua badana dekenai do umui raka vareai, tau ta hodu ta ia huaia noho do umui itaia, vadaeni ia ese do ia daekau rumana dekenai do umui daekau. 11 Vadaeni unai ruma ena biaguna do umui hereva henia, do umui gwau, ‘Hadibaia tauna ia gwau, vadivadi daiutu be edeseni, egu diba tahua taudia danu Pasova do ai ania?’ 12 Vadaeni ia ese ataiai daiutu badana ta do ia hadibaia umui dekenai, ia hegaegae vadaeni. Unuseni Pasova do umui karaia hegaegae.”
13 Vadaeni idia ruaosi idia lao, ia ese ia gwauraia guna gaudia idia davaria, vadaeni Pasova idia karaia hegaegae.
Anibou Helaga
14 Negana ia ginidae neganai, Iesu be iena aposetolo taudia danu idia helai diho. 15 Vadaeni idia dekenai ia hereva, ia gwau, “Lau ura bada hari inai Pasova do ita ania hebou guna, gabeai hisihisi do lau davaria. 16 Badina be umui lau hamaoroa, lau be Pasova do lau ania lou lasi, ela bona iena anina korikori do ia hedinarai Dirava ena Basileia lalonai.”
17 Vadaeni kapusi ta ia abia, ia hanamoa, ia gwau, “Inai be umui abia, umui ibounai do umui inua. 18 Badina be lau hamaoroa umui dekenai, lau be uaina do lau inua lou lasi, ela bona Dirava ena Basileia do ia ginidae.”
19 Vadaeni paraoa ia abia, ia hanamoa, ia makohia, ia henia idia dekenai, ia gwau, “Lauegu tauanina be inai, umui totona ia henia vadaeni. Inai bamona do umui karaia, lau dekenai do umui laloa totona.” 20 Idia ania ore, vadaeni ia ese kapusi ma ia abia, ia gwau, “Inai kapusi be maino karaia gwauhamata matamatana lauegu rarana dekenai, umui totona do ia bubua.
21 “Lauegu mase dala do ia karaia tauna ena imana be pata latanai, inai lauegu badibadinai. 22 Momokani, Taunimanima ena Natuna be do ia lao, ia gwauraia guna hegeregerena, to iena mase dala ia karaia tauna madi ia dika momokani.”
23 Vadaeni idia sibona ta ta dekenai idia nanadaia, idia gwau, “Inai be daika ese unai bamona do ia karaia?”
Daika do ia bada
24 Vadaeni idia sibona idia hepapahuahu, idia be daika do ia herea. 25 Vadaeni ia hamaoroa idia dekenai, ia gwau, “Bese idauidau edia king ese idia lohia idia dekenai, bona hanua idauidau taudia ese edia lohia dekenai idia hanamoa. 26 To umui be unai bamona lasi. Umui emui huanai guna ia vara tauna be gabeai vara tauna bamona do ia lao, bona hakaua tauna danu be hesiai tauna bamona do ia lao. 27 Badana be daika, aniani gabuna dekenai do ia helai diho tauna, o hesiai tauna? Aniani gabuna dekenai ia helai diho tauna, ani? To lau be umui emui huanai lau noho, emui hesiai tauna bamona.
28 Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi. 29 Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai. 30 Vadaeni lauegu Basileia lalonai, egu pata dekenai do umui aniani, bona do umui inuinu, bona terona ena latanai do umui helai, vadaeni Israela iduhu 12 dekenai do umui kota henia.
Iesu ia gwau Petero ese do ia hunia ena hereva dekenai
31 “Simona e, Simona e, oi kamonai. Satani ese gwaumaoro ia abia vadaeni, emui abidadama do ia tohoa, hegeregere uiti idia botaia, iena momoru kokia totona. 32 To lau be lau guriguri vadaeni oi dainai, oiemu abidadama do ia moru lasi totona. Vadaeni lau dekenai do oi giroa mai neganai, be oiemu tadikaka dekenai goada do oi henia.” 33 Petero ia gwau, “Lohiabada e, lau be oi danu do ita lao, ela bona dibura ruma, ela bona mase.” 34 To Iesu ia gwau, “Petero e, oi lau hamaoroa inai, kokoroku do ia boiboi lasi, oiemu hereva dekenai nega toi do oi hunia lau, do oi gwau, ‘Lau be lau diba lasi Iesu.’ ”
Puse, tamaka bona tuari kaia
35 Ma Iesu ia gwau, “Guna lau ese umui lau siaia neganai, mai emui pusepuse lasi, mai emui dabua udaia gauna lasi, mai emui tamaka lasi, umui raka, be umui ese gau ta dekenai umui hegeregere lasi, a?”
Idia gwau, “Lasi.”
36 Vadaeni ia gwau, “To harihari, ta mai ena pusepuse, do ia abia, ta mai ena dabua udaia gauna, danu do ia abia, ta mai ena tuari kaia lasi, iena dabua dekena amo kaia ta do ia hoia. 37 Badina Dirava ena Buka Helaga lalonai inai hereva ia noho:
‘Taunimanima ese idia laloa vadaeni,
ia be dika karaia tauna hegeregerena.’
Umui lau hamaoroa inai: Unai kara be momokani lau dekenai do ia vara. Badina Buka Helaga ena hereva ibounai lau totona, be do idia vara momokani.” 38 Idia gwau, “Lohiabada e, tuari kaia rua be inai.”
Ia gwau, “Ia hegeregere vadaeni.”
Olive Ororo dekenai Iesu ia guriguri
39 Vadaeni idia raka murimuri dekenai, ma nega ibounai ia karaia bamona, Iesu ia lao Olive Ororo dekenai, iena diba tahua taudia danu iena murina dekenai idia raka. 40 Unai gabu dekenai idia ginidae, vadaeni idia dekenai ia hamaoroa, ia gwau, “Do umui guriguri, dibagani ese umui do ia abia garina.”
41 Vadaeni ia sibona ia raka siri, nadi ta bema idia negea ena daudau hegeregerena, vadaeni iena tuina ia atoa diho, ia guriguri, 42 ia gwau, “Egu Tamana e, oiemu lalona bema ia hegeregere, inai kapusi be lau dekena amo do oi kokia, to lauegu ura lasi, oiemu ura sibona.” 43 Vadaeni aneru ta guba dekena amo ia dekenai ia ginidae, ia dekenai goada henia totona. 44 To hisihisi bada ese Iesu ena lalona ia abia, ia guriguri goadagoada, ela bona iena kopina ia siahu ranuna be rara bamona ia moru tano dekenai.
45 Guriguri dekena amo ia toreisi, diba tahua taudia dekenai ia giroa lao, to idia be idia mahuta noho, edia laloa idia doko dainai. 46 Vadaeni ia ese ia hereva idia dekenai, ia gwau, “Badina dahaka umui mahuta? Umui toreisi, umui guriguri, dibagani ese umui do ia abia garina.”
Iesu idia dogoatao
47 Iesu ia hereva noho neganai, taunimanima momo idia ginidae vadaeni. Iuda, diba tahua tauna ta, ese ia hakaudia, vadaeni Iesu dekenai kisi henia totona ia raka kahirakahira lao. 48 To Iesu ia gwau, “Iuda e, Taunimanima ena Natuna be kisi dekena amo iena mase dala do oi karaia, a?”
49 Iesu ena diba tahua taudia ese idia itaia dahaka do ia vara, vadaeni idia nanadaia ia dekenai, idia gwau, “Lohiabada e, tuari kaia dekena amo idia dekenai do ai heatu, a?” 50 Vadaeni idia ta ese Hahelagaia Tauna Badana ena hesiai tauna ena taiana idiba kahana ia utua oho.
51 To Iesu ia gwau, “Dohore.” Vadaeni unai tau ena taiana dekenai Iesu ese iena imana ia atoa, ia hanamoa lou.
52 Vadaeni Iesu ese ia do idia dogoatao totona idia lao taudia, dubu biagudia bona Dubu Helaga ena gima taudia bona hanua tau badadia, dekenai ia hereva henia, ia gwau, “Umui be henaoa tauna ta do umui dogoatao totona bamona umui mai, mai emui kaia, bona mai emui io, a? 53 Dina ibounai ita be Dubu Helaga lalonai ita gini hebou, to edena bamona lau umui dogoatao lasi? To inai be umui emui nega, dibura ena siahu negana.”
Petero ese iena hereva dekena amo Iesu ia hunia
54 Vadaeni idia ese Iesu idia dogoatao, Hahelagaia Tauna Badana ena ruma dekenai idia hakaua vareai. Petero danu Iesu ena murina dekenai ia raka, to sisina ia daudau. 55 Haida ese magu lalonai lahi idia karaia, vadaeni idia helai hagegea. Petero danu idia edia badinai ia helai. 56 Vadaeni hesiai hahine ta ese lahi ena diari dekenai Petero ia itaia, vadaeni ia gwau, “Inai tau be Iesu ena turana ta.”
57 To Petero ese iena hereva dekenai Iesu ia hunia, ia gwau, “Hahine e, lau be lau diba lasi ia.”
58 Nega ia daudau lasi, tau ta ese ma Petero ia itaia, ia gwau, “Oi danu idia edia turana ta.”
To Petero ia gwau, “Tau e, lau be lasi.”
59 Hora ta ia lao, vadaeni ta ma ia hereva goadagoada, ia gwau, “Momokani, inai tau be Iesu ena turana ta, badina be ia danu Galilea tauna.”
60 To Petero ia gwau, “Tau e, oiemu hereva ena anina lau diba lasi.”
Vadaeni ia hereva neganai, maoromaoro kokoroku ia boiboi. 61 Vadaeni Lohiabada ese iena matana ia giroa Petero dekenai, ia itaia noho. Unai neganai, Petero ese Lohiabada ena hereva ia laloa, ia gwau, “Kokoroku do ia boiboi lasi, nega toi oiemu hereva dekenai do oi hunia lau.” 62 Vadaeni Petero ia raka murimuri dekenai, ia tai dikadika.
Iesu idia hevaseha henia, bona idia botaia
63 Iesu idia dogoatao taudia ese idia kirikirilaia, bona idia botaia. 64 Iena matana danu dabua dekenai idia koua, iena vairana idia botaia, idia nanadaia, idia gwau, “Oi ia botaia tauna be daika?” 65 Bona hereva dika momo idia gwauraia ia dekenai.
Kaunsolo taudia edia vairana dekenai Iesu idia kota henia
66 Daba rere neganai, hanua tau badadia idia haboua, dubu biagudia bona taravatu hadibaia taudia danu, vadaeni kaunsolo taudia edia vairana dekenai Iesu idia hakaua lao. Idia gwau, 67 “Oi hamaoroa ai dekenai, oi be Keriso o?”
Iesu ia gwau, “Bema umui lau hamaoroa, umui be do umui kamonai lasi. 68 Bona bema umui lau nanadaia, umui be do umui haere lasi. 69 To harihari ia lao, Taunimanima ena Natuna be Dirava ena siahu idibana kahana dekenai do ia helai.”
70 Vadaeni ibounai idia gwau, “Be, oi be Dirava ena Natuna, a?” Ia gwau, “Umui gwauraia maoro unai.”
71 Idia gwau, “Dahaka dainai samania hereva ma ita tahua? Ia sibona ena uduna dekenai ia hereva gauna ita kamonai vadaeni!”
Iesu be Pilato ena vairana dekenai
23
1 Vadaeni hebou taudia ibounai idia toreisi, Pilato dekenai Iesu idia hakaua lao. 2 Ia dekenai idia samania hamatamaia, idia gwau, “Inai tau ai davaria, aiemai bese taudia dekenai ia hereva henia mai goada danu, Kaisara ena takisi moni henia totona ia gwauatao, bona sibona ia gwauraia ia be Keriso, king ta.”
3 Vadaeni Pilato ese ia nanadaia, ia gwau, “Oi be Iuda taudia edia King, a?”
Iesu ia haere, ia gwau, “Oi hereva maoro unai.”
4 Pilato ese dubu biagudia bona unai taunimanima momo dekenai ia hamaoroa, ia gwau, “Kerere ta lau davaria lasi inai tau dekenai.”
5 To idia be idia hereva goadagoada, idia gwau, “Ia ese iena hadibaia herevadia dekenai Iudea noho taudia ibounai ia hadikadia, Galilea dekena amo ia hamatamaia, ia mai bona inai hanua dekenai.”
6 Pilato ese inai hereva ia kamonaia, vadaeni ia henanadaia, ia gwau, “Inai Iesu be Galilea tauna, a?” 7 Vadaeni ia diba ia be Heroda ena kahana tauna dainai, ia ese Heroda dekenai ia siaia lao, badina unai neganai Heroda be Ierusalema dekenai ia noho.
Iesu be Heroda ena vairana dekenai
8 Heroda ese Iesu ia itaia, vadaeni ia moale bada, badina be nega daudau Iesu ena sivarai ia kamonai, vadaeni ia ura be do ia itaia, bona Iesu ese toa ta do ia karaia, vadaeni do ia itaia. 9 Vadaeni ia dekenai hereva momo ia nanadaia, to Iesu be ia haere lasi. 10 Dubu biagudia bona taravatu hadibaia taudia be unuseni idia gini, idia ese Iesu idia samania mai goada danu. 11 Vadaeni Heroda mai ena tuari taudia danu ese Iesu idia kirikirilaia, idia hevaseha henia, dabua namo herea ta iena tauanina dekenai idia atoa, vadaeni Pilato dekenai idia siaia lou. 12 Unai neganai Pilato bona Heroda be idia maino karaia vadaeni, badina be guna idia ruaosi ta ta dekenai idia badu henia.
Iesu nega iharuana Pilato ena vairana dekenai
13 Vadaeni Pilato ese dubu biagudia bona hanua lohia taudia ia boiridia, 14 ia hamaorodia, ia gwau, “Inai tau umui mailaia, umui gwau hanua dekenai ia ese taunimanima ia hakaua kerere, be lau ese umui emui samania hereva lau tahua, to iena kerere ta lau davaria lasi. 15 Heroda danu ese Iesu ena kerere ta ia davaria lasi, unai dainai ia siaia lou ita dekenai. Inai dainai, ia ese ena davana be mase kererena ta ia karaia lasi. 16 Namo, lau botaia, vadaeni do lau ruhaia ia lao.” 17 Badina be nega ibounai, Pilato ena kara be unai aria neganai, dibura ruma dekenai idia noho tauna ta do ia ruhaia murimuri dekenai.
18 To taunimanima ibounai idia boiboi, idia gwau, “Inai tau alaia. To Baraba be do oi ruhaia, bona henia ai dekenai.” 19 Baraba be hanua badana lalonai heatu ia havaraia, bona taunimanima ia alaia dainai, dibura ruma dekenai idia koua.
20 Pilato ese ma ia hereva henia lou idia dekenai, ia gwau ia ura be Iesu do ia ruhaia ia lao. 21 To idia ma idia boiboi, idia gwau, “Oi hasatauroa, oi hasatauroa!”
22 Nega ihatoina ma ia hereva lou idia dekenai, ia gwau, “Inai tau ena dika be dahaka? Lau be mase ena badina ta ia dekenai lau davaria lasi. Lau ese do lau botaia, vadaeni do lau ruhaia.”
23 To idia be mai goada danu idia boiboi, idia gwau, “Oi hasatauroa!” Vadaeni idia edia hereva ia kwalimu. 24 Vadaeni Pilato ese idia edia ura hegeregerena ia karaia. 25 Inai Baraba, heatu bona alaia dainai dibura ruma dekenai ia noho tauna, be ia siaia murimuri dekenai, idia edia noinoi hegeregerena. To Iesu be ia henia idia dekenai, edia ura do idia karaia.
Iesu idia hasatauroa
26 Idia ese Iesu idia hakaua murimuri dekenai, vadaeni Simona, Kurene tauna ta, gunika dekena amo ia mai neganai idia dogoatao, satauro be iena pagana dekenai idia atoa, Iesu ena murinai do ia huaia.
27 Taunimanima momo herea be Iesu ena murinai idia raka, bona hahine haida idia raka lao neganai, idia taitai noho. 28 Vadaeni Iesu ese iena vairana ia giroa, idia dekenai ia hereva, ia gwau, “Ierusalema hahine e, lau dekenai do umui taitai lasi, to umui sibona dekenai umui taitai, bona emui natuna dekenai do umui taitai. 29 Badina be negana do ia mai, taunimanima do idia gwau, natuna lasi hahine bona natuna maragi havaraia diba lasi hahine be idia namo! 30 Unai neganai ororo badadia dekenai do idia hereva henia, do idia gwau, ‘Aiemai latanai umui moru!’ bona ororo maragidia dekenai do idia hamaoroa, do idia gwau, ‘Ai do umui hunia!’ 31 Badina bema au be mai mauri danu neganai inai bamona kara idia karaia, be au mai kakoro danu neganai be edena bamona do idia karaia?”
32 Dika karaia taudia rua be Iesu danu idia hakaua murimuri dekenai, do idia hasatauroa nega tamona. 33 Gabu ta dekenai idia ginidae, ena ladana be Kwara Koukouna. Unuseni Iesu idia hasatauroa. Inai dika karaia taudia danu, ta Iesu ena idiba kahana dekenai, ma ta ena lauri kahana dekenai, idia hasatauroa. 34 Vadaeni Iesu ia guriguri, ia gwau, “Egu Tamana e, inai taudia edia dika mani oi gwauatao, badina idia diba lasi dekenai inai bamona idia karaia noho.”
Vadaeni iena dabua idia haria karaia, laki gadara dekena amo edia ahuna ta ta idia abia. 35 Hanua taudia be idia gini, Iesu idia itaia noho. Bona hanua lohia taudia ese idia kirikirilaia ia dekenai, idia gwau, “Ia be idau taudia ia hamauria, bema ia be Dirava ena Keriso, Dirava ena abia hidi tauna, ia be sibona do ia hamauria!”
36 Tuari taudia ese Iesu idia hevaseha henia, idia raka kahirakahira, uaina ena mamina ia namo lasi idia henia daekau ia dekenai, idia gwau, 37 “Bema inai be momokani oi be Iuda taudia edia king, oi sibona do oi hamauria be namo!”
38 Revareva ta danu idia torea, iena atai dekenai idia atoa, idia torea, “Iuda taudia edia King.”
39 Vadaeni ia danu idia hasatauroa tauna ta ese ia dekenai ia hevaseha, ia gwau, “Oi be Keriso, a? Oi sibona oi hamauria, bona ai danu oi hamauria!”
40 To iena turana ese ia gwau henia, ia gwau, “Dirava dekenai oi gari lasi, a? Oi be do oi mase, ia hegeregerena. 41 Gau tamona, ita ruaosi do ita mase iseda kara dika davana, to inai tau be mai ena kerere lasi.” 42 Vadaeni ia gwau, “Iesu e, oiemu Basileia do oi abia neganai, do oi laloa lau!”
43 Iesu ia gwau, “Momokani lau hamaoroa oi dekenai, hari dina ita ruaosi Paradaiso dekenai do ita ginidae.”
Iesu ia mase
44 Unai be dina tubua neganai, vadaeni unai nega dekena amo ia lao adorahi neganai, tano ibounai ia dibura. 45 Dibura ese dina ia koua, vadaeni Dubu Helaga ena iduara koua dabua helagana badana be huana dekena amo sibona ia darea kahana rua. 46 Vadaeni Iesu ia boiboi, ia gwau, “Egu Tamana e, egu lauma be oiemu imana dekenai lau atoa inai.” Unai bamona ia hereva, vadaeni ia mase.
47 Tuari biaguna ese unai kara ia itaia, vadaeni ia ese Dirava ia hanamoa, ia gwau, “Inai tau be kara maoromaoro tauna!”
48 Idia itaia noho taudia momo herea ese unai gaudia idia vara idia itaia, vadaeni lalohisihisi dainai, edia kemena idia botaia, bona hanua dekenai idia giroa lou. 49 Iesu ena turana, bona Galilea dekena amo iena murinai idia raka hahinedia be idau gabu dekenai idia gini, idia itaia noho.
Iesu idia guria
50 Kaunsolo tauna ta, ena ladana be Iosepa, kara maoromaoro tauna, ia noho. 51 Ia be kaunsolo edia hereva hebou dekenai bona edia kara dekenai ia vareai lasi. Ia be Iudea ena hanua ta, ena ladana be Arimatea, tauna. Ia danu Dirava ena Basileia ia naria noho. 52 Vadaeni ia lao Pilato dekenai, Iesu ena tauanina ia noia. 53 Vadaeni Iosepa ese Iesu ena tauanina ia abia diho, dabua aukana dekenai ia kumia, nadi gabuna idia geia ena matuna lalonai idia atoa. Unai nadi ena matuna be matamata, ena lalona dekenai tau ta idia do guria lasi. 54 Unai be Paraide, Sabati totona karaia hegaegae ena dina bona Sabati Dina be kahirakahira vadaeni.
55 Vadaeni Galilea dekena amo Iesu ena murinai idia raka hahinedia be Iosepa ena murinai idia lao, nadi ena matuna idia itaia, bona Iesu ena tauanina unuseni idia guria, be idia itaia danu. 56 Vadaeni idia giroa lao, muramura mai bonana, bona dahua muramurana idia abia hegaegae.
To Sabati neganai idia laga-ani, taravatu ena hereva hegeregerena.
Iesu ia toreisi lou
24
1 Pura ena dina ginigunana, hahine taudia be daba maragimaragi neganai guria gabuna dekenai idia lao, muramura mai bonana namo, idia abia hegaegae gaudia, be idia abia lao. 2 Vadaeni guria gabuna ena koua nadina be idau gabu dekenai ia noho, unuseni idia davaria. 3 Vadaeni nadi ena matuna dekenai idia raka vareai, to Lohiabada Iesu ena tauanina be idia davaria lasi. 4 Unai dainai idia laloa daradara. Vadaeni tatau rua idia edia badibadinai idia gini, mai dabua diaridiari danu. 5 Hahine idia gari, tano dekenai edia kwarana idia atoa diho. To unai tau ruaosi ese idia dekenai idia hereva henia, idia gwau, “Badina dahaka mauri tauna be mase gabuna dekenai umui tahua noho? 6 Ia be iniseni ia noho lasi, ia toreisi vadaeni. Galilea dekenai ia noho neganai, umui dekenai ia hamaoroa herevana be do umui laloa, 7 ia gwau, ‘Taunimanima ena Natuna be dika taudia ese iena mase dala do idia karaia, do idia hasatauroa, to dina ihatoina dekenai be do ia toreisi lou.’ ”
8 Vadaeni idia ese iena hereva idia laloa. 9 Vadaeni nadi ena matuna idia rakatania, idia giroa lou, unai gaudia ibounai be taudia 11, bona edia turana dekenai idia hamaoroa. 10 Hahine taudia be inai: Maria, Magadala hahinena, Ioana, Maria, Iamesi ena sinana, bona edia turana haida. Idia ese inai kara aposetolo taudia dekenai idia hamaoroa. 11 To edia hereva be gori ena mamina bamona, vadaeni idia abia dae lasi. 12 To Petero ia toreisi, ia heau lao, guria gabuna ena lalona ia itaia, dabua sibona ia noho. Vadaeni iena ruma dekenai ia giroa lou, idia vara gaudia dekenai ia hoa.
Iesu be Emausa dala dekenai ia hedinarai
13 Unai dina dekenai, tau rua be hanua maragina ta, ena ladana be Emausa, dekenai idia lao, Ierusalema bona unai hanua edia huanai be 12 kilomita hegeregerena. 14 Dala dekenai inai idia vara gaudia idia herevalaia idia sibona dekenai. 15 Vadaeni idia herevahereva neganai, Iesu be idia dekenai ia raka kahirakahira lao, idia danu ia raka hebou. 16 Tauna idia itaia, to idia diba lasi ia be Iesu. 17 Iesu ia gwau, “Umui be dala dekenai dahaka umui herevalaia?”
Vadaeni idia ruaosi idia gini, edia vairana be mai metau danu. 18 Vadaeni idia ta, ena ladana be Kleopa, ese ia haere henia, ia gwau, “Oi be Ierusalema dekenai sibona oi noho, unai dainai inai gaudia idia vara be oi diba lasi, a?”
19 Ia gwau, “Dahaka gau?”
Idia gwau, “Iesu, Nasareta tauna, ena sivarai. Ia be peroveta tauna, Dirava ena vairana dekenai, bona taunimanima ibounai edia vairana dekenai, iena kara bona iena hereva be mai siahu danu. 20 To dubu biagudia bona hanua lohia taudia ese iena mase dala idia karaia, idia hasatauroa. 21 To ai laloa bona ai gwau ia be Israela edia hamauria tauna. Dina toi idia ore vadaeni unai gaudia idia vara. 22 Harihari aiemai hahine haida edia hereva dekenai ai hoa. Idia be daba maragi guria gabuna dekenai idia lao. 23 To iena tauanina idia davaria lasi, vadaeni idia giroa mai, idia gwau aneru haida idia itaia, bona unai aneru ese idia hamaoroa idia dekenai, idia gwau ia be ia mauri lou vadaeni. 24 Bona aiemai turana haida danu guria gabuna dekenai idia lao, hahine edia hereva hegeregerena idia davaria, to Iesu be idia itaia lasi.”
25 Vadaeni Iesu ese idia ia gwau henia, ia gwau, “Kavakava taudia, emui lalona be dibura, peroveta taudia edia hereva umui abia dae lasi! 26 Ia maoro lasi a, Keriso ese unai bamona do ia hisihisi, bona iena hairaina do ia abia?” 27 Vadaeni Mose bona peroveta taudia edia buka dekenai, iena sivarai herevadia ibounai edia anina, be Iesu ese idia dekenai ia hadibaia.
28 Idia lao henia hanua be ia kahirakahira, vadaeni Iesu be ia raka hanaia gwauraia. 29 To idia ruaosi ese idia dogoatao, idia gwau, “Do ita noho, badina be ia adorahi vadaeni, dina be kahirakahira do ia diho.” Vadaeni idia danu ruma dekenai idia daekau. 30 Idia toiosi aniani gabuna dekenai idia helai diho, vadaeni Iesu ese paraoa ia abia, ia hanamoa, ia makohia, idia ruaosi dekenai ia henia. 31 Vadaeni edia matana idia kehoa, idia diba ia. Vadaeni edia vairana dekena amo ia boio. 32 Vadaeni idia ruaosi sibona idia herevahereva, idia gwau, “Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?”
33 Vadaeni idia toreisi, Ierusalema dekenai idia giroa lou, taudia 11 mai edia turana danu idia hebou noho neganai idia davaria. 34 Idia ese idia ruaosi dekenai idia hamaoroa, idia gwau, “Momokani, Lohiabada be ia toreisi vadaeni! Simona ese ia itaia vadaeni!”
35 Vadaeni idia ruaosi ese dala dekenai idia vara gaudia idia hamaoroa idia dekenai, bona paraoa ia makohia neganai edia lalona idia kehoa herevana danu.
Iesu be idia edia huanai ia hedinarai lou
36 Idia hereva noho neganai, Iesu be edia huanai ia gini, ia gwau, “Maino umui abia.”
37 Idia be edia kudouna dekenai idia hoa, idia gari dikadika, idia laloa ia be lauma ta. 38 To Iesu ia gwau, “Badina dahaka umui emui kudouna idia hoa? Badina dahaka umui laloa daradara? 39 Egu imana bona egu aena umui itaia, lau inai. Egu kopina dekenai do umui dogoatao, vadaeni do umui diba, badina be lauma be tauanina lasi bona turiana lasi, inai lau umui itaia hegeregerena.”
40 Inai bamona ia hereva, vadaeni iena imana bona ena aena ia hedinaraia idia dekenai. 41 To idia moale bona idia hoa dainai, do idia laloa daradara noho. Vadaeni Iesu ese ia nanadaia idia dekenai, ia gwau, “Emui aniani sisina ia noho, o?” 42 Idia ese gwarume sisina, idia gabua gauna, idia henia. 43 Vadaeni ia ese ia abia, edia vairana dekenai ia ania.
44 Ia ese ia hereva henia idia dekenai, ia gwau, “Ita noho hebou neganai umui lau hamaoroa, Mose bona peroveta taudia edia Buka dekenai, bona Salamo Buka dekenai, lauegu sivarai idia torea herevadia ibounai, be do idia momokani.”
45 Vadaeni ia ese Buka Helaga ena anina ia hadibaia idia dekenai, ela bona edia lalona idia kehoa. 46 Ma ia hamaoroa idia dekenai, ia gwau, “Inai bamona ia torea vadaeni: Keriso ese unai bamona hisihisi do ia abia, bona dina toi murinai mase dekena amo do ia toreisi lou. 47 Vadaeni Keriso ena ladana dainai, lalona giroa bona dika gwauatao do idia harorolaia gabu ibounai dekenai. Ierusalema dekenai inai gaukara do umui hamatamaia, ia lao bona tanobada besedia ibounai dekenai do idia harorolaia. 48 Umui ese inai gaudia ibounai emui matana dekenai umui itaia vadaeni, unai dainai do umui gwauraia hedinarai. 49 Bona Harihari Gauna, egu Tamana ese umui dekenai ia gwauhamata do ia henia, be lau ese emui latanai do lau siaia diho. Umui be Ierusalema dekenai do umui noho, ia lao bona ataiai dekena amo do ia diho siahuna do umui abia.”
Iesu guba dekenai ia abia daekau
50 Vadaeni Iesu ese idia ia hakaua murimuri dekenai, ela bona Betania idia kahirakahira vadaeni. Vadaeni iena imana ia abia isi, ia hanamoa idia dekenai. 51 Idia dekenai ia hanamoa noho neganai, ia be idia dekena amo ia abia siri, ia abia daekau guba dekenai. 52 Idia ese idia tomadiho henia ia dekenai, vadaeni mai moale danu Ierusalema dekenai idia giroa lou. 53 Vadaeni Dubu Helaga dekenai idia giroa lou, bona unuseni nega ibounai Dirava idia hanamoa.
SIVARAI NAMONA
IOANE
IA TOREA
Mauri ena Hereva ese gau ibounai ia havaraia
1
1 Matamaia neganai Hereva ia noho. Hereva be Dirava danu ia noho, bona unai Hereva be Dirava. 2 Hereva be matamaia neganai Dirava danu ia noho. 3 Gau ibounai be Dirava ese ia karaia inai Hereva dekena amo. Gau ta be idau dala dekenai ia vara lasi, badina idia karaia gaudia ibounai be unai Hereva ese ia karaia. 4 Mauri be Hereva ena lalona dekenai ia noho, bona unai mauri ese diari ia mailaia taunimanima dekenai. 5 Diari be dibura lalonai ia hedinaraia, bona dibura ese ia habodoa diba lasi.
6 Tau ta ia vara, Dirava ese ia siaia, iena ladana be Ioane. 7 Ia be hereva momokani do ia gwauraia, bona Diari do ia hedinaraia totona ia mai, taunimanima ibounai ese iena hereva do idia kamonai, bona Diari do idia abidadama henia totona. 8 Ia be unai Diari lasi, to Diari herevalaia totona ia mai. 9 Inai be Diari momokani, taunimanima ibounai hadiaria totona ia mai tanobada dekenai.
10 Hereva be tanobada dekenai ia noho, bona inai Hereva dekena amo Dirava ese tanobada ia karaia. To tanobada be ia diba lasi ia. 11 Iena tano korikori dekenai ia mai, to iena bese taudia ese idia abia dae lasi ia. 12 To taunimanima haida ese ia dekenai idia abidadama henia. Vadaeni inai ia dekenai idia abia dae taudia dekenai siahu ia henia, idia be Dirava ena natudia idia lao totona. 13 Dirava ena natuna idia vara, be headava ena kara dekena amo idia vara bamona lasi, idia be tanobada tamana dekena amo idia vara lasi. Dirava sibona be idia edia Tamana.
14 Inai Hereva be taunimanima ena tauanina dekenai ia halaoa, bona iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona. Bogahisihisi kara bona hereva momokani dekenai ia honu momokani.
15 Ioane ese inai Hereva ia herevalaia, ia boiboi, ia gwau, “Lau herevalaia tauna be inai, lau gwau, ‘Lauegu murina dekenai do ia mai tauna be ia bada, to lau be maragi. Badina lau be do lau vara lasi neganai, ia be guna ia noho vadaeni.’ ”
16 Inai Hereva ese iena bogahisihisi dekena amo, ita ibounai ia hanamoa vadaeni. Ia ese hariharibada, bona ma hariharibada ia henia vadaeni ita dekenai. 17 Badina be Dirava ese Mose dekena amo taravatu ia henia, to hariharibada bona kara momokani be Iesu Keriso ese ia mailaia vadaeni. 18 Matamaia neganai ia mai bona harihari tau ta ese Dirava ia itaia lasi. To iena Natuna tamona sibona, Tamana dekenai momokani ia noho Tauna, ia ese Dirava ena toana ita dekenai ia hedinaraia vadaeni.
Ioane Bapatiso ia haroro
19 Iuda taudia ese hahelagaia taudia bona Levi orea taudia haida Ierusalema dekena amo idia siaia, Ioane do idia nanadaia totona. Idia nanadaia, idia gwau, “Oi be daika?”
20 Vadaeni Ioane ese hereva ia hunia lasi, ia haere momokani, ia gwau, “Lau be Keriso lasi.”
21 Ma idia nanadaia, idia gwau, “Sedira, oi be Elia, a?”
Ia gwau, “Lau be Elia lasi.”
Ma idia gwau, “Ai naria noho Peroveta Tauna be oi, a?”
Ia haere, ia gwau, “Lasi.”
22 Vadaeni idia ese idia nanadaia lou, idia gwau, “Oi be daika? Oiemu haere be ai idia siaia mai taudia dekenai do ai hamaoroa. Oi sibona oiemu sivarai be mani oi gwauraia.”
23 Vadaeni Ioane ese sibona ena sivarai ia gwauraia, ia gwau, “Lau be,
Gado ta taunimanima idia noho lasi tano dekenai ia boiboi noho, ia gwau:
Lohiabada ena dala umui karaia hegaegae.”
Inai be Isaia, peroveta tauna, ena hereva hegeregerena.
24 Inai Farisea idia siaidia taudia ese ma idia nanadaia lou. 25 Idia gwau, “Bema oi be Keriso lasi, Elia lasi, bona unai ai naria noho Peroveta Tauna lasi, badina dahaka bapatiso oi karaia noho?”
26 Ioane ia haere, ia gwau, “Lau be ranu dekenai bapatiso lau henia, to umui emui huanai, umui diba lasi tauna ta ia gini noho. 27 Ia be lauegu murinai do ia mai, bona lau be hegeregere lasi iena tamaka varona do lau ruhaia.”
28 Inai kara be Betania, Ioridane Sinavai unai kahana dekenai ia vara. Ioane be unuseni ia bapatiso karaia.
Iesu be Dirava ena Mamoe Natuna
29 Kerukeru dabai Ioane ese Iesu ia itaia, ia dekenai ia raka mai, vadaeni ia gwau, “Itaia, Dirava ena Mamoe Natuna ia mai inai, ia be tanobada ena dika kokia tauna. 30 Guna lau gwauraia tauna be inai. Lau gwau, ‘Tau ta be lauegu murinai do ia mai, lau be maragi, to ia be bada, badina lau do lau vara lasi neganai, ia be ia mauri noho.’ 31 Lau be lau diba lasi ia, to inai tau Israela dekenai do ia hedinaraia totona, taunimanima lau bapatiso henidia ranu dekenai.”
32 Ioane ese iena hereva ma ia gwauraia hedinarai, ia gwau, “Lauma Helaga lau itaia vadaeni, guba dekena amo ia diho, pune manu bamona, ia latanai ia kamokau. 33 Lau be lau diba lasi ia, to Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona iena latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ ” 34 Ma Ioane ia gwau, “Lau ese lau itaia vadaeni, bona umui dekenai lau gwauraia hedinaraia inai, ia be Dirava ena Natuna.”
Ioane ena diba tahua taudia Iesu ena murinai idia raka
35 Kerukeru dabai Ioane mai ena diba tahua taudia rua danu unuseni idia gini lou. 36 Iesu ia raka hanaia neganai idia itaia, vadaeni Ioane ia gwau, “Umui itaia, Dirava ena Mamoe Natuna be inai.”
37 Inai diba tahua taudia ruaosi ese iena hereva idia kamonai, vadaeni Iesu ena murinai idia lao. 38 Iesu ese iena vairana ia giroa, iena murinai idia raka taudia ruaosi ia itaia, vadaeni idia ia nanadaia, ia gwau, “Dahaka umui tahua?”
Idia haere, idia gwau, “Rabi e, oi be edeseni oi noho?” Rabi ena anina be “Hadibaia Tauna.”
39 Ia gwau, “Umui mai itaia.” Vadaeni idia lao, iena noho gabuna idia itaia, bona unai dina ia dekenai idia noho. Unai nega be adorahi, 4 okaloka bamona.
40 Unai tau ruaosi, Ioane ena hereva dainai, Iesu ena murinai idia raka lao, edia tau ta be Andrea. Ia be Simona Petero ena tadina. 41 Andrea ese karaharaga iena kakana korikori Simona ia davaria, vadaeni ia hamaoroa, ia gwau, “Ai be Mesia ai davaria vadaeni.” Mesia ena anina be Keriso. 42 Vadaeni ia ese Simona ia hakaua lao Iesu dekenai.
Iesu ese ia itaia, vadaeni ia gwau, “Oi be Simona, Iona ena natuna. To oiemu ladana be do idia gwauraia Kepa.” Kepa be Petero hegeregerena, anina be “nadi.”
Filipo bona Natanaela be Iesu ena murinai idia raka
43 Kerukeru dabai, Iesu ia ura Galilea dekenai ia lao gwauraia, vadaeni Filipo ia davaria, ia dekenai ia hereva, ia gwau, “Lauegu murinai oi raka mai.” 44 Filipo be Betesaida tauna, Andrea bona Petero edia hanua tauna. 45 Filipo ia lao, Natanaela ia davaria, ia hamaoroa, ia gwau, “Mose ena taravatu lalonai bona peroveta taudia edia buka lalonai idia herevalaia tauna ai davaria vadaeni. Ia be Iesu, Nasareta tauna, Iosepa ena natuna.”
46 Natanaela ia gwau, “Nasareta dekena amo gau namona ta do ia mai diba, a?”
Filipo ia gwau, “Oi mai itaia.”
47 Iesu ese Natanaela ia itaia, ia dekenai ia mai noho, vadaeni ia herevalaia, ia gwau, “Israela tauna korikori be inai, ia be koikoi diba lasi momokani tauna!”
48 Natanaela ese ia dekenai ia hereva, ia gwau, “Edena bamona oi diba lau?”
Iesu ia haere, ia gwau, “Filipo ese oi do ia boiria lasi, fig au henunai oi noho neganai, lau itaia oi.”
49 Natanaela ia haere, ia gwau, “Rabi e, oi be Dirava ena Natuna, oi be Israela ena King!”
50 Iesu ma ia hereva ia dekenai, ia gwau, “Oi lau hamaoroa vadaeni, lau gwau, ‘Fig au henunai oi lau itaia,’ dainai lau oi abidadama henia, a? Inai kara idia hereaia karadia be do oi itaia.” 51 Ma idia ia hamaoroa, ia gwau, “Momokani umui lau hamaoroa, guba do umui itaia, do ia kehoa, bona Dirava ena aneru do umui itaia, Taunimanima ena Natuna ena latanai do idia daekau, do idia diho.”
Iesu ena hoa kara ginigunana
2
1 Dina rua murinai headava aria ta idia karaia Kana, Galilea ena hanua ta dekenai. Iesu ena sinana danu unuseni ia lao. 2 Iesu, mai ena diba tahua taudia danu idia boiria, vadaeni inai headava aria dekenai idia hedinaraia. 3 Uaina ibounai ia ore neganai, Iesu ena sinana ese Iesu dekenai ia hereva, ia gwau, “Edia uaina ia ore vadaeni.”
4 To Iesu ia haere henia, ia gwau, “Hahine e, lau dekenai be dahaka oi karaia? Lauegu nega be dohore.”
5 Vadaeni iena sinana ese hesiai gaukara taudia dekenai ia hamaoroa, ia gwau, “Umui dekenai ia hamaoroa gauna be do umui karaia.”
6 Unuseni be daramu 6 idia helai noho, Iuda taudia edia huria gaukara karaia totona, idia ta ta edia anina be hegeregere lita 100 mai kahana bamona. 7 Iesu ia hereva hesiai gaukara taudia dekenai, ia gwau, “Daramu be ranu dekenai umui hahonua.” Vadaeni idia hahonua momokani. 8 Ma idia ia hamaoroa, ia gwau, “Harihari ranu haida umui bubua, bona do umui abia lao aria biaguna dekenai.” Vadaeni idia ese idia abia lao. 9 Aria biaguna ese uaina dekenai ia halaoa ranuna ia inua, to ia be ia diba lasi edeseni dekena amo ia mai, ranu idia bubua taudia sibona idia diba. Vadaeni aria biaguna ese headava tauna ia boiria, ia hereva henia, ia gwau, 10 “Taunimanima ibounai ese uaina namo herea idia atoa diho guna, vadaeni vadivadi taudia ese momo idia inua murinai, be uaina sisina ia namo idia atoa diho. To oi be uaina namo herea oi dogoatao vadaeni, ia mai bona harihari!”
11 Iesu ese inai hoa kara ginigunana ia karaia Kana hanua, Galilea kahana dekenai. Unuseni iena siahu ia hedinaraia, bona iena diba tahua taudia idia abidadama henia ia dekenai.
12 Unai murinai, Iesu mai ena sinana danu, bona iena tadina bona iena diba tahua taudia danu, idia diho lao Kaperanauma dekenai, unuseni dina momo lasi idia noho.
Iesu ese hoihoi taudia Dubu Helaga dekena amo ia lulua
13 Iuda taudia edia Pasova aria dinana ia kahirakahira neganai, Iesu be Ierusalema dekenai ia daekau. 14 Dubu Helaga lalonai Iesu ese boromakau bona mamoe bona pune manu idia hoihoilaia taudia ia itaia. Moni idia senisia taudia danu ia itaia, idia helai noho edia pata dekenai. 15 Vadaeni varo dekena amo botaia gauna ia karaia, bona Dubu Helaga dekena amo ibounai ia luludia, mamoe bona boromakau danu. Moni idia senisia taudia danu edia moni ia bubua negea, bona edia pata ia bubua. 16 Vadaeni pune manu hoia taudia dekenai ia gwau henia, ia gwau, “Unai be umui kokia lao, egu Tamana ena Ruma be hoihoi Rumana dekenai umui halaoa lasi.” 17 Iena diba tahua taudia ese Buka Helaga ena hereva idia laloa, inai bamona ia torea, ia gwau: “Dirava e, oiemu Ruma lau lalokau henia bada, inai lalokau be egu lalona dekenai ia siahu, lahi bamona.”
18 Iuda taudia ese Iesu idia nanadaia, idia gwau, “Inai bamona oi karaia ena anina be dahaka? Dahaka hoa kara do oi hedinaraia ai dekenai, vadaeni do ai diba oi be mai emu siahu inai bamona kara do oi karaia diba?”
19 Iesu ia haere, ia gwau, “Inai Dubu Helaga do umui kokia, vadaeni lau ese dina toi lalonai do lau haginia lou.”
20 Iuda taudia idia gwau, “Inai Dubu Helaga be lagani 46 lalonai idia gaukara, haginia totona. To oi ese dina toi lalonai ma do oi haginia lou, oi gwau, a?”
21 To Iesu ia herevalaia Dubu Helaga gauna be iena tauanina. 22 Unai dainai, ia be mase dekena amo ia toreisi lou neganai, iena diba tahua taudia ese unai Iesu ena hereva idia laloa lou. Vadaeni idia ese Buka Helaga bona Iesu ena hereva danu idia hamomokania.
Iesu ese taunimanima ibounai edia laloa ia diba
23 Iesu be Pasova aria ena nega Ierusalema dekenai ia noho neganai, taunimanima momo ese ia dekenai idia abidadama henia, ia ese ia karaia hoa karadia idia itaia dainai. 24 To Iesu ese inai taunimanima dekenai ia abidadama henia lasi, badina be ia ese taunimanima ibounai edia laloa ia diba. 25 Bona tau ta ese taunimanima edia kara Iesu dekenai ia hamaoroa gwauraia be anina lasi, badina taunimanima edia laloa, be ia diba momokani vadaeni.
Text info
hmo