Awêtuc kêkêŋ da
21
(Mar 12:41-44)
1 Jesu gêôc mataanô sa ma gêlic lau tolêlôm sêkêŋ nêŋ da kêsêp Anôtônê kanom
2 e gêlic awêtuc ŋalêlôm sawa teŋ kêkêŋ mone sauŋanô luagêc kêsêp.
3 Go kêsôm gebe “Biŋŋanô, aê jasôm êndêŋ amac gebe Awêtuc ŋalêlôm sawa tônê kêkêŋ kêlêlêc êsêac samob su,
4 gebe lau samob tônê sêkôc aŋga nêŋ gêŋ kêlêsuc êsêacŋa sa mêŋsêkêŋ kêtu da. Ma eŋ kêpô lêna ŋanô, mago kêkêŋ nê gêŋ tonê mo samobgeŋ kêsêp gêja.”
Jesu kêsôm biŋ kêpi senseŋ lôm dabuŋ suŋa
(Mat 24:1-2; Mar 13:1-2)
5 Lau ŋagêdô sêsôm biŋ kêpi lôm dabuŋ gebe sêjam gêlôŋ ŋa poc ŋajam to ŋa awalauŋ, taŋ sêkêŋ kêtu daŋa. Tec Jesu kêsôm gebe
6 “Têm oc mêŋêsa, go gêŋ tê alic nê, ŋapoc teŋ oc êŋgôŋ poc teŋ ŋaô aŋga tonec atom, têta samob saliŋ-saliŋ.”
Gêŋwapac ênac m tau
(Mat 24:3-14; Mar 13:3-13)
7 Ma êsêac têtu kênac Jesu gebe “Mêtêmôkê, êndêŋ ondoc biŋ tonec mêŋêsa ma asageŋ oc êtu gêŋ tonaŋ ŋai ŋanô êsaŋa ŋabelo.”
8 Ma Jesu kêsôm gebe “Alic taôm gebe sênam amac ôkwi atom, gebe lau gwalêkiŋ oc sênam aê laŋôc sêmêŋ ma sêsam tauŋ gebe ‘Aê eŋ.’ Ma sêsôm gebe ‘Ŋanoc kêdabiŋgac.’ Mago andaŋguc êsêac atom.
9 Ma embe aŋô siŋ to lau sêli tauŋ sa ŋawae, naŋ atakê atom, gebe gêŋ samob tonaŋ mêŋêsa êmuŋ, mago noc nom ŋatêku êsuŋa oc êsa sebeŋ atom.”
10 Go kêsôm gêdêŋ êsêac gebe “Laum teŋ sêndi sênac siŋ êndêŋ laum teŋ, ma gamêŋ teŋ êndêŋ gamêŋ teŋ.
11 Ôjô oc ênam kapôêŋ-kapôêŋ ma tôbôm to gêmac sec êsa êtôm gamêŋgeŋ ma gêŋsêga têtakê ŋamalacŋa to gêŋtalô kapôêŋ aŋga undambê oc mêŋsêsa.
12 Gêŋ tonaŋ ŋai samob êsa atomgeŋ ma sêu lemeŋ êpi amac ma sêjanda amac to sêkêŋ amac asô lôm malacŋa to andu kapoacwalôŋa ma sêwê amac akô kiŋ to gôliŋwaga laŋôŋnêm êtu aêŋoc ŋaêŋa.
13 Ŋasawa tonaŋ amacnêm noc awa Anôtônê mêtê saŋa.
14 Taêm ênam êtu tôŋ gebe amansaŋ biŋ ajô êsêac aweŋŋa kwanaŋ-kwanaŋ atom,
15 gebe aê jansuŋ biŋ to kauc êndêŋ amac êwac ma nêm ŋacjo samob sêkŋ auc to senseŋ nêm biŋ nê sêŋgôm êtôm atom.
16 Tenemi to tamemi, ma tewemi to lasimi, ma nêm tawaŋ to nêm lau ŋagêdô oc sêkêŋ amac nasênac amacnêm ŋagêdô êndu,
17 ma lau samob têntac endec amac êtu ŋoc ŋaêŋa.
18 Mago môkêmlauŋ tageŋ oc ênaŋa aŋga môkêmapac atom.
19 Apuc taôm tôŋ ma atap aŋgôŋ matem jali sa.
Jesu kêsôm biŋ kêpi senseŋ Jerusalem suŋa
(Mat 24:15-21; Mar 13:14-19)
20 “Amac embe alic siŋwaga topomtopom sêwa Jerusalem auc, naŋ ajala êndêŋ tonaŋ gebe kêdabiŋ gebe malac tau oc êtu gasaŋ.
21 Êndêŋ tonaŋ lau, taŋ sêŋgôŋ Judaia naŋ, sêc sêpi lôc sêna, ma êsêac taŋ sêmoa malaclêlôm tau naŋ, sêc sêsa sêna, ma êsêac taŋ sêmoa malacmagê naŋ, sêsô malac sêna atom,
22 gebe ‘bêc Anôtô êkêŋ ŋagêjôŋa tau tônê,’ gebe biŋ samob, taŋ teto gêc naŋ, ŋanô êsa.
23 Ojae lauo, taŋ sêmoa teŋ to ônaŋ sêkêŋ su ŋapalê sêmoa naŋmêŋ, gebe gêŋwapac ŋanô êtap gamêŋ tonaŋ sa ma Anôtônê têtac ŋandaŋ êtap laum tonaŋ sa.
24 Oc sênac êsêac ŋa siŋ ma sêkôc êsêac tôŋ sêwê êsêac nasêsêp tenteŋlatu samob ŋalêlôm. Ma lau samuc sêka Jerusalem popoc sêmoa e lau samuc nêŋ noc ênac pep.
Ŋamalacnê Latu êmu êmêŋ
(Mat 24:29-31; Mar 13:24-27)
25 “Oc to ajôŋ ma utitalata kaiŋteŋkaiŋteŋ êsa ma gwêc ŋadembom êŋgasim ŋakicsêa e ŋamalac samob, taŋ sêmoa nom naŋ, nêŋ meloco êsa ma nêŋ ŋalêlôm ŋatutuc ŋanô.
26 Ŋamalac têtêc tauŋ to gêŋ, taŋ mêŋêsa aŋga nom naŋ, ŋawêc êŋgôm ŋamalac mateŋ êIô gebe gêŋ ŋaclai undambêŋa kôtêŋ-kôtêŋgeŋ.
27 Ma êndêŋ tonaŋ oc sêlic Ŋamalacnê Latu toŋaclai ma toŋawasi ŋanô êŋgôŋ tao teŋ ŋalêlôm êmêŋ.
28 Ma gêŋ tonaŋ embe êndambiŋ gebe ŋanô êsa, naŋ matem teŋteŋgeŋ to aôc laŋôm sa, gebe bêc Anôtô ênam amac kêsiŋa kêdabiŋ.”
Kaleloŋ êkêŋ puc aêac
(Mat 24:32-35; Mar 13:28-31)
29 Ma Jesu kêsôm biŋgôliŋ teŋ gêdêŋ êsêac gebe “Alic kaleloŋ to ka ŋagêdô samob.
30 Embe alic êlêc, go taôm ajala gebe ockêsa kêdabiŋgac.
31 Amac amboac tonaŋ. Êndêŋ taŋ alic gêŋ samob tonaŋ mêŋêsa naŋ, amac ajala gebe Anôtônê gamêŋ kêdabiŋ.
32 Biŋŋanô, aê jasôm êndêŋ amac gebe Gôlôac tonec oc sênaŋa atom e gêŋ tonaŋ ŋai samob ŋanô êsa acgom.
33 Undambê to nom ênaŋa ma aêŋoc biŋ oc ênaŋa atom.
Tanam jali
34 “Ajop taôm gebe gêŋ êjaŋiŋ amac to anôm gêŋ anaboa ma apô sim taôm êtu gêŋ nomŋa êkôniŋ nêm ŋalêlôm tôŋ atom, gebe bêc tonaŋ êtap amac sa sep tageŋ
35 êtôm lip gêjac gwada nec atom. Bêc tonaŋ oc êtap lau samob, taŋ sêŋgôŋ nom auc naŋ sa.
36 Amboac tonaŋ anam jali to ateŋ mec ŋapaŋ gebe êpuc amac tôŋ ma awê gêŋ samob, taŋ oc êmêŋ naŋ sa ma naêkô Ŋamalacnê Latu laŋônêm.”
37 Gêdêŋ bêc, taŋ Jesu kêdôŋ lau aŋga lôm dabuŋ naŋ, ŋagêbêc eŋ kêsa jagêmoa lôc, taŋ sêsam sebe Lôckatêkwi naŋ.
38 Ma ŋabêbêc lau samob dêdêŋ eŋ sebe sêŋô ênê biŋ aŋga lôm dabuŋ.
Judanêŋ laumata sêkêc Jesunê biŋ
22
(Mat 26:1-5, 14-16; Mar 14:1-2, 10-11; Joaŋ 11:45-53)
1 Om Polom Ŋalucŋa, taŋ sêsam gebe Pasa naŋ, kêdabiŋ
2 ma lau dabuŋsêga to biŋsutau sêgôm mocsac sebe senseŋ Jesu suŋa elêmê, gebe têtêc lau.
3 Ma Sadaŋ kêsêp Juda, taŋ sêsam eŋ sebe Isariot ma gêmoa gêwiŋ êsêac 12 naŋ, nê ŋalêlôm gêja.
4 Ma eŋ gêdêŋ lau dabuŋsêga to siŋwaga lôm dabuŋŋa nêŋ laumata jakêmasaŋ lêŋ eoc Jesu lasê êndêŋ êsêacŋa.
5 Tec êsêac têntac ŋajam kêsa ma sêsôm kêtu tôŋ gebe sêkêŋ mone êndêŋ eŋ.
6 Ŋac tau gêlôc gebe êŋgôm, tec gêdib gebe êtap ŋasawa ŋajam teŋ sa naŋ lau sêkac tauŋ su aŋga ênê acgom, go eoc eŋ lasê êndêŋ êsêac.
Sêmansaŋ moasiŋ Pasaŋa
(Mat 26:17-25; Mar 14:12-21; Joaŋ 13:21-30)
7 Polom ŋaluc ŋabêc sêmbuc domba Pasaŋa mêŋkêsa.
8 Ma Jesu kêsakiŋ Petere agêc Joaŋ ma kêsôm gebe “Agêc naamansaŋ aêacnêŋ moasiŋ Pasaŋa gebe taniŋ.”
9 Tec êsêagêc sêsôm gêdêŋ eŋ gebe “Aôm gobe aêagêc amansaŋ aŋga ondoc.”
10 Tec eŋ kêsôm gêdêŋ êsêagêc gebe “Alic acgom, agêc embe asô malac ana, oc andac ŋac teŋ eŋgeŋ ku buŋa. Andaŋguc eŋ asô andu tau, taŋ eŋ êsô êna naŋ.
11 Go asôm êndêŋ andu ŋatau gebe ‘Mêtêmôkê kêtu kênac aôm gebe Balêm ŋacleŋŋa, taŋ aê to ŋoc ŋacseŋomi aniŋ Pasa amoaŋa naŋ, gêc ondoc.’
12 Ma eŋ oc êtôc gamêŋ ŋalêlôm kapôêŋ teŋ êndêŋ amagêc, taŋ gêc ŋadeŋ ŋaôŋa, sêpô adêŋ kwanaŋgeŋ naŋ, go amansaŋ gêŋ aŋga tonaŋ.”
13 Agêc sêja ma têtap sa kêtôm Jesu kêsôm gêdêŋ êsêagêc ma sêmasaŋ Pasa.
Biŋ moasiŋ dabuŋŋa
(Mat 26:26-30; Mar 14:22-26; 1Kor 11:23-25)
14 Noc mêŋkêsa, tec Jesu jagêŋgôŋ sic ma aposolo jasêwiŋ eŋ.
15 Go kêsôm gêdêŋ êsêac gebe “Ŋoc ŋalêlôm taêc gêjam gedeŋ tôŋgeŋ gebe janiŋ Pasa tonec jawiŋ amac êmuŋ acgom, go jaôc ŋandaŋ.
16 Aê jasôm êndêŋ amac gebe Oc janiŋ êtiam atom jamoa e janiŋ toŋanôgeŋ aŋga Anôtônê gamêŋ.”
17 Go kêkôc laclu gêjam daŋge ma kêsôm gebe “Akôc êwac ma anac sam êndêŋ taôm.
18 Ma aê jasôm êndêŋ amac gebe Galoc janôm wain ŋanô êtiam atom e Anôtônê gamêŋ mêŋêsa acgom.”
19 Go kêkôc polom mêŋgêjam daŋge su, ma kêpô kêkôc jakêkêŋ gêdêŋ êsêac ma kêsôm gebe “Aêŋoc ôlic, taŋ kakêŋ gêjô amacŋa naŋ tonaŋ. Aŋgôm amboac tonaŋ ec taêm ênam aêgeŋ.”
20 Seŋ su, go kêkôc laclu amboac tonaŋ ma kêsôm gebe “Laclu tonaŋ kêtu aêŋoc dec jamoatiŋ poac wakucŋa tau, taŋ kêkêc siŋ kêtu amacŋa.
21 “Alic acgom, ŋac taŋ gebe eoc aê lasê naŋ, lêma gêsac tebo gêwiŋ aêŋoc.
22 Ŋamalacnê Latu tec oc êsa nê lêŋ êna êtôm Anôtô kêmasaŋ, tageŋ ojae ŋac, taŋ eoc eŋ lasê naŋma.”
23 Ma êsêac têtu kênac tauŋ gebe êsêacnêŋ asa oc êŋgôm gêŋ amboac tônê.
Asa lau têtu lau kapôêŋ
24 Ŋacseŋomi sêsôm tauŋ gebe nêŋ asa oc êtu ŋac kapôêŋ êlêlêc ŋagêdô su.
25 Tec Jesu kêsôm gêdêŋ êsêac gebe “Lau samuc nêŋ kiŋ sêkôniŋ nêŋ lau. Ma êsêac, taŋ sêjam gôliŋ lau toŋaclai naŋ, sêsam êsêac sebe ‘Moasiŋ ŋatau.’
26 Amac amboac tonaŋ atom. Mago amacnêm ŋacsêga naŋ êtôm ŋac sauŋ ma kasêga êtôm sakiŋwaga acgom, go ŋajam.
27 Ŋac ondoc kêlêlêc ondoc su. Ŋac taŋ gêŋgôŋ gebe êniŋ ŋêŋgeŋ naŋ, me ŋac taŋ gêjam sakiŋ gêŋ gêmoa naŋ. Ŋac taŋ gêŋgôŋ gebe êniŋ gêŋŋa naŋ. Aê tec gamoa amac ŋasawa nec, katôm sakiŋwaga.
28 “Amac lau tonaŋ asap aê tôŋ kêtôm ŋoc noc lêtômŋa ŋapaŋ.
29 Tamoc gêliŋ ŋagôliŋ su gêdêŋ aê, tec aê jaliŋ su êndêŋ amac.
30 Aniŋ to anôm gêŋ aŋga ŋoc tebo amoa ŋoc gamêŋ ma aŋgôŋ lêpôŋ ŋaô, gebe amêtôc Israelnêŋ gôlôac 12 nêŋ biŋ.
Jesu kêkêŋ puc gêdêŋ Petere
(Mat 26:31-35; Mar 14:27-31; Joaŋ 13:36-38)
31 “Simon, Simon, ôlic Sadaŋ gebe êkôc amac su, gebe ekoloŋ amac êtôm sekoloŋ lala sêjaliŋ ŋanô to ŋapa saŋa.
32 Ma aê tec kateŋ kêtu aômŋa gebe nêm kôkêŋ gêwiŋ ê su atom. Ma êndêŋ taŋ ônam taôm ôkwi su naŋ, ôpuc lasimi tôŋ.”
33 Tec Petere kêsôm gêdêŋ eŋ gebe “Apômtau, aê gajac ŋawae gabe jasêp kapoacwalô to jamac êndu jawiŋ aôm.”
34 Tec Jesu kêsôm gebe “Petere, aê jasôm êndêŋ aôm gebe Êmbêc tonec talec oc êtaŋ atomgeŋ, ma aôm ônsa aê auc êtu dim têlêac gebe gôjam kauc aê.”
Biŋ atali to siŋŋa
35 Go Jesu kêsôm gêdêŋ êsêac gebe “Gêdêŋ taŋ kasakiŋ amac aja akôc awa kêsêp ômbiŋkap ŋaatali ma abic atali to asô atapa atom naŋ, gêŋ teŋ gêjô amac me masi.” Ma êsêac sêjô eŋ awa gebe “Masianô, gêŋ teŋ gêjô aêac atom.”
36 Tec eŋ kêsôm gêdêŋ êsêac gebe “Mago galoc amboac teŋ. Ŋac taŋ nê awa to atali gêc naŋ, êkôc gêŋ tau. Ma ŋac taŋ kêkôc siŋ atom naŋ, êkêŋ nê ŋakwê êndêŋ lau sênam ôli ma êkôc ŋaawa naênam ôli siŋ teŋ.
37 Ma aê jasôm êndêŋ amac gebe Biŋ taŋ teto amboac tonec naŋ, oc êtu tôŋ êpi aê gebe ‘Sêsam eŋ gêwiŋ kêjaŋgowaga.’ Biŋ taŋ teto kêpi aê naŋ, oc ŋanô êsa.”
38 Ma êsêac sêsôm gebe “Apômtau, alic acgom, siŋ luagêc tec gêc.” Go eŋ kêsôm gêdêŋ êsêac gebe “Kêtôm su.”
Jesu keteŋ mec
(Mat 26:36-46; Mar 14:32-42)
39 Go Jesu kêsa gêja ma kêpi Lôckatêkwi amboac gêgôm-gêgôm gêmoa ma ŋacseŋomi têdaguc eŋ.
40 Sêô lasê gamêŋ tau acgom, go kêsôm gêdêŋ êsêac gebe “Ateŋ mecmaŋ, gebe lêtôm êtap amac sa atom.”
41 Go gêwi êsêac siŋ ma kêsu tau su kêsa gêja ŋasawa kêtôm têtuc poc naêsêpŋa, go kêpôŋ aduc ma keteŋ mec gebe
42 “O Tamoc, embe aôm têmtac teŋ, naŋ ôkôc laclu tonec su aŋga aêŋoc. Mago aêŋoc biŋ êtu tôŋ atom, aôm taôm nêm êtu tôŋ.” [
43 Go aŋela teŋ aŋga undambê mêŋgêôc tau lasê gêdêŋ eŋ ma kêpuc eŋ tôŋ.
44 Biŋ tonaŋ kêmônaŋ eŋ ŋanô e keteŋ mec ŋajaŋa. Ma nê waeŋ keseleŋ jatep-jatep amboac dec kêsêp nom.]
45 Keteŋ mec su ma gêdi gêdêŋ nê ŋacseŋomi gêja e gêlic biŋ gêjac êsêac êndu ma sêc bêc sêc.
46 Tec Jesu kêsôm gêdêŋ êsêac gebe “Amac aêc bêc kêtu asageŋŋa. Andi sa ma ateŋ mecmaŋ, gebe lêtôm êtap amac sa atom.”
Sêkôc Jesu tôŋ
(Mat 26:47-56; Mar 14:43-50; Joaŋ 18:3-11)
47 Jesu kêsôm biŋ tonaŋ gêmoa ma sêlic lau pom teŋ sêmêŋ, naŋ êsêac 12 nêŋ ŋac teŋ, ŋaê Juda, gêwê êsêac. Juda tau kêtu gasuc gêdêŋ Jesu gêja gebe êIêsôp eŋ alianô.
48 Tec Jesu kêsôm gêdêŋ eŋ gebe “Juda, aôm kôlêsôp Ŋamalacnê Latu gobe oc eŋ lasê me.”
49 Ma êsêac taŋ sêsap Jesu tôŋ sêmoa naŋ, sêlic gêŋ tonaŋ e sêsôm gebe “Apômtau, aêac oc anac êsêac ŋa siŋ me masi.”
50 Ma nêŋ ŋac teŋ gêjac dabuŋsêganê sakiŋwaga kêpa eŋ taŋalauŋ anôŋa su.
51 Tec Jesu kêsôm gêdêŋ êsêac gebe “Andec, agôm kêtôm.” Ma kêmoasac ênê taŋalauŋ e ŋajam kêsa.
52 Ma Jesu kêsôm gêdêŋ lau dabuŋsêga to siŋwaga lôm dabuŋŋa ma laumata, taŋ têtu oloŋ-oloŋgeŋ dêdêŋ eŋ sêja naŋ, gebe “Amac alic aê amboac kêjaŋgowaga teŋ me, tec aôc siŋ to olopoac adêŋ aê amêŋ.
53 Kêtôm bêcgeŋ gawiŋ amac gamoa lôm dabuŋ, mago êu lemem teŋ kêpi aê atom. Ma onec amac to ŋakesec ŋaŋaclai tau nêm nocgoc.”
Petere gêsa Jesu auc
(Mat 26:57-58, 69-75; Mar 14:53-54, 66-72; Joaŋ 18:12-18, 25-27)
54 Êsêac sêkôc Jesu tôŋ ma sêwê eŋ sêsô dabuŋsêganê andu sêja. Ma Petere gêjac tau susu kêdaguc.
55 Lau sêboa ja kêsa andu tau ŋamalacluŋ ma sêsêlu sêŋgôŋ. Tec Petere jakêsêp êsêac ŋasawa.
56 Ma sakiŋwagao teŋ gêlic ja kêpô Petere ma kêpuc mata tôŋ eŋ e kêsôm gebe “Ŋac tônê gêwiŋ Jesugoc.”
57 Ma Petere kêpa tau gebe “Awê, aê gajam kauc eŋ nec.”
58 Têlageŋ ma ŋac teŋ gêlic eŋ e kêsôm gebe “Êsêacnêŋ teŋ aôm amboac tonaŋ.” Mago Petere kêsôm gebe “Ŋac tau, aê atom.”
59 Ma kêtôm ockatu ŋasawa teŋ gêbacnê, go ŋac teŋ kêsôm ŋajaŋa gebe “Biŋŋanô, ŋac tônê gêwiŋ eŋ amboac tonaŋgoc, gebe eŋ ŋac Galilaiaŋa.”
60 Tec Petere kêsôm gebe “Ŋac tau, biŋ taŋ aôm kôsôm naŋ, aê gajam kauc.” Kêsôm biŋ tonaŋ gêmoa ma gaôgeŋ talec kêtaŋ.
61 Tec Apômtau kêkac tau ôkwi mêŋmata gê Petere e Petere taê gêjam Apômtaunê biŋ, taŋ kêsôm gêdêŋ eŋ gebe “Êmbêc tonec talec oc êtaŋ atomgeŋ ma aôm ônsa aê auc êtu dim têlêac.”
62 Tec kêsa gêja ma kêtaŋ ŋanô.
Lau sêsu Jesu susu to sêjac eŋ
(Mat 26:67-68; Mar 14:65)
63 Lau taŋ sêkôc Jesu tôŋ naŋ, sêsu eŋ susu to sêjac eŋ.
64 Êsêac sêkwa eŋ laŋôanô ŋa obo auc, go têtu kênac eŋ gebe “Ôsôm lasê gebe asa gêjac aôm.”
65 Ma sêsôm biŋ alôb-alôb ŋagêdô taêsam kêpi eŋ gêwiŋ.
Laumata sêkip Jesunê biŋ sa
(Mat 26:59-66; Mar 14:55-64; Joaŋ 18:19-24)
66 Geleŋmata ma launêŋ lau ŋanô to dabuŋsêga ma biŋsutau sêkac sa ma sêsôm sejoŋ Jesu sêja lau ŋanô sêkac sa ŋamala.
67 Go sêsôm gebe “Aôm embe Kilisi, naŋ ôsôm taôm lasê êndêŋ aêac.” Tec eŋ kêsôm gêdêŋ êsêac gebe “Aê embe jasôm êndêŋ amac, oc akêŋ êwiŋ atom.
68 Ma embe jatu kênac biŋ teŋ êndêŋ amac, oc ajô aê aoc atom.
69 Ma galoc tonec Ŋamalacnê Latu oc êŋgôŋ Anôtô ŋaniniŋ Ŋatau nê anôŋa.”
70 Ma lau samob sêsôm gêdêŋ eŋ gebe “Amboac tonaŋ Anôtônê Latu aôm me.” Tec eŋ kêsôm gêdêŋ êsêac gebe “Amac asôm gebe aê ênê Latu.”
71 Ma êsêac sêsôm gebe “Aêac tapô lêna biŋ ŋagêdô êtu ageŋŋa. Aêac tauŋ taŋô biŋ tau kêsa eŋ tau awa.”
Jesu kêkô Pilata laŋônêm
23
(Mat 27:1-2, 11-14; Mar 15:1-5; Joaŋ 18:28-38)
1 Lau samob, taŋ sêkac tauŋ sa sêmoa naŋ, dêdi jasejoŋ eŋ dêdêŋ Pilata sêja.
2 Go sêôc aweŋ sa ma sêgôliŋ biŋ kêpi eŋ ma sêsôm gebe “Ŋac tonec aêac alic eŋ gêli aêacma lau sa, ma kêkô lau auc gebe sêkêŋ takis êndêŋ kaisara atom to gê tau kêpi kiŋ Kilisi.”
3 Tec Pilata kêtu kênac Jesu gebe “Judanêŋ kiŋ aôm me masi.” Ma Jesu gêjô eŋ awa gebe “Kôsômgac.”
4 Go Pilata kêsôm gêdêŋ lau dabuŋsêga to lau ŋagêdô gebe “Aê galic ŋac tonec gêwê biŋ teŋ ŋakaiŋ atom.”
5 Mago êsêac sêsôm ŋajaŋa gebe “Eŋ gêli lau sa ma kêdôŋ kêtôm Judaia ŋagamêŋ samob. Gêjac m aŋga Galilaia e mêŋgêdêŋ tonec.”
Jesu kêkô Herodo laŋônêm
6 Pilata gêŋô biŋ tonaŋ ma kêtu kênac gebe “Ŋac tônê eŋ ŋac Galilaiaŋa me.”
7 E gêŋô gebe eŋ aŋga Herodonê gôliŋ ŋalêlôm, tec kêkêŋ eŋ gêdêŋ Herodo tau, taŋ gêdêŋ ŋasawa tonaŋ gêmoa Jerusalem naŋ gêja.
8 Herodo gêlic Jesu e têtac ŋajam samucgeŋ gebe gêŋô eŋ ŋawaegeŋ ma gebe êlic eŋ ŋanô elêmê ma taê gêjam gêwiŋ gebe Jesu êŋgôm nê gêŋsêga teŋ eŋ êlic acgom.
9 Tec kêtu kênac biŋ taêsam gêdêŋ eŋ. Mago Jesu gêjô eŋ awa teŋ atom.
10 Ma lau dabuŋsêga to biŋsutau, taŋ sêkô naŋ, sêguŋ biŋ ŋajaŋa kêpi eŋ.
11 Go Herodo to nê siŋwaga sêmajec eŋ to sêsu eŋ susu ma sêkêŋ ŋakwê kwalam-kwalam gêdêŋ eŋ kêsô, ma sêkêŋ eŋ gêdêŋ Pilata gêmu gêja kêtiam.
12 Gêdêŋ bêc tonaŋ Herodo agêc Pilata, taŋ gêmuŋgeŋ sêkêŋ kisa gêdêŋ tauŋ naŋ, sêwê tauŋ auc kêtiam.
Sêsôm kêtu tôŋ gebe Jesu êmac êndu
(Mat 27:15-26; Mar 15:6-15; Joaŋ 18:39–19:16)
13 Pilata kêkalem lau dabuŋsêga to kasêga ma lau ŋagêdô sa sêpi tageŋ,
14 go kêsôm gêdêŋ êsêac gebe “Ŋac tonec amac akôc eŋ adêŋ aê amêŋ kêtu gêli lau saŋa, mago aê katu Iêsu eŋ, amac taôm aŋô. Biŋ taŋ amac agôliŋ kêpi eŋ naŋ, aê katap ŋanô teŋ sa aŋga ênê atom.
15 Ma Herodo amboac tonaŋ, tec kêkêŋ eŋ gêdêŋ aêac gêmu gêmêŋ kêtiam. Alicgac me, eŋ gêgôm biŋ teŋ kêtôm gebe danseŋ eŋ suŋa nec atom.
16 Amboac tonaŋ jasôm si eŋgeŋ ma jaŋgamboac eŋ su.” [
17 Ŋagôliŋ teŋ gêc gebe Pilata êŋgamboac ŋac teŋ su êtôm omsêgageŋ êndêŋ êsêac.]
18 Tec lau samob sêmôêc guluŋgeŋ gebe “Eŋ ênaŋamaŋ, ma ôŋgamboac Baraba su êndêŋ aêac.”
19 Ŋac tonaŋ gêli lau sa aŋga malac e gêjac ŋamalac êndu, tec sêkêŋ eŋ gêŋgôŋ kapoacwalô.
20 Pilata taê gêjam gebe êŋgamboac Jesu su, tec kêmasaŋ biŋ gêdêŋ êsêac kêtiam.
21 Ma êsêac sêmôêc kêkô aucgeŋ gebe “Ônac eŋ êpi kakesotau, ônac eŋ êpi kakesotau.”
22 Go Pilata kêsôm gêdêŋ êsêac kêtu dim têlêac gebe “Ŋac tonec gêgôm sec amboac ondoc. Aê katap ênê biŋ danseŋ eŋ su ênaŋaŋa teŋ sa atom, tec gabe jai eŋgeŋ ma jaŋgamboac eŋ su.”
23 Ma êsêac sêkac eŋ sêmôêc kapôêŋ ma sêjatu gebe ênac eŋ êpi kakesotau êna.
24 Amboac tonaŋ Pilata kêsôm kêtu tôŋ gebe sêŋgôm nêŋ biŋ ŋanô êsa,
25 ma kêgaboac ŋac, taŋ gêŋgôŋ kapoacwalô kêtu gêli lau sa to gêjac ŋamalac ênduŋa naŋ, su kêtôm êsêac teteŋ, ma Jesu tec kêkêŋ eŋ gêja kêtôm êsêacnêŋ biŋ.
Sêjac Jesu kêpi kakesotau
(Mat 27:32-44; Mar 15:21-32; Joaŋ 19:17-27)
26 Êsêac sêkôc Jesu sêja e sêkam ŋac Kureneŋa teŋ tôŋ, ŋaê Simon, taŋ aŋga kôm gêmêŋ naŋ, ma sêu kakesotau gêsac eŋ gebe êôc êndaŋguc Jesu.
27 Lau taêsam ŋasec têdaguc Jesu ma lauo, taŋ taêŋ walô eŋ to têtaŋ naŋ, sêwiŋ amboac tonaŋgeŋ.
28 Tec Jesu kêkac tau ôkwi gêdêŋ êsêac ma kêsôm gebe “Jerusalem latuio, ataŋ aê atom, ataŋ taôm to nêm ŋapalê acgom.
29 Alicgac me, têm teŋ oc êmêŋ êsa, go lau sêsôm gebe ‘Aêac aweŋ êôc lauo kapoac to êsêac, taŋ sêkêkam atom naŋ, ma su taŋ gêlôm gêŋ dedec atom naŋ.’
30 Êndêŋ ŋasawa tônê oc lau sêôc aweŋ sa ma sêsôm êndêŋ lôc gebe ‘Au taôm ansac aêac ŋaô,’ ma êndêŋ gamêŋ ŋabau gebe ‘Aŋgênduc aêac auc.’
31 Embe êtap ka matac sa amboac tonec, ma oc êŋgôm ka masê amboac ondocgeŋ.”
32 Ma sêwê ŋac sec luagêc sêwiŋ sêja sebe sênac êsêagêc êndu sêwiŋ Jesu.
33 Sêja e sêô lasê gamêŋ tau, naŋ sêsam sebe “Môkêlac” naŋ acgom, go sêjac eŋ to ŋac sec luagêc sêpi kakesotau, teŋ geŋkaleŋ anôŋa ma teŋ geŋkaleŋ gasêŋa.
34 Ma Jesu kêsôm gebe “Tamoc, ôsuc êsêacnêŋ biŋ ôkwi, gebe sêjam kauc gêŋ, taŋ sêgôm naŋ.” Go êsêac sêpuc kapoac ênê ŋakwê ma sêjac sam.
35 Lau sêkô ma sêlic gêŋ tonaŋ ŋai sêwiŋ. Kasêga têtaŋ pêlê eŋ gebe “Eŋ gêjam lau ŋagêdô sa, ma eŋ embe Kilisi, taŋ Anôtô kêjaliŋ eŋ sa naŋ, go ênam tau sa amboac tonaŋgeŋ.”
36 Ma siŋwaga sêsu eŋ susu amboac tonaŋ ma têtu gasuc eŋ sebe sêkêŋ bu ŋamakic êndêŋ eŋ
37 ma sêsôm gebe “Embe Judanêŋ kiŋ aôm, naŋ ônam taôm samaŋ.”
38 Ma biŋ teŋ gêc eŋ ŋaôŋa gebe “Judanêŋ kiŋ tau tonec.”
39 Ma ŋac sec luagêc, taŋ seŋkaleŋ naŋ, nêŋ teŋ kêsôm biŋ alôb-alôb kêpi eŋ gebe “Aôm tonaŋ oc Kilisi me. Ônam taôm kêsi ma aêagêc awiŋmaŋ.”
40 Go nê ŋac teŋ gêjô eŋ awa jagêc biŋ eŋ gebe “Ŋandaŋ kêpi aêac kêtôm tau, ma aôm tonaŋ kôtêc Anôtô atom me.
41 Aêagêc tec daôc jagêdêŋ, gebe kêtu aêagêcnêŋ biŋ ŋagêjô, mago ŋac tecenaŋ gêgôm gêŋ teŋ keso atom.”
42 Ma kêsôm gebe “O Jesu, taêm ênam aêma êndêŋ taŋ mêŋôtu kiŋ.”
43 Ma Jesu kasôm gêdêŋ eŋ gebe “Biŋŋanô, aê jasôm êndêŋ aôm gebe Ocsalô tonec aôm ômoa ôwiŋ aê aŋga Paradis.”
Jesu gêmac êndu
(Mat 27:45-56; Mar 15:33-41; Joaŋ 19:28-30)
44 Kêdabiŋ gebe oc êkô ŋaluŋ ma gêsuŋbôm gêjam gamêŋ samob auc e gêdêŋ ocmata.
45 Oc ŋawê gêjaŋa ma obo baliŋ, taŋ geŋkaleŋ lôm dabuŋ naŋ, gêŋgic kêsêp ŋaluŋgeŋ.
46 Ma Jesu gêmôêc kapôêŋ gebe “O Tamoc, aê jasakiŋ katuc êndêŋ lêmam êwac.” Kêsôm tonaŋ su ma gêmac êndu.
47 Kapitai tau gêlic e awa gêôc Anôtô gebe “Biŋŋanô, ŋac tonec eŋ ŋac gêdêŋgoc.”
48 Ma lau samob, taŋ mêŋsêkô sebe sêlic gêŋ tau naŋ, sêlic e têtuc bôndagi ma sêc sêmu sêja.
49 Jesunê lau samob to lauo, taŋ têdaguc eŋ aŋga Galilaia sêmêŋ naŋ, sêkô jaêcgeŋ ma sêlic gêŋ tonaŋ samob.
Sêkêŋ Jesu kêsêp sê
(Mat 27:57-61; Mar 15:42-47; Joaŋ 19:38-42)
50 Judanêŋ kasêga teŋ gêmoa, nê ŋaê Josep, naŋ ŋac ŋajam to ŋac gêdêŋ.
51 Eŋ gêlôc sa gêdêŋ biŋ, taŋ êsêac sêsôm to sêgôm naŋ atom. Eŋ aŋga Judanêŋ malac teŋ, ŋaê Arimatia. Ŋac tau gêôŋ Anôtônê gamêŋgeŋ gêmoa.
52 Eŋ gêdêŋ Pilata gêja ma keteŋ Jesunê ŋawêlêlaŋ,
53 jakêkôc su mêŋkêsabaŋ ŋa obo ma ketoc eŋ gêc sêô, taŋ sêsap kêsêp poc naŋ. Tetoc ŋawêlêlaŋ teŋ gêc sê tau su atom tageŋ.
54 Bêc sêmasaŋ tauŋŋa ma sabat kêdabiŋ.
55 Tec lauo, taŋ têdaguc Jesu aŋga Galilaia sêmêŋ naŋ, sêwiŋ Josep jasêlic sêô to kôm tetoc Jesunê ŋawêlêlaŋ ênêcŋa.
56 Go sêmu sêja ma sêmasaŋ gêŋ ŋamalu to ŋalêsi gebe sêniŋ oso ŋawêlêlaŋ. Ma gêdêŋ sabat tau sêlêwaŋ tauŋ kêtôm biŋsu ŋajatu.
Jesu gêdi sa
24
(Mat 28:1-10; Mar 16:1-8; Joaŋ 20:1-10)
1 Gêdêŋ woke ŋabêc ŋamataŋa gêdêŋ bêbêc kanucgeŋ naŋ lauo sejoŋ gêŋ ŋamalu, taŋ sêmasaŋ naŋ, sa sêja sêô
2 e sêlic sêsabi poc su aŋga sêawa.
3 Tec sêsô sêja ma têtap Apômtau Jesu nê ŋawêlêlaŋ sa atom.
4 Lauo tonaŋ taêŋ gêjam jakêsa-jakêsa sêkô e sêlic ŋac luagêc toŋakwê ŋaeb ŋaôma mêŋsêkô sêwiŋ êsêac.
5 Êsêac têtêc tauŋ e sêpô dêducgeŋ sêkô, go êsêagêc sêsôm gêdêŋ lauo gebe “Amboac ondoc asôm mata jali tau aŋga ŋacmatênêŋ.
6 Eŋ gêmoa tonec atom, Anôtô gêŋu eŋ sa su. Taêm ênam biŋ, taŋ eŋ kêsôm gêdêŋ amac gêdêŋ gêmoa Galilaia naŋ
7 gebe ‘Oc sêkêŋ Ŋamalacnê Latu êndêŋ lau sec nêŋ lemeŋ nasênac eŋ êpi kakesotau ma ŋabêc êtu têlêac, go êndi sa.’ ”
8 Lauo taêŋ gêjam ênê biŋ tau tonaŋ,
9 tec sêmu aŋga sêô sêja ma têdôŋ biŋ samob tonaŋ ŋai gêdêŋ ŋacseŋomi 11 to lau ŋagêdô samob.
10 Lauo tau tonec ŋai Maria aŋga Magdala agêc Joana ma Jakobonê têna Maria to lauo ŋagêdô, taŋ sêwiŋ êsêac naŋ, sêsôm biŋ tonaŋ gêdêŋ aposolo.
11 Mago lau tonaŋ sêŋô lauonêŋ biŋ tonaŋ ŋai e amboac sêboaco ma sêkêŋ gêwiŋ atom.
12 Tec Petere gêdi ma kêlêti gêja sêô jakêtuc kêniŋ kêsêp e gêlic obo kwalam-kwalam tau gêc ma gêŋac lêma kêtu gêŋ tonaŋŋa, go gêc gêmu gêja kêtiam.
Ŋac luagêc sêja Emaus
(Mar 16:12-13)
13 Bêc tonaŋgeŋ ma lau tonaŋ nêŋ ŋac luagêc sêja malac teŋ, ŋaê Emaus, naŋ gêc Jerusalem ŋagala, ŋasawa kêtôm ockatu ŋasawa têlêac,
14 ma agêc sêjam biŋ samob tonaŋ ŋai kêtu biŋgalôm gêdêŋ tauŋ.
15 Agêc sêsôm biŋ tau ma sênac mateŋ gêdêŋ tauŋ sêmoa e Jesu tau jagêô lasê ma kêsêlêŋ gêwiŋ êsêagêc,
16 mago agêc mateŋanô kaiŋ teŋ e sêjala eŋ atom.
17 Go Jesu kêtu kênac êsêagêc gebe “Biŋ ondoc tec amagêc ajam kêtu biŋgalôm gêdêŋ taôm amoa intêna nec.” Ma êsêagêc sêpô dêducgeŋ sêkô.
18 Go agêcnêŋ ŋac teŋ, ŋaê Kleopa, gêjô eŋ awa gebe “Aôm ŋac jaba tageŋ tonec, tec gômoa Jerusalem ma kôjala biŋ, taŋ sêgôm aŋga malac gêdêŋ ŋasawa tecenec naŋ atom me.”
19 Go Jesu kêtu kênac êsêagêc gebe “Biŋ amboac ondoc.” Tec êsêagêc sêjô eŋ awa gebe “Biŋ tonaŋ kêpi Jesu aŋga Nasaret. Eŋ propete, taŋ kêsôm to gêgôm nê gêŋ ŋajaŋa, Anôtô to lau samob sêlic.
20 Ma aêacma lau dabuŋsêga to kasêga sêkêŋ eŋ gêdêŋ lau-mêtôcwaga sebe sênac eŋ êndu e sêjac eŋ kêpi kakesotau.
21 Mago aêac tec taêŋ kêka gebe Ŋac tau tonaŋ oc ênam Israel sa. Biŋ tonaŋ mêŋkêsa ma galoc ŋabêc kêtu têlêac.
22 Go aêacma lauo ŋagêdô têtakê aêac gebe bêbêc kanucgeŋ sêja sêô
23 ma têtap ênê ŋawêlêlaŋ sa atom, tec sêmu sêmêŋ ma sêsôm gebe sêlic aŋela seoc tauŋ lasê, naŋ sêsôm gebe eŋ gêmoa mata jali.
24 Tec aêacma lau ŋagêdô sêja sêô ma têtap sa kêtôm taŋ lauo sêsôm naŋgeŋ. Mago ŋac tau tec sêlic eŋ atom.”
25 Go Jesu kêsôm gêdêŋ êsêagêc gebe “Melocagêc, tonêm ŋalêlôm ŋadanigeŋ e akêŋ gêwiŋ biŋ samob, taŋ propete sêsôm naŋ atom.
26 Ŋandaŋ tonaŋ gêjac Kilisi ŋawae gebe êôc, go êkôc nê ŋawasi sa atom me.”
27 Ma eŋ gêwa biŋ, taŋ teto kêpi eŋ naŋ, sa gêdêŋ êsêagêc gêjac m aŋga Mose to propete samob nêŋ.
28 Ac sêsêlêŋ e têdabiŋ malac, taŋ sebe sêna naŋ, ma eŋ gêgôm amboac gebe êôc lêlêc êsêagêc êna.
29 Tec agêc sêsôm sepeŋ ducgeŋ gebe “Ômoa ôwiŋ aêagêcmaŋ gebe kêtula ma oc jakêsêpgac.” Tec eŋ kêsô gêja gebe êŋgôŋ êwiŋ êsêagêc.
30 Gêdêŋ taŋ sêŋgôŋ sêwiŋ tauŋ sebe sêniŋ gêŋ naŋ, Jesu kêkôc polom mêŋgêjam daŋge ma kêpô kêkôc jakêkêŋ gêdêŋ êsêagêc.
31 Ma agêc mateŋanô ŋakêŋkêŋ kêsa e sêjala eŋ su ma malamê.
32 Gocgo agêc sêsôm gêdêŋ tauŋ gebe “Kec, gêdêŋ taŋ eŋ kêsôm biŋ gêdêŋ aêagêc aŋga intêna ma gêwa biŋ, taŋ teto gêc naŋ sa, ma nêŋ ŋalêlôm kepeŋ aêagêc nec atom me.”
33 Ma gacgeŋ dêdi sêmu sêja Jerusalem e têtap êsêac 11 to nêŋ lau ŋagêdô, taŋ sêkac tauŋ sa sêŋgôŋ naŋ sa.
34 Ma lau tonaŋ sêsôm gêdêŋ êsêagêc gebe “Apômtau gêdi sa biŋŋanôgoc, tec geoc tau lasê gêdêŋ Simon.”
35 Go êsêagêc sêjac miŋ biŋ, taŋ kêsa aŋga intêna to sêjala eŋ gêdêŋ kêpô polom kêkôc naŋ, gêdêŋ êsêac.
Jesu geoc tau lasê gêdêŋ nê ŋacseŋomi
(Mat 28:16-20; Mar 16:14-18; Joaŋ 20:19-23; Apos 1:6-8)
36 Sêsôm biŋ tonaŋ sêmoa ma Jesu tau kêsa jakêkô êsêac ŋaluŋgeŋ ma kêsôm gêdêŋ êsêac gebe “Biŋmalô êndêŋ amac.”
37 Mago êsêac têtakê ma têtêc tauŋ ŋanô seboc sêlic ŋalau teŋ.
38 Tec eŋ kêsôm gêdêŋ êsêac gebe “Amboac ondoc tec atakê ma nêm ŋalêlôm ulu-ulu kêtu asageŋŋa.
39 Alic lemoc to ockaiŋ acgom, gebe aê tau tec kakô. Mêŋamoasac aê alic acgom. Ŋalaunê ŋamêsôm to ŋatêkwa amboac alic aŋga aêŋoc nec gêc atom.”
40 Kêsôm tonaŋ ma kêtôc lêma to akaiŋ gêdêŋ êsêac.
41 Êsêac têntac ŋajam gêbôc nêŋ ŋalêlôm auc ma sêkêŋ gêwiŋ atom, sê taêŋ ŋaômageŋ. Tec eŋ kêsôm gêdêŋ êsêac gebe “Amacnêm gêŋ taniŋŋa teŋ gêc tonec me masi.”
42 Ma sêkêŋ i sigob ŋagêdô teŋ gêdêŋ eŋ.
43 Ma eŋ kêkôc su mêŋgeŋ êsêac sêlic.
44 Ma kêsôm gêdêŋ êsêac gebe “Aêŋoc biŋ, taŋ gêŋgôŋ gawiŋ amac ma kasôm gêdêŋ amac naŋ, tonec gebe Biŋ samob. taŋ teto kêpi aê gêc Mosenê biŋsu to propete ma Pesalem naŋ, samob oc êtu tôŋ.”
45 Go gêwa biŋ sa gêdêŋ êsêac e nêŋ kauc jakêsêp biŋ, taŋ teto gêc naŋ.
46 Ma kêsôm gêdêŋ êsêac gebe “Biŋ amboac tonec tec teto gêc gebe Kilisi êôc ŋandaŋ ma êndêŋ bêc êtu têlêac, go êndi sa aŋga ŋacmatênêŋ.
47 Ma ênê lau sênam eŋ laŋô nasênam mêtê lau samuc samob gebe sênam tauŋ ôkwi e êsuc êsêacnêŋ sec ôkwi. Êsêac sênam mêtê sênac m aŋga Jerusalem.
48 Biŋ tonaŋ ŋai ŋasêwa-biŋ-sawaga amac.
49 Alicgac me, biŋ tau, taŋ Tamoc gêjac mata naŋ, oc jakêŋ wacêpi amac. Mago aŋgôŋ malac tonecgeŋ e ŋaclai aŋga lôlôc êkwa amac auc acgom.”
Jesu kêpi undambê gêja
(Mar 16:19-20; Apos 1:9-11)
50 Go gêwê êsêac sêsa Betania sêja e gêôc lêma sa ma gêjam mec êsêac.
51 Gêjam mec êsêac gêmoa e gêwi êsêac siŋ ma Anôtô kêkôc eŋ sa kêpi undambê gêja.
52 Go êsêac sêpôŋ aeŋduc gêdêŋ eŋ ma sêc sêmu sêja Jerusalem kêtiam totêntac ŋajam samucgeŋ.
53 Ac sêmoa lôm dabuŋ sêwi siŋ atom, sêlanem Anôtôgeŋ.
Ŋawae Ŋajam kêtôm
JOAŊ KETO
Ŋawae Ŋajam kêtôm Joaŋ Keto nec gêwa Jesu sa gebe Anôtôŋê Biŋ ênêc teŋgen to teŋgeŋŋa eŋ, taŋ “kêtu ŋamalac mêŋgêmoa nom gêwiŋ aêac”. Teto Ŋawae Ŋajam ŋam buku tau gêwa sa gebe Lau tê sêsam-sêsam nê, sêkên êwiŋ Jesu gebe Kilisi tau, taŋ Anôtô gêjac mata eŋ naŋ, Anôtônê Latu tau ma lau, taŋ sêkêŋ êwiŋ eŋ oc sêŋgôŋ mateŋ jali naŋ (20:31).
Joaŋ Gêjac m nê Ŋawae Ŋajam gêwa Jesu sa gebe Anôtônê Biŋ Tau ênêc teŋgeŋ to teŋgeŋŋa, taŋ ŋaê lulu sêkwa tauŋgeŋ. Eŋ keto gêŋtalô ŋagêdô, taŋ sêwaka Jesu sa gebe Kilisi, taŋ Anôtô gêjac mata naŋ, to Anôtônê Latu eŋ. Go keto gêŋtalô ŋabingalôm, taŋ gêwa biŋ naŋ Anôtô geoc lasê ŋa gêŋtalô tau naŋ, ŋam sa. Buku ŋasêbu tonaŋ gêjac ŋagêdô sêkên gêwiŋ Jesu to têdaguc eŋ ŋamiŋ, mago ŋagêdô sêli tauŋ sa gêdên eŋ ma sêjac jao tauŋ e sêkêŋ gêwiŋ eŋ atom. Jesu to nê ŋacseŋomi sêbiŋ tauŋ tôŋ ŋaŋêŋgosu, tec kêtu awê gêdên gêbêc, taŋ sêkôc eŋ tôŋ naŋ, ma kêpi biŋ, taŋ eŋ kêkêŋ puc to gêjac êsêac têntac tôŋ gêdêŋ taŋ ŋacjo sêjac eŋ kêpi ka ŋanoc kêdabiŋ naŋ. Joaŋ keto biŋ tonaŋ gêc môlêlatu 13-17. Go sêkôc Jesu tôŋ to sêmêtôc ênê biŋ ma sêjac eŋ kêpi ka e gêdi sa to jageoc tau lasê gêdên nê ŋacseŋomi ŋamiŋ naŋ, teto gêc môkêlatu ŋamuŋa.
Joaŋ tec kêwaka biŋ tonec sa gêc awêgeŋ gebe Daŋgôn mateŋ jali ŋam kêsêp Kilisigeŋ. Anôtô gêsuŋ moasiŋ ŋanô gêdên ŋamalac sêkôc ŋaômageŋ. Moasiŋ tau eŋ galocgeŋ gêjac m ma kêkên lau, taŋ sêkêŋ gêwiŋ Jesu gebe intêna to biŋŋanô ma daŋgoŋ mateŋ jali ŋamôkê eŋ naŋ ŋawae (14:6). Go Joaŋnê biŋ taujala teŋ tonec gebe gê dôŋ gêŋ ŋanô undambêŋa kêpi ŋamalacnêŋ gêŋ kêtôm bêcgeŋŋa amboac bu to mo ma ŋawê to gejobwaga to nê domba ma wainmôkê to ŋaŋanô.
Ŋadênaŋ
1. Biŋandaŋ 1:1-18
2. Ŋackêsagu Joaŋ ma Jesunê ŋacseŋomi ŋamataŋa 1:19-51
3. Jesu kêkôc nê sakiŋ sa gêjam mêtê lau gêmoa awêgeŋ 2:1–12:50
4. Jesunê bêc ŋamuŋa aŋga Jerusalem to malac, taŋ gêc malac tau ŋagala naŋ 13:1–19:42
5. Apômtau gêdi sa aŋgaŋaccmatênêŋ ma geoc tau lasê 20:1-31
6. Ŋatêkku gebe Apômtau geoc tau lasê aŋga Galilaia gêwiŋ 21:1-25
Biŋ daŋgôŋ mateŋ jaliŋa
1
1 Anôtô kêkêŋ undambê to nom atomgeŋ naŋ Biŋ tau gêmoa. Biŋ tau tonaŋ gêmoa jagêwiŋ Anôtôgeŋ, ma Biŋ tau naŋ Anôtô tau.
2 Anôtô kêkêŋ undambê to nom atomgeŋ naŋ Biŋ tau gêmoa jagêwiŋ Anôtôgeŋ.
3 Anôtô kêkêŋ gêŋ samob ŋa eŋgeŋ. Eŋ kêkêŋ gêŋ teŋ ŋa eŋ masi nec atom.
4 Mateŋ jali ŋam gêc Biŋ tau ma mateŋ jali tau tonaŋ kêtu ŋamalacnêŋ ŋawê.
5 Ŋawê tau tec mêŋkêpô ŋakesec, mago ŋakesec gêjam auc atom.
6 Anôtô kêsakiŋ ŋamalac teŋ, nê ŋaê Joaŋ.
7 Eŋ gêmêŋ gebe êwa Biŋ sa, gebe êwa ŋawê tau ŋam sa, gebe ŋamalac samob sêŋô ênê biŋ ma sêkêŋ êwiŋ.
8 Ŋac tau tonaŋ ŋawê tau eŋ atom, gêmêŋ gebe êwa ŋawê ŋam sageŋ.
9 Ŋawê ŋanô tau tonec mêŋkêsêp nom e kêpô ŋamalac samob.
10 Eŋ gêmoa nom ma Anôtô kêkêŋ nom ŋa eŋ, mago lau nomŋa sêjala eŋ atom.
11 Eŋ gêmêŋ tau nê gamêŋ, mago nê lau sêkôc eŋ sa atom.
12 Lau taŋ sêkôc eŋ sa to sêkêŋ gêwiŋ eŋ naŋ, tec kêkêŋ ŋaclai gêdêŋ êsêac gebe têtu Anôtônê ŋapalê.
13 Êsêacnêŋ ŋam kêsêp dec to têntac kêkac ma ŋac teŋ kêka lasêŋa atom. Nêŋ ŋam jakêsêp Anôtôgeŋ.
14 Biŋ tau kêtu ŋamalac mêŋgêmoa gêwiŋ aêac. Ma aêac talic ênê ŋawasi, taŋ moasiŋ to biŋŋanô gêjam eŋ auc naŋ, ma ŋawasi tau kêtôm Tama kêkêŋ gêdêŋ Latu tageŋ.
15 Joaŋ gêwa eŋ ŋam sa kêkac awa sageŋ gebe “Ŋac tau, naŋ kasôm ênê biŋ gebe ‘ŋac taŋ êndaŋguc aê êmêŋ naŋ, gêmuŋ aê gebe eŋ kêtu aêŋoc ŋamata.’ ”
16 Aêac samob takôc moasiŋ to moasiŋ aŋga gêŋ, taŋ gêjam eŋ auc samucgeŋ naŋgoc.
17 Anôtô kêkêŋ biŋsu gêdêŋ Mose kêsôm lasê, ma moasiŋ to biŋŋanô kêsa aŋga Jesu Kilisi nê.
18 Ŋamalac teŋ gêlic Anôtô atomanô, Anôtônê Latu tageŋ, taŋ gêŋgôŋ Tama labum naŋ, gêwa eŋ ŋam sa.
Ŋackêsagu Joaŋ gêjam mêtê
(Mat 3:1-12; Mar 1:1-8; Luk 3:1-18)
19 Juda sêsakiŋ lau dabuŋwaga to Lewinê wakuc aŋga Jerusalem dêdêŋ Joaŋ sêja gebe têtu kênac eŋ gebe “Aôm asa.” Ma Joaŋ gêwa biŋ amboac tonec sa
20 ma kêsôm lasê to gêsaŋ biŋ teŋ auc atom, kêsôm lasêgeŋ gebe “Aê Kilisi tau atom.”
21 Tec êsêac têtu kênac eŋ gebe “Amboac ondoc, aôm Elia me.” Ma eŋ kêsôm gebe “Aê eŋ atom.” Tec têtu kênac eŋ gebe “Aôm oc propete tau me.” Tec eŋ gêjô êsêac aweŋ gebe “Masi.”
22 Go têtu kênac eŋ gebe “Aôm asa. Ôsôm acgom gebe awa biŋ sa êndêŋ lau, taŋ sêsakiŋ aêac naŋ. Aôm taôm ôwa taôm sa acgom.”
23 Tec eŋ kêsôm gebe
“Aê ŋac teŋ awa, taŋ gêmôêc gêmoa gamêŋ sawa gebe ‘Amansaŋ Apômtaunê intêna’
amboac propete Jesaia kêsôm.”
24 Go lau, taŋ Parisai sêsakiŋ êsêac naŋ,
25 têtu kênac eŋ gebe “Aôm Kilisi tau atom ma aôm Elia atom, ma aôm propete tau atom, mago amboac ondoc tec kôsagu lau.”
26 Tec Joaŋ gêjô êsêac aweŋ gebe “Aê tec kasagu lau ŋa bugeŋ, ma ŋac tau, naŋ amac ajala eŋ atom naŋ, tec wackêkô amac ŋaluŋgeŋ.
27 Eŋ kêdaguc aê gêmêŋ, ma aê katôm gebe janac pêla ênê atapa ŋalêkôŋ atom.”
28 Biŋ tonaŋ kêsa Betania, naŋ gêc Jordan ŋamakeŋ ônêŋa, gamêŋ taŋ Joaŋ kêsagu lau gêmoa naŋ.
Anôtônê domba
29 Ŋageleŋ Joaŋ gêlic Jesu gêdêŋ eŋ gêmêŋ ma kêsôm gebe “Kec, nê Anôtônê domba, taŋ kêsip ŋamalacnêŋ sec su naŋ, tau tônê.
30 Ŋac tau, taŋ ŋawa eŋ sa gebe ‘Ŋac teŋ êndaŋguc aê êmêŋ, naŋ gêmuŋ aê gebe eŋ kêtu aêŋoc ŋamata.’
31 Aê tec kajala eŋ kwanaŋgeŋ atom, mago Anôtô gebe lau Israel sêlic eŋ, tec aê mêŋkasagu lau ŋa bugeŋ.”
32 Joaŋ gêwa biŋ ŋagêdô sa gebe “Aê galic Ŋalau kêsêp aŋga undambê amboac balôsi mêŋgêmoa gêwiŋ eŋ.
33 Aê tauc tec kajala eŋ kwanaŋgeŋ atom. Mago ŋac, taŋ kêsakiŋ aê gamêŋ gebe jansaŋgu lau ŋa bu naŋ, kêsôm gêdêŋ aê gebe ‘Aôm oc ôlic Ŋalau êsêp mêŋêmoa êwiŋ ŋac teŋ. Ma ŋac tau tonaŋ oc ênsaŋgu lau ŋa Ŋalau Dabuŋ.’
34 Biŋ tonaŋ aê galic, tec gawa sa gebe Anôtônê Latu eŋ.”
Jesunê ŋacseŋomi ŋamataŋa
35 Ŋageleŋ ma Joaŋ to nê ŋacseŋomi luagêc sêmu jasêkô kêtiam
36 e Joaŋ mataanô gêlic Jesu kêsêlêŋ gêmêŋ ma kêsôm gebe “Kec, nê Anôtônê domba.”
37 Ŋacseŋomagêc tau sêŋô eŋ kêsôm biŋ tonaŋ, tec têdaguc Jesu sêja.
38 Jesu kêsa tau ôkwi e gêlic êsêagêc têdaguc eŋ ma kêtu kênac êsêagêc gebe “Amagêc asôm asageŋ.” Ma êsêagêc sêjô eŋ awa gebe “Rabi” (tanam ôkwi gebe Mêtêmôkê), “aôm gôêc ondoc.”
39 Ma eŋ kêsôm gêdêŋ êsêagêc gebe “Amêŋ, mêŋalic.” Tec êsêagêc sêja sêlic gamêŋ, taŋ eŋ gêc naŋ, ma gêdêŋ bêc tonaŋ agêc sêmoa sêwiŋ eŋ. Ma biŋ tonaŋ gêdêŋ oc gebeŋ kwalamgeŋ.
40 Ŋaclagêc taŋ sêŋô Joaŋ kêsôm biŋ tau e agêc têdaguc Jesu sêja naŋ, nêŋ ŋac teŋ tec Simon Petere lasi Andrea.
41 Ŋac tau kêtap têwa Simon sa kêtu ŋamata ma kêsôm gêdêŋ eŋ gebe “Aêagêc atap Mesia tau sa” (tanam ôkwi gebe Kilisi).
42 Go gêwê têwa gêdêŋ Jesu gêja. Jesu mata gê eŋ ma kêsôm gebe “Aôm Joaŋ latu Simon, tasam aôm gebe Kêpa acgom” (tanam ôkwi gebe Petere).
Jesu kêkalem Pilip agêc Natanael
43 Ŋageleŋ Jesu gebe êna Galilaia e gêdac Pilip ma kêsôm gêdêŋ eŋ gebe “Ôndaŋguc aê.”
44 Ma Pilip tau aŋga Andrea agêc Petere nêŋ malac Betsaida.
45 Pilip gêdac Natanael ma kêsôm gêdêŋ eŋ gebe “Ŋac taŋ Mose keto biŋ kêpi eŋ gêc biŋsu to propete teto naŋ, aêac atap eŋ sêŋac. Eŋ Josep latu Jesu aŋga Nasaret.”
46 Ma Natanael kêsôm gêdêŋ eŋ gebe “Gêŋ ŋajam teŋ oc mêŋêsa Nasaret me.” Tec Pilip kêsôm gêdêŋ eŋ gebe “Ômôêŋ ôlic.”
47 Jesu gêlic Nata nael gêdêŋ eŋ gêja ma kêsôm kêpi eŋ gebe “Kec, Israel ŋanô eŋ, biŋdansaŋ teŋ gêc ênê ŋalêlôm atom.”
48 Natanael kêtu kênac eŋ gebe “Gôlic aê aŋga ondoc.” Tec Jesu gêjô eŋ awa gebe “Pilip gêmôêc aôm atomgeŋ, ma aê galic aôm kôkô jambô ŋalabu.”
49 Ma Natanael gêjô eŋ awa gebe “Mêtêmôkê, Anôtônê Latu aôm, Israelnêŋ kiŋ aômgoc.”
50 Go Jesu gêjô eŋ awa gebe “Aê kasôm gêdêŋ aôm gebe Galic aôm kôkô jambô ŋalabu, tec kôkêŋ gêwiŋ aê nec me. Aôm oc ôlic ŋanô ŋagêdô êlêlêc gêŋ tonaŋ su.”
51 Ma kêsôm gêdêŋ eŋ gebe “Biŋŋanô, aê jasôm tobiŋŋanôgeŋ êndêŋ amac gebe Amac oc alic undambê êŋa ma Anôtônê aŋela sêpi sêsêp dêndêŋ Ŋamalacnê Latu.” sêjam ŋaê Petere ôkwi kesep tauŋ aweŋ gebe Kêpa. l
Seŋ awê to ŋac ŋamoasiŋ aŋga Kana
2
1 Ŋabêc kêtu têlêac, go sêsi awê aŋga Kana Galilaiaŋa ma Jesu têna gêmoa gêwiŋ.
2 Ma sêkêŋ jaeŋ gêdêŋ Jesu to nê ŋacseŋomi gêja amboac tonaŋ gebe sêniŋ moasiŋ sêwiŋ.
3 Wain kêpa, tec Jesu têna kêsôm gêdêŋ eŋ gebe “Êsêacnêŋ wain masi.”
4 Ma Jesu kêsôm gêdêŋ eŋ gebe “Awê, aêagêcnêŋ asageŋ ŋagêdô gadêŋ tauŋ. Ŋoc noc mêŋkêsa atom tageŋ.”
5 Go têna kêsôm gêdêŋ sakiŋwaga gebe “Eŋ embe êsôm biŋ teŋ êndêŋ amac, naŋ aŋgôm.”
6 Lau tau nêŋ kupoc buŋa 6 kêkô kêtôm Judanêŋ biŋ sêkwasiŋ tauŋ têtu selecŋa. Ku tau tageŋ ŋalêlôm kêtôm sêsêwa bu bakep luagêc me têlêac êsêpŋa.
7 Tec Jesu kêsôm gêdêŋ êsêac gebe “Asuŋ bu êsêp ku tonaŋ e mêŋêc.” Tec êsêac sêsuŋ bu kêsêp e mêŋgêc poap tageŋ.
8 Go kêsôm gêdêŋ êsêac gebe “Galoc akati ma akôc andêŋ Ŋac-kêsaê-gêŋwaga ana.” Tec êsêac sêkôc sêja.
9 Ŋac-kêsaê-gêŋwaga kêsaê e gêlic bu kêtu wain ma gêjam kauc ŋam. Tageŋ sakiŋwaga, taŋ sêsuŋ bu tau naŋ, tec sêjalagac. Go gêmôêc ŋac-gêjam-awêwaga
10 mêŋkêsôm gêdêŋ eŋ gebe “Lau samob sêkêŋ wain ŋajam lau sênôm gêmuŋ e kêtôm, go sêkêŋ wain ŋaôma kêdaguc. Ma aôm kôgamiŋ wain ŋajam e galoc, go kôkêŋ.”
11 Jesu gêjac m nê gêŋtalô kêpi gêŋ tonaŋ aŋga Kana Galilaiaŋa ma geoc nê ŋawasi lasê, ma nê ŋacseŋomi sêkêŋ gêwiŋ eŋ.
12 Gêgôm gêŋ tonaŋ su, go agêc têna ma lasii to nê ŋacseŋomi sêsêp Kapanaum sêja jasêmoa tonaŋ bec ŋagêdô.
Jesu kêjanda têtulu-gêŋwaga aŋga lôm dabuŋ
(Mat 21:12-13; Mar 11:15-17; Luk 19:45-46)
13 Judanêŋ Pasa kêdabiŋ, tec Jesu kêpi Jerusalem gêja.
14 Aŋga lôm dabuŋ eŋ kêtap sa gebe lau sejoŋ bulimakao to domba ma balôsi gebe lau sênam ôli, ma sêjô-monewaga sêŋgôŋ sêwiŋ.
15 Tec gêjam lêpoa kêtu bôcômbiŋ ma kêjanda êsêac samob to nêŋ domba ma bulimakao aŋga lôm dabuŋ sêsa awê sêja. Go kêsêwa sêjô-monewaga nêŋ mone siŋ ma kêtiŋ tebo piŋpoŋ.
16 Ma kêsôm gêdêŋ lau-têtulu-balôsiwaga gebe “Akôc gêŋ tau sa êsa awê êna. Aŋgôm Tamocnê andu Êtu andu sênam ôli gêŋŋa atom.”
17 Ma nê ŋacseŋomi taêŋ gêjam biŋ, taŋ teto gêc naŋ gebe “Gaim tauc su katu nêm anduŋa.”
18 Tec Juda têtu kênac eŋ gebe “Aôm gôgôm gêŋ amboac tonaŋ, naŋ ôwa taôm sa ŋa gêŋtalô ondoc êndêŋ aêac.”
19 Ma Jesu gêjô êsêac aweŋ gebe “Embe anseŋ lôm dabuŋ tonec su ma oc jakwê sa êtôm bêc têlêac êtiam.”
20 Tec Juda sêsôm gebe “Lôm dabuŋ tecenec sêkwê sêmoa e jala 46 gêjaŋa, ma aôm tonaŋ gobe ôkwê sa êtôm bêc têlêac me.”
21 Jesu kêsôm biŋ lôm dabuŋŋa tonaŋ kêpi tau ôli.
22 Gêdêŋ taŋ Anôtô gêŋu Jesu sa aŋga ŋacmatênêŋ naŋ, nê ŋacseŋomi taêŋ gêjam ênê biŋ tau tonaŋ ma sêkêŋ gêwiŋ biŋ, taŋ teto gêc to biŋ Jesu kêsôm naŋ.
Jesu kêjala lau samob
23 Jesu gêmoa Jerusalem gêdêŋ omsêga Pasa ma gêgôm gêŋtalô lau taêsam sêlic, tec sêkêŋ gêwiŋ ênê ŋaê.
24 Mago Jesu kêkêŋ tau paŋ-paŋ gêdêŋ êsêac atom, gebe kêjala êsêac samob,
25 ma kêpô lêna lau sêwa ŋamalac teŋ ŋam sa êndêŋ eŋŋa atom, gebe eŋ tau kêjala biŋ, taŋ gêc ŋamalacnêŋ ŋalêlôm naŋ.